Kururu Ma 1 - Kịrịkẹnị Baịbụl

Jerusalẹm Tomoni Ma Kururu Ḅie Ini Omi-ẹ

¹ Yei pakaye mị ḍiki! Jerusalẹm mị kpọngọlọma sime ọkụ ḍiki, anị tomoni gbọrị sịkị ḅein nyọ mị! Gbọrị sịkị sẹkiri mị mgba kụn se pịrị nyọ mị, mịọkụ anị ḅo deḅọ fịsa eremeniḅọ kpọngọlọma sime ọkụ simesam; Ḅọrọsa sịkị ḅụ sẹma ḅie mgba ẹrẹ pakatẹịn sẹ mị anị ḅịkị ḅo omoni ḅara ḅie sọsam.

² Ḍin mịmgba árị owumẹ; owu-a-mengi ma á tọrụ iderimẹ. Arịa olomu ikiapụ mamgba, á kuḅie kụrọmaḅọ ḅarị ofori-ẹ. Árị na gbolomapụ ma ini ḅụọ-se-á-chụasam, se inimgba ḅarị árị na tarakẹ.

³ Juda-a tomonima anị ḅarachụa nyanaka omoni-ẹ, inia ama ḅie ini kụrọḅara se desin apụ-ẹ. Ini jịn amama ḅie angamẹ, ini se inia nyọ chịn ẹka nyọ ma— Ini pịọrụ ḅọrọḅịa ọkụ ofori ḅaraḅụ, árị na tarakapụma á kelemasam.

⁴ Gbọrịḅọ sọ ḅarị Oputẹkẹwarị mị ḅie ḅo tẹkẹkẹ fịafịa enema ḅie. Anịnyọ nime chuchu iremeni ma tọrụsiọrịmẹ, pịkịna agbamịẹapụma ḅiefiemẹ. Opuama mị ḅe onu ḅọkọ ma papa chịẹmẹ, pịkị Zaịyọn mị anị kuḅie si ḅụ omi-ẹ.

⁵ Árị-na-tarakapụ ma á nẹngịmase; ini inia kụrọse árị ọlọmẹ. Nyanaḅọ Ḅe ori á tọrụsiọrịmasam árịa si-a nwẹngị ḅụọma gose; Ini árịa awọma kun se ini ọkịsam.

⁶ Jerusalẹm ḅe opu na ḅẹlẹ na ḅọrọsaye sọsam. Arịa tịḅịnịma ini ḅurupụkọtarị se ịnyọ ḅụ fasa tụḅụra kịkẹmẹ, Ịnyọ kalaye kẹngẹ kọn se piri de apụ ḅara pẹlẹma so nama ḅara.

⁷ Mịọkụ kpọngọlọma kansa ama, Jerusalẹm árịa iḅi olomu enema se ḅiekoromamẹ. Á ḅịkị árị na tarakapụma pịrị sịkị, ḅarachụa á pịrịḅọ sọ ofori-ẹ; Á inuma apụma árịa ḅịkịḅụ á ḍẹrịmẹ.

⁸ Arịa opu ḅọrọsam; á papaḅụsinsam pịkị ḍikisima ḅie sọsam. Ḅụgerere ḅụ á tọrụ ḅọị se ḅiefiemẹ. Jerusalẹm mị ḅụnjịnjịma ḅara se opu si mịẹmẹ.

⁹ Arịa fịafịaka mị ọrị mị sarasaramẹ, ọkụma á ḅụ kaịnḅokẹ. Arịa ḅịkị mị ḅalafamamẹ; ineda á kuḅie kụrọmaḅịaḅọ ofori-ẹ. Árị na tarakapụma ọmụ inia ḅara iḅisam, se árị owu Nyanaḅọ Ḅe pịrịmẹ ori á ḍikiḅụgerere.

¹⁰ Arịa yela ngọ mamgba tarakapụma àrị ọfọịn ọkịmẹ. Árị ini ọrịmẹ ini Oputẹkẹwarị ḅie sọ àrị sịkị, Anị Nyanaḅọ Ḅe ḅereni Jịn sẹ apụ pịrịka nyọ mị.

¹¹ Arịa tomonima ḅiefiemẹ ini ini fịḅịaye ḍọkịarịogbo; Ini ngọma dẹrị se se fịye fẹmẹ ini pa ḍumoḅịaye gose. “Ị̀ ḍiki, Nyanaḅọ,” opuama mị anị owumẹ; “ị̀ya ḅụḅalaḅala ḅie ị̀ ọrị.”

¹² “Ị̀ ḍiki!” árị owu nwẹngị ḅọrọḅọ goyegoye pịrịmẹ. “Gbọrịḅọ sọ ofori-ẹ à nyana ḅụakụ na kịkịnaye nyanasaḅọ, Nyanaḅọ Ḅe dekiḅo ị̀ ọgọnọ gbana ḅụfụka mị oria ịganị sịkịḅụ.

¹³ “Ori ọgọnọju fịnị se sẹịnmẹ, fịnị mị ị̀ ḅụ ḅieju dọkịmamẹ. Ọ̀ ḍẹịntu ị̀ pịrịmẹ se ị̀ ọkịḅo kiri koromamẹ. Anịsịkị ò ḅo ị̀ sarakoroma se ị̀ se fafaka ḅụakụ ḅie chumẹ.

¹⁴ “Ori ị̀ya si mamgba ḅụ elekima chụamẹ se àrị fịna gbolomamẹ; Ori àrị se ị̀ kọngọ kpọ kelemamẹ, se ị̀ ḅụ ḅo lọkọmẹ arịa iku ḅụ. Nyanaḅọ Ḅe ị̀ se ị̀rị̀ na tarakapụma pịrịmẹ, se inia ḅie à se ini na bịamaḅịa ḅarachụa nyanaḅịa ọkụ ofori-ẹ.

¹⁵ “Nyanaḅọ Ḅe ị̀ya kụrọtẹịn owuni mamgba ḍẹrịmẹ; Ori owuni kụlọ fịrịmamẹ iniḅo ị̀ya asẹmẹnị ma ḅaasinmẹ. Ori ị̀ya tomonima pọnjị ḅaamẹ tụmgbakị elelenda pọnjị irumịẹ ọkụ.

¹⁶ “Anịgose owu-a mengi ị̀ tọrụ iderimẹ. Ineda ị̀ kuḅie kụrọmaḅọ ofori-ẹ; gbọrịḅọ sọ kụrọ kuḅie se ị̀ pịrịkẹ. Tarakaḅọ ḅe ori ị̀ inumasam; ị̀ya tomonima ini nyanaye ma ḅụ kọnye ofori-ẹ.

¹⁷ “Àrị ị̀ ḅara ịsụn pakụmamẹ, ọkụma ḅarachụa ị̀ pịrịḅịaḅọ ofori-ẹ. Nyanaḅọ Ḅe nyọnyọ ma ḅụ ọ̀ tarakapụ chịn ị̀ damaḅosam; Ini ḅụnjịnjịmaye ḅara se ị̀ mịẹmẹ.

¹⁸ “Ọkụma Nyanaḅọ Ḅe ọ̀ karakara ḅụ omi-ẹ, anịatịḅị àrị ininachịn oria ọkwẹịn pịrịmẹ. Ómine ị̀ poki, ómine nyọnyọ ḅụ sime-atomoni mamgba; ómine ị̀ya ḅụakụ ma ḅụ ị̀ ḍiki. Ị̀ya asẹmẹnị ma na eremeni ma na, ini ini ọkịsosam kụrọḅara ḅụ.

¹⁹ “Àrị ị̀rị̀ na gbolomapụ ma chịnmẹ, ọkụma ini ḅarachụa ị̀ pịrị ḍụkụkẹ. Agbamịẹapụma na tịḅịnịma na opuamama ateli ma ḅie fịmẹ, Ini fị se ḍumoḅịa fịye ḍọkịarịogbo.

²⁰ “Yei Nyanaḅọ ị̀ya opu kuḅiesi mị ḍiki, ị̀ tẹmẹ mị ḅe akụ sịkịḅụ! Ị̀ kuḅie kururu ḅụ kankọsịsam ị̀ya sima gose. Ateli ma ḅie nweni nini omi-ẹ, warịma ḅie sọnị fị omi-ẹ.

²¹ “Ị̀ ḅiefiearị ọkụ mị poki; ị̀ kuḅie kụrọmaḅọ ofori-ẹ. Ị̀rị̀ na tarakapụma inia ḅie ḅẹlẹmẹ na ị́ ḅụḅalaḅala ọkịḅo ị̀ pịrịsam. Ị́ ḅereni ene mị ọkịḅo; ye ị̀rị̀ na tarakapụma sọ à tọrụsiọrị ọkụ se tọrụsiọrị.

²² “Ḅẹrẹsi kọn ini pịrị inia si-a-tịḅị mamgba gose; Fomuḅara se ini pịrị, ị̀ya sima gose ị́ fomuḅara se ị̀ pịrị ọkụ mị. À ḅụḅalaḅala ḅụ ḅiefiemẹ, à pịkịna kuḅie ḅụ obimẹ.”