Maịnkarama Oloko 9 - Kịrịkẹnị Baịbụl

Tomoni Ma Ḅe Ḅịpịpokika Mị

¹ “Ó poki, Izrẹlapụ! Mịmgba ọ́ Jọdan Tọrụ mị saḅa mun opusọ pịkị kụrọ ọ́ nẹngịapụ ama nwọ ọkị anga-ẹmun-aḅẹ. Inia opuamama ḍụḅamẹ, arịa onu ma gelemun so mị bịanmẹ.

² Tomonima na mịnaḅụ na gele pịkị kụrọ apụ-ẹ; ini ma godoro apụ-ẹ, ini ḍuko ọ́ pịkị naasam na ineda dadama inia tọrọkọ chịẹ-chịẹ ḅọ ngịsị ofori-ẹ.

³ Ọkụma mịọkụ ọ́ ḅarana ọrịḅịa na Nyanaḅọ ọ́mịna Tamụnọ Ḅe kọrịarị owoi fịnị ḅara nwọse ọ́mịna tọrọkọ pẹlẹma munḅịa. Ori ini nẹngịmaḅịa ọ́ nwẹngị tọrọkọ mun-arị sịkị, mịẹse ori ini depakụma se ọ́ sarasarama ini ḅaasinḅịa ọkụ, anị ò ḅereni ọ́ pịrịsa ḅaraḅụ.

⁴ “Nyanaḅọ ọ́mịna Tamụnọ Ḅe ini depakụma ọ́ pịrịsa ḅẹḅẹ, ọ́mịna ḅie ọ́ ḅẹma na ori ómine ọkịḅo mịn ama mị ḅie chumẹ na ómine anị nyana ọkị gbẹịnmẹ. Ẹn-ẹn, Nyanaḅọ Ḅe mịna apụma ori ini depakụma ọ́ pịrịaḅẹ anịatịḅị ini sitịḅịnyanamẹ.

⁵ Ómine iḅi apụ-ẹ, ọ́ pịkị karakaraye mịẹmẹ nwọḅẹ ẹrẹchịkẹ Nyanaḅọ Ḅe ọ́ mịẹse ómine inia ama ọkịarịye-ẹ nwọḅẹyekẹ. Ori ini depakụmaḅịa anịatịḅị ini sitịḅịnyanamẹ pịkị ò ḅereni ọ́mịna olomu-aḍapụ, Ebraham ḅe na, Aịzịk ḅe na, pịkị Jekọb ḅe na pịrịye mị ọ̀ nwọ mịẹ ḅeinma mẹ.

⁶ Ó nemi na Nyanaḅọ Ḅe gose mị fịye pakụma ama mị se ọ́ pịrịarịye anị ómine anị nyana gbẹịnmẹ gosekẹ. Ẹn-ẹn, ómine ininachịn apụ-ẹ.

⁷ “Ngịsị ó se ḅieḅaramama ọ́ wẹrị onwun ele mị ḅieḅụ Nyanaḅọ ọ́mịna Tamụnọ Ḅe ịganịma la-ọkụ mị. Ómine Ijipt mị ḅie pakaso ene ḅụ ọkịḅo ó ḅo mịanga la ene la, ọ́ nyana ḅereni ọ̀ pịrịkẹ.

⁸ Saịnaị Tụndụ mị nyọ ḅụ sọnị Nyanaḅọ Ḅe ómine ori ịganịmamẹ-ori ịganịma so ọkụma ori ọ́ ḅaasinḅịa ḅara-ẹ.

⁹ Àrị iwo tụndụ mị tanjị mun se Nyanaḅọ Ḅe ómine na fị ọḅọkụ mị gịẹịn ḍụparị pẹkẹrẹma ọkị-emun mẹ. Anịju à simemun enekaka-a mesi na ḍin-a mesi na nwọ lamẹ yefịka pịkị mengi ḅuka ḅụ.

¹⁰ Anịsịkị Nyanaḅọ Ḅe mama ḍụparị pẹkẹrẹ ma seni ị̀ pịrịmẹ, anị ori ḅarana ọ̀ ḅara se gịẹịn ayema, tụndụ mị chuku ó koḅirima sime se fịnị mị ḅie ọ̀ wẹrị ọkwẹịn ọ́ pịrị ene mị.

¹¹ Iin, àrị enekaka-a mesi ma na ḍin-a mesi ma na ḅọrọ sịkị, Nyanaḅọ Ḅe ọḅọkụ mị seni gịẹịn koroma ḍụparị mama pẹkẹrẹ ma se ị̀ pịrịmẹ.

¹² “Anịsịkị Nyanaḅọ Ḅe nwọse ị̀ ḅẹmẹ, ‘Tụndụ mị ọgọnọ kirikiri tu koromun anịatịḅị ị́ya tomoni, Ijipt mị ḅie ị́ ọkịpakụmaḅo apụma ini sisosam ini pịkị siye mịẹsam. À tọn ini pịrị na mịẹ nwọḅẹye mị ḅụ ini gbọtụma ḅarasinsam, ini oru mịẹ iniaḅụ pịrịsam.’

¹³ “Nyanaḅọ Ḅe pịkị nwọse ị̀ ḅẹmẹ, ‘Mịna apụma ininachịn la-ọkụ à nemimẹ.

¹⁴ Ngịsị ị̀ kpema. À ḅimẹ àrị ini ḅaasin mịẹsosịkị gbọrịḅọ sọnị ini se ḅiekoroma ẹka ḅara. Anịsịkị àrị ị́ se ḍaḅọ mịẹ ḍụḅa pịkị kụrọ ini nẹngị sẹ nwọ pịrịḅịa.’

¹⁵ “Anị à vinpịkị tụndụ mị ọgọnọ ideri koroye-ẹ, ọḅọkụ mị ọgọnọ ḅụ gịẹịn koroma ḍụparị mama pẹkẹrẹ ma ị̀ ḅara ḅie à nwọ deki waraḅẹ. Tụndụ mị ọgọnọ ḅụ fịnị ḅẹlẹ kọrị pakaḅoaḅẹ.

¹⁶ Àrị ọrịmẹ na Nyanaḅọ ọ́mịna Tamụnọ Ḅe chụa ọ́ pịrị oloko mị ọ́ kansam, ọ́ pịkị ọ̀ ḅụ simịẹsam anị ikulele se owoi nambulo kịkẹmaye tẹmẹ se oru mịẹ ọ́mịna ḅụ pịrịḅụ.

¹⁷ Anịẹrẹchị ọ́mịna tọrọkọ ḅụ ḍụparị pẹkẹrẹ ma à nwọse kiri gbin pu kọsịmamẹ.

¹⁸ Anị à pịkị gbọrị sịkị se ị̀ tọrụ se kiri iḅo se Nyanaḅọ Ḅe tọrụkuḅu ḅụ simemun enekaka-a mesi na ḍin-a mesi na nwọ laye-ẹ yefịka pịkị mengi ḅuka ḅaraḅụ. À gose ọkọ mịẹye anịatịḅị Nyanaḅọ Ḅe ḅụ ó simịẹsam, ọ́ pịkị ori ịganịmasam.

¹⁹ Nyanaḅọ Ḅe oria kụrọ ịganị mị ị̀ ḅalafamamẹ, anịatịḅị anị ò ḅụosọ laḅara ḅụ ori ineda ọ́ ḅaasinḅịa, ọkụma Nyanaḅọ Ḅe ọ̀ pịkị gbọrị sịkị nwọse ị̀ naamẹ.

²⁰ Nyanaḅọ Ḅe anị ò ḅụosọ laḅara ḅụ ori Erọn ḅe ḅaa-ẹtọnmẹ, anị à pịkị Erọn ḅe tịḅịgose tẹkẹye-ẹ anị gbọrị sịkị ḅụ.

²¹ Ọ́ mịẹkụrọma si ḅụ simeye mị à nwọ ọkịmẹ—anị ikulele owoi nambulo mị—anị seni fịnị ḅie gbin chụamẹ. Àrị anị ḅaa kọsịmamẹ, se anị gbẹịn anị ḅo fọn sọ se à fọn mị se tụndụ mị ḅụ ideri koroarị mengi mị ḅie saramẹ.

²² “Ọ́ pịkị Nyanaḅọ ọ́mịna Tamụnọ Ḅe ịganịmamẹ Tabẹra ḅie ó sime sịkị ḅụ, Masa ḅie na, pịkị Kibrọt Hatava ḅie na.

²³ Kedẹsh Banea ḅie ḅụ ori ómine fịrịmamẹ na ó mun ò seni ọ́ pịrịarị ama mị ọkị se anị nyana nwọḅẹ sịkị sọnị ọ́ nyana ḅereni ọ̀ pịrịkẹ; ó kuḅie se ọ̀ ḅụgbanakẹ, ọ́ pịkị ọ̀ ḅịpịpokikẹ.

²⁴ Àrị ó nemi sịkị ngịsị ma ọ́ nyana ḅereni Nyanaḅọ Ḅe pịrịkẹ.

²⁵ “Anị à gose àrị enekaka-a mesi ma na ḍin-a mesi ma na ḅie tọrụ se kiri iḅoye-ẹ Nyanaḅọ Ḅe tọrụkuḅu ḅụ anịatịḅị à nemimẹ na ọ̀ tọn pẹlẹsam na ori ọ́ ḅaasinḅịa.

²⁶ Se à tẹkẹmẹ, ‘Yei Kụrọmamgba Nyana Tamụnọ, ị́ya tomonima ini ḅaama, ị́rị́ ị́ya opu ịnyọ na kụrọ na se Ijipt mị ḅie ḍụa pịkị ọkị pakụmaḅosa apụma.

²⁷ Ị́ya fịrịnwẹngịapụma se ḅiekoroma, Ebraham ḅe na, Aịzịk ḅe na, pịkị Jekọb ḅe na, se mịna apụma ḍikimama inia ininachịn na, sitịḅị na, pịkị si na ḅụ.

²⁸ Ijipt apụma ḅofa nwọḅẹ na ị́ ineda ini ọkịmun ị́ ḅereni ini pịrịsa ama mị lakẹ. Ini nwọ ḅẹḅịa na ị́ya tomonima ị́ nwọ ọkị pakaso onwun ele mị ḅie mun mẹ ini ḅaaḅịa ẹrẹchị, anịatịḅị ị́ taraka se ini wẹrịmaye ẹrẹchị.

²⁹ Mịna apụma anị ị́rị́ kọkọ ḅarana sẹlẹọkị se ị́ya tomoni mịẹapụ, se Ijipt mị ḅie ị́ya opu kụrọ na ịnyọ na se ọkịpakụmaḅo apụ mama.’