Mak Iḅi Ḅẹrẹ Mị 3 - Kịrịkẹnị Baịbụl

Gbọrị Ḅarafịsa Owuḅọ Ḅe

¹ Anịeso Jizọs Ḅe ò vinpịkị so tẹkẹwarị mị nwọ mun mẹ, anịnyọ gbọrị ḅarafịsa owuḅọ simemẹ.

² Dapụ anịnyọ simemẹ, Jizọs Ḅe Ọ̀ mịẹirimamẹ nwọ ḅẹye seni Oria ọgọnọ gbanaḅịa apụ, anịẹrẹchị ini iḅiọkụma Ori ẹnyẹmẹ, nwọfa Ori Ịnyọsara Ene mị ḅie tomoniḅọ ḅe gwọḅịa-ẹtuḅo.

³ Jizọs Ḅe nwọse ḅarafịsa ḅọ ḅe ḅẹmẹ, “Paka tọrọkọ ḅo.”

⁴ Anịsịkị, Ò tomonima gbelamẹ, “Cheye, mịna Oloko mị nwọ ḅereni wa pịrị na wa Ịnyọsara Ene mị ḅie mịẹ nwọ ḅẹye? Ḅarachụa nweni pịrị mụnọ, anịkanịka ye se nweni lama? Tomoniḅọ ḍumo ḍụa mụnọ, anịkanịka anị fama?” Ọkụma ini gbọrịye sọnị ḍukokẹ.

⁵ Anị Jizọs Ḅe ịganịmamẹ, Ori ini ḍiki kelema sịkị, ọkụma anị-ẹ ḅẹ sọnị, Ọ̀ pịkị anị gbọrị sịkị ḅụ ḍikitịḅịfoin nyana ini pịrịmẹ, anịatịḅị ini opuma ininachịn pịkị mịẹirimamẹ. Anịeso Ọ̀ nwọse tomoniḅọ ḅe ḅẹmẹ, “Ị́ ḅara ịsụn pakụma.” Ori anị ịsụn pakụma se anị ḅo pịkị iḅimẹ.

⁶ Anị Farisiapụma tẹkẹwarị mị koromasoye-ẹ, se mun Hẹrọd ḅe ḅụ simeapụma ḅie dapụ na ịrịamẹ, se ini wẹrị Jizọs Ḅe ḅaaḅịa ọkụ ḅẹrẹ nwọ ḅiamẹ.

Ḍapa Aka ḅụ sime Tomonikpo

⁷ Jizọs Ḅe na oria ọḅụḍukoapụma na pakaso Galili Tọrụ mị nwọ mun mẹ, se ḅaka tomonikpo ò ḍuko mun mẹ. Tomonima Galili ḅie na, Judia ḅie na,

⁸ pịkị Jerusalẹm ḅie na, Idumịa pẹkẹrẹ ḅụ na, Jọdan mị saḅa koro ísí pẹkẹrẹ ḅụ na, pịkị ini na palịa opuamama Taya na Saịdọn-a pẹkẹrẹma ḅụ wẹrị ḅomẹ. Mịna ḅaka tomonikpo mị Jizọs Ḅe nwọ damaḅomẹ, anịatịḅị Ọ̀ mịẹarịyema ini nwọ naamẹ.

⁹ Tomonikpo mị ḅaka so ọkụma, Jizọs Ḅe nwọse Oria ọḅụḍukoapụma ḅẹmẹ na ini arụ karakarama Ọ̀ pịrị, mịẹse tomonima Ọ̀ nanga kọsịma ẹka ḅara.

¹⁰ Ọ̀ tọn-a tomoni nwọ gwọsam, anịẹrẹchị obiapụ mamgba pụnụma Ò sime nyọ nwọ daḅoaḅẹ, pa ḅara seni Ọ̀ lamaḅịa ẹrẹchị.

¹¹ Se si-a-tẹmẹ ḅie ḅụ simeapụma Ori ọrị sịkị goyegoye ini ḅịkị koro se olokumẹ, “Ị́rị́ anị Tamụnọ Tọkụ Ḅe-ẹ!”

¹² Jizọs Ḅe si-a-tẹmẹma ḍiki ịganịmẹ na àrị Ò ḍukopakụma ma-ẹ.

Jizọs Ḅe Oyimaịn Okunwẹngịapụ fịnjịma Sẹlẹmẹ

¹³ Anịeso Jizọs Ḅe ori iwo gbọrị chịngị ọgọnọ mun se obi owuapụma nwọ chịn Ọ̀ ḅụ pịrịmẹ. Ini Ọ̀ damaḅomẹ,

¹⁴ se Ori oyimaịn apụ fịnjị sẹlẹọkịmẹ, se okunwẹngịapụ nwọse ini chịnmẹ. Ọ̀ nwọ ḍuko ini pịrịmẹ, “Àrị ọ́ sẹlẹsam, ómine ị̀rị̀ na simeḅịa ẹrẹchị.” “À pịkị ọ́ fịrịma pakụmaḅịa se ó mun Tamụnọ ḅẹrẹ mị nwọ ḍukoḅịa,

¹⁵ ọ́ pịkị kụrọ nyana se sitẹmẹma desinḅịa.”

¹⁶ Mịna apụma anị Ọ̀ sẹlẹ oyimaịn apụ fịnjịma-ẹ: Saịmọn (Jizọs Ḅe Pita nwọse ọ̀ chịnmẹ);

¹⁷ Jems ḅe na numbireowu Jọn ḅe na, Zẹbidi owuapụ awọma (Jizọs Ḅe Ḅoanajis nwọse ini chịnmẹ, anị mị fiearịye, “Soalagba Awọ”);

¹⁸ Andru, Filip, Batolomiu, Matio, Tọmọs, Jems Alfịọs yaḅe na, Tadịọs, Saịmọn Sẹḅẹlẹmaḅọ ḅe na,

¹⁹ pịkị Judas Ịskarịọt, Jizọs Ḅe seni ịbafị ḅọ ḅe na.

Jizọs Ḅe na Bẹlzibọl ḅe na

²⁰ Anịeso, Jizọs Ḅe Ò so warị mun mẹ. Jịn tomonikpo koḅirimamẹ, anịẹrẹchị Jizọs Ḅe na Oria ọḅụḍukoapụma na ini sịkị nyana se yefịkẹ.

²¹ Ò furoapụma mịn mị gbolomaye nwọ naa sịkị, ini paka mun Ori ọkị-ẹmun mẹ, anịatịḅị tomonima nwọ ḅẹaḅẹ na, “Ọ̀ ḅarị Ọ̀ ḅụ nemikẹ!”

²² Jerusalẹm mị ḅie wẹrị ḅo Oloko ḍieapụma ḅe dapụ nwọ ḅẹaḅẹ, “Bẹlzibọl Ò ḅie omi-ẹ! Sitẹmẹma ḅe tịḅịnịḅọ ḅe mị kụrọ se Ọ̀ pịrị se Ò se sitẹmẹma nwọ depakụmarịye-ẹ.”

²³ Anị Jizọs Ḅe mịna tomonima chịn Ọ̀ ḅụ pịrị se kaḅo ḅụ ọkwẹịn kọn ini pịrịye-ẹ, “Nde Oru ḅe ineda Oru ḅe desinḅịa ọkụ?

²⁴ Amanyanakiri nemikase mịna ḅụ pu se juju ḅụ wẹrị se jịnye jịnye na owusọ ọkụma, anị amanyanakiri mị anị ḅịkịḅịa.

²⁵ Furo nemikase mịna ḅụ pu se pẹkẹrẹ pẹkẹrẹ ḅụ wẹrị se jịnye jịnye na owusọmẹ ḅẹḅẹ, anị furo mị anị ḅịkịḅịa.

²⁶ Anị gbọrị ḅara mị ḅụ, Oru amanyanakiri nemikase mịna ḅụ pu juju ḅụ wẹrịmẹ ḅẹḅẹ, anị ḍin la ẹkẹ, ọkụma anị ḅịkịḅịa, se ḅarị ineda chịẹ ẹkẹ.

²⁷ “Gbọrịḅọ sọnị ineda kan sọmun kụrọḅọ warị ḅie oria ye nwọ deki ẹkẹ, ọ̀ tatarị kụrọḅọ ḅe fịna koromaka simeogbo anịsịkị re mị ori ineda oria warị mị nwọ ọfọịnḅịaye-ẹ.

²⁸ “À kọkọmaye mị ḍuko ọ́ pịrịaḅẹ, ini ineda ḅarasin tomoni pịrịḅịa inia sima na Tamụnọ fiesima mamgba ḅụ na.

²⁹ Ọkụma si ọkwẹịn kọn se Fịafịa Tẹmẹ Ḅe ọgọnọ gbana ḅọ goyegoye ngịsị ini ḅarasin iniḅọ pịrị ẹkẹ, anịatịḅị iniḅọ simegbaso si nwọ mịẹsam.”

³⁰ (Jizọs Ḅe mịn mị ḅẹmẹ anịatịḅị dapụ nwọ ḍukoaḅẹ, na “Sitẹmẹ Ò ḅie omi-ẹ.”)

Jizọs Ḅe Nyengi Ma Na Oria Owuapụ Mịnapụma Na

³¹ Anịeso, Jizọs Ḅe nyengima na oria owuapụ mịnapụma na ḅo lamẹ. Ini nụngọ ogbo chịẹsimemẹ, se Ori ọrịḅịa ẹrẹchị, oku se Ọ̀ fịrịmamẹ.

³² Tomonikpo sime Jizọs Ḅe kelema waraḅẹ, se ini ḍuko Ọ̀ pịrịmẹ na, “Ḍiki, ị́ nyengima na ị́ya mịnapụma na, ini nụngọ omi-ẹ, ini pịkị ị́ ḅiaḅẹ.”

³³ Jizọs Ḅe pẹkẹrẹmẹ, “Ị̀ nyengima tụḅọ? Nde apụ, ị̀ya mịnapụ?”

³⁴ Sime Ò kelema tomonima Ọ̀ nwọ ḍiki se nwọ ḅẹmẹ, “Ḍiki! Ị̀ nyengima na ị̀ya mịnapụma na mịn ini-ẹ!

³⁵ Tamụnọ Ḅe tọnye mịẹḅọ goyegoye, iniḅọ anị ị̀ mbireḅe-ẹ, ị̀ mbụrama-ẹ, pịkị ị̀ nyengima-ẹ.”