Malakaị 3 - Kịrịkẹnị Baịbụl

¹ Kụrọmamgba Nyanaḅọ Ḅe nwọ pẹkẹrẹmẹ, “Àrị ị̀ya fịrịnwẹngịḅọ se sẹịnḅịa, se ori ateli mị karakarama ị̀ pịrịḅịa. Anịsịkị Nyanaḅọ Ḅe, ọ́ tọrụseḍikiarịḅọ ḅe, ḅụ nemika ḅara ḅụ ori Oputẹkẹwarị mị ḅie sọḅoḅịa. Ọ́ tọrụseḍikiarị okunwẹngịḅọ ḅe, ò ḅo ị̀ya ọḅọkụ mị ḍuko finjiḅịa.”

² Ọkụma ò ḅoḅịa ene mị ḅụ, tụḅọ ineda inema nyanaḅe? Ọ̀ ḅụpakụmaḅoḅịa sịkị, tụḅọ ineda ḍumoḅe? Ineda fịafịakaye goyegoye sịkịrị sinḅịa saḅaị sime ọkụ ọ̀ nwọ simeḅịa, ikulele fọị-kpaịnma fịnị ọ̀ nwọ kịkẹmẹ.

³ Ò ḅo ḅẹrẹkọn ḅịa ḅara anị tomoniḅọ seleḅa na goli na ḅụ ọkpọtọ sin se anịḅo fịafịa kpaịn ḅara ọkụ simemẹ, anị ḅara anị Nyanaḅọ Ḅe oria okunwẹngịḅọ ḅe, ori agbamịẹ apụma mịẹfịafịamaḅịa ọkụ-ẹ, anị mị mịẹse ini Nyanaḅọ Ḅe oria karakara ḍiepịrịaye agbama ọkịḅo ọ̀ pịrịḅịa.

⁴ Anịsịkị anị Judapụma na, Jerusalẹm apụma na, se ḅo Nyanaḅọ Ḅe pịrịḅịa ḍiepịrịaye agbama, ọ̀ ḅụḅẹlẹaye sọḅịaye-ẹ, tatarị sịkị àrị simesime ḅara mị.

⁵ Kụrọmamgba Nyanaḅọ Ḅe nwọḅẹmẹ, “Àrị ọ́mịna ogboku ḅụpakụmaḅo se ḅẹrẹkọn ọ́ pịrịḅịa, se à pịkị anị gbọrị kirikiri ọ́mịna ḅie arịapụ ma na, sẹfị apụma na, iruo onyechịẹ chịẹ apụma na, fịrịnwẹngịa kirima ḅie fịrịnwẹngị apụ gbẹịn aye ḅụ ini inuma inuma apụma na, pịkị deapụ koroma fịsa eremeni na, ḍapụ na nyengi apụ na koroma fịsa awọmẹnị na, pịkị igoniapụ na—pịkị ị̀ osisika apụ mamgba na nwọ go pakụmaḅịa.

Ị̀ Kọnfịḅo Ayema Se Oyi-a Kiri Pu Ḅe Gbọrị Kiri Se Ḅeinma Nyanaḅọ Ḅe Pịrị

⁶ “Ị̀rị̀ anị Nyanaḅọ Ḅe-ẹ, à pịkị ḍinmaḍinmakẹ. Anịẹrẹchị ómine Jekọb furo ḅie pakaḅo apụ; ma ọ́ gbọtụma fasokẹ.

⁷ Ómine ọ́mịna tatarị ḅieju-aḍapụma sime ọkụ; ómine ọḅụ pịkị ị̀ya olokoma gbinsam, ọ́ pịkị àrị kokokẹ. Ó vinpịkị ị̀ damaḅo, ị̀rị̀ sọ à pịkị tọrụ pịkị ómine daḅịa. Ọkụma ó gbelaḅẹ na, ‘Cheye wa nwọ mịẹ sịkị re wa ị́ damaḅo ḅe?’

⁸ Àrị ómine gbelaḅẹ na, tomoniḅọ Tamụnọ Ḅe inuma mị karakara nọ? Anị ọkọ sime gbẹịnkẹ, anịẹḅẹsọ, ómine ị̀ inumaḅẹ. Ó gbelaḅẹ, ‘Nde ḅaraḅụ nọ?’ Ye se oyi-a kiri pu ḅụ gbọrị kiri se Nyanaḅọ Ḅe pịrị mịẹmịẹye mị na, pịkị ḍiepịrịaye agbamịẹ mị ḅụ na-ẹ.

⁹ Worinime ọ́mịna ọgọnọ mgba gbana waraḅẹ, anịatịḅị bebe sẹ mị mgba ị̀ inumaḅẹ.

¹⁰ Ó ḅeinma ọ́mịna oyi-a kiri ḅụ gbọrị kiri mị se Oputẹkẹwarị ḅie ḅo, mịẹso sịkị fịaye anịnyọ ḅakaḅịa ḅara. Ómine ị̀ ḍaḍiki, se ọ́ pịkị ọrịḅịa na, à soḅie ḅụ pẹlẹḅọkọ ma finji se ḅakama tọrụ kịrịkịrị iḅi aye nwọ ọsụn ọ́mịna ọgọnọ saraḅịa.

¹¹ À ḅereni ẹkẹ ḍọkọḍọkọ feni awọ ó ḍipi fịayema sima, anịsịkị ọ́mịna tụmgbakị elelenda ozuma àrị buruku burukuma chụaḅịa.

¹² Anịsịkị sẹsẹ ma ḅie tomoni mamgba, ini nwọse ómine chịnḅịa ḅieḅẹlẹ apụ, anịatịḅị ọ́mịna ama mị anị anga gbẹịn nyọ nwọ sọḅịa.”

Tamụnọ Ḅe Ò Ḍikitịḅịfoin Ḅerenimẹ Se Oria Tomonima Pịrịmẹ

¹³ Nyanaḅọ Ḅe nwọ ḅẹmẹ, “Ị̀ gbolomaye ḅụ, ọ́ tọn-a ḅalafama sia ḅẹrẹ nwọ ḍukosam. Ọkụma ó gbelaḅẹ na, ‘Ị́ gbolomaye ḅụ cheye wa nwọ ḍukosa?’

¹⁴ Ọ́ nwọḅẹmẹ na, ‘Fịrịnwẹngị Tamụnọ Ḅe pịrị mị papaye-ẹ. Ò ḍukoye mịẹ mị, anị che sọye nyana, anịkanịka ḅụkụrọma pa se Kụrọmamgba Nyanaḅọ Ḅe ḍie na wa mịẹaye ma àrị wa ngịrịmamẹ nwọḅẹye mị sọnị?

¹⁵ Wa ọrị ḅara ọkụma, opuaye mịẹmịẹ apụma anị ḅieḅẹlẹarịye-ẹ. Siaye mịẹmịẹ apụma, ye ini na lọkọlọkọ mị kẹngẹkẹ ọkụma inia simịẹmịẹ ayema ini nwọse Tamụnọ Ḅe tọrụ dadamẹ anịẹḅẹsọ ò fomuḅara se ini pịrịpịrịkẹ.’ ”

¹⁶ Anịsịkị Nyanaḅọ Ḅe ḍikiḅalafa apụma, ini ọkwẹịn jụmḅọ jụmḅọ pịrịpịrịmẹ, se Nyanaḅọ Ḅe ini poki se ini ḍukoaye ma naamẹ. Nyanaḅọ Ḅe ḍikiḅalafa pịkị osi se ọ̀ pịrịpịrị apụma, ọ̀ tọrọkọ sime ḍiri mị ḅie, inia ẹrẹ ma gịẹịn waraḅẹ.

¹⁷ “Ini ị̀ya tomoni sọḅịa,” Kụrọmamgba Nyanaḅọ Ḅe ọkọ ḅẹmẹ, “À ye mịẹḅịa ene lasịkị, ini jokoma ị̀ya tomoni sọḅịa. Àrị ini ḍikitịḅịfoinḅịa, ḍaḅọ fịrịnwẹngị ọ̀ pịrị tọkụ ḍikitịḅịfoin ọkụ.

¹⁸ Ị̀ya tomonima ini pịkị gbọrị sịkị nwọse karakaraye mịẹmịẹ apụma na sitịḅịnyana apụma na ḅụ pakaḅịa kịrịye nwọ ọrịḅịa, anị fịrịnwẹngị ị̀ pịrịpịrịḅọ ḅe na pịkị fịrịnwẹngị ị̀ pịrịpịrịkaḅọ ḅe ḅụ na.”