Maịka 3 - Kịrịkẹnị Baịbụl

Maịka Ḅe Ḅelema Izrẹl-a Tịḅịnị Ma ḍukosimamẹ

¹ Ó poki, ómine Izrẹl ḅie ḅẹrẹtọn apụma! Karakara mịẹmịẹye ḅụ ọ́ ḅụ se chu na gbẹịn-amẹ,

² anịsọ, ómine iḅi mị ḍikiḅụjịjịmẹ se siye mịẹ mị ḅẹlẹmamẹ. Ómine ị̀ya tomonima oju pịnịmẹ ḍumoḅụ, se mịnị mị kanịmẹ inia ịmgbema ḅụ.

³ Ómine ị̀ya tomonima pẹị-famamẹ. Ómine inia ojuapụra mị pịnị pịkị inia ịmgbema anyịma, se nama ḅara se anị kọsịma ḅẹlẹ ḅie chụamẹ.

⁴ Ọ́ Nyanaḅọ Ḅe chịn olokuḅịa sịkị ḅoaḅẹ, ọkụma ori ọ́ pẹkẹrẹ-ẹkẹ. Ọ́mịna tẹkẹma, ò poki-ẹkẹ, anịatịḅị ó siye mịẹsam.

⁵ Nyanaḅọ Ḅe nwọ ḅẹmẹ, ini gbẹịnye se pịrị se dein omi-ẹ ịkịan mị ḍuko ini pịrịarị ịkịankoroapụma ini iruo kọn ị̀ya tomonima pịrịmẹ, ọkụma yese ini gbẹịnkapụ ma, ọmụ ịkịan ini nwọ ọrị inia ḅalafamamẹ.

⁶ Mịn mị gose, “Ómine ịkịankoroapụ, ọ́mịna ene mị ḅọrọ-ọtọn-aḅẹ; ịrụa mị anị ọ́ ḅụ tumaḅẹ. Anịatịḅị ómine ị̀ya tomonima dairima ẹrẹchị, ọ́ ḅarị ineda ịkịankoro-ḅọịye ọrịẹkẹ, ọ́ pịkị ineda tọrọkọju pakaḅịaye ḍuko-ẹkẹ.”

⁷ Tọrọkọju pakaḅịaye ḍukoḅịa apụma ḅụgerere inia tọrụ sọḅịa inia iruo ma ḅụ. Inimgba, ini ḅịkị iderimaḅịa anịatịḅị Tamụnọ Ḅe ori ini pẹkẹrẹkẹ.

⁸ Ị̀rị̀ ọkụma, Nyanaḅọ Ḅe ori ị̀rị̀ na omi-ẹ, ọ̀ kụrọ na pịkị ḅẹrẹkọn yenemi na kuḅiekụrọ na nwọ se ị̀ pịrịmẹ se Izrẹl-a tomonima mịẹasi ma ḍuko.

⁹ Ómine ị̀ poki, ómine Izrẹl ḅie ḅẹrẹtọn apụma, ómine ọ́ karakaraye mị ḍikiḅụjịjị se karakaraye pịkị karakarakaye mịẹarịapụ ma.

¹⁰ Tamụnọ Ḅe oria opuama, Jerusalẹm mị nweni ḅaa ḅụ na jụmḅọ inuma ḅụ na mị ó se sakị anịa chuku namarịye-ẹ.

¹¹ Opuama mị ḅie ḅẹrẹtọn apụma, ọḅụ fị ḅụ ini ama mị ḍikiḍikimẹ, gbẹịnye ḅụ agba mịẹapụ ma oloko mị fieye ḍukomẹ, igbiki fị ḅụ ịkịankoroapụma inia ịkịan ma ḍukopakụmamẹ se inimgba ḅerenimẹ na Nyanaḅọ Ḅe ori iniaḅụ omi-ẹ. “Wa damaḅoḅịa ḅụfụka ofori-ẹ,” ini nwọ ḅẹmẹ. “Nyanaḅọ Ḅe ọ́mịna ḅụ omi-ẹ.”

¹² Anị ḅụ, ómine gose, ini ḅo ozu kọrị ḅara nwọse Zaịyọn ḅie ozu kọrị ḅịa Jerusalẹm mị ḅo siaye sara nyọ sọḅịa, se Oputẹkẹwarị chịngị mị ḅo opu piri sọḅịa.