Mak Iḅi Ḅẹrẹ Mị 2 - Kịrịkẹnị Baịbụl

Jizọs Ḅe Gbọrị Ḅara Na Ḅụọ Na Fị Owuḅọ Gwọmẹ

¹ Ḍin kalaye ḅọrọ sịkị, Jizọs Ḅe Ò vinpịkị so Kapanịọm mun mẹ, se Ori ama omi-ẹ nwọḅẹye mị wasamamẹ.

² Tọn-a tomoni ḅo koḅirimamẹ; anịẹrẹchị ẹmbẹ ngịsị ofori-ẹ, ḅọkọ mị tọrọkọ sọnị. Jizọs Ḅe Tamụnọ ọkwẹịn mị nwọ ḍuko ini pịrị simeogbo

³ anị inein-a owuapụ, gbọrị ḅara na ḅụọ na fịsaḅọ nwọ pụra se warị sọ ḅo Ọ̀ pịrịye-ẹ.

⁴ Ọkụma tomonikpo mị gose, ini ineda tomoniḅọ ḅe ọkịḅo Jizọs Ḅe sime anga lakẹ. Anị ini Jizọs Ḅe sime nyọ kịẹnma warịochu mị toluye-ẹ. Ini anị kan tolu finji so sịkị, ini tomoniḅọ ḅe seni koromamẹ, oria iḅila ọgọnọ ọ̀ ḅọlọlọ sime ḅara ḅụ.

⁵ Jizọs Ḅe ini nyana ḅereni mị ḍụḅa la ọkụ nwọ ọrị sịkị, Ọ̀ nwọse ḅara na ḅụọ na fịsaḅọ ḅe ḅẹmẹ, “Ị̀ya tọkụ, ị́ya sima ḅụ ini ḅarasin ị́ pịrịsam.”

⁶ Anịnyọ kpọnjị sime Oloko ḍieapụma ḅe dapụ inia kuḅie ḅụ koromamẹ,

⁷ “Nde ḅe ḅọ Ḅe ḅiekpọma mịn ḅara mị se ọkwẹịn Tamụnọ Ḅe sima ọkụ? Ọkwẹịn gbẹịnkaye Ọ̀ nwọ ọkwẹịn aḅẹ! Tamụnọ Ḅe kẹngẹ anị ineda siḅụ-ḅarasin nweni pịrịḅịaye-ẹ!”

⁸ Anịkirikiri, Jizọs Ḅe inia kuḅiema ḅụ ini koromarịyema nwọ nemimẹ, se nwọse ini ḅẹmẹ, “Cheye gose, ọ́ nwọ sime aye koroma-ao?

⁹ Nwọse ḅe ḅara na ḅụọ na fịsaḅọ ḅe ḅẹ na, ‘Ị́ya sima ḅụ ini ḅarasin ị́ pịrịsam,’ sarasaratẹịn mụnọ, anịkanịka, nwọse ọ̀ ḅẹ na, ‘Sịsẹ chịẹ, ị́ya iḅila deki se nwẹngị so’ mị sarasaratẹịn?

¹⁰ À mịẹse ọ́ nemiḅịa na, Tomoniḅọ Tọkụ Ḅe sẹkiri Ọ̀ kụrọ nyanamẹ siḅụ-ḅarasin nweni pịrị.” Anị Ọ̀ nwọse ḅara na ḅụọ na fịsaḅọ ḅe ḅẹye-ẹ,

¹¹ “À ḍuko ị́ pịrịaḅẹ sịsẹ chịẹ, ị́ya iḅila deki, se so warị mun!”

¹² Inimgba tọrụ se ḍikiarịogbo, tomoniḅọ ḅe ọ̀ sịsẹ chịẹmẹ, se oria iḅila mị deki, se be nwẹngị somẹ. Anị inimgba ḅụgbiripumamẹ, se ini Tamụnọ Ḅe bomamẹ, se nwọ ḅẹmẹ, “Jịn sịkị mịn mị na kịkịnaye ma wa ọrịkẹ!”

Jizọs Ḅe Livaị Ḅe Chịnmẹ

¹³ Jizọs Ḅe pịkị nwẹngị paka Galili Tọrụ mị aka mun mẹ. Tomonikpo Ọ̀ damaḅomẹ, se Ọ̀ sakị ye se ini ḍiemẹ.

¹⁴ Ọ̀ nwẹngịmamun-arị ogbo Ọ̀ gbọrị amaochoḅọ, Livaị, Alfịọs yaḅe nwọ ọrịmẹ, oria fịrịnwẹngị warị mị ḅie ò sime waraḅẹ, Jizọs Ḅe nwọse ọ̀ ḅẹmẹ, “Ị̀ ḍuko.” Livaị ḅe sịsẹ se Ò ḍukomẹ.

¹⁵ Anịeso Jizọs Ḅe Ò Livaị ḅe warị ḅie yefịsimemẹ. Tọn-a amaochoapụ na pịkị simịẹapụma na Jizọs Ḅe ḍukosimemẹ, se inia ḅie tọn-a apụ Jizọs Ḅe na oria ọḅụḍukoapụma na ḅụ sọ yefịsimemẹ.

¹⁶ Oloko ḍieapụma ḅe dapụ anị Farisiapụma, ọrịmẹ na Jizọs Ḅe Ò simịẹapụma na amaochoapụma na gboloma yefịaḅẹ nwọ ḅẹ sịkị, anị ini Oria ọḅụḍukoapụma gbelaye-ẹ, “Nde Ò gose nwọ sime tomoni na yefịarịye?”

¹⁷ Jizọs Ḅe ini ḍukoye mị naa se pẹkẹrẹmẹ, “Obikapụma ini ḅịrịḅọ ḅikẹ, ọkụma obiapụma kẹngẹ-ẹ. À ḅo karakarapụ nwọ chịn-ẹḅokẹ, ọkụma ini siapụma-ẹ, mịẹse ini inia sima ḅụ vinpịkịḅịa ẹrẹchị.”

Ḅuruseḅụḅama Gboloma Ḅẹrẹ Mị

¹⁸ Gbọrị sịkị ḅụ, Jọn Mengisaraḅọ ḅe, ọḅụḍukoapụma na Farisiapụ ọḅụḍukoapụma na ḅuruseḅụḅaama simemẹ. Nweni Jizọs Ḅe damaḅo se Ò gbelamẹ, “Cheye mịẹse Jọn Mengisaraḅọ ḅe ọḅụḍukoapụma na Farisiapụma ọḅụḍukoapụma na ḅuruseḅụḅaama, se Ị́ya ọḅụḍukoapụma gose ọkọ mịẹkaye?”

¹⁹ Jizọs Ḅe pẹkẹrẹmẹ, “Ọ́ chịn ḅara ereya nyọ sime igoniapụ yefịka ḅụ sime ḅe? Anị ọkọ simekẹ yemịẹmịẹḅara ḅụ! Ereyaḅọ ḅe ini na sime warasịkị ḅụ, ini ọkọ mịẹ ẹkẹ.

²⁰ Ọkụma sịkị ḅoḅịa ini inia ḅie ereyaḅọ ḅe nwọ kun soḅịa sịkị, anị ene mị ḅo laḅịa sịkị, anịsịkị ini ḅuruseḅụḅaama ḅụ simeḅịa.

²¹ “Ịwọ ḅịtẹ seni olomu ḅụchụaye sẹlẹḅịa ḅọ ofori-ẹ, ò nemikase ọkọ mịẹmẹ ḅẹḅẹ, ịwọ pẹkẹrẹ mị anị olomuye mị ḅụ yekan sinḅịa, se ḍụḅatẹịn kanye nwọ mịẹḅịa.

²² Ịwọ iru nwọse olomusa nama apụra ololo ḅie chụaḅịa ḅọ pịkị ofori-ẹ, ò nemikase ọkọ mịẹmẹ ḅẹḅẹ, iru mị anị olomu nama apụra ololo mị nwọ poloḅịa, se iru mị na nama apụra ololo mị na igweinḅịa. Anịnakaraka, ịwọ iru mị nwọse ịwọ nama apụra ololo mị ḅie chụa.”

Ịnyọsara Ene Mị Gboloma Ḅẹrẹ

²³ Jizọs Ḅe pịkị Ịnyọsara Ene mị ḅie ịpịamgba ozu ḅie nwẹngị ḅọrọsimemẹ. Oria ọḅụḍukoapụma Ò ḍuko nwẹngị ḅọrọarịogbo, anị ini sakị ịpịamgbama kaịn fịye-ẹ.

²⁴ Anị Farisiapụma nwọse Jizọs Ḅe ḅẹye-ẹ, “Ḍiki, nde Ị́ya ọḅụḍukoapụma Ịnyọsara Ene mị ḅie mịna oloko mị na kurakaye nwọ mịẹye!”

²⁵ Jizọs Ḅe pẹkẹrẹmẹ, “Devid ḅe anịsịkị mịẹye mị ma ó goka, fịye ọ̀ ḅụ palịma sịkị? Ḅuru ori na oria tomonima na nwọ tarịmẹ,

²⁶ anị ọ̀ Tamụnọ warị mị ḅie sọmunye-ẹ se ini seni agbamịẹ Tamụnọ Ḅe pịrị fịturu mị ọkị fịmẹ. Mịn mị mịẹ sịkị anị Abaịata ḅe Gele Agbamịẹḅọ ḅụ simearị sịkị ḅụ-ẹ. Mịna Oloko mị sime ḅara ḅụ, agbamịẹapụ kẹngẹ anị mịn fịturu mị nwọ fịḅịaye-ẹ, ọkụma Devid ḅe ori anị fịmẹ pịkị anị seni oria tomonima sọnị nwọ pịrịmẹ.”

²⁷ Se Jizọs Ḅe ḍukopẹlẹmẹ, “Tomoniḅọ iḅi gose ini Ịnyọsara Ene mị nwọ mịẹmẹ; ini tomoniḅọ mịẹse Ịnyọsara Ene mị pịrịkẹ.

²⁸ Anịọkụma, Tomoniḅọ Tọkụ Ḅe ọ̀ Nyanaḅọ sọ seni Ịnyọsara Ene mị sọnị nwọ pịrịmẹ.”