Maịka 7 - Kịrịkẹnị Baịbụl

Izrẹlapụma Ini Angarị Ḅara Simẹ

¹ Che-ẹ à fasam! À sime ọkụ anị ejema tịḅị kọn se kaịn-fịḅịa chịnmgbọlụ ọrịka pịkị iru-mịẹ-chịn ma ọgọnọ tụmgbakị elelenda sọ ọrị fịka ḅurupụkọtarịarịḅọ sime ọkụ à nwọ simemẹ. Tụmgbakị elelenda ma na pịkị ḅẹlẹ irumịẹ chịnmgbọlụ mamgba na ini kaịn famasam.

² Ama mị ḅie karakara iḅiye mịẹarị gbọrịḅọ sọ kọnkẹ, gbọrịḅọ sọ nyana ḅereni Tamụnọ Ḅe pịrịkẹ. Ḅẹḅọ ḅẹḅọ nweni ḅaaḅịa ẹmbẹ nwọ koruaḅẹ. Ḅẹḅọ ḅẹḅọ ò juo amaḅọ tombi-se-ḅaamẹ.

³ Inimgba simịẹmịẹye ḅụ ọbịrị-apụ-ẹ. Fịrịtịḅịnị ma na ḅẹrẹkọn-apụ ma na ini ọḅụfị ḍọkịmẹ. Ḅịpị ḅẹrẹ ḅụ sọ ḅọ ḅe ò ḅiarịye ọ̀ nwọ ḍuko ini pịrịmẹ, se ḅịpịogbosọ ḅaraḅụ ini ḅo ḅẹrẹ ḅiamẹ.

⁴ Inia ḅie iḅitẹịn pịkị ngịsị furufurukapụ ma sọnị, osuein yeḅụsọka ọkụ anị ini yeḅụsọka ọkụ-ẹ. Ene mị ḅosam Tamụnọ Ḅe fomuḅara se tomonima pịrịḅịa ene mị inia nyọ koru ịkịankoroapụma ḅụ ọ̀ ḅọrọ inia ḅeri jine ḅaraḅụ. Mịọkụ ini ḅụḅalaḅala ḅie omi-ẹ.

⁵ Ị́rị́ na palịa angaḅọ ḅe ò ḅereni ma, anịkanịka kuḅie se inikio ḅe ḅụ gbanama. Ị́ya ọkwẹịn ḅịpị ḅụ ị́ ḅụ ọbị, ọkịmun ị́ ta ma ḅụ sọ.

⁶ Ma sịkị ma ḅie owuapụ awọma ini oḅori ḅara se inia ḍapụma na angaḅịa, eremeni awọma ini inia nyengi apụma dapakaḅịa, pịkị iremeni ma inia fua-eremeni ma na kamụsọḅịa, tomoniḅọ ḅe na tarakapụma anị pịkị oria furo ḅieapụ ma-ẹ.

⁷ Ọkụma ị̀rị̀ à Nyanaḅọ Ḅe tọrụ ḍikiḅịa; à kuḅie kụrọma Tamụnọ Ḅe koruḅịa, anị ị̀ ḍụaḅịaḅọ ḅe. Ị̀ Tamụnọ Ḅe ori ị̀ naaḅịa.

Nyanaḅọ Ḅe Ori Oria Tomonima Ḍụaḅọrọmaḅịa

⁸ Mine-na-tarakapụ ma mịna ḅịkị ḅụ gose ḅieḅẹlẹḅịaye ofori-ẹ. Wa ḅịkịsam, ọkụma wa pịkị sịsẹḅịa. Mịọkụ wa kanakana ḅie omi-ẹ, ọkụma Nyanaḅọ Ḅe, ori enekuḅu se wa pịrịḅịa.

⁹ Wa si se Nyanaḅọ Ḅe mịẹsam, anịgose wa kalasịkị se oria ịganị mị inemaḅịa. Ọkụma anịḅe-kuluma ọ̀ wa ḍụaḅịa se ini se wa mịẹ siaye ma tẹlịma karakaramaḅịa. Ọ̀ wa ọkịḅo enekuḅu ḅie chuḅịa; wa ḍumo sime se ọ̀ wa ḍụaḅịa ọkụ wa nwọ ọrịḅịa.

¹⁰ Anịsịkị mine-na-tarakapụ ma mịn mị ọrịḅịa se ḅụgerere nyanaḅịa—anị mine-na-taraka gbọrị opuama-ẹ, anị wa kombo se gbela apụma na “Nde ómine Nyana Tamụnọ Ḅe?” Wa ini ọrịḅịa ọmụḅarasi ḅụ; tomoni ọpọtọkọ nanga-ọkụ wa nwọse ini nanga-ḅọrọḅịa ateli ma ḅie.

¹¹ Jerusalẹm apụ, ó kpoto opuama mị onu ma namaḅịa sịkị mị ḅoaḅẹ. Anịsịkị ḅụ ọ́mịna eke mị finjimaḅịa.

¹² Ọ́mịna tomonima ini nyọnyọ ma ḅụ vinpịkị ómine damaḅoḅịa—ịrụapakapaka nyọ sime Asiria ḅie ḅoḅịa apụma na chukuju Ijipt ḅie ḅoḅịa apụma na, Yufretis Tọrụ pẹkẹrẹ mị ḅie ḅoḅịa apụma na ḅọlọju sime-a tọrụ ma ḅie na tụndụma ḅie na ḅoḅịa apụma na.

¹³ Ọkụma tomonikiri mị onwun ele sọḅịa anịa ḅie angapụma nyana sitịḅị gose.

Nyanaḅọ Ḅe Ò Ḍikitịḅịfoin Nyana Izrẹl Mị Pịrịmẹ

¹⁴ Nyanaḅọ, ananaḍikiḍikiḅọ sọ ị́ya tomonima pịrị, ị́ sẹlẹ ọkịsa tomonima. Ini sasama piri ele ḅie angamẹ nwọ ḅẹsọ, fịye pakụmaḅịa kiri ini kelemamẹ. Ye ini Bashan na Giledị na ḅie ḅụ iḅianyọ ma mun fịye ḍọkị fị, ḅọrọsa ḅọlọ sịkị ḅụ ini ye ọkụ mị.

¹⁵ Ḅụbuanmaye mịẹ wa pịrị Nyanaḅọ, Ijipt ḅie ị́ wa ọkịpakụmaḅo enema ḅie ị́ mịẹ ọkụ mị.

¹⁶ Sẹ mamgba mà ma ọrị sịkị, inia ḅie tọnye inia ḅieḅaraḅịa ini ịnyọ nyanamẹ nwọ ḅẹsọ. Kuḅie lọkọ ḅụ inia ḅịpị ma gbẹịnḅịa ini pịkị ḅara se inia ḅeri ma gbẹịnḅịa.

¹⁷ Ini oruwu ḅara se fọn ḅie ikiriḅịa. Inia ḅọị-anyọ ma ḅie ini ḅụgeregere na ḅalafa na ḅụ pakaḅoḅịa. Ini ḅalafa ḅụ, tọrụ pịkị Nyanaḅọ, mịna Tamụnọ Ḅe daḅịa.

¹⁸ Ị́ kịkẹ jịn Tamụnọ ofori-ẹ, Yei Nyanaḅọ; ị́ya tomonima ḅụ kọn apụma mịẹ-a sima ḅụ ị́ ḅarasinmẹ. Ịganị ḅụ ị́ simegbasokẹ, ọkụma anị ị́ ḅụḅẹlẹye sọmẹ ị́ya fafaka ḅẹlẹma mị mịẹpakụma wa pịrị.

¹⁹ Ị́ pịkị kpoto wa ḍikiḅụgerereḅịa. Ị́ mịna sima nanga-kiri-pịrị se àrị ọkị tọrụ mengi chuku ḅie gbinḅịa!

²⁰ Ị́ ị́ya iḅimịẹ mị na fafaka ḅẹlẹma mị na se ị́ya tomonima ḍieḅịa, Ebraham ḅe na, Jekọb ḅe na ḅụ koroḅo apụma, ḅọrọsa ḅọlọ sịkị ḅụ, ị́ ḅereni mịna ḅieju-a ḍapụma pịrị ḅaraḅụ.