Mak Iḅi Ḅẹrẹ Mị 5 - Kịrịkẹnị Baịbụl

Jizọs Ḅe Sitẹmẹ Ḅie Sime Gbọrị Owuḅọ Gwọmẹ

¹ Jizọs Ḅe na Oria ọḅụḍukoapụma na ḅo Galili Ḍapa mị ḅụ ísí pẹkẹrẹ mị lamẹ, Gẹrasa pẹkẹrẹ mị ḅụ.

² Jizọs Ḅe arụ mị ḅie koroḅo kirikiri, ḍụẹịn ḍipi nyọ mị ḅie pakaḅo gbọrị owuḅọ Ori na ịrịamẹ. Sitẹmẹ tomoniḅọ ḅe ḅie omi-ẹ

³ se ḍụẹịn ḍipi nyọ mị ḅie ori angamẹ. Gbọrịḅọ sọnị ḅarị ineda ikoli seni ori ịkasị koromakẹ;

⁴ tọn-a sịkị ini ọ̀ ḅụọma na ọ̀ ḅarama na nwọ ịkasịmẹ, ọkụma ini ọkọ mịẹ sịkị goyegoye ori ikolima nwọ anyịmaḅịa, se ọ̀ ḅụọma ḅụ ikulelema nwọ kọsịmaḅịa. Gbọrịḅọ sọnị ineda ḅẹrẹtọn ọ̀ pịrị-ẹka ḅara ọ̀ nwọse kụrọmẹ.

⁵ Ḍin na enekaka na ḅụ, ori iḍupuma ogboku ḅụ na chịngịma ḅie na nwẹngịma nwẹngịma ḅọrọmẹ, oloku se ḍụparị se ọ̀ ḅụ pẹlẹpẹlẹmẹ.

⁶ Sasaju ò simearịogbo, mị ò Jizọs Ḅe ọrịye-ẹ se anị ọ̀ mangị ḅo Jizọs Ḅe la se ọ̀ ḅụọịkpụkụma se ọ̀ tọrọkọ ḅịkịkoro,

⁷ se gele pụkọ se olokumẹ, “Jizọs, Geletẹịn Tamụnọ Ḅe Tọkụ! Ị́ che gose ị̀ ḅụfụkama-ao? À Tamụnọ Ḅe nwọse ị́ tẹkẹmẹ, ḅụfụka se ị̀ pịrị ma!”

⁸ (Ò gose mịn mị ḅẹye anịatịḅị Jizọs Ḅe nwọ ḅẹaḅẹ, “Sitẹmẹ, tomoniḅọ ḅe ḅie pakaḅo!”)

⁹ Anị Jizọs Ḅe ò gbelaye-ẹ, “Nde ị́ya ẹrẹ?” Tomoniḅọ ḅe pẹkẹrẹmẹ, “Ị̀ya ẹrẹ anị ‘Mbogirigiri’—anịatịḅị wa ḅakamẹ!”

¹⁰ Se ọ̀ pa Jizọs Ḅe tẹkẹaḅẹ na sitẹmẹma Ori àrị depakụmama anịnyọ mị ḅụ.

¹¹ Chịngị mị aka sịkị ḅụ yefị simearị oporopo ogbo anịnyọ mị na kpekima simemẹ.

¹² Se, si-a-tẹmẹma Jizọs Ḅẹ tẹkẹmẹ, “Wa se oporopoma fịrịma se wa arịa ḅie sọ.”

¹³ Anị ò ḅereni àrị pịrịye-ẹ, se si-a-tẹmẹma tomoniḅọ ḅe ḅie pakaso mun oporopoma ḅie sọmẹ. Anị bebe oporopo ogbo mị mgba ineda sọnọ ẹndẹ pembe ye laḅịa, arịmgba chịngị mị aka sịkị ḅụ wẹrị be mangị ideri tọrụ mị ḅie koro se simbi fịmẹ.

¹⁴ Oporopoma ḍikiḍikisime apụma ini mangị so se mun pakaye mị ḍuko wasama-ẹmunmẹ ama mị ḅie na ozuma ḅie na. Tomoni pakamun pakaye mị nwọ ḍiki-ẹmunmẹ,

¹⁵ se ini Jizọs Ḅe damaḅo sịkị, ini si-a-tẹmẹ ḅakama ḅie simeḅọ ḅe nwọ ọrịmẹ, ori ọrị apụma ḅalafamẹ ò sime ḅara gose.

¹⁶ Anị ọrị apụma, si-a-tẹmẹma ḅie simeḅọ ḅe ḅụ na oporopoma ḅụ na pakayema nwọ ḍuko tomonima pịrịmẹ.

¹⁷ Se anị ini ḍuko Jizọs Ḅe pịrịye-ẹ na ori inia ama pẹkẹrẹ mị nwọ koromaso.

¹⁸ Se Jizọs Ḅe arụ mị ḅụkụlọarịogbo, mị si-a-tẹmẹma ḅie pakaḅo ḅọ ḅe Ọ̀ tẹkẹye-ẹ, “Ye àrị ị́rị́ na mun!”

¹⁹ Ọkụma Jizọs Ḅe ḅereni ọ̀ pịrịkẹ. Anịnakaraka Ọ̀ nwọse ọ̀ ḅẹmẹ, “Vinpịkị so mun Nyanaḅọ Ḅe ị́ ḅụ nwẹngị opu fịrị mị nwọ ḍuko ị́ furo ḅie apụma pịrị, Ọ̀ pịkị ị́ ḅụ nyana iḅi kuḅie mị na.”

²⁰ Anị tomoniḅọ ḅe so mun Oyi-a Ama mamgba ḅie nwẹngị kelema se Jizọs Ḅe mịẹ ọ̀ pịrịye mị nwọ ḍukoma ḅọrọye-ẹ. Se anị naa apụ mamgba inia ḅụgbiripumẹ.

Jaịrọs Ḅa Ma Na Ḅara Se Jizọs Ḅe Ḅụchụaye Lama Eremeniḅọ Ma Na

²¹ Jizọs Ḅe Ò vinpịkị saḅa ḍapa mị ḅụ ísí pẹkẹrẹ mị nwọ mun mẹ. Anịnyọ, ḍapa mị aka ḅụ ḅaka tomonikpo koḅirima Ò gborimẹ.

²² Jaịrọs, anịnyọ ḅụ sime tẹkẹwarị mị ḅie fịrịnwẹngịḅọ ḅe ḅomẹ, se ò Jizọs Ḅe ọrị sịkị, ori Ọ̀ ḅụọchuku ḅịkị koromẹ

²³ se ori ịnyọ la-ọkụ nwọse Ọ̀ tẹkẹmẹ, “Ị̀ ndụḅa ma á ḅụ opuma kụrọmakẹ. Pasisi, ḅo Ị́ ḅarama seni á ḅụ gbana, mịẹse á ḅụ iḅi se á ḍumoḅịa ḅara!”

²⁴ Anị Jizọs Ḅe sịsẹ ori na mun ye-ẹ. Tọn-a tomoni Ọ̀ ḅụ sọ se ori na mun simemẹ se ini ḅaka so ọkụma, ini angana angana ḅụ Ò gbori kelemamẹ.

²⁵ Gbọrị eremeniḅọ oyimaịn kụra fịnjị nwọse pulo ḅụ ideri opu tọrụsiọrị ḅie simemẹ,

²⁶ tọn-a ḅịrịapụ á gwọsam nwọ ḅẹ sọnị. Árị arịa igbiki mamgba nwọ fama sosam nwọ ḅẹ sọnị, á ḅụ iḅi nakaraka, anị sitẹịnmẹ sịkịmamgba.

²⁷ Á Jizọs Ḅe gbolomaye nwọ naasam, anị ḅụ mị á tomonikpo mị ḅie Oria ọḅụju wẹrị ḅoye-ẹ,

²⁸ se nwọse ḅịpị seni á ḅụ fiemaḅẹ, “À pa ḅara se Oria ḅụchụaye nwọ lama ọkụma, ị̀ ḅụ iḅiḅịa.”

²⁹ Á ḅara se Oria ḅụchụaye mị lamamẹ, se anị kirikiri á ḅụ ideri sime pulo mị dachịẹmẹ se árị á ḅụ nemimẹ na á gwọsam arịa ḅụfụka mị ḅụ.

³⁰ Anị gbọrị kirikiri, Jizọs Ḅe Ò nemimẹ na kụrọ Ọ̀ ḅụ pakasosam, se anị Ọ̀ tọrụ pịkị tomonikpo mị da se gbelaye-ẹ, “Tụḅọ ḅara se ị̀ya ḅụchụaye lama?”

³¹ Oria ọḅụḍukoapụma pẹkẹrẹmẹ, “Tomonikpo mị Ị́ pụnụmarị ọkụ Ị́ nwọ ọrị sịkị nde Ị́ gose gbelaye, tụḅọ ḅara se Ị́ lama nọ?”

³² Ọkụma Jizọs Ḅe Ọ̀ pa nyọ mị ḍiki kelemaḅẹ nwọfa ḅara se Ọ̀ lamaḅọ mị Ọ̀ nwọ ọrịḅịa otuḅo.

³³ Eremeniḅọ ma árị á ḅụ ḅie mịẹsaye mị nwọ nemimẹ anị ḅụ á pakaḅomẹ, se ḅalafa na ḅụgeregere na ḅụ, á ḅịkị Ọ̀ ḅụọchuku koro se kọkọmaye mị mgba nwọ ḍuko Ọ̀ pịrịmẹ.

³⁴ Jizọs Ḅe nwọse á ḅẹmẹ, “Ị̀ ndụḅa, ị́ya ḅereni mị anị ị́ mịẹ iḅimasam. Deinma ḅụ so, se ye ị́ya ḅụfụka ḅụ ị́ gwọ.”

³⁵ Jizọs Ḅe mịn mị nwọ ḅẹarị sịkị ḅụ, Jaịrọs ḅe warị ḅie okunwẹngịapụ ḅo Jaịrọs ḅe lamẹ, se nwọse ọ̀ ḅẹmẹ, “Ị́ ndụḅa ma á fịsam, nde ị́ pa Yeḍieḅọ ḅe ḅụfụkamarịye?”

³⁶ Jizọs Ḅe Ori ini ḍukoarịye mị nwọ abalakẹ, ọkụma nwọse tẹkẹwarị mị ḅe tịḅịnịḅọ ḅe ḅẹmẹ, “Ḅalafa ma, ḅereni nyana.”

³⁷ Anị ḅụ Ò ḅereni gbọrịḅọ sọnị pịrịkẹ Ò ḍuko mun, Pita ḅe na, Jems ḅe na numbireowu Jọn ḅe na sikima ọkụma.

³⁸ Ini ḅo fịrịnwẹngịḅọ ḅe warị lasịkị, Jizọs Ḅe Ò tomonima ḅe ḅụḅalaḅala mị ọrị pịkị inia oloku owu-a tịḅịḅiema nwọ naamẹ.

³⁹ Ọ̀ warị ḅie sọ se nwọse ini ḅẹmẹ, “Ó cheye gose mịn ḅụḅalaḅala mị nwọ nyana? Cheye gose ómine owu-ao? Tọkụ ma á fịkẹ á papa mọnọaḅẹ!”

⁴⁰ Ini Ọ̀ ḍẹrị se Ò se kpọtimẹ, se anị ḅụ ori inimgba nwọ depakụmamẹ, se tọkụ ma ḍa ḅe na nyọngọrọma na, pịkị oria tẹrẹ-a ọḅụḍukoapụma na nwọ ọkị, se so tọkụ ma ḅọlọlọ sime jukuru ḅie mun mẹ.

⁴¹ Ori á ḅara ọlọ se nwọse á ḅẹmẹ, “Talita, kumi,” anị mị fiearịye, “Eremenitọkụ, à nwọse ị́ ḅẹaḅẹ sịsẹ!”

⁴² Anị gbọrị kirikiri á sịsẹ se sakị nwẹngịma ḅọrọmẹ. (Árị oyimaịn kụra fịnjị nwọ lasam.) Mịn mị paka sịkị, anị opuma inia ḅụgbiripumamẹ.

⁴³ Ọkụma Jizọs Ḅe Ọ̀ kụrọma tọn ini pịrịmẹ na ini ḍuko gbọrịḅọ sọnị pịrị ma, se Ọ̀ nwọ ḅẹmẹ, “Ó ye se á pịrị se á fị.”