Maịka 2 - Kịrịkẹnị Baịbụl

Tamụnọ Ḅe Ò Fomuḅara Se Igwein Apụma Pụndarịpụma Pịrịḅịa

¹ Anị opuma ḅalafamaye sọ ḍin ḅụ mọnọye ọgọnọ sime siye koroma apụma pịrịḅịa! Ene ḅo ḅase ini ẹmbẹ nyana kirikiri, ini ini tọn siye mị mịẹmẹ.

² Ini ozu ḅimẹ ḅẹḅẹ, ini àrị kọrịḅịa; ini warị ḅi ḅi, ini àrị ọkịḅịa. Awọ na ngọ na nyana se ḅụ ḅọrọ gbọrịḅọ sọ ofori-ẹ.

³ Anị ḅụ Nyanaḅọ Ḅe nwọ ḅẹmẹ, “À tọn-aḅẹ na à ḅụfụka se ḅo ọ́ pịrịḅịa, ọ́ pịkị ineda anịa ḅie pịọrụ paka-ẹkẹ. Ómine ọ́ ḅụ ọrịḅịa ḅụfụka ḅie, se ọ́ ḅarị ngịsị opuayemịẹ ḅara se nwẹngị-ẹkẹ.

⁴ Anịsịkị mị ḅo laḅịa sịkị, tomoni ó se ye-otoma ḅụfụka fiearịye ḅẹrẹ nwọ ḍukoḅịa, se ini mị kuḅie-lọkọma nime mị chuḅịa, ómine la ḅọrọsaye gbolomaye ḅụ: Wa okorona okorona kansam! Nyanaḅọ Ḅe ọ́mịna kiri mị ọkịsam Se anị se kụrọ ḅaraḅụ mine kun apụma pịrịsam.”

⁵ Anịọkụma ini ḅo kiri mị pịkịmaḅo Nyanaḅọ Ḅe-a tomonima pịrịḅịa ḅiri lasịkị; ọ́mịna ḅụ gbọrịḅọ sọ ḍiekiri nyana-ẹkẹ.

⁶ Tomonima kụrọma ọkwẹịn ị̀ pịrị se nwọ ḅẹmẹ, “Ḅarị kụrọma ọkwẹịn wa pịrịma. Ḅarị kụrọma arịaye mamgba ḍukoma. Tamụnọ Ḅe ọ́mịna ḅụgererema-ẹkẹ.

⁷ Ị́ koroma ḅara ini fụla se Izrẹl-a tomonima pịrị? Nyanaḅọ Ḅe ọ̀ nyana wa pịrị inema ḅarị ofori? Ọ̀ kọkọma ineda nwọ simeye mịẹ ḅe? Ọ̀ ḅarị iḅiọkwẹịn kọn karakaraye mịẹapụ ma pịrịka?”

⁸ Nyanaḅọ Ḅe pẹkẹrẹmẹ, “Ómine tarakapụ ḅara se owu se ị̀ya tomonima pakamẹ. Owu ḅie soḅo-apụ ma koromaḅẹ na dein inia warịma ḅie omi-ẹ, ọkụma anịanga ómine ini koru se inia oju inia ḅụchụayema furu ọkịaḅẹ.

⁹ Ómine ị̀ya tomonima inia erema desinmẹ ini ḅẹlẹma ama mị ḅie se ọ́ pịkị à nyana inia-awọ ma pịrị ḅẹlẹma mị furu-gbasosam.

¹⁰ Ọ́ sịsẹ se so; mịanga dein ḅarị ofori-ẹ. Ọ́mịna sima àrị mị nyọ mị ọkị guluguluma sam.

¹¹ “Mịna tomonima ḍọkịarị ịkịankoroḅọ ḅara anị iruo-na-epele-na se nyọnyọ ma kelema-arịḅọ ḅe-ẹ, se ḅẹaḅẹ, ‘Àrị ịkịankoroaḅẹ na ere-iru na ọfịrị iru na mị ju ideri ọ́ pịrịḅịa.’ ”

Nyanaḅọ Ḅe Izrẹl Mị Ḅie Kọn Apụma Ori Ini Kpokponimaḅịa

¹² Tamụnọ Ḅe nwọ ḅẹmẹ, “Ọkụma àrị ọ́mịna ḅụ kọn Izrẹl-a tomoni mamgba koḅirimaḅịa. Àrị ómine ọkị koḅirimaḅịa, pịkịmaḅo ananama ogbo-ḅie-sọ-eḅoarị anana ḅara wẹrịḅịa. Osuein ele ḅie anana ḅein ọkụ, anị ọ́mịna amama ḅo pịkị tomoni ḅein nyọ sọḅịa ọkụ-ẹ.”

¹³ Tamụnọ Ḅe, ori ateli mị finji ini pịrịḅịa se ini ḅọrọma pakụmaḅo ḅịa ini somun ama mị ḅie. Ini opuama mị onu-a ḅọkọ ma kan se ḅọrọsoḅịa. Inia amanyanaḅọ, Nyanaḅọ Ḅe, na-mịnaḅụ-na, ini ḅọrọma pakụmaḅịa.