Kolosi 1 - Kịrịkẹnị Baịbụl

¹ Mịn fịrịfịrịmaḍiri mị Pọl, anị Tamụnọ Ḅe ḅereni ḅara ḅụ ḅo Kraịst Jizọs Ḅe okunwẹngịḅọ sọ ḅọ ḅe na, pịkị mịna mịnaḅọ Timoti ḅe na ḅara ḅụ anị ḅomẹ—

² Seni Kolosi ama mị ḅie sime Tamụnọ-a tomonima sẹịnmamẹ, Kraịst Ḅe ḅie kuḅie se ḅụgbana gbẹịn mịnapụma: Ye Tamụnọ, mịna Ḍaḅọ Ḅe ḍikiḅụgerere na deinma na seni ọ́ pịrị.

Mịẹḅaka Ḅe Tẹkẹ Kọn Ḅara

³ Wa sịkịmamgba mịẹḅaka se Tamụnọ Ḅe ḅẹḅẹmẹ, wa Nyanaḅọ Jizọs Kraịst Ḅe ḅụ, wa tẹkẹ ọ́ pịrịarị sịkị goyegoye.

⁴ Anịatịḅị Kraịst Jizọs Ḅe ḅụ ọ́ nyana ḅereni mị wa nwọ naamẹ, ọ́ pịkị nyana Tamụnọ-a tomoni mamgba pịrị ḅẹlẹma mị na.

⁵ Kọkọma oku mị, anị Iḅi Ḅẹrẹ mị, tarị ḅo ómine lasịkị, anị pịrịḅịa tọrụseḍikiarịye mị gbolomaye ọ́ naamẹ, ọ́mịna ḅereni mị na ḅẹlẹma mị na tọrụseḍikiarịye mị ḅụ mịn àrị sẹrẹrẹye-ẹ, soḅie ini se deinma wẹrị ọ́ pịrị waraye mị.

⁶ Iḅiọkwẹịn mị, anị ḅaka ḅẹlẹma nwọ ọkịḅo se wasama bebe tomonikiri mị kelemaḅẹ, anị ọ́mịna ogboku mịẹsa ḅara mị ó ḅo Tamụnọ Ḅe ḍikiḅụgerere mị nwọ naa ene mị ngịsị, pịkị anị kọkọma sime ḅara mị nwọ nemi sịkị ngịsị.

⁷ Ẹpafras ḅe ḅara ọ́ Tamụnọ Ḅe ḍikiḅụgerere mị nwọ ḍawọ ḅomẹ, mịna ḅụ yela mine na gbọrị fịrịnwẹngịarị ḅọ ḅe, kuḅie se ḅụgbana gbẹịn Kraịst fịrịnwẹngịḅọ ḅe mịna tịḅị gose.

⁸ Tẹmẹ Ḅe se ọ́ pịrị ḅẹlẹma mị gbolomaye ọ̀ nwọ ḍuko wa pịrịmẹ.

⁹ Mịn mị gose wa sịkịmamgba tẹkẹ ọ́ pịrịpịrịmẹ, wa ó gbolomaye nwọ naa sịkị ngịsị. Wa Tamụnọ Ḅe ḅara ḅimẹ na ḍawọnemi ọ̀ nwọse ọ́ pịrị ḅeinma, ó ḅi ḅara ḅụ, ọ̀ Tẹmẹ Ḅe pịrịpịrị nemi mị na yekaịnḅo mamgba na.

¹⁰ Anịsịkị mị ómine ineda Nyanaḅọ Ḅe ḅiarị ḅara mị nwọse ḍumo kọn, se sịkịmamgba ọ̀ ḅụḅẹlẹye ma nwọ mịẹḅịaye-ẹ. Tọrụ kịrịkịrị iḅi mịẹmịẹaye mamgba ọ́mịna ḍumo ḅụ ḍiepakụmaḅịa, ọ́ pịkị Tamụnọ Ḅe ḍawọnemi mị ḅụ sime sẹnịḅịa.

¹¹ Ye ini oria boma nyana kụrọ mị ḅụ ḅo ịnyọ mị mgba nwọse ọ́ mịẹ kụrọma, mịẹse ómine ineda yegoyegoye nwọ inemaḅịa ḅara.

¹² Se ḅieḅẹlẹ ḅụ mịẹḅaka se Ḍaḅọ Ḅe ḅẹḅịa ḅara ọ́ mịẹse Tamụnọ Ḅe enekuḅu amanyanakiri mị ḅie ọ̀ karakarama koroma oria tomonima pịrịye ma ḍiaọkị mị ḅụgbẹịn apụ ọ́ nwọ sọ ḅọ ḅe.

¹³ Ọ̀ kanakana mị kụrọ ḅie wa ḍụapakụmamẹ, se deinma wa ọkịḅo oria yela Tọkụ Ḅe amanyanakiri mị ḅie chumẹ,

¹⁴ ọ̀ ḅụ wa ḅọrọ mịna ḅụ ma nyanaḅọ ḅe, anị mị fiearịye, mịna sima ḅụ ini ḅarasin wa pịrịsam.

Kraịst Ḅe Na Oria Fịrị Ma Na Gbolomaye

¹⁵ Kraịst Ḅe ori anị wa tọrụ se ọrị, se wa tọrụ se ọrịka Tamụnọ Ḅe kịkẹḅọ ḅe-ẹ, ori anị tatarị yi Tọkụ Ḅe-ẹ, tẹmẹayema ḅụ mgba tatarị yiḅọ ḅe.

¹⁶ Anịatịḅị ọ̀ ḅụ mị Tamụnọ Ḅe ḅọrọ soḅie na, tomonikiri ḅie na simeye goyegoye nwọ tẹmẹye-ẹ, tọrụmgbọlụ ọrịaye na pịkị tọrụmgbọlụ ọrịkaye ma na, tẹmẹ anga kụrọma na, nweni nyana apụma na, ḅẹrẹtọn apụma na, kụrọ nyana apụma na. Tamụnọ Ḅe ọ̀ ḅụ ḅọrọ bebe tomonikiri mị mgba tẹmẹ se pịkị anị se ọ̀ pịrịmẹ.

¹⁷ Kraịst Ḅe tatarị simearịogbo yemamgba pakaḅomẹ, yemamgba ori na gbọrịye mịẹ ḅụ wẹrị arịa karakara kiri nwọ nyanamẹ.

¹⁸ Ori mịn oria oju mị tịḅịnịḅọ ḅe-ẹ, anị chọchị mị-ẹ, ori mịn oju mị ḍumo mị ḅe chuku ḅe-ẹ. Ori mịn ini fịḅụsịsẹ ma ḅụ yi tatarị Tọkụ Ḅe-ẹ, mịẹse ori kẹngẹ ye mamgba ḅụ tatarị kiri mị nwọ nyanaḅịa ẹrẹchị.

¹⁹ Anịatịḅị anị Tamụnọ Ḅe ḅi ọkụ-ẹ na Tọkụ Ḅe na mịnaḅụ na Tamụnọ Ḅe simeọkụ sime-ẹ.

²⁰ Anịọkụma, Tọkụ Ḅe ḅụ Tamụnọ Ḅe ḅọrọ ḍukopẹlẹmẹ na ò tomonikiri mị mgba nwọ pịkịḅo ọ̀ ḅụ pịrịḅịa, Tamụnọ Ḅe oria Tọkụ Ḅe mgbẹsẹchịn ọgọnọ kọn fị ḅụ ḅọrọ deinma mịẹmẹ, se ye mamgba pịkịḅo ọ̀ ḅụ pịrịmẹ tomonikiri ḅie na pịkị soḅie ye mamgba na.

²¹ Gbọrị sịkị, ọ́ Tamụnọ Ḅe na sasamẹ, pịkị ori na tarakapụ nwọ sọmẹ ọ́ mịẹ siaye ma na pịkị ọ́ nyana si koromama na gose.

²² Ọkụma mịọkụ oria Tọkụ Ḅe kọn fị mị gose, Tamụnọ Ḅe ó seni oria ikiapụ nwọ mịẹsam, ori ọ́ mịẹse ọ́ fịafịa, mịẹirimaka ḍukosimaye ḅụ oforiapụ ọ̀ tọrụkuḅu ọ́ nwọ sọḅịa ọkụ.

²³ Ó ḅereni ḅụ chịẹ tọrọkọ mun anị jike ẹka chukusẹkẹ ḍụparị mị ọgọnọ, iḅiọkwẹịn mị naa ḅụ ọ́ nyanaḅo sa tọrụseḍikiarị sọye mị ḅụ ó jike ma ọ́ pịkị ḅụsikima ma. Mịn iḅiọkwẹịn mị, anị ị̀rị̀ Pọl ḅe ḅo anịa fịrịnwẹngịḅọ nwọ sọye mị-ẹ—mịn iḅiọkwẹịn mị anị ini ḍuko ḅẹḅọ ḅẹḅọ pịrịarịye mị-ẹ, bebe tomonikiri mị mgba ḅie.

Pọl Ḅe Chọchị Mị Ḅe Fịrịnwẹngịḅọ Ḅara Ḅụ Mịẹaye Ma

²⁴ Se mịọkụ ị̀ ḅieḅẹlẹaḅẹ àrị ómine gose tọrụsiọrịye ẹrẹchị, anịatịḅị ị̀ya ojumịnị mị tọrụsiọrị ḅụ à ḅarachụa Kraịst Ḅe ọrị oria oju mị pịrị kọnma tọrụsiọrịma mịẹ ḅeinmaḅẹ, anị chọchị mị-ẹ.

²⁵ Se Tamụnọ Ḅe ị̀ seni chọchị mị ḅe fịrịnwẹngịḅọ nwọ mịẹsam, ọ́mịna iḅi gose mị fịrị mị se ị̀ pịrị nwẹngị-ẹ nwọ ḅẹ ḅọ ḅe, mị fịrị mị anị ḅeinma oria oku mị nwọ ḍukopakụma mị-ẹ.

²⁶ Anị ḅọrọsa ḅụọ mamgba ḅụ ò seni ḅọị ḅụ koroma tomoni mamgba pịrịye mị-ẹ, ọkụma mịọkụ ori anị ḍieḅelema oria tomonima pịrịsam.

²⁷ Tamụnọ Ḅe tọnye anị oria ḅọịye mị nwọ ḍieḅelema oria tomonima pịrị mị-ẹ, mị yela pịkị boma nyana ḅọịye mị ọ̀ nyana se tomoni mamgba pịrịye mị. Se ḅọịye mị, anị Kraịst Ḅe ori ọ́mịna ḅie omi-ẹ, anị mị fiearịye ọ́ Tamụnọ boma mị ḅụ yeḍiaọkịḅịa.

²⁸ Anịgose wa Kraịst Ḅe simeọkụ nwọ ḍuko ḅẹḅọ ḅẹḅọ pịrịmẹ. Wa nyana nemi mị laḅara mgba wa nwọse ini tetema pịkị ye se ini ḍiemẹ mịẹse wa Kraịst Ḅe na gbọrịye mịẹ ḅụ, karasa ḅọ ḅara nwọse ḅọḅọ ọkị Tamụnọ Ḅe tọrọkọ ḅoḅịa ḅara.

²⁹ Mịn mị nwọ mịẹ gose à ḅụkụrọma ịnyọ se fịrịnwẹngịmẹ, Kraịst Ḅe pịrị opu ịnyọ mị à nwọse anị mịẹmẹ ị̀ ḅie ḅụ sime fịrịnwẹngịarịye mị.