Mak Iḅi Ḅẹrẹ Mị 7 - Kịrịkẹnị Baịbụl

Ḅieju-aḍapụ Ma Ḅe Ḍieye Mị

¹ Jerusalẹm mị ḅie wẹrị ḅo da Farisiapụ na da Oloko ḍieapụ na koḅirima Jizọs Ḅe kelemamẹ.

² Ini ọrị ḅomẹ na Oria ọḅụḍukoapụma ḅie dapụ inia fịafịaka ḅarama nwọse fịye fịmẹ—anị ini fiearịye Farisiapụma se tomonima ḅẹ ḅara mị ini nwọse inia ḅarama sịkịrịkẹ.

³ Anịatịḅị Farisiapụma pịkị kirikọn Juapụ mamgba na, ini inia ḅieju-aḍapụma ḅara daọkị ḍieye mị nwọ ḍuko nwẹngịmẹ: ini karakara ḅara se inia ḅarama sịkịrịka simeogbo ini fịye fịfịkẹ;

⁴ ini pịkị fẹ ḅie ḅoye nwọ fị ẹkẹ, ini tatarị anị sịkịrịka simeogbo. Ini pịkị daọkịsa tọn-a jịn oloko nwọ ḍuko nwẹngịmẹ, arịa ḅụ daye anị, wẹrị ọmọngọma na ḅẹlẹma na, alapẹlẹka bọlịma na, pịkị mọnọyema na sịkịrị sịkịrịḅịa ḅara.

⁵ Anị Farisiapụma na Oloko ḍieapụma na Jizọs Ḅe gbelaye-ẹ, “Cheye mịẹse ị́ya ọḅụḍukoapụma mịna ḅieju-aḍapụma saḅama se wa pịrị ḍieye mị nwọ ḍuko nwẹngịka ḅara, anịnakaraka fịafịaka ḅarama nwọse yefịarịye?”

⁶ Jizọs Ḅe nwọse ini pẹkẹrẹmẹ, “Aịzaya ḅe, karakara ḅara se ómine epekelepepe apụma ḅụ ịkịankoromẹ, se Fịafịa ḍiri mị nwọ gịẹịnmẹ na: ‘Tamụnọ Ḅe nwọ ḅẹmẹ, mịna tomonima inia ḅịpịpẹkẹrẹma ini nwọse ị̀ osimẹ, ọkụma inia kuḅiemgbọlụma kọkọma ị̀ wẹrị sasa waraḅẹ.

⁷ Ini kpẹrẹkị ị̀ tẹkẹarịye mị yeḅụsọ kẹ, anịatịḅị tomoniḅọ chụa olokoma mị ini se yeḍiearịye-ẹ, Tamụnọ oloko-ẹ nwọ ḅẹ ye ọkụ!’

⁸ “Tamụnọ oloko mị ọ́ nwọse anga pịrịmẹ, se tomonima ḍiearịyema nwọ mịẹmẹ.”

⁹ Se Jizọs Ḅe pịkị nwọ ḅẹmẹ, “Tamụnọ oloko mị sịkị nemi ọ́ nwọ kọnmẹ, pa ọ́mịna ḍieayema nwọ ọlọ chịẹmaḅịaye gose.

¹⁰ Anịatịḅị Moziz ḅe tọn koromamẹ na, ‘Ị́ ḍa na ị́ nyengi na osi,’ ‘se ḍaḅọ anịkanịka nyengiḅọ ḅụ siye ḍukoḅọ goyegoye ini gbarịmaka ḅaraḅụ iniḅọ ḅaa.’

¹¹ Ọkụma ómine nwọse yeḍiemẹ na tomoniḅọ nemikase ye nyana se ḅarachụa iniḅọ ḍaḅọ anịkanịka iniḅọ nyengiḅọ pịrịḅịa ọkụma iniḅọ nwọ ḅẹ, na ‘Mịn mị Kọbanị-ẹ’ (anị mị fiearịye anị sime Tamụnọ Ḅe pịrịmẹ),

¹² mịn ḅara ḅụ ini ọ̀ ḅụ ḅarasinsam ḅarachụa ḍaḅọ anịkanịka nyengiḅọ pịrị ḅụ.

¹³ Mịn ḅara mị ó seni jịn apụ ḍie sayema Tamụnọ ọkwẹịn mị nwọ kan sinmẹ. Mịn mị na kịkịna jịn-aye ọ́ pịkị nwọ mịẹmẹ.”

Tomoniḅọ Mịẹse Iniḅọ Fịafịa Ẹka Yema

¹⁴ Anịsịkị Jizọs Ḅe ọ̀ pịkị gbọrị sịkị nwọse tomonikpo mị chịn, se nwọse ini ḅẹmẹ, “Óminemgba, ómine ị̀ poki, se kaịnḅo.

¹⁵ Ḅo tomoniḅọ ḅie sọ se nweniḅọ mịẹse iniḅọ fịafịa ẹkaye ofori-ẹ. Anịnakaraka, tomoniḅọ ḅie pakaḅoye re mị nweniḅọ mịẹse iniḅọ fịafịa ẹkaye-ẹ.”

¹⁶ Anịẹrẹchị, ó ḅeri nyanamẹ ḅẹḅẹ, ó poki!

¹⁷ Ò tomonikpo mị koromaso se warị ḅie sọ sịkị Oria ọḅụḍukoapụma mị kaḅo mị gbolomaye nwọse Ò gbelamẹ.

¹⁸ Ọ̀ nwọse ini ḅẹmẹ, “Ma ó yenemi ísíapụma nẹngịkẹ, ma ọ́ kaịnḅoka? Tomoniḅọ ḅịpị ḅie sọye ineda nweniḅọ mịẹse iniḅọ fịafịaka ḅọ sọ ẹkẹ,

¹⁹ anịatịḅị anị tomoniḅọ ḅe kuḅiemgbọlụ ḅie sọ kẹ, ọkụma ọ̀ ḅụlọ ḅie mị anị sọye-ẹ, se anị pịkị oria oju ḅie pakasomẹ.” (Mịn mị nwọ ḅẹ ḅụ, Jizọs Ḅe Ò ḍukopakụmaḅẹ na fịye mamgba-o fị gbẹịnmẹ.)

²⁰ Se Ọ̀ pịkị nwọ ḅẹmẹ, “Tomoniḅọ ḅịpị ḅie pakaḅoye mị nweniḅọ mịẹse iniḅọ fịafịakaye-ẹ.

²¹ Anịatịḅị tomoniḅọ ḅe ḅie ḅụ, ò kuḅiemgbọlụ ḅie mị siaye mamgba pakaḅoye-ẹ: furu na, nweniḅaa na,

²² sẹfị na, ngẹrị fị ḍọkị na, pịkị siye tọrụkịrịkịrị nwọ mịẹ na; nweni inuma na, ḍikitọrụgbẹịnkaye na, yeḍikipụkọsoli na, ḍukosima na, opuayemịẹ na, pịkị oḅoriamịẹye na,

²³ ma siaye mamgba tomoniḅọ ḅe ḅie pakaḅomẹ se pịkị ọ̀ mịẹse ọ̀ fịafịakẹ.”

Gbọrị Eremeniḅọ Ḅereni

²⁴ Anịsịkị Jizọs Ḅe Ọ̀ nwẹngị so se Taya opuama mị na kpeki nyọ mị nwọ mun mẹ. Ọ̀ gbọrị warị ḅie sọ mun mẹ, se Ò ḅikẹ gbọrịḅọ sọnị nemi na Ori anịnyọ omi-ẹ nwọ ḅẹye mị, ọkụma Ori ineda ḅọị sime kẹ.

²⁵ Gbọrị eremeniḅọ, ḅarọ ma ḅie sitẹmẹ omi-ẹ, á Jizọs Ḅe gbolomaye nwọ naa kirikiri, árị Ọ̀ damaḅo se Ọ̀ ḅụọchuku ḅịkị koromẹ.

²⁶ Eremeniḅọ ma jịn sẹ ḅọ-ẹ, Siria, Fonisia ama ḅie ini yi ḅọ-ẹ. Á Jizọs Ḅe tẹkẹmẹ na Ọ̀ ḅarọ ma ḅie sitẹmẹ ḅe nwọ desin.

²⁷ Ọkụma Jizọs Ḅe nwọ pẹkẹrẹmẹ, “Ye wa tatarị fịye seni awọmẹnịma pịrị. Anị karakarakẹ awọmẹnịma fịye mị nwọse gbin koroma obirima pịrị.”

²⁸ “Ị̀ Nyanaḅọ,” á nwọ pẹkẹrẹmẹ, “Dẹbụl chuku sime obirima sọnị àrị awọmẹnịma fịkọnma fịye nwọ fịfịmẹ!”

²⁹ Anị Jizọs Ḅe nwọse á ḅẹye-ẹ, “Nwọ sime pẹkẹrẹ ḅịpị gose, so warị mun ị́ya tọkụ ma ḅie sitẹmẹ ḅe ọ̀ pakasosam!”

³⁰ Á vinpịkị so warị mun se mọnọye ọgọnọ árịa tọkụ ma ḅọlọlọ simeọkụ nwọ ọrịmẹ; sitẹmẹ ḅe ọ̀ kọkọma á ḅie ḅụ pakasosam.

Jizọs Ḅe Ḅeri Na Ḅịpị Na Iniki Kọnḅọ Gwọmẹ

³¹ Anịeso, Jizọs Ḅe Taya pẹkẹrẹ mị nwọ koromaso, se nwẹngịma mun Saịdọn ḅie ḅọrọ mun Galili ḍapa mị lamẹ, Oyi Ama ma ḅe ateli mị ḅụ wẹrị ḅọrọ somẹ.

³² Ini gbọrị owuḅọ nwọ ọkịḅo Ọ̀ pịrịmẹ, iniki se ọkwẹịn ḅụ ḅụfụka nyanaḅọ, se ini Jizọs Ḅe tẹkẹmẹ na Ọ̀ ḅara seni oria ọgọnọ gbana.

³³ Anị Jizọs Ḅe tomonikpo mị ḅie ḅụ, tomoniḅọ ḅe ngẹrị nwọ ọkị sikimaye-ẹ, se ori Ọ̀ ḅaratụmgbalịma se tomoniḅọ ḅe ḅerima ḅie chu, fụla sara, ḅara se tomoniḅọ ḅe ḅẹlẹ mị lamamẹ.

³⁴ Anịsịkị Jizọs Ḅe Ọ̀ tọrụ dekichịẹma so mị ḍikimẹ, gbunma ḅiede, se nwọse tomoniḅọ ḅe ḅẹmẹ, “Efata,” anị mị fiearịye, “Finji!”

³⁵ Anịkirikiri, tomoniḅọ ḅe ḅerima finjimẹ, ọ̀ ḅẹlẹ pịkị finmamẹ, se ḅụfụka ofori ḅụ ọ̀ sakị ọkwẹịnmẹ.

³⁶ Anịeso Jizọs Ḅe tọn ini pịrịmẹ na ini anị ḅe ye ḍuko gbọrịḅọ sọnị pịrịma; ọkụma Ori anị tọn ini pịrị sịkị re, mị ini anị ḍukotẹịnye-ẹ.

³⁷ Se iḅiọkụ anị naa apụ mamgba ḅụgbiripumamẹ. “Ò ye mamgba nwọ mịẹ iḅima sa ọkụ ḍiki!” ini nwọ ḅẹmẹ. “Ọ̀ mịẹ seni ḅeri inikiḅọ ḅe ye naamẹ, se ḅịpị iniki kọnḅọ ḅe pịkị ọkwẹịnmẹ!”