Mak Iḅi Ḅẹrẹ Mị 11 - Kịrịkẹnị Baịbụl

Ọmụḅaraiḅi Nwọse Jerusalẹm Ḅie Sọ Mị

¹ Ini ḅo Jerusalẹm na kpeki sịkị Bẹtfagi na Bẹtani amama nyọ mị ḅụ, ini ḅo Oliv Tụndụ mị lamẹ. Jizọs Ḅe ori oria ọḅụḍukoapụma ḅie mama apụ nwọse tọrọkọ fịrịmamẹ

² se Ọ̀ nwọse ini ḅẹmẹ, “Ọ́mịna tọrọkọ sime ịwọama mị ọ́ nwọ mun. Ó mun nyọ la kirikiri, ó gbọrị ayamburama asụn nwọ ọrịḅịa, kpọ waraḅẹ, gbọrịḅọ sọnị ma tanjị nwẹngịka wu. Ómine ò finma, se ò se mịọ ḅo.

³ Se tomoniḅọ nemikase ó cheye gose ọkọ mịẹ nọ nwọse ó gbelamẹ ḅẹḅẹ, ó ḍuko ọ̀ pịrị na Nyanaḅọ Ḅe ò ḅimẹ, se ọ̀ pịkị ḅọlọka sịkị ò se ọ̀ fịrịmaḅịa.”

⁴ Se anị ini mun ateli ḅie ayamburama asụn ḅe nwọ ọrịye-ẹ, gbọrị warịḅọkọ ḅụ ini ọ̀ kpọ waraḅẹ. Ini ò finmarị sịkị,

⁵ chịẹsimeapụ ma ḅie dapụ ini gbelamẹ, “Cheye ọ́ nwọ mịẹ-ao, ori ayamburama asụn ḅe ọ́ nwọ finma-ao?”

⁶ Jizọs Ḅe ḍuko ini pịrị ọkụ mị ini nwọ pẹkẹrẹmẹ, se tomonima ini wẹrịsomẹ.

⁷ Ini ayamburama asụn ḅe nwọ ọkịḅo Jizọs Ḅe pịrịmẹ, inia ḅụchụayema nwọse nama ḅe ọgọnọ isemẹ, se Jizọs Ḅe oria ọgọnọ ḅụkụlọmẹ.

⁸ Tọn-a tomoni inia ḅụchụayema se ateliogbo ḅụ isemẹ, ísíapụma pịkị ozuma ḅie chịn ịkpangịma nwọ pẹlẹ se isemẹ.

⁹ Tọrọkọ sime apụma na ọḅụju sime apụma na oloku se nwọ ḅẹaḅẹ, “Ọ́ Tamụnọ Ḅe tokoni! Ye Tamụnọ Ḅe, Nyanaḅọ Ḅe ẹrẹ ḅụ ḅoarị ḅọ ḅe ḅẹlẹma!

¹⁰ Tamụnọ Ḅe ḅoarị mịna Ḍa Devid amanyanakiri mị ḅẹlẹma! Tokoni sime Tamụnọ Ḅe pịrị!”

¹¹ Jizọs Ḅe Ò Jerusalẹm ḅie sọmẹ, se Oputẹkẹwarị mị ḅie mun, se yelayelaye nwọḍiki kelemamẹ. Ọkụma ene mị sisaye gose, ori na oyimaịn ọḅụḍukoapụ fịnjịma na so Bẹtani mun mẹ.

Jizọs Ḅe Figi Chịn Mị Worimẹ

¹² Anị ḍukoma ene ḅụ, ini Bẹtani vinpịkị ḅoarịogbo, ḅuru Jizọs Ḅe tarịmẹ.

¹³ Sasaju ịnyanya ḅụ ḅein figi chịn Ọ̀ nwọ ọrịmẹ, se anị ori anị damamunye-ẹ, nwọfa Ori anịa ọgọnọ figi mgbọlụ ọrị ḅịa otuḅo. Ọkụma Ò ḅo anị lasịkị, ịnyanya kẹngẹ mị Ori ọrịye-ẹ, anịatịḅị figi chịn mgbọlụ chụa sịkịkẹ.

¹⁴ Jizọs Ḅe nwọse figi chịn mị ḅẹmẹ, “Gbọrịḅọ sọnị ḅarị ị́ ḅụ figi mgbọlụ nwọ fị ẹkẹ!” Se Oria ọḅụḍukoapụma ò ḍukoye mị nwọ naamẹ.

Jizọs Ḅe Oputẹkẹwarị Mị Mun mẹ

¹⁵ Ini ḅo Jerusalẹm lasịkị, Jizọs Ḅe Ori Oputẹkẹwarị mị ḅie sọ se sakị anịa ḅie ye fẹ pịkịna yedẹrịapụ mamgba nwọ depakụmamẹ. Ọ̀ pịkị igbiki ḍinmarịapụma dẹbụlma na elesika dẹrịapụma se sime ịkasịema na nwọ deki gbinmẹ,

¹⁶ Ọ̀ pịkị ḍụkụ gbọrịḅọ sọnị pịrịkẹ, ini ḅo yepụra Oputẹkẹwarị odo mị ḅie ḅọrọ.

¹⁷ Anịsịkị ò ḅo ye se tomonima ḍiemẹ, “Fịafịa ḍiri ma ḅie, ini gịẹịnsam na Tamụnọ Ḅe nwọ ḅẹmẹ, ‘Ị̀ya Oputẹkẹwarị mị tomoni mamgba tẹkẹwarị ini nwọse anị chịnḅịa.’ Ọkụma ómine anị pịkị se furuapụ ikpu nwọ mịẹsam!”

¹⁸ Tịḅịnị agbamịẹapụma na Oloko ḍieapụma na mịn mị nwọ naamẹ, se anị ini sakị Jizọs Ḅe ḅaaḅịa ọkụ nwọ ḍọkịye-ẹ. Ini Ò ḍiki ḅalafamẹ, anịatịḅị oria yeḍie ḅara mị anị bebe tomonikpo mị ḅụgbiripumamẹ.

¹⁹ Saso sọ sịkị, Jizọs Ḅe na Oria ọḅụḍukoapụma na opuama mị koromasomẹ.

Figi Chịn Mị Ḅe Ḍawọye

²⁰ Anị ḍukoma ene mị ḅe dede funfun ḅụ, ini ateliogbo nwẹngịma mun-arị sịkị ini figi chịn mị nwọ ọrịmẹ. Anị samịnasam ọgọnọ ḅụ ọkịmun kunoma la.

²¹ Pita ḅe pakaye mị se ḅiekoroma ḅụ, nwọse Jizọs Ḅe ḅẹmẹ, “Ḍiki, Yeḍieḅọ, ị́ worinime se pịrị figi chịn mị fịsam!”

²² Jizọs Ḅe nwọse ini pẹkẹrẹmẹ, “Ọ́ Tamụnọ Ḅe ḅụ ḅereni nyana.

²³ Ómine ineda nwọse mị chịngị mị ḅẹḅịa, sịsẹ, se ị́ ḅụ se mun tọrụ mị ḅie gbin, ó kuḅiemgbọlụ maịn maịn mịẹkẹ ḅẹḅẹ, ọkụma ḅereni na ó ḍukoye mị mịẹḅịa ḅẹḅẹ, anị mịẹ ọ́ pịrịḅịa.

²⁴ Mịn mị gose, à ḍuko ọ́ pịrịaḅẹ: Ọ́ tẹkẹ se ye ḅiḅịa sịkị, ó ḅereni na anị ọ́ ḅara lasam, anịsịkị ó ḅi yelayelaye ọ́ ḅara laḅịa.

²⁵ Se ọ́ chịẹsime se tẹkẹḅịa sịkị layelaye, tomoniḅọ se ọ́ mịẹ siye layelaye ọ́ ḅarasin iniḅọ pịrị, mịẹse ọ́mịna Ḍa soḅie simeḅọ ḅe sọnị ọ́mịna sima ḅụ ḅarasin ọ́ pịrịḅịa ḅara.

²⁶ (Ó nemikase ḅarasin jịn apụ pịrịkẹ ḅẹḅẹ, ọ́mịna Ḍa soḅie simeḅọ Ḅe sọnị ọ́mịna sima ḅụ Ọ̀ ḅarasin ọ́ pịrị ẹkẹ.”)

Jizọs Ḅe Nyana Kụrọ Mị Gboloma Ḅẹrẹ Mị

²⁷ Ini pịkị jịn sịkị se Jerusalẹm nwọ ḅomẹ. Jizọs Ḅe Oputẹkẹwarị mị ḅie nwẹngịarịogbo, tịḅịnị agbamịẹapụma na Oloko ḍieapụma na, pịkị sẹnịapụma na ọ́ damaḅomẹ

²⁸ se nwọse Ò gbelamẹ, “Che kụrọ Ị́ nwọse mayema nwọ mịẹ-ao? Tụḅọ mị kụrọ mị se Ị́ pịrị?”

²⁹ Jizọs Ḅe ini pẹkẹrẹmẹ, “À pa gbọrị ḅẹrẹ nwọse ó gbelaḅịa, se ómine anịa pẹkẹrẹḅịpị se ị̀ pịrịmẹ ḅẹḅẹ, anịsịkị à se mayema mịẹ kụrọ mị à nwọ ḍuko ọ́ pịrịḅịa.

³⁰ Ó ḍuko ọkọmụ, Jọn ḅe se mengisara kụrọ mị anị nde anga ḅụ ḅo: Tamụnọ ḅara anị ḅo mụnọ se tomoni ḅara anị ḅo?”

³¹ Ini sakị inia ogboku anị pekeleḍikimẹ, “Cheye wa nwọ ḍuko ḅe? ‘Tamụnọ ḅara anị ḅomẹ’ wa nwọ pẹkẹrẹ ọkụma, Ọ̀ nwọ ḅẹḅịa, ‘Ó che gose anịọkụma Jọn ḅe ḅerenika?’

³² Ọkụma wa nemikase, ‘Tomoni-a ḅara ḅomẹ, nwọ ḅẹ ọkụma.’” (Ini tomonima ḍikiḅalafamẹ, anịatịḅị anị ọrị ḅọḅọ ḅụokoromẹ na Jọn ḅe ịkịankoroḅọ-ẹ.)

³³ Anị gose ini nwọse Jizọs Ḅe pẹkẹrẹmẹ, “Wa nemikẹ.” Jizọs Ḅe nwọse ini ḅẹmẹ, “Anị-ẹ ḅẹḅẹ, ị̀rị̀ sọnị à se mayema mịẹ kụrọ mị ḅo nyọ à ḍuko ọ́ pịrị ẹkẹ.”