Matio 10 - Kịrịkẹnị Baịbụl

Oyimaịn Ọḅụḍukoapụ Fịnjịma

¹ Jizọs Ḅe oria oyimaịn ọḅụḍukoapụ fịnjịma chịn koḅirima se kụrọ se ini pịrịmẹ, se sitẹmẹ desin pịkị obi tọrụkịrịkịrị nwọ gwọḅịa ẹrẹchị.

² Mà anị oyimaịn ọḅụḍukoapụ fịnjịma ẹrẹma-ẹ: tatarịḅọ, Saịmọn (ini Pita se chịnḅọ ḅe) pịkị numbireowu Andru ḅe na, Jems ḅe na numbireowu Jọn ḅe na, Zẹbidi awọma;

³ Filip ḅe na Batolomiu ḅe na; Tọmọs ḅe na Matio, amaochoḅọ ḅe na; Jems Alfịọs yaḅe na, pịkị Tadịọs ḅe na;

⁴ Saịmọn, amaḅẹlẹmaḅọ ḅe na, Judas Ịskarịọt ḅe na, Jizọs Ḅe dẹrịḅọ ḅe.

Oyimaịn Apụ Fịnjịma Inia Fịrị

⁵ Jizọs Ḅe mịna oyimaịn apụ fịnjịma nwọ fịrịma pakụma se mà datekerema ọkwẹịnma se ini pịrịmẹ: “Jịn sẹ apụ nyọma ó mun ma, pịkị Sameria amama sọnị ómine agbama

⁶ Anịnakaraka, Izrẹlapụma ḅie fa ananama ọ́ nwọ damamun.

⁷ Ó mun se Tamụnọ ḅẹrẹ nwọ ḍuko na, ‘Soḅie Amanyanakiri mị anị kpekisam!’

⁸ Ómine obiapụma gwọ, fịapụma sịsẹma, ḅalafama ḅụkan obi kọn apụma gwọ, se si-a-tẹmẹma depakụma. Igbiki gbẹịnka ḅụ ọ́ nyanamẹ, anịẹrẹchị ọ́ pịkị gbẹịnye ọkịka ḅara ḅụ pịrị.

⁹ Ọ́ gbọrị goli sọnị, seleḅa sọnị, anịkanịka kọbọ sọnị, se ọ́mịna akpama ḅie chụa mun ma;

¹⁰ ó yeọmgbọḅịa akpa se chụa mun ma, pịkị ḅụchụaye gbanama mun ma, anịkanịka akpaka, anịkanịka amgbara sọnị. Fịrịnwẹngịḅọ ḅe ọ̀ ḅụpalịma ayema ini se ọ̀ pịrị.

¹¹ “Ó ḅo ama, anịkanịka ịwọama lala, ómine ama mị ḅie sọ se ómine ọkị ḅi ḅọ nwọ ḍọkị, se ómine anịanga sime mun ó soḅịa sịkị la.

¹² Ọ́ warị sọsọ, ọ́ nwọ ḅe-ẹ, ‘Deinma ómine na sime.’

¹³ Anị warị mị ḅie simeapụma iḅi ḅara se ómine ọkịmẹ ḅẹḅẹ, ye ọ́mịna deinma kereniḅịpị mị anịanga sime; ọkụma ini nemikase iḅi ḅara se ómine ọkịkẹ ḅẹḅẹ, ómine ọ́mịna kereniḅịpị mị chịn ọkị.

¹⁴ Nemikase da warị anịkanịka ama iḅi ḅara se ómine ọkịkẹ se pịkị ó poki ḍụkụkẹ ḅẹḅẹ ómine anị nyọ mị koroma so, se ómine ọ́ ḅụọ sime fọnma gugu koroma.

¹⁵ À ḍuko kụrọma ọ́ pịrịaḅẹ na Ḅẹrẹkọn Ene mị ḅie, Tamụnọ Ḅe ḍikiḅụgerere nyana Sọdọm na Gomọra na pịrịtẹịn anị amapụma nẹngịḅịa!

Ḅoarị Ḅe Ḅụfụka Ma

¹⁶ “Ó poki! Anana se piri obiri ogbo ḅie fịrịma ḅara à nwọse ọ́ fịrịma pakụmaḅẹ. Oruwu ḅe yenemi ọkụ ọ́ nwọse yenemi, pịkị okuku ḅe dein ọkụ ọ́ nwọse dein.

¹⁷ Ómine ọbị, anịatịḅị tomoni ó kun se ḅẹrẹkọn warị munḅịa. Ini pịkị inia Tẹkẹwarịma ḅie ó fomuḅịa.

¹⁸ Ini ị̀ tịḅị gose ó se ḅẹrẹchiri munḅịa, ḅẹrẹtọn apụ na amanyanapụ na tọrọkọ ḅụ, ómine Iḅi Ḅẹrẹ mị nwọ ḍuko se ini na Jịnsẹapụma na pịrịḅịa.

¹⁹ Ini ó se ḅẹrẹchiri munḅịa sịkị, ómine ọ́mịna ḅụ ḅalaḅalamama, ó ḍukoḅịaye ḅụ, anịkanịka ọ́ wẹrị anị ḍukoḅịa ḅara na gose. Ó ḍukoḅịaye mị ini se ó ḍieḅịa anị gbọrị sịkị ḅụ.

²⁰ Anịatịḅị ọ́ kọnḅịa ọkwẹịnma ọ́mịna yekẹ, ọkụma ọ́mịna Ḍa Ḅe Tẹmẹ mị mịn ọ́mịna ḅie ḅụ wẹrị ọkwẹịnḅịaye-ẹ.

²¹ “Tomoni inia mịnapụ nwọse mun fị ḅie chuḅịa, ḍapụ pịkị anị ḅara mị nwọse inia awọ mịẹḅịa; awọmẹnị pịkị anị ḅara mị nwọse ini yiapụ mịẹḅịa, se ini se fị ḅie chuḅịa.

²² Nwenimgba taraka se ọ́ wẹrịmaḅịa ị̀ tịḅị gose. Ọkụma anị inema mun kulumalaḅọ kẹngẹ anị ḍụaḅọrọma nyanaḅịaye-ẹ.

²³ Ini gbọrị ama ḅie ḅụfụka se ọ́ pịrịmẹ ḅẹḅẹ, ọ́ mangị so jịn ama mun. À ḍuko kụrọma ọ́ pịrịaḅẹ na Izrẹl ama mamgba ḅie ọ́mịna fịrị ọ́ nwọ nwẹngị karamaka simeogbo Tomoniḅọ Tọkụ Ḅe pịkịmaḅoḅịa.

²⁴ “Yeḍawọarịḅọ ḅe ori opusọtẹịn ye se ò ḍieḅọ ḅe nẹngịkẹ, omoniḅọ ḅe sọnị opusọtẹịn ọ̀ nyanaḅọ ḅe nẹngịkẹ.

²⁵ Anị ḅụ gbẹịnḅịa, yeḍawọarịḅọ ḅe ye se ò ḍiearịḅọ ḅe na kịkịna, omoniḅọ ḅe sọnị ọ̀ nyanaḅọ ḅe na kịkịna. Ini nemikase sitẹmẹ tịḅịnịḅọ nwọse warị mị ḅe tịḅịdaḅọ ḅe nwọ chịn ọkụma, sitẹịn ẹrẹ ini nwọse warị mị ḅieapụma chịnḅịa!

Ḍikiḅalafaḅịa Ḅọ

²⁶ “Ó tomoni ḍikiḅalafa ma, anịatịḅị mịọkụ gbẹịn koroma se ini finji ẹka ye ofori-ẹ, anịkanịka ḅọị se tomoni nemi ẹka ye ofori-ẹ.

²⁷ À kanakana ḅie ḍuko ọ́ pịrịarịyema enekaka fịafịa ogbo ómine àrị ḍukopakụma ọ́ ḅọịma angaḅie naayema, warị ochuma ọgọnọ ḅụ ómine àrị ḍukopakụma.

²⁸ Ómine ini ḍikiḅalafa ma, anị oju mị ḅaa se ineda tẹmẹ mị ḅaa-ẹka apụma, anịnakaraka ọ́ Tamụnọ Ḅe ḍikiḅalafa, anị ineda oju mị ḅaa, pịkị kọrịfịnị ḅie tẹmẹ mị ḅaaḅịa ḅọ Ḅe.

²⁹ Ị́ ineda gbọrị kọbọ seni mama tịḅịpẹlẹḍụẹịn feni awọ fẹḅịa, anị sọnị arịa ḅụ ḅe gbọrị ye sọ sokoro kiri koro ẹkẹ, ọ́mịna Ḍa ḅe ḅerenika simeogbo.

³⁰ Ómine ọkụma, ọ́mịna tịḅị sime inime ma sọnị ini àrị kịẹn nemi waraḅẹ.

³¹ Anịẹrẹchị ọ́ ḅalafama ó yelatẹịn tọn-a tịḅịpẹlẹḍụẹịn feni awọ nwọ nẹngị waraḅẹ!

Kraịst Ḅe Ḍukopakụma Mị Na Ọ̀ Sịkị Mị Na

³² “Tomoni-a tọrọkọ ḅụ ị̀ ḍukopakụmaḅọ, ị̀rị̀ sọnị àrị iniḅọ ḍukopakụmaḅịa soḅie ị̀ Ḍa Ḅe tọrọkọ ḅụ.

³³ Ọkụma tomoni-a tọrọkọ ḅụ ị̀ sịkị ḅọ ị̀rị̀ sọnị ị̀ Ḍa soḅie simeḅọ Ḅe tọrọkọ ḅụ àrị iniḅọ sịkịḅịa.”

Deinmakẹ, Ọkụma Okola-agiji-ẹ

³⁴ “Ó koroma ma na à ḅosam deinma se ḅo sẹkiri mị pịrị gose. Ẹn-ẹn, deinma ọkịḅo gose à ḅokẹ, ọkụma okola-agiji-ẹ.

³⁵ À ḅomẹ mịẹse owuapụ awọma inia ḍapụma na tụḅụrụ, eremeni awọma inia nyengiapụma na tụḅụrụ, eremeni awọ pịkị inia deapụ nyengiapụ na tụḅụrụḅịa ḅara;

³⁶ tomoniḅọ ḅe orina tarakatẹịnḅịa apụ, anị orina gbọrị ịla ḅie pakaḅo apụma-ẹ.

³⁷ “Iniḅọ ḍaḅọ anịkanịka nyengiḅọ ḅẹlẹmatẹịn ị̀ nẹngịḅọ, iniḅọ ị̀ya ọḅụḍukoḅọ sọ gbẹịnkẹ; iniḅọ owutọkụ anịkanịka eremenitọkụ ḅẹlẹmatẹịn ị̀ nẹngịḅọ, iniḅọ ị̀ya ọḅụḍukoḅọ sọ gbẹịnkẹ.

³⁸ Mịna mgbẹsẹchịn deki se ị̀ya nwẹngịḅụọma ḍukonwẹngịka ḅọ goyegoye, iniḅọ ị̀ya ọḅụḍukoḅọ sọ gbẹịnkẹ.

³⁹ Ḅarana iniḅọ ḍumo kpa ḍọkịḅọ goyegoye iniḅọ anị famaḅịa, ọkụma ị̀ tịḅị gose iniḅọ ḍumo famaḅọ goyegoye, anị nyana ḅoḅịa.

Gbẹịn-aye

⁴⁰ “Iḅi ḅara se ómine ọkịḅọ goyegoye, iḅi ḅara se ị̀ ọkịmẹ se iḅi ḅara se ị̀ ọkịḅọ goyegoye, iḅi ḅara nwọse ị̀ se fịrịma ḅọ ḅe ọkịmẹ.

⁴¹ Iḅi ḅara se Tamụnọ okunwẹngịḅọ ọkịḅọ goyegoye, ori Tamụnọ okunwẹngịḅọ nwọḅẹ ye gose, iniḅọ Tamụnọ okunwẹngịḅọ ḅe gbẹịnye nyanaḅịa. Iḅi ḅara nwọse karakaraye mịẹḅọ nwọ ọkịḅọ goyegoye, iniḅọ karakaraye nwọ mịẹmẹ gose, iniḅọ karakaraye mịẹḅọ mị ḅe gbẹịnye nyanaḅịa.

⁴² Karakaraye à nwọ ḍuko ọ́ pịrịaḅẹ, oḅoku mengi kalaye kẹngẹ nwọse ị̀ya ọḅụḍukoapụma ḅie bokatẹịnḅọ pịrị ḅọ goyegoye, iniḅọ ị̀ya ọḅụḍukoḅọ-ẹ, nwọḅẹ ye gose, gbarịmaka ḅara ḅụ iniḅọ gbẹịnye nyanaḅịa.”