Kịẹnḅịpị Ma 4 - Kịrịkẹnị Baịbụl

Livaị Sẹ Ḅie Kohat furo Mị Nyana Fịrị Ma

¹ Anị-ẹ so Nyanaḅọ Ḅe ḍuko Moziz ḅe pịrịmẹ.

² Livaị sẹ mị ḅie Kohat apụma ama ama ḅụ na pịkị furofuro ḅụ na inia kịẹnḅịpị se ḍiri ḅie chụa

³ se pịkị owuapụma ḅụ kụra soi ḅụ ọkị iwomun kụra mesi-oyi-fịnjị la se Nyanaḅọ Ḅe pakaḅoḅo Ikowarị mị ḅie fịrịnwẹngị gbẹịn-apụ ma ẹrẹ ma se ḍiri ḅie chụa.

⁴ Inia fịrị mị opuma fịafịa ayema na gbolomamẹ.

⁵ Nyanaḅọ Ḅe ma olokoma tọn se Moziz ḅe pịrịmẹ. Na ini kansoḅịa sịkị lasịkị, Erọn ḅe na oria owuapụ awọma na Ikowarị mị ḅie sọmun seni Ọḅọkụ Igbe mị tọrọkọ ḅọkọ mị kikima ḅịtẹ mị sin seni Igbe mị gbẹịn.

⁶ Ini ḍikitọrụgbẹịn nama oju apụra seni anị gbẹịn, bulu tọrụ nyana ḅịtẹ seni anị ọgọnọ ise, anịsịkị, seni anị dekiḅịa chịnma seni anịa ḅie toluma.

⁷ Ini se agbamịẹ Nyanaḅọ Ḅe pịrị fịturu-dẹbụl mị, bulu tọrụ nyana ḅịtẹ ini nwọse anịa tọrụ ise, se insẹnsị bọlị ma na, agbamịẹ-bọlị ma na pịkị agbamịẹ iru ojongo ma na. Dẹbụl mị ọgọnọ fịturu sịkịmamgba simeḅịa.

⁸ Ini pulo-pulo ḅịtẹ seni ma aye mamgba gbẹịnḅịa, se ḍikitọrụgbẹịn nama apụra seni anị ọgọnọ ise, anịsịkị, se anị dekiḅịa chịnma seni anịa ḅie tolumaḅịa.

⁹ Ini bulu tọrụ nyana ḅịtẹ seni tọnjie gbanaye mị na, anịa tọnjie ma na, yekpapụ ayema na, sẹrẹrẹ panị ma na, tire panị ma na pịkị oliv olo chụa aye mamgba na gbẹịnḅịa.

¹⁰ Anị na anịa ḅie sime fịrịnwẹngịaye ma na ḍikitọrụgbẹịn nama apụra ini nwọse àrị fangala se anị seni yedekiye mị ọgọnọ gbanaḅịa.

¹¹ Anịḅe jịnye ini bulu tọrụ nyana ḅịtẹ seni goli-goli agbamịẹ ẹbẹ mị tọrụ ise, ḍikitọrụgbẹịn nama apụra seni anị gbẹịn, anịsịkị yedeki chịnma seni arịa ḅie tolumaḅịa.

¹² Fịafịa Nyọ mị ḅie ini se yechụọ fịrịnwẹngị aye mamgba ini nwọ ọkị, bulu tọrụ nyana ḅịtẹ seni àrị fangala se àrị seni yedekiye mị ọgọnọ gbana.

¹³ Agbamịẹ ẹbẹ mị ḅụ oḅolo fọn ma ini nwọ sin seni awụ tọrụ nyana ḅịtẹ se anịa tọrụ iseḅịa.

¹⁴ Ini se agbamịẹ ẹbẹ mị ḅụ fịrịnwẹngị aye mamgba anị ọgọnọ mị ini àrị seni gbanaḅịaye-ẹ: ḅụrọ ma na, akọ nyana namagbọaye ma na, kirisoku aye ma na pịkị bazini ma na agbamịẹ ẹbẹ mị ḅe fịrịnwẹngị aye mamgba. Anịsịkị ini ḍikitọrụgbẹịn nama oju apụra seni anịa tọrụ ise, se yedekiye chịnma nwọse anịa ḅie tolumaḅịa.

¹⁵ Ini pike nyọ ḅụ, ini kansoḅịa sịkị. Kohat sẹ mị kẹngẹ anị osiḅụ sime ayema dekiḅịaye-ẹ, ọkụma anị Erọn ḅe na oria owuapụ awọma na tatarị, osiḅụ sime aye mamgba gbẹịnso pịkị inia aye mamgba na se chụa gbẹịnso sịkị. Kohat sẹ ḅie apụma ini ngịsị ḅara se osiḅụ sime ayema lama ẹkẹ anịka ini fịḅịa. Ma anị Kohat sẹ ḅie apụma sime ini pịrị fịrịma-ẹ ini Ikowarị mị sinso sịkị sinso sịkị.

¹⁶ Ẹleaza, Erọn agbamịẹḅọ yaḅe anị bebe Ikowarị mị na pịkị tọnjie pulo mị na, insẹnsị mị na, fịayemgbọlụ ḍiepịrịayema na, tomoni tịḅị sara sara pulo mị na pịkị Ikowarị mị ḅie ini se osiḅụ wẹrị Nyanaḅọ Ḅe pịrịaye mamgba na ḍikiḍiki mị sime pịrịḅọ ḅe-ẹ.

¹⁷ Nyanaḅọ Ḅe nwọse Moziz ḅe na Erọn ḅe na ḅẹmẹ,

¹⁸ “Ó ḅerenima Kohat sẹ mị fịfa Livaị furo mị ḅie

¹⁹ anị ḅụ seni osiḅụ simetẹịn ayema kpekima mị gose. Seni mịn mị kiki ḅụ, Erọn ḅe na oria owuapụ awọma na sọmun, ọrụḅọḅọ nwẹngịḅịa fịrị tọn iniḅọ pịrị, pịkị iniḅọ dekiḅịaye mị na ḍuko nụḅọ pịrị.

²⁰ Ọkụma nemikase Kohat apụma sọmun agbamịẹapụma osiḅụ sime ayema koḅiriarị ọkụ ọrịmẹ ḅẹḅẹ, ini fịḅịa.”

Sime Livaị Sẹ Mị Ḅie Gashọn Furo Apụ Ma Pịrị Fịrị Ma

²¹ Anị-ẹ so Nyanaḅọ Ḅe ḍuko Moziz ḅe pịrịmẹ na

²² Livaị sẹ mị ḅie Gashọn furo apụma kịẹnḅịpị nwọ ọkị ama ama ḅụ na, furo furo ḅụ na,

²³ se owuapụ mamgba ẹrẹ seni ḍiri ḅie chụa, kụra soi ḅụ ọkị iwoma mun mesi oyi fịnjị lasapụ ma, anị Nyanaḅọ Ḅe pakaḅoḅo Ikowarị mị ḅie fịrịnwẹngị gbẹịn-apụ.

²⁴ Ma ayema deki fịrị mị sime ini pịrịmẹ:

²⁵ Ikowarị mị na, anịa ḅie-ḅọkọ kikima ḅịtẹ mị na anịa ọḅụ gbẹịnye mị na; ini se ọgọnọ ise ḍikitọrụgbẹịn nama oju apụra mị na.

²⁶ Ikowarị mị na, ẹbẹ mị kelema odo mị ḅe ḅọkọ kikima ḅịtẹma na, ḍiki ma na, odo mị ḅọkọ kikima ḅịtẹma na, pịkị ini se ma ye mamgba sụkachịẹma yema na. Arịmgba àrị nwẹngị na gbẹịn fịrịma nwẹngịḅịa.

²⁷ Moziz ḅe na Erọn ḅe na ini tọrụse Gashọn furo apụma ḅụ wẹrị, se ḍọkịḅo ọrị na Erọn ḅe na oria owuapụ awọma na tọn ini pịrị fịrị mamgba ini nwọ nwẹngịmẹ.

²⁸ Ma sime Gashọn sẹ mị pịrị fịrịma-ẹ Ikowarị mị ḅie: Itama, Erọn agbamịẹḅọ ḅe yaḅe, inia fịrịma tọn ini pịrịḅịa.

Sime Livaị Sẹ Ḅie Mẹreraị Furo Apụ Ma Pịrị Fịrị Ma

²⁹ Anị-ẹ so Nyanaḅọ Ḅe nwọse Moziz ḅe ḅẹmẹ na Livaị sẹ mị ḅie Mẹreraị furo apụma ḅe kịẹnḅịpị nwọ ọkị ama ama ḅụ na furo furo ḅụ na,

³⁰ se owuapụ mamgba ẹrẹ seni ḍiri ḅie chụa kụra soi ḅụ ọkị iwomun mesi oyi fịnjị lasa apụma anị Nyanaḅọ Ḅe pakaḅoḅo Ikowarị mị ḅie fịrịnwẹngị gbẹịn apụma.

³¹ Ini anị Ikowarị mị ḅọkọ chịnma na, ịbama na, ogbochịnma na, chuku sẹkẹ ayema na, deki fịrị mị nyanaye-ẹ.

³² Mị ogbochịnma na, chuku sẹkẹ ayema na, ikiḅa-chịn ma na, Ikowarị mị kelema odo mị ḅie ḍiki ma na ini se anị sụka chụa chịẹma aye mamgba na. Ḅọḅọ dada nụḅọ dekiḅịaye nwọ nyanaḅịa.

³³ Ma sime Mẹreraị sẹ mị pịrị fịrị ma-ẹ Ikowarị mị ḅie: Itama, Erọn agbamịẹḅọ yaḅe, inia fịrịma tọn ini pịrịḅịa.

Livaị Sẹ Apụ Ma Kịẹnḅịpị Mị

^34-48 Anịẹrẹchị Nyanaḅọ Ḅe tọnye mị mịẹḅụ Moziz ḅe na, Erọn ḅe na pịkị ama tịḅịda apụma na, Livaị sẹ mị ḅie tẹrẹ-a furoma ḅe kịẹnḅịpị mị nwọ ọkịmẹ anị Kohat sẹ mị na, Gashọn sẹ mị na, pịkị Mẹreraị sẹ mị na. Ama ama ḅụ na furo furo ḅụ na anị ini kịẹn se ḍiri ḅie chụaye-ẹ anị kụra soi ọkịmun mesi oyi fịnjị lasa apụ anị ineda Nyanaḅọ Ḅe pakaḅoḅo Ikowarị mị fịrịnwẹngịḅịa apụ, mị ini simeḅịa ọkụ-ẹ: Sẹ Kịẹnḅịpị Kohat kịnị-a mesi oyi fịnjị ofori kịnị-a sọnọma ẹndẹ fịnjị Gashọn kịnị sonio ẹndẹ, oyiasi na soi fịnjị Mẹreraị kịnị nine-a ẹndẹ-ẹ Kịẹngboloma: kịnị poku na esenie-a si fịnjị-ẹ

Sẹ Kịẹnḅịpị

⁴⁹ Nyanaḅọ Ḅe tọn seni Moziz ḅe pịrịsa ḅaraḅụ, owuḅọ goyegoye ini se ḍiri ḅie chụa se pịkị ḅọḅọ nwẹngịḅịa fịrị na nụḅọ dekiḅịaye ma na nwọ tọn inimgba pịrịmẹ, anị Nyanaḅọ Ḅe tọn seni Moziz ḅe pịrị ọkụ mị-ẹ.