Matio 17 - Kịrịkẹnị Baịbụl

Pịkịḍinma Mị

¹ Sonio-a ḍin ḅọrọ sịkị, Jizọs Ḅe Pita ḅe na Jems ḅe na Jọn ḅe na nwọ ọkị Ọ̀ ḅụ chụa se inia tọrọkọ ịsụn gbọrị gele tụndụ nwọ tanjị mun ngẹrị anị nyọ simemẹ.

² Ini ḍikiḅịa sịkị, Jizọs Ḅe Ọ̀ pịkị ḍinmasam: Ọ̀ tọrụkuḅu ịrụa mị ḅịa ọkụ ḅịamẹ, Oria ḅụchụayema nwananị nwananị ma ḅịaḅẹ.

³ Anịsịkị ini Moziz ḅe na Ịlaịja ḅe na nwọ ọrịmẹ ini Jizọs Ḅe na ọkwẹịn aḅẹ.

⁴ Anị Pita ḅe nwọse Jizọs Ḅe ḅẹye-ẹ, “Nyanaḅọ, anị iḅimẹ na wa mịnyọ sime! Ị́ ḅụḅẹlẹḅịa ọkụma, à mịanga tẹrẹ-a ikowarị nwọ namaḅịa, gbọrịye sime Ị́ pịrị, gbọrịye sime Moziz ḅe pịrị, gbọrịye pịkị sime Ịlaịja ḅe pịrị.”

⁵ Ori ọkwẹịn àrịogbo, ḅiarị soḅuno ḅo ini gbẹịnmẹ, se pụkọ soḅuno mị ḅie pakaḅo se nwọ ḅẹmẹ, “Ḅe anị ị̀ ḅụ yela Tọkụ Ḅe-ẹ, Oria mịẹmịẹye opuma ị̀ ḅụḅẹlẹmẹ—ómine Ò poki!”

⁶ Ọḅụḍukoapụma pụkọ mị naa sịkị, inia ḅalafa so ọkụma ini inia tọrụma se kiri iḅomẹ.

⁷ Jizọs Ḅe ini damaḅomẹ, se ḅara se ini lama, se nwọ ḅẹmẹ, “Ọ́ sịsẹ, ọ́ ḅalafama!”

⁸ Anị ini tọrụ dekichịẹmaye-ẹ, se ini ḅarị jịnḅọ ọrịkẹ, Jizọs Ḅe sikima.

⁹ Ini tụndụ mị ọgọnọ koroḅo sịkị, Jizọs Ḅe inia ḅeri jinemẹ na, “Ómine ọrị elekima mị ó ḍuko gbọrịḅọ sọ pịrịma, ọkịmun ini fị ḅụ Tomoniḅọ Tọkụ Ḅe nwọ sịsẹmaḅịa sịkị la.”

¹⁰ Anịsịkị ọḅụḍukoapụma Jizọs Ḅe gbelamẹ, “Nde Oloko ḍieapụma gose ḅẹye, na Ịlaịja ḅe tatarị ḅoḅịa?”

¹¹ “Ịlaịja ḅe ọ̀ kọkọma tatarị ḅoḅịa,” Jizọs Ḅe nwọ pẹkẹrẹmẹ, “Ọ̀ pịkị yegoyegoye nwọ karakaramaḅịa.

¹² Ọkụma à ḍuko ọ́ pịrịaḅẹ na Ịlaịja ḅe ọ̀ kọkọma tatarị ḅosam, ọkụma tomonima ini ò nemikẹ, se inia ḅụḅẹlẹ ḅara nwọse ọ̀ mịẹsam. Anị gbọrị ḅara mị ini pịkị se Tomoniḅọ Tọkụ Ḅe mịẹ simaḅịa ọkụ-ẹ.”

¹³ Anịsịkị mị ọḅụḍukoapụma kaịnḅoye-ẹ, na Jọn Mengisaraḅọ ḅe ḅẹrẹ mị ò ḍuko ini pịrịarịye-ẹ.

Jizọs Ḅe Sitẹmẹ Ḅie Sime Owutọkụ Gwọmẹ

¹⁴ Ini vinpịkị tomonikpo mị damaḅo sịkị, gbọrị owuḅọ Jizọs Ḅe damaḅomẹ, Ọ̀ tọrọkọ kpẹrẹkị koro,

¹⁵ se nwọ ḅẹmẹ, “Nyanaḅọ, ị̀ya tọkụ ḅe ḍikiḅụgerere! Jine obi ọ̀ nwọ kọn aḅẹ, anị opuma ḅalafamamẹ. Tọn-a sịkị ḅụ ò sokoro fịnị ḅie anịkanịka mengi ḅie korokoromẹ.

¹⁶ Àrị ori ọkị ị́ya ọḅụḍukoapụma damaḅomẹ, ọkụma ini ineda ọ̀ gwọkẹ.”

¹⁷ Jizọs Ḅe nwọ pẹkẹrẹmẹ, “Ó ḅereni nyanakẹ pịkị mịẹirimarị ọkụ ḍiki! Àrị ómine na sime mun nde sịkị la ḅe? Àrị ómine inema mun nde sịkị la ḅe? Tọkụ ḅe ọkịḅo ị̀ pịrị mịanga!”

¹⁸ Jizọs Ḅe ḅẹrẹtọn sitẹmẹ ḅe pịrịmẹ, se ọ̀ paka somẹ, anị gbọrị kirikiri ọ̀ ḅụ iḅimẹ.

¹⁹ Anị ọḅụḍukoapụma ḅọịma Jizọs Ḅe damaḅo se ò gbelaye-ẹ, “Nde wa gose ineda sitẹmẹ ḅe desinkaye?”

²⁰ Jizọs Ḅe nwọse ini pẹkẹrẹmẹ, “Ọ́mịna ḅereni boka gose-ẹ. À ḍuko kụrọma ọ́ pịrịaḅẹ, na ọ́mịna ḅereni nemikase ḍụḅa fịnyọtẹịn mọstad mgbọlụ na gbasị ọkụma, ómine ineda mị chịngị mị ḅẹḅịa, ‘Mịanga koroma so se anịnyọ mun!’ anị pịkị munḅịa. Ómine ineda yegoyegoye mịẹḅịa!

²¹ [Ọkụma tẹkẹ na ḅuruseḅụḅaama na kẹngẹ mị ineda mịn mị mịẹḅịaye-ẹ; jịnye ineda anị mịẹ ẹkẹ.”]

Jizọs Ḅe Pịkị Oria Fị Mị Ḍukomẹ

²² Ọḅụḍukoapụ mamgba koḅirima Galili ḅo sịkị, Jizọs Ḅe nwọse ini ḅẹmẹ, “Ḅọlọka sịkị ini Tomoniḅọ Tọkụ Ḅe nwọ ḅọrọma tomonima pịrịḅịa,

²³ se ini Ọ̀ ḅaaḅịa ọkụma tẹrẹ-a ḍin karamaḅịa ene ḅụ, Ọ̀ fịḅụsịsẹḅịa.” Anị opuma ọḅụḍukoapụma kururumamẹ.

Oputẹkẹwarị Mị Ḅe Igbiki Ocho Mị

²⁴ Jizọs Ḅe na ọḅụḍukoapụma na ḅo Kapanịọm ama mị nwọ lasịkị, Oputẹkẹwarị igbikiocho apụma Pita ḅe damaḅo se ò gbelamẹ, “Ọ́mịna yeḍieḅọ ḅe Oputẹkẹwarị igbiki ori ocho-ochoka?”

²⁵ Pita ḅe nwọse ini pẹkẹrẹmẹ, “Ori ocho-ochomẹ.” Pita ḅe warị mị ḅie sọmun sịkị, Jizọs Ḅe tarị ọkwẹịn Pita ḅe pịrịmẹ, nwọ ḅẹ na, “Saịmọn, nde ị́ kuḅie? Tụḅọ amaigbiki ocho se sẹkiri mị ḅe amanyanapụma pịrịpịrị? Sẹ mị ḅie apụ mọnọ se igoniapụ?”

²⁶ Pita ḅe nwọ pẹkẹrẹmẹ, “Igoniapụma-ẹ, iḅimẹ.” Jizọs Ḅe nwọ pẹkẹrẹmẹ, “Anịọkụma,” “anị mị fieaḅẹ na sẹ mị ḅie apụma ini ocho ẹkẹ.

²⁷ Ọkụma wa mịna tomonima ḅụosọḅịaye nwọ mịẹ ḅikẹ. Anịẹrẹchị tọrụ aka mun se arị wakị koroma. Se ị́ tatarị kunḅịa inji ḅe nwọ jine pakụmaḅo, ọ̀ ḅịpị ḅie ị́ igbiki ọrịḅịa se ị̀rị̀ na ị́rị́ na tịḅị ḅụ Oputẹkẹwarị igbiki mị ocho.”