Matio 11 - Kịrịkẹnị Baịbụl

Jọn Mengisaraḅọ Ḅe Se Fịrịma Okunwẹngịapụ Ma

¹ Jizọs Ḅe maa datekerema ma nwọse oria ọḅụḍuko oyimaịn apụ fịnjịma pịrịso sịkị, ori anị nyọ mị koromaso, se nwẹngị mun anị na kpeki amama ḅie yeḍie, pịkị Tamụnọ ḅẹrẹ mị ḍukomẹ.

² Jọn, Mengisaraḅọ ḅe, ikoliwarị ḅie sime Kraịst Ḅe nwẹngịarị fịrịma nwọ naa sịkị, ori oria ọḅụḍukoapụma ḅie dapụ se Ọ̀ fịrịmamẹ.

³ Se nwọse Jizọs Ḅe gbelamẹ, “Ḍuko wa pịrị,” Jọn ḅe ḅẹrẹ ḅẹ ḅoḅịa nwọḅẹ ḅọ “Ḅe ị́rị́ mọnọ, se wa tọrụ se jịnḅọ ḍiki-ao?”

⁴ Jizọs Ḅe ini pẹkẹrẹmẹ, “Ó vinpịkị mun ọ́ naasayema na, ómine ọrịsayema na ḍuko Jọn ḅe pịrị:

⁵ Tọrụmgbọlụpụn apụma inia tọrụmgbọlụma finjisam, ikeliapụma ini nwẹngịsam. Ḅụkan obi kọn apụma ini nwọ mịẹ fịafịamasam, inikiapụma ini ye naasam, fịapụma ini sịsẹsam, ini pịkị Iḅi Ḅẹrẹ mị ḍuko igwein apụma pịrịsam.

⁶ Ḅieḅẹlẹ sime ị̀ ḅụ ḅụ kuḅie maịn-maịn nyanakapụma pịrị!”

⁷ Jọn ḅe ọḅụḍukoapụma vinpịkị soarị ogbo, Jizọs Ḅe Jọn ḅe gbolomaye nwọ ḍuko tomonikpo mị pịrịmẹ: “Onwun ele ogbo Jọn ḅe ọ́ nwọ damamun sịkị, ó che ọrị ḍọkị? Fọrụ jikearị ịnyanya mọnọ?

⁸ Ọ́ pakamun che ḍiki-e mun? Ó mun gẹnịgẹnị ḅiriaye ḅiri ḅọ ọrị-ẹ mun? Anị ḅara mị nwọse ye ḅiriapụma amanyanapụ warịma ḅie anị ini angaye-ẹ!

⁹ Ó ḍuko ị̀ pịrị, cheye ọ́ nwọ ọrịḅịa ẹrẹchị ọ́ pakamun? Ịkịankoroḅọ? Iin, à ḍuko ọ́ pịrịaḅẹ na iḅi ḅara se ịkịankoroḅọ nẹngị ḅọ anị ómine ọrịye-ẹ.

¹⁰ Anịatịḅị Jọn ḅe anị Fịafịa ḍiri mị ḅẹrẹ ḅẹ ḅọ ḅe-ẹ, na: ‘Ḅe ị̀ya okunwẹngịḅọ ḅe-ẹ Tamụnọ Ḅe nwọ ḅẹmẹ, àrị ò se ị́ tọrọkọ fịrịmaḅịa, ateli mị karakarama ị́ pịrịḅịa ẹrẹchị.’

¹¹ À karakaraye ḍuko ọ́ pịrịaḅẹ na Jọn, mengisaraḅọ ḅe, ori opusọ tomoniḅọ goyegoye nwọ nẹngịmẹ. Ọkụma soḅie Amanyanakiri mị ḅie bokatẹịnḅọ ḅe opusọ ọ̀ nẹngịmẹ.

¹² Jọn ḅe sakị oria oku ḍuko sịkị ngịsị ọkịḅo mịmgba la, kụrọḅara Tamụnọ Amanyanakiri mị ḅụ sọmẹ, kụrọapụ kụrọḅara se anị ọkị ḍọkịaḅẹ.

¹³ Ịkịankoroapụ mamgba na Moziz Oloko mị na Amanyanakiri mị gbolomaye nwọ ḍukomẹ tẹrẹmẹ Jọn ḅe sịkị mị ḅo la;

¹⁴ nemikase ómine inia oku mị ḅereni ḅimẹ ḅẹḅẹ, Jọn ḅe anị Ịlaịja ḅe-ẹ, ori anị ḅoḅịa ini nwọ ḅẹ ịkịankoroḅọ ḅe-ẹ.

¹⁵ Anịọkụma ó poki, ó ḅeri nyanamẹ ḅẹḅẹ!

¹⁶ “Mịọkụ, cheye à nwọse mị ḅụọ ḅeapụma otoma ḅe? Fẹ chiri ḅie sime awọmẹnị simeọkụ ini nwọ simemẹ. Gbọrị nyọ koḅirimapụ oloku ísí anga koḅirimapụma pịrị se nwọ ḅẹ,

¹⁷ ‘Wa ereya akwa nwọ farị ọ́ pịrịmẹ, ọkụma ọ́ sẹkị ḍụkụkẹ! Wa pịkị fịapụḍipi nime chu ọ́ pịrịmẹ ọkụma ómine owu ḍụkụkẹ!’

¹⁸ Jọn ḅe ò ḅo sịkị, ò ḅuruseḅụḅamamẹ pịkị ḅuḅuaye ḅukẹ, se ḅọḅọ nwọ ḅẹmẹ, ‘Ò ḅie sitẹmẹ omi-ẹ!’

¹⁹ Tomoniḅọ Tọkụ Ḅe ḅo sịkị, ò yefịmẹ, pịkị ḅuḅuaye nwọ ḅumẹ, tomoniḅọ goyegoye nwọ ḅẹmẹ, ‘Ḅe ḅọ ḅe ḍiki! Opufịye na opu iruḅu ḅẹlẹma ḅọ-ẹ, amaigbiki ochoapụ ikiaḅọ-ẹ, pịkị ini depakụmasa apụma na!’ Anị simeọkụ simeọkụ sọnị, Tamụnọ nemi mị anịa fịrị ḅụ wẹrị anịa kọkọmaye mị ḍiepakụmasam.”

Ḅereni Nyanaka Ama Ma

²⁰ Jizọs Ḅe sakị ḅakama oria ḅụgbiripuma fịrịma nwẹngị amama ḍiki ịganịmẹ, anịatịḅị tomonima pa inia sima ḅie vinpịkịkẹ.

²¹ “Anị ḅalafamaye sọ ị́ pịrịḅịa ọkụ ḍiki, Korazin! Anị pịkị ḅalafamaye sọ ị́rị́ sọnị pịrịḅịa ọkụ ḍiki, Bẹtsaịda! Ọ́mịna ḅie mịẹ ḅụgbiripumayema nemikase Taya na Saịdọn na ḅie mịẹmẹ nwọ ḅẹ ọkụma, ḅọlọ sịkị ngịsị anịanga sime tomonima, mgbọkụ ini kururu-a ḅịtẹ ḅirisam, pịkị fọn se inia ḅụ sarasam, se ḍiepakụma na ini inia sima ḅụ vinpịkịsam!

²² À ḍukokụrọma ị́ pịrịaḅẹ, na Ḅẹrẹkọn Ene ḅụ Tamụnọ Ḅe ḍikitịḅịfoin nyana Taya na Saịdọn apụma na pịrịtẹịn ọ́ nẹngịḅịa!

²³ Se ị́rị́, Kapanịọm mị ọkụma! Ị́ ị́ḅụ dekigololoma mun so mị la ḍọkị? Ini ị́ suma kọrịfịnị ḅie gbin chuḅịa! Ị́ ḅie nwẹngị ḅụgbiripumayema Sọdọm ḅie mịẹmẹ nwọ ḅẹ ọkụma, mgbọkụ anị pa omi-ẹ mịmgba sọnị!

²⁴ À ḍukokụrọma ị́ pịrịaḅẹ na Ḅẹrẹkọn Ene mị ḅụ, Tamụnọ Ḅe ḍikitịḅịfoin nyana Sọdọm mị pịrịtẹịn ị́ nẹngịḅịa!”

Ị̀ Damaḅo Se Ịnyọsara

²⁵ Anịsịkị mị ḅụ Jizọs Ḅe nwọ ḅẹmẹ, “Ḍaḅọ, so mị na tomonikiri mị na Nyanaḅọ! À mịẹḅaka se ị́ ḅẹmẹ, anịatịḅị ị́ se yenemiapụ na yekaịnḅoapụma na ḅọịma ye ị́ nwọse maa yekaịnḅokapụma ḍiesam.

²⁶ Iin, Ḍaḅọ, ị́ ḅimẹ anị ọkọ paka.

²⁷ “Ị̀ Ḍa Ḅe ye mamgba ò se ị̀ pịrịsam. Tọkụ Ḅe nemi gbọrịḅọ sọ ofori-ẹ Ḍaḅọ Ḅe sikima ọkụma, pịkị Ḍaḅọ Ḅe nemi gbọrịḅọ sọ ofori-ẹ Tọkụ Ḅe sikima, ọkụma Tọkụ Ḅe ḅụḅẹlẹ se ori ò se ḍie ḍọkịapụma na sikima ọkụma.

²⁸ “Ómine ị̀ damaḅo, ómine ikuaye pụra se ịnyọḅụfasapụ mamgba, àrị ịnyọsara se ọ́ pịrịḅịa.

²⁹ Ómine ị̀ya kọngọ gbanaye mị ọkị ọ́mịna kọngọ ḅụ gbana, se ị̀ ḅara yeḍawọ anịatịḅị à dein na ḅụsekiri pịrị tẹmẹ nwọ nyanamẹ, se ọ́mịna tẹmẹma dein ịnyọsaraḅịa.

³⁰ À se ọ́ pịrịḅịa kọngọ gbanaye mị sarasaramẹ, à se pịkị ọ́mịna ọgọnọ gbanaḅịa pụraye mị ikukẹ.”