Kururu Ma 2 - Kịrịkẹnị Baịbụl

Nyanaḅọ Ḅe Fomuḅara Se Jerusalẹm Mị Pịrịmẹ

¹ Yei! Nyanaḅọ Ḅe oria ịganị ḅụ ḍukopẹlẹsam na ori iku fomuḅara se Jerusalẹm mị pịrịḅịa. Anịa soḅie iḅi mị ọ̀ pịkị kankọsịmasam. Ori ịganị sịkị mị ḅụ, ori oria Oputẹkẹwarị mị sọnị se sarakoromamẹ.

² Nyanaḅọ Ḅe ḍikiḅụgerere oforika ḅụ Juda ḅie sime ama goyegoye nwọ kanmẹ. Pịkịna ama mị ḍụa owuni-a kụrọ warị mamgba kangbinmẹ. Ọ̀ ḅụgerere ọkị se ḅo sẹ mị na anị ḍikiḍiki apụma na tọrụ chụamẹ.

³ Oria opu ịganị ḅụ ori Izrẹl kụrọ mị kankọsịmẹ; Ọ̀ ḅarachụa wa pịrị ḍụkụkẹ tarakaḅọ ḅe ḅo sịkị. Ọ̀ wa gbẹịnmachịẹmẹ fịnị yegoyegoye sima ọkụ.

⁴ Ori oria lubu ma se wa damẹ tarakaḅọ ḅara ḅụ; Ori ini ḅaafamamẹ wa opu ḅieḅẹlẹ nyana pịrị apụ mamgba. Mịọ Jerusalẹm ḅie wa oria kọrịarị ịganị mị ọwụmamẹ.

⁵ Tarakaḅọ ḅara, Nyanaḅọ Ḅe ọ̀ nwọse Izrẹl kansam; Ori árịa owuni-a kụrọ warịma na amanyanaḅọ odo ma na kankọsịmasam. Ò kuluma ẹka kururu ọkịḅo Juda apụma pịrịsam.

⁶ Wa ọ̀ tẹkẹarị Oputẹkẹwarị mị ọ̀ kọsịma dẹkịdẹkịmasam; Ọ̀ mịẹmẹ fịafịa enema na Ịnyọ Sara Ene ma na ḅo kulumasam. Amanyanaḅọ na agbamịẹḅọ na gbọrịḅụ oria ịganị mị ḅe kụrọ ini lasam.

⁷ Nyanaḅọ Ḅe oria agbamịẹ ẹbẹ mị sịkịmẹ pịkị oria fịafịa Oputẹkẹwarị mị ḍikitọrụsinmẹ; Ò ḅereni tarakaḅọ ḅe pịrịmẹ ori anịa onu agbagba ma kankoromamẹ. Ọmụḅaraiḅi ḅụ ini anịnyọ ḍoroku mẹ, anị wa gbọrị sịkị ḅieḅẹlẹ ḅụ tẹkẹtẹkẹ nyọ mị.

⁸ Nyanaḅọ Ḅe ọ̀ mịẹkụrọmamẹ na Zaịyọn onu agbagba ma àrị ḅịkị; Ò yetọnye se àrị tọnpakụmamẹ àrị okorona okorona kankọsịḅịa ọkụ. Sokopi-a warịma na onu agbagba ma na mịọkụ sokoro sarasosam.

⁹ Onu ḅọkọ mamgba àrị kiriḅie ḍipisam, arịa igodo ma na kiki ma na kọsịdẹkịdẹkịsam. Amanyanaḅọ ḅe na ama opuapụ ma na ini omoni ḅaraḅie sọsam. Oloko mị ini ḅarị anị telimakẹ, ịkịankoroapụma sọnị ḅarị Nyanaḅọ Ḅe ḅara tẹmẹ ḅụ aye ọrịkẹ.

¹⁰ Jerusalẹm olomu apụma papa kiri ọgọnọ mị ini yawụma simeye-ẹ, Fọn ma na inia tịḅị ọgọnọ na okuru ḅịtẹma na inia ojuma ḅụ. Iremeni awọma inia tịḅị ma tu kiri pịrịmẹ.

¹¹ Owuḅụ ị̀ tọrụmgbọlụma pokosam; ị̀ tẹmẹ ḅie ḅakama akụmẹ. Ị̀ya tomonima ḅe kan kuḅie si ḅụ ị̀ ḅụ ịnyọ famẹ. Kala awọmẹnịma na ndo ndoarị awọma na opuama mị ateli ma ḅie fụmụaḅẹ.

¹² Fịye na mengi na pụkọtarị ḅụ, ini inia nyengiapụ ma chịn owumẹ; Yelapụ ḅịkị ọkụ ini ateli ogbo ḅịkịmẹ, Se inia nyengiapụ ma ḅara ḅie ḅọrọ fịmẹ.

¹³ Yei Jerusalẹm, à ḅẹlẹma nyana pịrị Jerusalẹm, àrị ineda che ḍukoḅe? Nde àrị ineda ị́ kuḅie kụrọmaḅịa ọkụ? Mị ḅara se tọrụsiọrịsaḅọ ofori-ẹ. Ị́ laye mị abaji ḍụḅa ọkụ ḍụḅamẹ; tọrụ se ḍikiarị kuḅie kụrọ ofori-ẹ.

¹⁴ Ị́ya ịkịankoroapụma nyana ḍuko ị́ pịrịḅịaye ofori-ẹ, iruoaye sikima; Ini ḍuko ị́ pịrịarị Tamụnọ ọkwẹịn mị ị́ dairimamẹ, ị́ya sima ḅụ pịkị ḅụ, Ini ị́ mịẹ sima ḍuko gbererema ị́ pịrịkaye mị ḅụ ini ị́ mịẹse ị́ ḅo koromamẹ na siye mịẹ ḅụ vinpịkị mị anị ḅarị ị́ ḅụ mịẹka mịẹka ḅara simekẹ.

¹⁵ Opuama mị anga nwẹngị ḅọrọarịapụ goyegoye ḍiki iderima tọrụ se ị́ ḍikimẹ. Ini inia tịḅị ma jike se Jerusalẹm mị ḅe kankọsị mị ḍẹrịmẹ; “Mịn anị iḅi ḅẹlẹ opuama mị anị? Mịn anị sẹkiri mị se opuaye mịẹmịẹ ama mị anị?”

¹⁶ Ị́rị́ na tarakapụ mamgba ị́ kombomẹ se si nungu se ị́ ḍikimẹ. Ini inia ḅịpịpẹkẹrẹ ma fanga se nwọ chumamẹ, “Wa anị kansam! Mịn wa koru sime ene mị-ẹ!”

¹⁷ Nyanaḅọ Ḅe anịḅe kuluma ori ẹrẹma simeye mị ọ̀ mịẹsam: Ḍikiḅụgerere oforiḅaraḅụ ọ̀ wa kansam, ḅọlọ sịkị ngịsị ọ́mịna ḅeri jine ḅaraḅụ. Ori ọmụḅaraiḅi se mine-na-tarakapụ ma pịrịmẹ, ḅieḅẹlẹ se ini pịrịmẹ mịna ḅịkị ḅụ.

¹⁸ Yei Jerusalẹm ye ị́ya onu agbagba ma owu pakụma Nyanaḅọ Ḅe pịrị! Ye ị́ya owu mengi ma tọrụ ideri ọkụ ideri ḍin na enekaka na ḅụ; Ịnyọ sara ị́ ḅụ pịrịma owu na kururu na ḅụ.

¹⁹ Ḍin mị ḅie mgba sịsẹ pịkị sịsẹ owu pakụma Nyanaḅọ Ḅe pịrị; Ị́ kuḅie ọsụn sara se ọ̀ tẹkẹ ò ḍikiḅụgerere se ị́ pịrị ị́ya awọma tịḅị gose— Ateli ịkọlị ma ḅie ḅuru kpọlịḅaa àrị awọma!

²⁰ Ḍiki, Yei Nyanaḅọ! Cheye gose ị́ mị ḅara se fomuḅara se wa pịrị-ao? Eremeni ini ḅẹlẹma awọ oju mịnị ma pẹị aḅẹ! Agbamịẹapụ na ịkịankoroapụ na Oputẹkẹwarị mị ḅie ḅụoju ini ini ḅaa aḅẹ.

²¹ Asẹ na olomu na gbọrị ḅụọḅụ ateli ḅie ḅọlọlọ fịmẹ, Asẹmẹnị na eremeni na tarakaḅọ ḅe okola-agiji ini ḅaamẹ. Ị́rị́ ini gbogboḅamẹ ḍikiḅụgerere oforika ḅụ ị́ya ịganị ene ḅie.

²² Ị́rị́ ị̀rị̀ na tarakapụma fịrịmaḅomẹ, ini ḅo ḅalafama ḅara se tọrụ ḅẹlẹ ti kọn ị̀ kelemamẹ, Pịkịna ị́ ịganị àrị sịkị gbọrịḅọ sọ pịọrụ sokẹ. Ini ị̀ya awọma ninimẹ, anị à ḍikiḍiki pakụmaḅo pịkị ḅẹlẹma awọmẹnịma.