Mak Iḅi Ḅẹrẹ Mị 8 - Kịrịkẹnị Baịbụl

Jizọs Ḅe Fịye Se Kịnị Oyiẹndẹ Pịrịmẹ

¹ Ma ḅọlọka simeogbo, jịn ḅaka tomonikpo ḅo koḅirimamẹ. Ini fịḅịaye ḅarị ofori sịkị, Jizọs Ḅe ọḅụḍukoapụma chịn Ọ̀ ḅụ pịrị se nwọ ḅẹmẹ,

² “À mịna tomonima ḍikitịḅịfoinmẹ, anịatịḅị ini tẹrẹ-a ḍin nwọse ị̀rị̀ na simesam, se mịọkụ fịḅịaye ḅarị nwọ nyanakẹ.

³ À nemikase fịye se ini pịrịka se ini fịrịma warị mun ọkụma, ini ateliogbo fụmụḅịa ini soarị sịkị, anịatịḅị inia ḅie dapụ ḅọlọ nyọ ḅụ wẹrị ḅomẹ.”

⁴ Oria ọḅụḍukoapụma Ò gbelamẹ, “Nde anga mị eleogbo mị ḅie ḅụ tomoniḅọ ineda mịna tomonima karaḅịa fịye nwọ ḍọkịḅo ḅe?”

⁵ “Nde ọ́ nyana fịturu la ọkụ?” Jizọs Ḅe nwọ gbelamẹ. “Sọnọma okpokpo-ẹ,” ini nwọ pẹkẹrẹmẹ.

⁶ Ọ̀ tọn tomonikpo mị pịrịmẹ na ini kiri kpọnjị sime. Anịsịkị ọ̀ sọnọma fịturu okpokpoma ọkịmẹ, mịẹḅaka se Tamụnọ Ḅe ḅẹ, àrị pu, se àrị seni Oria ọḅụḍukoapụma pịrịmẹ, àrị ḍie tomonikpo mị pịrịḅịa ḅara; se ọḅụḍukoapụma anị ḅara mị nwọ mịẹmẹ.

⁷ Ini pịkị boka inji awọ nwọ nyanamẹ. Jizọs Ḅe ma ma gose mịẹḅaka nwọ ḅẹmẹ, se Ọ̀ nwọ ḍuko ọḅụḍukoapụma pịrịmẹ na ini pịkị àrị sọnị nwọ ḍie ini pịrị.

^8-9 Ini fị inia ḅụlọma ḅeinmamẹ; se sọnọma ḍụḅa ḍụḅa opu kana ọḅụḍukoapụma nwọse fị kọnma fịye pumburoma nwọ gbalamẹ. Ini pa kịnị oyiẹndẹ pembe ye nwọ lamẹ. Jizọs Ḅe Ò tomonima ḅẹ se ini somẹ

¹⁰ anịsịkị Ori na Oria ọḅụḍukoapụma na ini arụ ḅụkụlọ se so Dalmanuta pẹkẹrẹ mị nwọ mun mẹ.

Farisiapụ Ma Ḅụgbiripumaye Nwọ Ḅimẹ

¹¹ Tọn-a Farisiapụ Jizọs Ḅe damaḅo se sakị Ori na ḅẹrẹ jineamẹ. Ḍẹịntu Ọ̀ pịrịḅịa ẹrẹchị, ini nwọse Ọ̀ ḅẹmẹ na Ọ̀ ḅụgbiripumaye mịẹ ini pịrị, se ḍiepakụma na Tamụnọ Ḅe Ori na omi-ẹ.

¹² Ọkụma Jizọs Ḅe sịma se nwọ ḅẹmẹ, “Nde mịmgba ene mị ḅe-a tomonima gose ḅụgbiripumaye nwọ ḅiye? Ẹn-ẹn, à ḍuko ọ́ pịrịaḅẹ! Ọkọsime ḍiepakụmaye ini nwọse mịna tomonima nwọ pịrị ẹkẹ!”

¹³ Ori ini koroma so se vinpịkị mun arụ mị ḅụkụlọmẹ, se sakị ḍapa mị saḅa ísí pẹkẹrẹ mị mun mẹ.

Farisiapụ Ma Na Hẹrọd Ḅe Na Fịturu Sumaye Mị

¹⁴ Anị ọḅụḍukoapụma ḅieḅaramaye nwọ sọmẹ na ini ḅakama fịturu se chụa ḅo ḅịa, ọkụma fịturu gbọrị okpokpo ngẹrị mị ini se arụ mị ḅụkụlọye-ẹ.

¹⁵ “Ọ́ tọrụkweinma,” Jizọs Ḅe nwọse inia ḅerijinemẹ, “Farisiapụma na Hẹrọd ḅe na fịturu sumaye mị ḅụ.”

¹⁶ Se ini sakị inia ogboku ḅụ nwọ ḅẹaḅẹ: “Ọ̀ mịn mị ḍukomẹ, anịatịḅị wa fịturu nyanakẹ.”

¹⁷ Jizọs Ḅe Ori ini ḍukoarịye mị nwọ nemimẹ, se Ọ̀ nwọse ini gbelamẹ, “Nde ó gose ọ́ fịturu nyanakẹ nwọ ḅẹye mị nwọse ḅẹrẹ ḍukoarịye? Ma ọ́ pa nemika, anịkanịka, kaịnḅo ka? Ọ́mịna kuḅiema àrị mị ḅara mị nwọse ikula wara-ao?

¹⁸ Ọ́ tọrụmgbọlụ nyanamẹ, ọ́ nyọ ọrịka? Ó ḅeri nyanamẹ; ó ye naaka? Ó seni ḅiekoromaka

¹⁹ à sọnọ-a fịturu okpokpoma pu seni kịnị oyimaịn ẹndẹ fịnjị na oyiasi ma nwọ pịrị sịkị mị ḅụ, ini fị kọnma pumburoma ḅụ nda kana ọ́ nwọ tan ḅeinma?” “Oyimaịn fịnjị-ẹ,” ini nwọ pẹkẹrẹmẹ.

²⁰ Jizọs Ḅe pịkị nwọse ini gbelamẹ, “À pịkị sọnọma okpokpoma nwọ pu se kịnị oyiẹndẹ ma pịrị sịkị kọn ayema ḅụ nda kana ọ́ nwọ tan ḅeinma?” “Sọnọmẹ-ẹ,” ini nwọ pẹkẹrẹmẹ.

²¹ Ọ̀ nwọse ini gbelamẹ, “Se anị sọnị ma ọ́ pa kaịnḅoka?”

Jizọs Ḅe Bẹtsaịda Ḅie Tọrụmgbọlụ Pụnḅọ Ḅe Nwọ Gwọmẹ

²² Ini Bẹtsaịda nwọ ḅomẹ, gbọrị apụ gbọrị tọrụmgbọlụ pụnḅọ nwọse ḅo Jizọs Ḅe pịrị nyọ mị, se Ọ̀ tẹkẹmẹ na Ọ̀ ḅara se ọ̀ lama.

²³ Jizọs Ḅe ḅara ḅụ tọrụmgbọlụ pụnḅọ ḅe ọlọ, se ò se ịwọama mị ḅie pakamẹ. Ọ̀ fụla se tomoniḅọ ḅe tọrụmgbọlụ sara so sịkị, Jizọs Ḅe Ọ̀ ḅarama se tomoniḅọ ḅe ọgọnọ gbana, se nwọse ò gbelamẹ, “Ị́ ineda ye ọrị?”

²⁴ Tomoniḅọ ḅe ọ̀ tọrụ deki ọgọnọ ḍiki se nwọ ḅẹmẹ, “Iin, àrị ineda tomoni ọrịmẹ, ọkụma chịn simeọkụ ini nwọ sime se nwẹngị ma ḅọrọaḅẹ.”

²⁵ Jizọs Ḅe Ọ̀ pịkị Ọ̀ ḅarama se tomoniḅọ ḅe tọrụmgbọlụma ọgọnọ gbanamẹ. Mịn sịkị mị ḅụ, tomoniḅọ ḅe ori iḅiọkụma yeḍikimẹ se oria yeọrị mị vinpịkị ḅomẹ, se ò ḅelema yegoyegoye nwọ ọrịmẹ.

²⁶ Anịsịkị Jizọs Ḅe ọ̀ fịrịma warị sẹịnmẹ, se nwọse ọ̀ ḅẹmẹ, “Ḅarị vinpịkị so ịwọama mị mun ma.”

Pita Ḅe Jizọs Ḅe Gbolomaye Ḍukopakụmamẹ

²⁷ Anịsịkị Jizọs Ḅe na Oria ọḅụḍukoapụma na, ini so Sizaria Filipaị ịwọamama mun mẹ. Ateliogbo ḅụ, Ori ini gbelamẹ, “Ó ḍuko ọkọmụ, ị̀rị̀ tụḅọ-ẹ, tomonima nwọ ḅẹ?”

²⁸ “Dapụ nwọ ḅẹmẹ na ị́rị́ Jọn Mengisaraḅọ ḅe-ẹ,” ini nwọ pẹkẹrẹmẹ; “ísíapụma nwọ ḅẹmẹ na ị́rị́ Ịlaịja ḅe-ẹ, anịsịkị ísíapụma pịkị nwọ ḅẹmẹ na, ị́rị́ ịkịankoroapụma ḅie gbọrịḅọ-ẹ.”

²⁹ “Ómine kwanị?” Ọ̀ nwọse ini gbelamẹ. “Ị́rị́ tụḅọ-ẹ, ọ́ nwọ ḅẹ?” Pita ḅe pẹkẹrẹmẹ, “Ị́rị́, Mẹsaya Ḅe-ẹ.”

³⁰ Anịsịkị Jizọs Ḅe tọn ini pịrịmẹ, “Ómine ị̀ gbolomaye ḍuko gbọrịḅọ sọ pịrịma.”

Jizọs Ḅe Oria Tọrụsiọrị Na Fị Na Gbolomaye Nwọ Ḍukomẹ

³¹ Anịeso Jizọs Ḅe sakị ye se Oria ọḅụḍukoapụma ḍiemẹ: “Tomoniḅọ Tọkụ Ḅe ori opuma tọrụsiọrịḅịa gbarịmaka ḅara ḅụ, se sẹnịapụma na, tịḅịnị agbamịẹapụma na, pịkị Oloko ḍieapụma na Ọ̀ sịkịḅịa. Ini Ọ̀ ḅaaḅịa, ọkụma tẹrẹ-a ḍin ḅọrọ sịkị, Ọ̀ sịsẹ se ḍumoḅịa.”

³² Ọ̀ mịn mị nwọ mịẹ ḅelema ini pịrịmẹ. Anị Pita ḅe Ọ̀ chịn se anga pịrị se sakị Ò ḍiki ịganịye-ẹ.

³³ Ọkụma Jizọs Ḅe Ò vinpịkị Oria ọḅụḍukoapụma ḍiki, se Pita ḅe ḍiki ịganịmẹ. Ọ̀ nwọ ḅẹmẹ, “Ị̀ wẹrị sikima, Oru.” “Ị́ya koromama tomoni-a koroma-ẹ, Tamụnọ-aye kẹ!”

³⁴ Anịsịkị Jizọs Ḅe Ò tomonikpo mị na Oria ọḅụḍukoapụma na nwọ chịn Ọ̀ ḅụ pịrịmẹ. Ọ̀ nwọ ḍuko ini pịrịmẹ, “Ị̀ ḍuko ḍọkịḅọ omi-ẹ ḅẹḅẹ,” “ori ọ̀ ḅụ seni ḅieḅarama, ori oria mgbẹsẹchịn mị pụra, se ị̀ ḍuko.

³⁵ Anịatịḅị mịna ḍumo ḍụa ḍọkịḅọ ḅe, ori anị famaḅịa; ọkụma ị̀ tịḅị gose, pịkị iḅiọkwẹịn mị gose mịna ḍumo famaḅọ ḅe, ori anị ḍụaḅịa.

³⁶ Tomoniḅọ nyanaḅo sọye omi, ò nemikase bebe tomonikiri mị mgba nwọ nyana ọkị, se oria ḍumo mị nwọ fama ọkụma?

³⁷ Tomoniḅọ pịrị pakụma se mịna ḍumo nyanaḅịaye ofori-ẹ.

³⁸ Tomoniḅọ nemikase Tamụnọ nemika pịkị sitịḅịnyana ene mị ḅie ḅụ ị̀ gose ḅụgerere nyanamẹ, pịkị ị̀ya ḍieye mị gose ḅụgerere nyanamẹ nwọ ḅẹḅẹ anịọkụma, iniḅọ gbolomaye ḅụ Tomoniḅọ Tọkụ Ḅe sọ ḅụgerereḅịa. Ọ̀ Ḍawu ḅe boma mị na, fịafịa enjẹlapụma na soḅie koroḅoḅịa sịkị.”