Matio 2 - Kịrịkẹnị Baịbụl

Ịrụapakapaka Nyọ Wẹrị Ḅo Igoniapụma

¹ Bẹtlihẹm ama mị ḅie ini Jizọs Ḅe yimẹ, Judia sẹ mị ḅie, Hẹrọd ḅe Amanyanaḅọ ḅụ sime sịkị. Ini Ò yi ma ḅọlọka simeogbo, lolia ḍawọnemiapụ ịrụapakapaka nyọ mị ḅụ wẹrị Jerusalẹm ḅomẹ

² se gbelamẹ, “Nde ini yi Juapụ amanyanaḅọ sọḅịa tọkụ ḅe sime nyọ? Wa Oria lolia nwọ ọrịmẹ, ịrụapakapaka nyọ mị ḅụ anị pakaḅo sịkị, se wa ḅo osi se Ọ̀ pịrị-ẹ ḅomẹ.”

³ Amanyanaḅọ Hẹrọd ḅe mịn ḅẹrẹ mị naa sịkị, anị opu ḅụḅalaḅala se ọ̀ pịrịmẹ, anị pịkị ọkọ sime ḅẹḅọ ḅẹḅọ pịrịmẹ Jerusalẹm mị ḅie.

⁴ Ọ̀ tịḅịnị agbamịẹapụma na, Oloko ḍieapụ mamgba na nwọ chịn koḅirima se ini gbelamẹ, “Nde anga ini Kraịst ḅe yi ḅe?”

⁵ Ini nwọ pẹkẹrẹmẹ, “Bẹtlihẹm ama Judia sẹ mị ḅie,” “Anịatịḅị mị ịkịankoroḅọ ḅe gịẹịn ọkụ-ẹ:

⁶ ‘Bẹtlihẹm Judia sẹ mị ḅie, ị́rị́ ngịsị bokatẹịnkẹ Judia ḅie tọrọkọ da opuamama ogboku; anịatịḅị ị́ ḅie anị tọrọkọdaḅọ pakaḅoḅịaye-ẹ anị ị̀ya tomoni Izrẹlapụma datekeremaḅịa ḅọ.’”

⁷ Anị Hẹrọd ḅe ḅọịma ịrụapakapaka nyọ ḅụ wẹrị ḅo igoniapụma chịn, se ini na ịrịaye-ẹ, se inia ḅụ ḅọrọ lolia mị jokoma pakaḅo sịkị mị nwọ nemimẹ.

⁸ Ori ini se Bẹtlihẹm fịrịmamẹ, se tọn ini pịrịmẹ: “Ó mun tọrụkweinma tọkụ ḅe ḍọkị, ómine Ọ̀ ḍọkịḅosa ḅẹḅẹ, ọ́ mịẹse à nemi, mịẹse ị̀rị̀ sọnị mun Ọ̀ tẹkẹḅịa ḅara.”

⁹ Ini mịn mị nwọse pakasomẹ, se ini ateli ḅụ mun-arị sịkị ini lolia mị nwọ ọrịmẹ ini ịrụapakapaka nyọ ḅụ sime se ọrị gbọrịye mị. Se anị inia tọrọkọ ịsụn mun tọkụ ḅe sime nyọ mị ḅụ dachịẹmẹ.

¹⁰ Inia ḅieḅẹlẹḅịa ọkụ ḍiki! Inia ḅie kọkọma opuma ḅẹlẹmẹ, ini lolia mị ọrị sịkị!

¹¹ Ini warị mị ḅie sọmun tọkụ ḅe na nyọngọrọ Meri ma na nwọ ọrị sịkị ini kpẹrẹkị se ọ̀ tẹkẹmẹ. Anịeso ini inia akpa ma finji se ḍiepịrịaye se Ọ̀ pịrịmẹ: goli na, frankịnsẹnsị na, pịkị maah (anị yeḅụrụmaka olo) na.

¹² Tamụnọ Ḅe ḍawọ ḅụ wẹrị inia ḅerijinemẹ na ini ḅarị vinpịkị Hẹrọd ḅe damamunma, anị ini vinpịkị jịn ateli ḅụ ḅọrọ so inia ama mun ye-ẹ.

Mangịso Ijipt Mun Mị

¹³ Ini so ḅọrọ sịkị, Nyanaḅọ Ḅe enjẹlḅọ ọ̀ ḅụ se ḍawọju Josẹf ḅe ḍiemẹ se nwọ ḅẹmẹ, “Sịsẹ se tọkụ ḅe na nyọngọrọma na deki mangị Ijipt mun se anị nyọ ḅụ anga sime ọkịmun àrị ị́ ḅẹ so nwọ ḅẹḅịa sịkị la, anịatịḅị Hẹrọd ḅe ọ̀ tọkụ ḅe ḍọkịḅịa ọ̀ ḅaaḅịa ẹrẹchị.”

¹⁴ Josẹf ḅe sịsẹ se tọkụ ḅe na nyọngọrọma na deki se ḍin ḅụ ini se Ijipt mun mẹ,

¹⁵ anịanga ò sime mun Hẹrọd ḅe fị sịkị nwọ lamẹ. Mịn mị mịẹmẹ, mịẹse Nyanaḅọ Ḅe oria ịkịankoroḅọ ḅe ḅụ ḅọrọ se kọn ọkwẹịn mị ḅo kọkọmaye nwọ sọḅịa ḅara, na “Ijipt ama mị ḅie, àrị ị̀ya Tọkụ Ḅe chịn pakụmaḅomẹ.”

Awọmẹnị Ma Ḅaa Mị

¹⁶ Hẹrọd ḅe ḅo nemi na, ịrụapakapaka nyọ ḅụ wẹrị ḅo igoniapụma epele se ò tisam nwọ ḅẹ sịkị, anị opuma ò ḅụosọmẹ. Ọ̀ kụrọ pịrịmẹ na ini Bẹtlihẹm na anị na kpeki amama na ḅie sime owuapụ awọ mamgba nwọ ḅaa, mama kụra lasa awọ ḅụ ọkị iderima—igoniapụma ḅịpị ḅụ ọ̀ naa lolia mị paka sịkị mị nwọse ḅụ kịẹnma ḅụ.

¹⁷ Mịn ḅara mị ḅụ ịkịankoro Jerimaya ḅe ḍukoye mị ḅo kọkọmaye sọmẹ na:

¹⁸ “Rema ḅie ini owutịḅị ḅie naamẹ, akụ owu nyọ fiema ḅara. Rechẹl ma árịa awọma gose owuaḅẹ; ini á kuḅiekụrọma á ḍụkụkẹ, anịatịḅị inimgba ini fịsam.”

Ijipt Ḅie Ḅụ Vinpịkị So Mị

¹⁹ Hẹrọd ḅe fị ḅọrọ sịkị, Nyanaḅọ Ḅe enjẹlḅọ ḍawọju Ijipt ḅie ọ̀ ḅụ se Josẹf ḅe ḍiemẹ,

²⁰ se nwọ ḅẹmẹ, “Sịsẹ, se tọkụ ḅe na nyọngọrọma na nwọ deki vinpịkị Izrẹl ama mị mun, anịatịḅị tọkụ ḅe ḅaa ḍọkịapụma ini fịsam.”

²¹ Anị Josẹf ḅe sịsẹ, se tọkụ ḅe na nyọngọrọma na nwọ deki vinpịkị Izrẹl munye-ẹ.

²² Josẹf ḅe ḅo naamẹ na Akịlọs ḅe ḍawu Hẹrọd amanyanaḅọ ḅe, kiri ḍinma Judia daḅẹ nwọ ḅẹ sịkị, Josẹf ḅe ọ̀ ḅalafamẹ mun anị nyọ ḅụ anga. Ọkụma ini ḍawọju ọkwẹịn kọn ọ̀ pịrịsa ḅara ḅụ, ò so Galili pẹkẹrẹ mị nwọ mun mẹ,

²³ se mun Nazarẹt nwọ chịn ama mị se oria anga nyọ mịẹmẹ. Ọ̀ mịn mị mịẹmẹ, mịẹse ịkịankoroapụma ḍukoye ma ḅo kọkọmaye sọḅịa ḅara na: “Ini Nazarẹtḅọ nwọse Ọ̀ chịnḅịa.”