Kịẹnḅịpị Ma 33 - Kịrịkẹnị Baịbụl

Ijipt Ḅụ So Moab Mun Mị

¹ Ma anị Izrẹlapụma Ijipt mị ḅie pakaso sịkị ini mun pike sime nyọma ẹrẹma-ẹ sẹ sẹ ḅụ, Moziz ḅe na Erọn ḅe na tịḅịda ini pịrịarị sịkị ḅụ.

² Nyanaḅọ Ḅe tọn ḅaraḅụ, ini mun pike sime nyọ goyegoye Moziz ḅe ori anị nyọ ẹrẹ mị se ḍiri ḅie gịẹịnmẹ.

³ Izrẹlapụma kụra ngei akalụ mị ḅie jie-a ḍin ene anị ini Ijipt mị ḅie pakasoye-ẹ, tatarị Saḅaḅọrọ fịye mị ḅọrọ ḅe eneḅa ḅụ. Nyanaḅọ Ḅe ini ḍikiḍiki ḅaraḅụ ini Ramẹsis opuama mị ḅie pakasomẹ, Ijipt apụma lelema ini ḍikiarị ogbo,

⁴ anị Ijipt apụma inia tatarị owuapụ awọma anị, Nyanaḅọ Ḅe ḅaa apụma nwọ ḍipi àrị sịkị ḅụ. Mịn mị mịẹḅụ, Nyanaḅọ Ḅe ọ̀ kụrọtẹịn Ijipt apụ oru ma nẹngị ọkụ nwọ ḍiepakụmamẹ.

⁵ Izrẹlapụma Ramẹsis mị ḅie pakaso se mun Sọkọt mị ḅie ḅụ pike simemẹ.

⁶ Ini pịkị mun pike sime anga anị Itam onwun ele mị aka ḅụ.

⁷ Anịangaḅụ ini pịkị somun Paị Hahaịrọt anị Beal Zefọn mị ḅụ ịrụapakapaka nyọ mị da, se Migdọl mị na kpekima pike simemẹ.

⁸ Ini Paị Hahaịrọt mị koromaso se Awụ Tọrụ mị ḅụ ḅọrọ mun Shọ onwun ele mị ḅie sọmẹ; ini tẹrẹ-a ḍin se nwẹngị se mun Mara mị ḅụ pike simemẹ.

⁹ Ini anịju somun Ẹlim mị la se anịnyọ ḅụ pike simemẹ, anịatịḅị ideri mengi ḅụ oyimaịn ịkpangị fịnjị na pịkị enemi kọrọ ḅụ tesi oyi fịnjị na anịju omi-ẹ.

¹⁰ Ini Ẹlim mị koromaso se mun Suẹz Opu-ọpọ mị na kpekima pike simemẹ.

¹¹ Ini mun pịkị pike sime jịn anga anị Sin onwun ele mị ḅie ḅụ-ẹ.

¹² Ini anịju sọmun Dofka ḅụ pike simemẹ,

¹³ Anịeso anị Alus mị-ẹ.

¹⁴ Jịn anga anị Rẹfidim, anị ini ḅu mengi nyanaka nyọ mị-ẹ.

^15-37 Rẹfidim mị ḅụ ọkịmun Họ Tụndụ mị la, anị ini pike sime anga ma-ẹ: Saịnaị Onwun ele mị ḅụ na, Kibrọt Hatava (anịkanịka “Kpalakpala Iḍupu Ma”), Hazirọt, Ritma, Rimọn Pẹrẹz, Libna, Risa, Kihẹleta, Shifa Tụndụ, Hareda, Makhilọt, Tehat, Tira, Mitka, Hashmona, Mosirọt, Bẹnẹ Jakan, Họ Hagidgad, Jọtbata, Abrona, Iziọngiba, Zin piri-ele mị (anị Kedẹsh mị-ẹ), pịkị Họ tụndụ, Idọm ama mị aka ḅụ simeye mị.

^38-39 Nyanaḅọ Ḅe tọn ḅaraḅụ Erọn agbamịẹḅọ ḅe ọ̀ Họ Tụndụ mị tanjịmẹ. Ò ḅo kụra sonioasi na tẹrẹ-a kụra fịnjị lasịkị ḅụ, anịanga ò sime fịmẹ, sọnọ akalụ mị ḅie ngei ene mị ḅu, anị Izrẹlapụma Ijipt mị ḅie pakaso kụra mesi karamaye mị ḅie.

⁴⁰ Erad amanyanaḅọ anị Kenan mị ḅe chuku-ọrụ-ḅụ simeḅọ ḅe, naamẹ na Izrẹlapụma ini ḅoaḅẹ.

^41-49 Họ Tụndụ mị ḅụ ọkịmun Moab ḅele kiri mị la ḅụ anị Izrẹlapụma pike sime anga ma-ẹ: Zalmọna, Punọn, Obot, Abaịrim ḅụ siaye ma Moab pẹkẹrẹ mị ḅụ, Dibọn Gadị, Almọn Diblateim, Abaịrim Tụndụ ma Nebo Tụndụ mị na kpekiaye ma, pịkị Moab ḅele kiri Jọdan Tọrụ mị ḅụ saḅamanga mị na Jẹriko ateli mị ḅụ ḅoarị ọkụma, Bẹt-Jeshimọt mị na pịkị Akasia Pẹsịkiri mị na ḅe ogboku mị.

Ma Ini Jọdan Mị Saḅaka Sịkịḅụ Ini Tọn Ini Pịrịaye Ma

⁵⁰ Moab ḅele kiri mị Jọdan Saḅamanga ḅụ Jẹriko ateli mị ḅie ḅụ ḅoarị ọkụma, anịanga ḅụ Nyanaḅọ Ḅe

⁵¹ ma ḅerijine ọkwẹịn ma kọn se Moziz ḅe pịrịmẹ Izrẹl mị gose: “Ọ́ Jọdan mị saḅamun Kenan ama mị ḅie sọsa ḅẹḅẹ,

⁵² ama mị ḅie angapụ mamgba ómine ini depakụma. Ini ḍụparị na ikulele na se tẹmẹ oru ma na pịkị inia tẹkẹ kiri mamgba ọ́ kansin.

⁵³ Ómine ama mị ọkị se anịa ḅie anga, anịatịḅị ị̀rị̀ anị seni ọ́ pịrịaḅẹ.

⁵⁴ Ómine ama mị ḍiaọkị sẹsẹ ḅụ na furo ḅụ na, anị ịkịan wakị ḅụ, opu anga se opu sẹma pịrị pịkị kalaye se kala sẹma pịrị.

⁵⁵ Ọkụma ó nemikase ama mị ḅie sime apụma depakụmakẹ ḅẹḅẹ, nwọ kọn apụma fun-pụmburo ḅụfụkama ọkụ ini nwọse ọ́mịna tọrụmgbọlụ ḅie ọ́mịna ḅụfụkamaḅịa, pịkị ịga sọ ọ́mịna agaga ma temi se owu seni ọ́ pakaḅịa.

⁵⁶ Ó nemikase ini depakụmakẹ ḅẹḅẹ, àrị ọ́ ḅaasinḅịa, anị à seni ini ḅaasinḅịa ẹrẹchị tọnsa ḅara mị.”