Kururu Ma 3 - Kịrịkẹnị Baịbụl

Tamụnọ Ḅe Ọ̀ Nyana Oria Tomoni Ma Pịrị Ḅẹlẹmamẹ Simegbasomẹ

¹ Ị̀rị̀ anị Tamụnọ Ḅe ḅụfụka se tomoniḅọ pịrị mị fieye nemi gbọrịḅọ-ẹ.

² Ori ị̀ suma suma mun gbun kanakana ḅie chumẹ

³ Se ị̀ ḅakụ gulugulumẹ ḍikiḅụgerere nyana ị̀ pịrịkaḅụ.

⁴ Ori ị̀ya oju mịnị kanfinjisam, se ị̀ya ịmgbema anyịmasam.

⁵ Ori ị̀ se ḅụḅalaḅala na opuma kuḅie sima ikoli ḅie ịkasịsam.

⁶ Ọ̀ kụrọḅara se ị̀ mịẹmẹ se à jikeka kanakana ḅie fị ḅọrọsapụ ḅara se angamẹ.

⁷ Ori ikoli se ị̀ ịkasịsam; ị̀rị̀ ikoli ḅọ-ẹ, pọkọsoḅịa ẹmbẹ nyanakaḅọ.

⁸ Àrị oloku owumẹ ḅarachụa ḍọkịḅụ, ọkụma Tamụnọ Ḅe ị̀ poki ḍụkụkẹ;

⁹ À nwẹngị ọkụma à jiajiaḅẹ, ḍụparị onu agbagba ị̀ kikimẹ, à pịkị daju-daju.

¹⁰ Tun ye ọbị ḅara ọ̀ nwọse ị̀ ọbịmẹ; chịrịḅa ḍosi ḅara ọ̀ nwọse ḍosi ị̀ koromẹ.

¹¹ Ori ateli ḅie ị̀ depakụmamẹ, ị̀ kanị kọsịmamẹ, se ị̀ se gbin koromamẹ.

¹² Ori oria lubu mị nụnụ se ḍẹịn ma pịkị ị̀ damẹ.

¹³ Ori oria ḍẹịn ma tẹịn gbunma ị̀ya oju chumẹ.

¹⁴ Tomoni ene mịmgba ị̀ ḍẹrịmẹ; à titiye sọ inimgba pịrịmẹ.

¹⁵ Akụ tọrụsiọrị anị ò se fịye na mengi na ḅaraḅụ ị̀ pịrịsaye-ẹ.

¹⁶ Ori ị̀ tọrụ se kiri sikirimẹ se onwun aka ma ḅie ị̀ya aka ma kpọkpọmẹ.

¹⁷ Ḍumo na dein na ḅieḅẹlẹ na à se ḅieḅaramasam.

¹⁸ À ḅaka sịkị nyanakẹ se anga; Nyanaḅọ Ḅe ḅụ à nyana kuḅie kụrọ ḅọrọsam.

¹⁹ Ị̀ya oju akụ mị na, angaḅịa nyọ ofori mị na ḅe koroma, ḅo akụ nweni ḅaa ḍiri sọsam.

²⁰ Àrị anị se ḅiekoromamẹ sịkịmamgba, anị pịkị ị̀ kuḅie lọkọmamẹ.

²¹ Anịsọ kuḅie kụrọ pịkịmaḅomẹ à mị gbọrịye mị se ḅiekoroma sịkị:

²² Nyanaḅọ Ḅe oria simegbaso ḅẹlẹma mị na, ḍikiḅụgerere mị na, pa simegbasomẹ, anịgose wa ḅarị fịfakẹ,

²³ Dede mị ịwọ ọkụ anị pịkị gbarịmaka ḅaraḅụ ịrụa mị ḅịaḅịa ọkụ-ẹ.

²⁴ Nyanaḅọ Ḅe ngẹrị mị à nyanaye-ẹ, anịẹrẹchị ọ̀ ḅụ mị àrị ị̀ya kuḅie kụrọ se gbanaye-ẹ.

²⁵ Nyanaḅọ Ḅe ori iḅi ini pịrịmẹ kuḅie se ọ̀ ḅụ gbanapụ mamgba

²⁶ Anịgose anị iḅitẹịnmẹ wa inema—ó koru se ọ̀ wa ḍụa—

²⁷ Anị pịkịna iḅitẹịnmẹ wa mịna kalaḅiri ḅụ mị inema mị ḍawọ.

²⁸ Wa tọrụsiọrị sịkị, wa ngẹrị yawụma inema ḅie simeḅịa;

²⁹ Wa tịḅịtu Nyanaḅọ Ḅe pịrịḅịa anịatịḅị ḅiekpọ pa pakaḅịa.

³⁰ Ini wa fomu pịkị wa wọlọmẹ nwọḅẹ sọ, wa arịmgba ḅereni ọkị.

³¹ Nyanaḅọ Ḅe ò ḍikiḅụgerere nyanamẹ, ọ̀ pịkị wa sịkị gbaso ẹkẹ.

³² Ori ineda kururu se ḅoḅịa, ọkụma ọ̀ nyana wa pịrị ḅẹlẹma mị ḅiekpọmamẹ pịkị kụrọmẹ.

³³ Anị ọ̀ tọrụḅẹlẹmaye sọkẹ ọ̀ wa mịẹse wa kuḅie si anịkanịka ḅụakụ nwọ nyana.

³⁴ Nyanaḅọ Ḅe ò nemimẹ mịna kuḅie ma ikoli ḅie kọsị sịkị;

³⁵ Ò nemimẹ ò se wa pịrị kụrọ ma ini nwọ piki sịkị;

³⁶ Ḅẹrẹkọn warị ḅie ini karakaraye mị pịkị iḅo sịkị ò nemimẹ.

³⁷ Gbọrị tomoniḅọ sọ ineda yemịẹpakụma ẹkẹ Nyanaḅọ Ḅe ḅereni anị pịrị sikima.

³⁸ Tamụnọ Ḅe tọnsa ḅaraḅụ iḅiye ineda pakaḅoḅịa siye pịkị ineda pakaḅoḅịa.

³⁹ Wa mịẹ-a sima gose ini fomuḅara se wa pịrị ọkụma cheye gose wa ḍukoye nyanaḅe?

⁴⁰ Ó ye wa mịna nwẹngị-a ḅụọma pekele ḍiki se pịkịma Nyanaḅọ Ḅe damamun.

⁴¹ Ó ye wa mịna kuḅiemgbọlụma finji soḅie Tamụnọ Ḅe pịrị se tẹkẹ,

⁴² “Wa mịẹirimasam pịkị nyana ḅerenikẹ se ị́rị́, Yei Nyanaḅọ ma ị̀ ḅarasin wa pịrịkẹ.

⁴³ “Ị́ wa ḍuko se wa ḅaamẹ; ị́ya ḍikiḅụgerere mị ị́ya ịganị ḅie ḅọịmẹ,

⁴⁴ Opuma kputu gbọrị soḅuno ḅerenikẹ se mịna tẹkẹma kan tolu ḅọrọ.

⁴⁵ Ị́ wa se sẹkiri mị ḅe sara mịẹsam.

⁴⁶ “Mine na tarakapụ mamgba wa wọlọ pịkịna wa kombomẹ.

⁴⁷ Tọrụsiọrị na opufa ḅie na wa ḅọrọmẹ; wa ḅụḅalaḅala na ḅalafa na ḅie angamẹ.

⁴⁸ Ị̀ya tomonima ḅe kan mị ḅụ owu mengi ị̀ tọrụ iderimẹ.

⁴⁹ “Ị̀ya owu mengi ma àrị ọsụn ideriarị mengi ḅie saraḅịa.

⁵⁰ Ọkịmun Nyanaḅọ Ḅe soḅie ọ̀ tọrụ tu wa ḍiki se mine ọrị sịkị laḅịa.

⁵¹ Ị̀ kuḅiemgbọlụ si mẹ à tọrụ se opuama mị ḅe eremeni ma ḅụ pakaye ma ọrịsịkị.

⁵² “Feni ḍẹịn ḅie koro ọkụ à nwọse tarakapụ ḅie koromẹ, ini gose taraka se ị̀ wẹrịmaḅịaye ofori-ẹ.

⁵³ Ini fịka ḅụ ị̀ se olulu ḅie gbinmẹ se ḍụparị se anịa ḅịpị gbẹịnmẹ.

⁵⁴ Mengi sakị ị̀ ḅilemamẹ, se à nwọ chịnmẹ fị kpekisam.

⁵⁵ “Olulu mị chuku ḅie Yei Nyanaḅọ, àrị owu pakụma ị́ pịrịmẹ,

⁵⁶ Se àrị ị́ tẹkẹ na ị̀ya owu mị poki nwọḅẹ sịkị ị́ ị̀ naamẹ.

⁵⁷ Ị́ ị̀ pẹkẹrẹ se nwọ ḅẹmẹ à ḅalafama.

⁵⁸ “Ị́ ḅo ị̀ ḍụaḅọrọmamẹ se ị̀ ḍumo ḍụamẹ Nyanaḅọ.

⁵⁹ Ḅẹrẹiḅi pẹlẹ ị̀ pịrị; ini se ị̀ mịẹsiaye ma ị́ nemimẹ.

⁶⁰ Ị́ nemimẹ ị̀rị̀ na tarakapụma ị̀ ḍikiḅụnwọnwọ pịkị siyeḅia ị̀ pịrị ọkụ.

⁶¹ “Ị́ ini naamẹ ini ị̀ wọlọ sịkị, Yei Nyanaḅọ, ini ḅiaye mamgba ị́ nemimẹ.

⁶² Ene mị mgba ini ị̀ ḅụ ḅẹrẹ ḍukomẹ pịkị mịẹḅịaye ma tọnmẹ.

⁶³ Dede ọkịmun ene san ini ị̀ se ḍẹrịye mịẹmẹ.

⁶⁴ “Fomuḅara se ini pịrị ini mịẹsaye ma gose, Yei Nyanaḅọ;

⁶⁵ Worinime se ini pịrị pịkị inia kuḅie mịẹlọkọma!

⁶⁶ Ini kunḅo se ini ọfịnsin tomonikiri ḅie!”