Kịẹnḅịpị Ma 5 - Kịrịkẹnị Baịbụl

Fịafịakapụ Ma Gboloma Oloko Ma

¹ Anị-ẹ so Nyanaḅọ Ḅe nwọse Moziz ḅe ḅẹmẹ,

² “Tọn Izrẹlapụ ma pịrị na inia ogboku ḅụkan obi kọnḅọ anịkanịka ọgị kọnḅọ pịkị ḅara se ḍụẹịn lama ḅụ ḅọrọ fịafịakaḅọ sọsaḅọ goyegoye inia ogboku ini nụḅọ depakụma.

³ Mịna fịafịakapụ mamgba ómine ini sin sikima mịẹse ini ó pike sime nyọ mị pụlama-ẹka ọkụ, anị àrị ị̀ya tomonima ogboku anga àrị nyọ mị.”

⁴ Izrẹlapụma ḅịpịpoki ḅụ ini inimgba depakụmamẹ ini koḅirima sime nyọ mị ḅụ.

Mịẹirimaye Gbẹịnye

⁵ Anị-ẹ so Nyanaḅọ Ḅe ma olokoma se Moziz ḅe pịrịmẹ

⁶ Izrẹlapụma gose. Tomoniḅọ nemikase Nyanaḅọ Ḅe ḅụ kuḅie se nụḅọ ḅụ gbana gbẹịnka ḅọ nwọ sọ se jịn tomoniḅọ mịẹirimamẹ ḅẹḅẹ,

⁷ oria si mị ọ̀ nwọ ḍukopakụmaḅịa, se pịkị ọ̀ mịẹirimaye mị mgba nwọ gbẹịnḅịa, se pịkị ori inuma ḅaraḅụ ọkịye mị seni sọnọ-a kiri pu ḅe gbọrị kiri nwọse chụa ọ̀ mịẹirimaḅọ ḅe pịrịḅịa.

⁸ Ọkụma nemikase oriḅọ ḅe fịsam pịkị mịna na pakakẹ ḅẹḅẹ, se igbiki mị gbẹịn pịrịḅịaḅọ ofori-ẹ nwọ ḅẹḅẹ, ini anị se Nyanaḅọ Ḅe pịrị, anị sime agbamịẹḅọ ḅe pịrịmẹ. Mịn igbiki mị anị ye mịẹirima ḅọ ḅe seni ajirima ḅe ḅụ chụa, se ọ̀ ḅụ mịẹfịafịamaḅịaye-ẹ.

⁹ Pịkịna Izrẹlapụma seni sosikima mịẹ se Nyanaḅọ Ḅe pịrị agba goyegoye sime anịsịkị mị ḅụ ini ye mị se pịrị agbamịẹḅọ ḅe pịrịmẹ.

¹⁰ Agbamịẹḅọ goyegoye ini se ọ̀ tọrọkọ ḅo ḍiepịrịayema nwọ ọkịḅịa.

Deapụ Ineda Kuḅie Se Ḅụgbana-ẹka Eremeni Ḅụa Ḅẹrẹ

¹¹ Nyanaḅọ Ḅe tọn se Moziz ḅe pịrịmẹ

^12-14 na ọ̀ ma ma tọn Izrẹlapụma pịrị. Anị ineda ọkọpakaḅịa na, owuḅọ tarọ ma iḅiḅarase ori na angaka ọkụ nwọ kịẹnma anị jịn owuḅọ na gboloma se á ḅụ pụlamamẹ ḅẹḅẹ. Ọkụma deḅọ ḅe ma ori anịa karakara mị ḍọkịḅokẹ anịatịḅị, tarọ ma árị anị ḅọịmẹ—onyechịẹḅọ pịkị ofori-ẹ, á ye mịẹarịsịkị á kunḅọ pịkị ofori-ẹ. Anịkanịka anị ineda ọkọpakaḅịa na, owuḅọ ḅe ọ̀ tọrụ se tarọ ma kịẹnmaḅẹ ma á gbọrịye sọnị mịẹkaḅụ.

¹⁵ Anị mịẹọkụ mịẹọkụ sọnị, owuḅọ ḅe ọ̀ tarọ ma ọkị se agbamịẹḅọ ḅe damamunḅịa. Ọ̀ pịkị anịa agbamịẹ ḍiepịrịye mị sọ se chụa munḅịa mịẹmịẹ ḅaraḅụ anị fịlawa mama kọpụ, ọkụma ori oliv pulo se anịa ọgọnọ sara ẹkẹ pịkị insẹnsị sọnị ò se chụa-ẹkẹ, anịatịḅị tọrụse tarọ kịẹnma deḅọ se ḅo agbamịẹ ḍiepịrịye-ẹ; mịẹse kọkọmaye mị ḅelepakaḅịa ọkụ.

¹⁶ Agbamịẹḅọ ḅe eremeniḅọ ma ọkịḅo agbamịẹ ẹbẹ mị tọrọkọ chịẹmaḅịa.

¹⁷ Se ò boma mengi seni gbọrị okoma bọlị ḅie chụa se pịkị Nyanaḅọ Ḅe pakaḅoḅo Ikowarị mị tọrọkọ onwun ọpụrụ se mengi mị ḅie chụaḅịa, mịẹse anị akụḅịa ọkụ.

¹⁸ Anịsịkị ori á tịḅị inime finma se ò ḍiepịrịye agba mịẹ fịlawa mị seni á ḅara chụaḅịa. Agbamịẹḅọ ḅe ọ̀ ḅara ḅie worinime-ọkịḅoḅịa-akụ-mengi mị na bọlị mị na nwọ ọlọḅịa.

¹⁹ Anịsịkị agbamịẹḅọ ḅe eremeniḅọ ma mịẹ se á mịn mị karịfịḅịa “Nemikase ị́ sẹfịkẹ ḅẹḅẹ, mị mengi mị seni ḅoḅịa worinime mị anị yese ị́ mịẹ-ẹkẹ.

²⁰ Ọkụma ị́ nemikase sẹfịmẹ ḅẹḅẹ,

²¹ ye Nyanaḅọ Ḅe ị́ya ẹrẹ mị mịẹ anị worinime sọ ị́ furo ḅieapụ ma ogboku. Ye ori ị́ya ereḅụ mị mịẹse anị kpatụ se pịkị ị̀ ḅụlọ mịẹ anị su.

²² Ye mị mengi mị ị́ ḅụlọ ḅie somun se mịẹse anị su pịkị ị́ya ereḅụ mị mịẹ anị kpatụ.” Eremeniḅọ ma nwọ pẹkẹrẹḅịa “À ḅerenimẹ, ye Nyanaḅọ Ḅe ọkọ mịẹ.”

²³ Anịsịkị agbamịẹḅọ ḅe mị worinime mị gịẹịnḅịa, se ọ̀ gịẹịnye mị sịkịrị seni akụ mengi bọlị mị ḅie chụaḅịa.

²⁴ Tẹrẹmẹ ò mengi seni á pịrị se á ḅuḅịa, anị mịẹse á ḅo akụ ḅụfụka nyanaḅịaye mị-ẹ,

²⁵ agbamịẹḅọ ḅe ma eremeniḅọ ma ḅara agbamịẹ ḍiepịrịye fịlawa mị nwọ ọkịḅịa, se anị deki chịẹma tẹkẹ ḅụ anị mịẹfịafịama Nyanaḅọ Ḅe pịrị, se anị seni agbamịẹ ẹbẹ mị ọgọnọ gbanaḅịa.

²⁶ Anịsịkị ọ̀ gbọrị ḅarakuḅu ḅeinḅịaye anịa ḅụ nwọ ọpụrụ ọkị dọkịmaḅịa agbamịẹ ẹbẹ mị ọgọnọ, se anịa elekima ḍiepakụma ḅụ. Anị ḅe kuluma, ò mengi mị seni eremeniḅọ ma pịrị se á ḅuḅịa.

²⁷ Á nemikase sẹfịmẹ ḅẹḅẹ, mengi mị mịẹse árị opu ḅụakụ nyanaḅịa; á ḅụlọ suḅịa, árịa ereḅụ mị kpatụḅịa. Árịa ẹrẹ pịkị worinime sọḅịa á furo ḅie apụma ogboku.

²⁸ Ọkụma á nemiye ofori-ẹ ḅẹḅẹ, ye á la-ẹkẹ á pịkị ineda awọ yiḅịa.

^29-30 Mịn anị oloko mị-ẹ owuḅọ ḅe tarọ ma gose pụkọsoli nyana pịkị tọrụse á kịẹnmamẹ na á sẹfịmẹ nwọ ḅẹḅẹ. Ini eremeniḅọ ma se ḅo agbamịẹ ẹbẹ mị tọrọkọ chịẹmaḅịa, se agbamịẹḅọ ḅe mị Tamụnọ anga mịẹmịẹye mị mịẹḅịa.

³¹ Owuḅọ ḅe ye ori ọlọ-ẹkẹ, ọkụma eremeniḅọ ma, nemikase ye mị á mịẹmẹ ḅẹḅẹ árị anịa fomuḅara nwọ daḅịa.