Luk Iḅi Ḅẹrẹ Mị 3 - Kịrịkẹnị Baịbụl

Jọn Mengisaraḅọ Ḅe Tamụnọ Ḅẹrẹ Ḍuko Mị

¹ Sẹdaḅọ Taịberiọs ḅe ḅẹrẹtọn jie-a kụra karama kụra mị ḅie Pọntịọs Paịlet ḅe Judia ḅụ gọvịna sọ sịkị, Hẹrọd ḅe Galili ḅie ḅẹrẹtọn àrị sịkị, se numbireowu Filip ḅe Ituria na pịkị Trakọnitis na ḅe irima ḅụ ḅẹrẹtọn àrị sịkị, Laịsanias ḅe Abilini ḅie ḅẹrẹtọn aḅẹ,

² se Anas ḅe na Kayafas ḅe na Gele Agbamịẹ Tịḅịnị nwọsọ sịkị. Anịsịkị mị ḅụ mị Tamụnọ ọkwẹịn mị ḅo Jọn, Zẹkaraya tọkụ ḅe laye-ẹ, piri-ele mị ḅie.

³ Anị Jọn ḅe bebe Jọdan Tọrụ mị ḅe iri mamgba nwọ mun kelema, Tamụnọ ḅẹrẹ mị ḍuko se nwọ ḅẹaḅẹ, “Ómine ọ́mịna sima ḅụ vinpịkị, se mengisara, se Tamụnọ Ḅe ọ́mịna sima ḅụ ḅarasin ọ́ pịrịḅịa.”

⁴ Ịkịankoro Aịzaya ḅe ḍiri ḅie anị gịẹịnsa ḅara mị: “Gbọrịḅọ eleogbo olokuaḅẹ: ‘Ọ́ Nyanaḅọ Ḅe ateli mị karakarama Ọ̀ pịrị; Ọ̀ nwẹngịḅọrọḅịa gbụkụkụ ateli ọ́ nwọ mịẹ Ọ̀ pịrị!

⁵ Gbisiri gbisiri anyọ ma ọ́ nwọ mịẹ karakarama, chịngịma na tụndụ mamgba na ọ́ nwọ mịẹ karakarama. Pịkịma pịkịma atelima ọ́ nwọ mịẹ gbụkụkụma, kpụlụkụ kpụlụkụ kala atelima mịẹ àrị mọnị mọnị.

⁶ Tomoni mamgba Tamụnọ ḍụaḅọrọma mị ọrịḅịa!’”

⁷ Tọn-a tomonikpo paka Jọn ḅe damaḅomẹ ò mengi se ini saraḅịa ẹrẹchị. Ọ̀ nwọse ini ḅẹmẹ, “Ómine oruwu!” “Tụḅọ ḍuko ọ́ pịrị na ómine ineda ḅoarị Tamụnọ ịganị mị ḅie pọkọsoḅịa-ẹ?

⁸ Ómine ọ́mịna sima ḅụ vinpịkịsam nwọ ḅẹye ḍiepakụmaḅịaye ọ́ nwọ mịẹ. Se sakị ọ́mịna ogboku nwọḅẹ ma na Ebraham ḅe mịna ḅieju-ḍaḅọ-ẹ. À ḍuko ọ́ pịrịaḅẹ na Tamụnọ Ḅe ori ineda ma ḍụparịma ọkị se àrị seni Ebraham ḅe ḅụ pakaḅo furo apụ nwọ mịẹḅịa!

⁹ Apala mị anị ḅụkarakaramasam kuno ḅụ ejema pẹlẹ gbinḅịa ẹrẹchị; iḅi mgbọlụ chụaka chịn layelaye ini anị pẹlẹ koroma se anị seni fịnị ḅie gbin chụaḅịa.”

¹⁰ Tomonima ò gbelamẹ, “Anị ọkụma cheye wa nwọ mịẹ ḅe?”

¹¹ Ọ̀ pẹkẹrẹmẹ, “Mama ḅụchụaye nyanaḅọ goyegoye gbọrịye nwọse ngịsị nyanakaḅọ ḅe pịrị, pịkị fịye nyanaḅọ goyegoye anị se jịn apụ na ḍia.”

¹² Amaocho apụma ḅe dapụ ọ̀ damaḅomẹ ò mengi se ini saraḅịa ẹrẹchị, se ini ò gbelamẹ, “Yeḍieḅọ, cheye mine wa nwọ mịẹ ḅe?”

¹³ Ọ̀ nwọse ini ḅẹmẹ, “Oloko mị ḍuko ḅara nẹngịmaye ọ́ nwọ ocho ma.”

¹⁴ Da owuni pịkị ò gbelamẹ, “Mine kwanị? Cheye wa nwọ mịẹ ḅe?” Ọ̀ nwọse ini ḅẹmẹ, “Ọ́ kụrọ ḅara se gbọrịḅọ sọ ḅara igbiki pọkọ ọkịma, pịkị tomoniḅọ mịẹkaye se iniḅọ pụnụmama. Ọ́mịna gbẹịnye ómine na deinkoro.”

¹⁵ Tomoni sakị tọrụ se mịẹḅịaye ḍikimẹ, se anịḅe ḅụgbiripu ḅụ koromaḅẹ nwọfa Jọn ḅe ori ḅọrọ Mẹsaya Ḅe-ẹtuḅo.

¹⁶ Anị Jọn ḅe nwọse inimgba ḅẹye-ẹ, “Ị̀rị̀ mengi mị à se mengi se ọ́ saraye-ẹ, ọkụma opusọ ị̀ nẹngị gbọrịḅọ ḅoaḅẹ, Oria akpaka ḍiki finma sọnị ị̀ gbẹịnkẹ. Ori Fịafịa Tẹmẹ Ḅe na fịnị na mị Ò se mengi seni ọ́ saraḅịaye-ẹ.

¹⁷ Oria yesẹlẹ ye Ori na omi-ẹ, Ò se Oria ịpịamgba mgbọlụma sẹlẹḅịaye, se iḅi mgbọlụma se Oria fịye koko nyọ ḅụ wẹrịḅịa; ọkụma osirosiroḅama Ọ̀ nwọse ngịsị binbinka fịnị ḅie chụa dọkịmaḅịa.”

¹⁸ Tọn-a kịrịkịrị ḅọkọ Jọn ḅe nwọse Tamụnọ Iḅi Ḅẹrẹ mị nwọ ḍuko tomonima pịrịmẹ.

¹⁹ Ọkụma Jọn ḅe Hẹrọd ḅe ḍiki ịganịmẹ anịatịḅị ọ̀ Hẹrọdịas ma nwọ ọkị simemẹ, numbireowu Filip tama, ọ̀ pịkị tọn-a simịẹmịẹaye nwọ mịẹmịẹ.

²⁰ Anịsịkị Hẹrọd ḅe pịkị sitẹịnye nwọ mịẹmẹ, Jọn ḅe nwọse ikoli ḅie chuḅụ.

Jizọs Ḅe Mengisara Mị

²¹ Nweni mamgba mengisara so sịkị, Jizọs Ḅe sọnị Ò mengisaramẹ. Ọ̀ tẹkẹ simearịogbo, so mị finjimẹ,

²² se Fịafịa Tẹmẹ Ḅe ḅo Oria ọgọnọ gbanamẹ, okuku ḅara ḅụ. Se pụkọ soḅie wẹrị ḅomẹ, “Ị́rị́ ị̀ya yela tọkụ-ẹ. Àrị ị́ ḍiki ḅieḅẹlẹmẹ.”

Jizọs Ḅe Ḅieju-aḍapụ Ma

²³ Jizọs Ḅe Oria fịrị nwọ sakị Ọ̀ kụra soi pembe ye nwọ lasam. Tomonima nwọ chịnmẹ na Ori Josẹf tọkụ-ẹ, Heli yaḅe,

²⁴ Matat yaḅe, Livaị yaḅe, Mẹlki yaḅe, Jani yaḅe, Josẹf yaḅe,

²⁵ Matatayas yaḅe, Emọs yaḅe, Nahum yaḅe, Esli yaḅe, Nagaị yaḅe,

²⁶ Mat yaḅe, Matatayas yaḅe, Semein yaḅe, Josẹk yaḅe, Joda yaḅe,

²⁷ Joanan yaḅe, Resa yaḅe, Zẹrubabẹl yaḅe, Shealtịẹl yaḅe, Neri yaḅe,

²⁸ Mẹlki yaḅe, Adi yaḅe, Kosam yaḅe, Ẹlmedam yaḅe, Ẹr yaḅe,

²⁹ Jọsụwa yaḅe, Ẹleaza yaḅe, Jorim yaḅe, Matat yaḅe, Livaị yaḅe,

³⁰ Simiọnị yaḅe, Juda yaḅe, Josẹf yaḅe, Jonam yaḅe, Ẹlaịakịm yaḅe,

³¹ Melia yaḅe, Mẹna yaḅe, Matata yaḅe, Netan yaḅe, Devid yaḅe,

³² Jẹsi yaḅe, Obẹd yaḅe, Boaz yaḅe, Salmọn yaḅe, Nashọn yaḅe,

³³ Aminadab yaḅe, Admin yaḅe, Anị yaḅe, Hẹzrọn yaḅe, Pẹrẹz yaḅe, Juda yaḅe,

³⁴ Jekọb yaḅe, Aịzịk yaḅe, Ebraham yaḅe, Tira yaḅe, Nehọ yaḅe,

³⁵ Serog yaḅe, Riu yaḅe, Pẹlẹg yaḅe, Eba yaḅe, Shẹla yaḅe,

³⁶ Kenan yaḅe, Afazad yaḅe, Shẹm yaḅe, Noa yaḅe, Lemẹk yaḅe,

³⁷ Mẹtusẹla yaḅe, Enọk yaḅe, Jarid yaḅe, Mehalalẹl yaḅe, Kenan yaḅe,

³⁸ Enọs yaḅe, Sẹt yaḅe, Adam yaḅe, Tamụnọ yaḅe.