Matio 14 - Kịrịkẹnị Baịbụl

Jọn Mengisaraḅọ Ḅe Ḅe Fị Mị

¹ Anịsịkị mị Hẹrọd, Galili ama mị ḅie ḅẹrẹtọnḅọ ḅe, Jizọs Ḅe gbolomaye nwọ naaye-ẹ.

² “Ḅe kọkọma Jọn mengisaraḅọ ḅe-ẹ, ò vinpịkị ḅo ḍumosam,” ọ̀ nwọ ḍuko oria fịrịtịḅịnịma pịrịmẹ. “Anị mị ò gose kụrọ nyana se maa ḅụbuama fịrịma nwẹngịarịye-ẹ.”

³ Anịatịḅị Hẹrọd ḅe tarị kụrọpịrịsam na ini Jọn ḅe nwọ kun, ọ̀ fịna, se ò se ikoliwarị ḅie chu. Hẹrọdịas, numbireowu Filip ḅe tarọ ma gose ọ̀ mịn mị nwọ mịẹmẹ.

⁴ Anịatịḅị Jọn Mengisaraḅọ ḅe ḅalafaka ḅụ ḍuko Hẹrọd ḅe pịrịmẹ na, “Anị kurakẹ ị́ mbire ḅe tarọ Hẹrọdịas ma na sime!”

⁵ Hẹrọd ḅe ḅimẹ ori ọ̀ ḅaa, ọkụma ò Juapụma ḍikiḅalafamẹ, anịatịḅị ịkịankoroḅọ ḅara ini nwọse Jọn ḅe ọkịmẹ.

⁶ Ini Hẹrọd ḅe yi ene mị se ḅiekoroma ḅụ, Hẹrọdịas ḅa ma koḅirima ogbo mị tọrọkọ sime sẹkịmẹ. Anị Hẹrọd ḅe ḅieḅẹlẹma so ọkụma

⁷ ye ḅereni á pịrị ḅụ, ọ̀ nwọ ḅẹmẹ, “À yekarịfịmẹ na ị́ ḅi ye goyegoye à se ị́ pịrịḅịa!”

⁸ Nyọngọrọ ma ḍuko á pịrị ḅara ḅụ árị ọ̀ ḅara ḅimẹ na, “Mị nyọ ḅụ gbọtụḅara Jọn, Mengisaraḅọ ḅe, tịḅị se ẹfẹrẹ ḅie chụa ḅo ị̀ pịrị!”

⁹ Amanyanaḅọ ḅe ò ḅieḅẹlẹkẹ nwọḅẹ sọnị, ọ̀ chịn ḅo igoniapụ mamgba tọrọkọ ò ḅereni á pịrị ḅara mị gose, ọ̀ kụrọ pịrịmẹ na á ḅi ḅara mị ini nwọ mịẹ á pịrị.

¹⁰ Anị mịẹse ọ̀ kụrọ pịrịmẹ se ini ikoliwarị ḅie Jọn ḅe tịḅị pẹlẹmẹ.

¹¹ Tịḅị mị ini nwọse ẹfẹrẹ ḅie chụa anị ọkịḅo tọkụ ma pịrịmẹ, árị anị ọkịmun nyọngọrọma pịrịmẹ.

¹² Jọn ọḅụḍukoapụma ḅo, se oria oju mị ọkịmun, se anị ḍipimẹ; anịeso ini mun ḍuko Jizọs Ḅe pịrịmẹ.

Jizọs Ḅe Fịye Se Owuapụ Oyimaịn Ẹndẹ Oyiasi Fịnjị Nwọ pịrịmẹ

¹³ Jizọs Ḅe Jọn ḅe ḅẹrẹ mị naa sịkị, ori arụ ḅie wẹrị anị nyọ mị koromasomẹ, se mun ngẹrị kpọngọlọma gbọrị anga simemẹ. Tomonima anị naamẹ, se inia amama koromaso, se kiri ọgọnọ ḅụ ḅọrọ ò ḍukoma mun mẹ.

¹⁴ Jizọs Ḅe arụ mị ḅie koroḅo sịkị, ọ̀ ḅaka tomonikpo nwọ ọrịmẹ, ori ini ḍikitịḅịfoinmẹ, se ori obiapụma nwọ gwọmẹ.

¹⁵ Anị saso mị ḅụ Oria ọḅụḍukoapụma Ọ̀ damaḅo se nwọ ḅẹmẹ, “Sịkị mị opuma fasam, mị pịkị gbọn nyọ-ẹ. Tomonima ḅẹ ini so ịwọamama ḅie mun, ini fịḅịa fịye fẹ inia ḅụ pịrị.”

¹⁶ Jizọs Ḅe nwọ pẹkẹrẹmẹ, “Ini soḅịa ọkụ ofori-ẹ, ómine ini fịḅịaye nwọse ini pịrị!”

¹⁷ Ini nwọ pẹkẹrẹmẹ, “Wa bebema mịnyọ nyanaye, anị fịturu sọnọ-a okpokpo na mama inji na-ẹ.”

¹⁸ Jizọs Ḅe nwọse ini ḅẹmẹ, “Anịọkụma ómine àrị ọkịḅo ị̀ pịrị mịanga.”

¹⁹ Ò tomonima ḅẹmẹ na ini osueinma ọgọnọ sime; anịsịkị ọ̀ fịturu sọnọ-a okpokpoma na mama injima na nwọ ọkịmẹ, tọrụ deki so ḍiki, se mịẹḅaka se Tamụnọ Ḅe ḅẹmẹ. Ọ̀ fịturu okpokpoma pumẹ, se àrị seni ọḅụḍukoapụma pịrịmẹ, se ọḅụḍukoapụma àrị ḍiama tomonima pịrịmẹ.

²⁰ Ọrụ ḅọḅọ fị iniḅọ ḅụlọ ḅeinma pịkị kọnmẹ. Anịsịkị ọḅụḍukoapụma kọnyema ḅụ oyimaịn kana fịnjị nwọ tan ḅeinmamẹ.

²¹ Anị fị owuapụ ḅe kịẹnḅịpị kịnị-a oyimaịn ẹndẹ oyiasi fịnjị pembe ye nwọ lamẹ, eremeni na awọmẹnị na kịẹnka ḅụ.

Jizọs Ḅe Mengi Ọgọnọ Nwẹngịmẹ

²² Anịsịkị Jizọs Ḅe mịẹse oria ọḅụḍukoapụma arụ ḅụkụlọ tatarị ò koromaso ísí pẹkẹrẹ mun mẹ, ò tomonima mịẹse ini so àrị sịkị ḅụ.

²³ Ò tomonima nwọ mịẹse ini so fama sịkị, ori iwo gbọrị chịngị ọgọnọ mun se ngẹrị anị nyọ sime tẹkẹmẹ. Saso ḅiri ḅụ, Jizọs Ḅe ngẹrị anị nyọ ḅụ kọnmẹ;

²⁴ mị sịkị mị ḅụ, arụ mị iḅiọkụ ḍapa mị ḅie sọmun lamasam, amburama anị se gbinma gbinma ḅọrọaḅẹ, anịatịḅị fọrụ mị anị ini na tụḅụrụmẹ.

²⁵ Ḅaso ḅie inein-a so ḅiri ḅụ Jizọs Ḅe mengi ọgọnọ nwẹngị ọḅụḍukoapụma damaḅomẹ.

²⁶ Ọḅụḍukoapụma Ò mengi mị ọgọnọ nwẹngịarị ḅara mị nwọ ọrị sịkị, inia ḅalafamẹ. Ini nwọ ḅẹmẹ, “Anị tẹmẹ-ẹ!” se ḅalafa ḅụ olokumẹ.

²⁷ Jizọs Ḅe kirikiri ọkwẹịn ini pịrị se nwọ ḅẹmẹ, “Ó kuḅie kụrọma! Ị̀rị̀-ẹ, ọ́ ḅalafama!”

²⁸ Pita ḅe Ọ̀ pẹkẹrẹ se nwọ ḅẹmẹ, “Nyanaḅọ, kọkọma se Ị́rị́-ẹ ḅẹḅẹ, kụrọ se ị̀ pịrị à se mengi ọgọnọ ḅụ Ị́ damaḅo.”

²⁹ “Ḅo!” Jizọs Ḅe nwọse ọ̀ pẹkẹrẹmẹ. Anị Pita ḅe arụ mị ḅie koro se sakị mengi ọgọnọ nwẹngị Jizọs Ḅe damamunye-ẹ.

³⁰ Ọkụma ori opu fọrụ mị ọrị sịkị, ọ̀ ḅalafamẹ anị ọ̀ sakị jịkẹ mengi ḅie sọ aḅẹ. “Ị̀ ḍụaḅọrọma, Nyanaḅọ!” ori olokumẹ.

³¹ Anị kirikiri Jizọs Ḅe ọ̀ ḅara ịsụn pakụma se ori ọlọ kụrọma, se nwọ ḅẹmẹ, “Ị́ nyana ḅereni boka ọkụ ḍiki! Cheye gose ị́ kuḅie jinejine-ao?”

³² Ini mamapụma arụ mị ḅụkụlọmẹ, se fọrụ mị yawụmẹ.

³³ Arụ mị ḅie sime ọḅụḍukoapụma kpẹrẹkị Jizọs Ḅe tẹkẹmẹ, nwọ ḅẹmẹ, “Kọkọmaye-ẹ ị́rị́ ma anị Tamụnọ Tọkụ Ḅe-ẹ!”

Jizọs Ḅe Gẹnẹsarẹt Ḅie Obiapụ Gwọmẹ

³⁴ Ini ḍapa mị saḅa koro se ḅo Gẹnẹsarẹt ama mị nwọ lamẹ.

³⁵ Tomonima Jizọs Ḅe nwọ lekiri ḅo sịkị, ini anị nyọ kelema amama ḅie sime obiapụma fịrịmaḅo Jizọs Ḅe pịrịmẹ.

³⁶ Ini Ọ̀ tẹkẹmẹ na jịnyeka sọnị Ò ḅereni obiapụma pịrị, ini pa ḅara se Oria ḅụchụaye akasịkị mị nwọ lama; se ḅara se anị lama apụ mamgba inia ḅụ iḅimẹ.