Matio 13 - Kịrịkẹnị Baịbụl

Yeḍipiḅọ Ḅe Kaḅo Mị

¹ Anị gbọrị ene mị ḅụ Jizọs Ḅe warị mị koromaso, se tọrụ aka nwọ mun mẹ, anịanga Ọ̀ kpọnjị sime se yeḍiemẹ.

² Ò gbori kelema tomonikpo mị ḅaka so ọkụma Ọ̀ gbọrị arụ nwọ ḅụkụlọ se anịa ḅie kpọnjị simemẹ, tomonikpo mị tọrụ mị aka sịkị chịẹ sime waraḅẹ.

³ Ọ̀ kaḅo ḅụ tọn-aye nwọ ḍuko ini pịrịmẹ, nwọ ḅẹ na: “Gbọrịḅọ mun ịpịamgba ḍipi-e mun mẹ.

⁴ Ori ozu mị ḅie ḍipiyemgbọlụma wasamarị sịkị, arịa ḅụ tọn-aye ateli akaḅụ koromẹ, se fenima ḅo àrị gbọ fịmẹ.

⁵ Arịa ḅụ tọn-aye ḍụparị kiri ḅụ koromẹ, fịye pakụma onwun ḅakaka nyọ ḅụ. Ḍipiyemgbọlụma sakị ḅịpị tolumamẹ, ọkụma fịye pakụma onwun mị ḅakakaye gose.

⁶ Ịrụa mị ḅịa pakaḅo sịkị, anị ịwọma sẹnịarị ḍipiayema nwọ samịnamamẹ, se kunoma iḅiọkụ ma kiri ḅie sọkaye gose ḍipiayema ḅọlọka fịfamẹ.

⁷ Ḍipiyemgbọlụma ḅụ tọn-aye ịga ḅie koromẹ, àrị sopaka sịkị, ịgama àrị temi ḅaamẹ.

⁸ Ọkụma ḍipiyemgbọlụma ḅụ tọn-aye iḅi kiri ḅụ koromẹ, se mgbọlụ chụamẹ: tọn-aye mgbọlụ-a sọnọasi nwọ chụamẹ, tọn-aye tesi, tọn-aye soi.”

⁹ Kuluma mị ḅụ Jizọs Ḅe nwọ ḅẹmẹ, “Ị́ ḅeri nyanamẹ ḅẹḅẹ, poki.”

Kaḅo Ma Gose Kọn Ye

¹⁰ Anịsịkị ọḅụḍukoapụma Jizọs Ḅe damaḅo se Ò gbelamẹ, “Cheye gose Ị́ kaḅo kọnkọn Ị́ ọkwẹịn tomonima pịrịarị sịkị?”

¹¹ Jizọs Ḅe ini pẹkẹrẹmẹ, “Se soḅie Amanyanakiri mị ḅe ḅọị ayema ḍawọḅịa nemi ini nwọse ọ́ pịrịsam, ọkụma mà ini se ini pịrịkẹ.

¹² Anịatịḅị nyanasa ḅọ ḅe ini pịkị nwọ pịrịtẹịnḅịa, mịẹse ọ̀ nyana ḅakamatẹịnḅịa ḅara, ọkụma nyanaka ḅọ ḅe, ọ̀ kịẹnma nyana kalaye mị sọnị ọ̀ ḅara ini ọkịḅịa.

¹³ À gose kaḅo ḅụ ọkwẹịn kọn ini pịrịarịye, anịatịḅị ini ḍikiaḅẹ, ọkụma ini ọrịye ofori-ẹ, ini pịkị pokiaḅẹ, ọkụma ini naaḅoye ofori-ẹ, ini pịkị kaịnḅokẹ.

¹⁴ Ini gbolomaye ḅụ Aịzaya ḅe koro ịkịan mị ḅo kọkọmaye sọmẹ na: ‘Ó poki nweniḅịa, ọkụma ọ́ kaịnḅo ẹkẹ; ó ḍiki nweniḅịa, ọkụma ómine ọrịẹkẹ,

¹⁵ anịatịḅị inia kuḅiema be yekaịnḅokẹ, ini pịkị inia ḅerima inikimasam pịkị inia tọrụmgbọlụma nwọ gbẹịnsam. Anịka ọkụma, inia tọrụmgbọlụma mgbọkụ ye ọrịsam, inia ḅerima sọ ye naasam, inia kuḅiema sọ yekaịnḅosam, se ini vinpịkị ị̀ damaḅoḅịa, Tamụnọ Ḅe nwọ ḅẹmẹ, se àrị ini gwọḅịa.’

¹⁶ “Ọkụma, ọ́mịna tọrụmgbọlụma ḅẹlẹmasaye-ẹ, anịatịḅị àrị ye ọrịmẹ, ọ́mịna ḅerima pịkị ye naamẹ!

¹⁷ À ḍuko ọ́ pịrịaḅẹ, tọn-a ịkịankoroapụ na, tọn-a Tamụnọ-a tomoni na opuma ḅimẹ ómine ọrịayema nwọ ọrị, ọkụma ini inedakẹ, pịkị ọ́ naaye ma nwọ naa, ọkụma ini naakẹ.

Jizọs Ḅe Yeḍipiḅọ Ḅe Kaḅo Mị Fieye Nwọ Ḍukomẹ

¹⁸ “Anịọkụma, ó poki, se yeḍipiḅọ ḅe kaḅo mị fieye ọ́ nwọ ḍawọ.

¹⁹ Amanyanakiri mị ḅe oku mị naa se anị kaịnḅokapụma, ateli ogbo koro ḍipiyemgbọlụma simeọkụ anị ini simeọkụ-ẹ. Si Ḅọ ḅe ḅo ini se inia ḅie ḍipiye mị nwọ sin ọkịmẹ.

²⁰ Ḍụparị kiri ọgọnọ koroayema, anị ḅieḅẹlẹ se oku mị daọkị apụma-ẹ, ini anị naa kirikiri.

²¹ Ọkụma anị gbunma inia ḅie sọmunkẹ, àrị pịkị sime ḅọlọsịkị lakẹ. Oku mị gose ḅụfụka na ḅụọchụa na ḅo anịa ḅie sọ paka sịkị, kirikiri ini saḅama anịa ḅụ ḅarasinmẹ.

²² Ịgama ḅie koro mgbọlụma anị oku mị naa apụma-ẹ, ọkụma mịn ḍumo mị ḅe ḅụḅalaḅalama na, ngọ ḅẹlẹma na, àrị temimẹ, se àrị ḅarị mgbọlụ chụakẹ.

²³ Iḅi kiri ḅụ ḍipiyemgbọlụma anị oku mị naa se anị kaịnḅoapụma-ẹ: ini chịnmgbọlụ chụamẹ, tọn-aye sọnọasi chụamẹ, tọn-aye tesi, tọn-aye pịkị soi.”

Fịye Ḅa Osuein Ma Kaḅo Mị

²⁴ Jizọs Ḅe jịn kaḅo kọn ini pịrịmẹ: “Soḅie Amanyanakiri mị iḅi ḍipiyemgbọlụ se iniḅọ ozu ḅie ḍipi ḅọ ọkụ kịkẹmẹ.

²⁵ Ọkụma ḍin ogbo, nwenimgba mọnọarị sịkị, ori na tarakaḅọ ḅe mun fịye ḅaa osuein ḍipimẹ ịpịamgbama ḅie, se nwẹngị somẹ.

²⁶ Ḍipiayema sẹnị se ịpịamgbama ọrụtọn-arị sịkị ḅụ, fịye ḅaa osueinma sọnị arịa ḅụ ḍiepakụmamẹ.

²⁷ Tomoniḅọ ḅe oria fịrịnwẹngịapụma ọ̀ damaḅo se nwọ ḅẹmẹ, ‘Tịḅịnịḅọ, iḅi ḍipiyemgbọlụ mị ị́ se ị́ya ozu ḅie ḍipiye anịka, nde fịye ḅaa osueinma wẹrị ḅo anga?’

²⁸ ‘Tarakaḅọ ḅe mị, mịn mị mịẹye-ẹ,’ ọ̀ nwọse ini pẹkẹrẹmẹ. ‘Anị iḅi ẹka wa mun fịye ḅaa osueinma nwọ burasin?’ Ini nwọse ò gbelamẹ.

²⁹ ‘Ẹn-ẹn,’ ọ̀ nwọ se ini pẹkẹrẹmẹ, ‘Anịatịḅị ó fịye ḅaa osueinma nwọ koḅiriḅịa sịkị, ómine ịpịamgbama sọ nwọse chụa burasinḅịa.

³⁰ Ye ịpịamgbama na fịye ḅaa osueinma na gboloma sopaka, mun sokusịkị mị la. Anịsịkị à ḍuko sokusịkị fịrịnwẹngịapụma pịrịḅịa, ọ́ tatarị fịye ḅaa osueinma koḅiri pakụmaḅo, se àrị se poku-poku ḅụ fịna dọkịmaḅịa ḅara ḅụ, anịsịkị ómine ịpịamgbama koḅirima ị̀ya ye wẹrị nyọ mị ḅie chụa.’”

Bokatẹịn Ḍipiyemgbọlụ Kaḅo Mị

³¹ Jizọs Ḅe jịn kaḅo kọn ini pịrịmẹ: “Soḅie Amanyanakiri mị mịn anị kịkẹye-ẹ. Gbọrị owuḅọ bokatẹịn ḍipiyemgbọlụ nwọse oria ozu ḅie ḍipimẹ.

³² Ḍipiyemgbọlụma ḅụ anị ma bokatẹịnmẹ, ọkụma anị sẹnị paka sịkị, chịn mamgba ḅụ anị ḍụḅatẹịnmẹ. Anịḅo eje sọmẹ, se sotọrụ fin-arị fenima ḅo anịa ịkpangịma ọgọnọ ḅụ arịa warịma namamẹ.”

Fịturu-sumaye Kaḅo Mị

³³ Jizọs Ḅe pịkị jịn kaḅo kọn ini pịrịmẹ, “Soḅie Amanyanakiri mị, mịn anị kịkẹ ọkụ-ẹ. Eremeniḅọ fịturu-sumaye nwọse fịlawa akpa na gwamẹ, anị mịẹsosịkị fịlawa mị mgba suḅeinmẹ.”

Jizọs Ḅe Kaḅo Ma Se Mịẹye

³⁴ Jizọs Ḅe kaḅo ḅụ maye mamgba ḍuko tomoni ogbo mị pịrịmẹ, kaḅo ḅụ sikima ò ḍuko ini pịrị aye ḅarị ofori-ẹ.

³⁵ Ọ̀ mịn mị nwọ mịẹmẹ mịẹse ịkịankoroḅọ ḅe ḍukoye mị ḅo kọkọmaye nwọ sọḅịa ọkụ, “À kaḅo kọnḅịa àrị ọkwẹịn ini pịrịḅịa sịkị; Tomonikiri mị sakị sịkị ngịsị tomonima nemikayema à nwọ ḍuko ini pịrịḅịa.”

Jizọs Ḅe Fịye Ḅa Osuein Kaḅo Mị Fieye Nwọ Ḍukomẹ

³⁶ Anịsịkị Jizọs Ḅe tomonikpo mị wẹrịso se gbọrị warị ḅie nwọ sọmẹ, oria ọḅụḍukoapụma Ọ̀ damaḅo se nwọ ḅẹmẹ, “Ozu mị ḅie sime Fịye Ḅaa osuein kaḅo mị fieye nwọ ḍuko wa pịrị.”

³⁷ Jizọs Ḅe ini pẹkẹrẹmẹ, “Iḅi ḍipiyemgbọlụma ḍipi ḅọ ḅe anị Tomoniḅọ Tọkụ Ḅe-ẹ;

³⁸ ozu mị anị sẹkiri mị-ẹ, iḅi ḍipiyemgbọlụma anị sime soḅie Amanyanakiri mị pịrịapụma-ẹ; fịye ḅaa osueinma anị sime si ḅọ ḅe pịrịapụma-ẹ;

³⁹ fịye ḅaa osueinma ḍipi tarakaḅọ ḅe anị Oru ḅe-ẹ. Soku sịkị mị anị mị ḅụọ mị ḅe kuluma mị-ẹ, soku sịkị mị ḅe fịrịnwẹngịapụma anị enjẹlapụma-ẹ.

⁴⁰ Fịye ḅaa osueinma ini nwọ kolokolo fịnị ḅie chụa dọkịma ḅara mị, anị anị simeḅịa ọkụ-ẹ mị ḅụọ mị ḅe kuluma ene ḅụ:

⁴¹ Tomoniḅọ Tọkụ Ḅe oria enjẹlapụma Ọ̀ nwọ fịrịma pakụmaḅịa, se ini Oria Amanyanakiri mị ḅie tomoni mịẹse ini si mịẹarịapụ mamgba nwọ koḅirimaḅịa, pịkị siye mịẹapụ mamgba na,

⁴² se ini se kọrị fịnị mị ḅie gbin chuḅịa, anịju ini sime owu, pịkị inia akama farịḅịa.

⁴³ Anịsịkị Tamụnọ-a tomonima ịrụa mị ḅịa ḅara ini nwọ ḅịaḅịa inia Ḍa Ḅe Amanyanakiri mị ḅie. Ị́ ḅeri nyanamẹ ḅẹḅẹ, poki!

Ḅọịsime Ngọ Kaḅo Mị

⁴⁴ “Mịn Soḅie Amanyanakiri mị mịn anị kịkẹ ọkụ-ẹ. Gbọrị owuḅọ bẹkẹma ḅara ḅụ ozu ḅie ḅọịsime ngọ nwọ ọrịmẹ. Ọ̀ pịkị anị gbẹịn koromamẹ, ò ḅieḅẹlẹ so ọkụma ò so mun ọ̀ nyanaye goyegoye nwọ dẹrịmẹ, se vinpịkị mun ozu mị fẹmẹ.

Opuma Yelaye Kaḅo Mị

⁴⁵ “Soḅie Amanyanakiri mị, mịn anị pịkị kịkẹ ọkụ-ẹ. Gbọrị owuḅọ ḅakama opuma yela ye nwọ ḍọkịmẹ,

⁴⁶ ò ḅo anịaḅụ gbọrịye nwọ ọrị sịkị, ò so mun ọ̀ nyanaye goyegoye nwọ dẹrịmẹ, se mun opuma yela ye mị nwọ fẹmẹ.

Ịgbọ Kaḅo Mị

⁴⁷ “Soḅie amanyanakiri mị, mịn anị pịkị kịkẹ ọkụ-ẹ. Injiḅaapụ inia ịgbọ mị se tọrụogbo koromamẹ, se inji tọrụkịrịkịrị anịa ḅie sọmẹ.

⁴⁸ Ịgbọ mị ḅein sịkị, ini anị nụnụ tọrụaka mun mẹ, kpọnjị sime se injima sẹlẹmẹ: iḅiayema ini nwọ sẹlẹ ẹkẹlịma ḅie chụamẹ, anịsịkị yeḅụsọkayema se gbin wokumamẹ.

⁴⁹ Mị anị simeḅịa ọkụ-ẹ, mị ḅụọ mị kulumaḅịa sịkị; soḅie enjẹlapụma paka mun iḅiapụma ḅie siapụma nwọ koḅiri sikimaḅịa

⁵⁰ se ini seni kọrị fịnị ḅie gbin chuḅịa, anị nyọ ini sime owu pịkị inia akama farịḅịa.

Ịwọ Karakaraye Na Olomuye Na

⁵¹ “Mà yema ómine àrị kaịnḅo?” Jizọs Ḅe nwọse ini gbelamẹ. “Iin,” ini nwọ pẹkẹrẹmẹ.

⁵² Anị ọ̀ nwọse ini ḅẹye-ẹ, “Anịẹrẹchị, Oloko ḍieapụma ḅụḅọ Soḅie Amanyanakiri mị ḅie ọḅụḍukoḅọ sọsa ḅọ goyegoye iniḅọ warị nyanaḅọ simeọkụ simesam anị iniḅọ ngọ warị ḅie ịwọaye na olomuaye na sin pakụmaḅo ḅọ-ẹ.”

Nazarẹt Ḅie Ini Jizọs Ḅe Sịkịmẹ

⁵³ Jizọs Ḅe maa kaḅoma nwọ kọn so sịkị, ori anị nyọ koroma somẹ

⁵⁴ se vinpịkị oria ama mun mẹ. Ori inia tẹkẹwarị ḅie yeḍiemẹ, se Ò pokiapụma ḅụgbiripumẹ. Ini nwọ gbelamẹ, “Nde anga Ọ̀ nwọ sime nemi na ḅụbuamaye na nwọ nyanaḅo?”

⁵⁵ “Ḅe Akanịḅọ tọkụ ḅe orika? Meri ma nyọngọrọma árịka, oria owuapụ mịnapụma anị Jems ḅe na, Josẹf ḅe na, Saịmọn ḅe na, pịkị Judas ḅe na inika?

⁵⁶ Oria eremeni-a mịnapụ mamgba ini mine na anga waraka? Nde anga Ọ̀ ma ye mamgba nwọ nyanaḅo?”

⁵⁷ Anị gose ini Ọ̀ sịkịmẹ. Jizọs Ḅe nwọse ini ḅẹmẹ, “Nyọnyọ mamgba ịkịankoroḅọ ḅe ori osi nyanamẹ, oria ama ḅie na ọ̀ pakaḅo furo ḅieapụma tọrọkọ na sikima.”

⁵⁸ Anị nyọ ḅụ ọ̀ tọn-a ḅụbuama fịrị nwẹngịkẹ, ini ḅereni nyanakaye gose.