Kịẹnḅịpị Ma 31 - Kịrịkẹnị Baịbụl

Ini Midia Mị Na Gbin Osiḅụ Sime Ọmụ Mị

¹ Nyanaḅọ Ḅe nwọse Moziz ḅe ḅẹmẹ,

² “Tọrụsiọrị se Midiapụ ma pịrị ini seni Izrẹlapụma mịẹye mị gose. Ị́ anị mị mịẹsosa ḅẹḅẹ, ị́ fịḅịa.”

³ Anịẹrẹchị Moziz ḅe nwọse tomonima ḅẹmẹ. “Ọ́ ḅụkarakarama ọmụ pịrị, mịẹsosịkị ómine ineda owuse Midia mị pakase fomuḅara se ini pịrịḅịa ọkụ, ini se Nyanaḅọ Ḅe mịẹye mị gose.

⁴ Izrẹl mị ḅieḅụ gbọrị sẹ kịnị-a mẹndẹ oyiasi fịnjị-fịnjị owuapụ ọ́ nwọse ọmụ mị fịrịma.”

⁵ Anịḅụ, owuapụ ḅụ, kịnị-a mẹndẹ oyiasi fịnjị-fịnjị ini nwọ sẹlẹ ọkịmẹ gbọrị sẹ gbọrị sẹ ḅụ, inimgba kịẹnḅịpị laye, anị gbọrị poku na kịnị-a oyi ẹndẹ na-ẹ, owuapụ ḅụ, ḅụ karakarama ọmụ mị pịrịmẹ.

⁶ Moziz ḅe ini se ọmụ mị fịrịmamẹ se Fịnehas ḅe ọmụ kụlọdamẹ, Ẹleaza agbamịẹḅọ ḅe yayo ḅe, ori anị osiḅụ simeayema na pịkị oḍu ma na anị se elekima pịrịḅịaye ma ḅara simeḅọ ḅe-ẹ.

⁷ Ini owu se Midia mị pakamẹ, anị Nyanaḅọ Ḅe tọn se Moziz ḅe pịrị sa ḅaraḅụ, se owuapụ mamgba ḅaafamamẹ,

⁸ pịkị Midia sọnọ amanyanapụma se chụa: Ivaị ḅe na, Rekẹm ḅe na, Zọ ḅe na, Họ ḅe na, pịkị Riba ḅe na. Belam, Beọ yaḅe sọnị ini ọ̀ ḅaamẹ.

⁹ Izrẹlapụma ini Midiapụ eremeni ma na awọmẹnịma na inia nambuloma na ananama na kunsomẹ, anịsịkị inia ngọ mamgba ọfọịn ọkịmẹ,

¹⁰ pịkị inia opuamama na ini pike simesime nyọ mamgba dọkịma famamẹ.

¹¹ Ọmụ mị ḅie ini ọfọịnḅoayema na, ini kunsoapụma na pịkị namama na,

¹² ini nwọse ḅo Moziz ḅe na, Ẹleaza ḅe na, pịkị Izrẹl sẹ apụma na nwọ pịrịmẹ, anị Moab sẹrẹrẹ-ḅele-kiri ḅie simeapụma Jọdan saḅamanga Jẹriko ḅụ ḅoarị ọkụma.

Ọmụogbo Mị Vinpịkị Ḅomẹ

¹³ Moziz ḅe na, Ẹleaza agbamịẹḅọ ḅe na pịkị sẹ tịḅịdapụ mamgba na ini pike sime nyọ mị ḅụ pakamun ọmụogbo mị na ịrịamẹ.

¹⁴ Moziz ḅe ọmụkụlọdapụ ma na owuni na ḅụ ẹkẹpụ ẹkẹpụ ma tịḅịda apụma na ḅụ ò ḅụosọ nyanamẹ, anị ọmụ mị ḅie vinpịkịḅo apụma.

¹⁵ Ọ̀ nwọse ini gbelamẹ, “Nde ó gose mịna eremeni mamgba wẹrịso se ini ḍumo ye?

¹⁶ Ó seni ḅiekoroma na eremeni ma anị Belam ḅe ḍukoaye ma mịẹapụ ma-ẹ, ini anị pịkị Piọ mị na kpakịmaye ḅụ tomonima mịẹ ini Nyanaḅọ Ḅe ḅụ ḅereni nyanakaye-ẹ, mịn mị anị fin-fin obi mị dekiḅo Nyanaḅọ Ḅe oria tomonima ọgọnọ gbanaye-mịẹ.

¹⁷ Anịẹrẹchị mịọkụ, ere nemisa owutọkụ goyegoye na pịkị owuḅọ nemisa eremeniḅọ goyegoye na, ọ́ ḅaafama,

¹⁸ se eremeni awọma na pịkị eremeni ma na ḅie ma owuḅọ nemikapụ ma ọ́ nwọse koroma ọḅụ wẹrịma.

¹⁹ Mịọkụ ọ́mịna ḅie nweni ḅaasaḅọ anịkanịka ḅara se ḍụẹịn lamasaḅọ goyegoye wa pike sime nyọ mị ḅie nụḅọ sọka mun sọnọma ḍin nwọ laḅịa. Tẹrẹ-a ḍin karama ene mị na pịkị sọnọma ḍin karama ene mị na ḅụ ómine na ọ́ kun eremeni ma na ómine ọ́ḅụ mịẹfịafịama.

²⁰ Ḅịtẹ goyegoye ómine anị mịẹfịafịamaḅịa, anị ḅọrọ nama ojuapụra se mịẹye sọnị, oḅori oju ichuka se mịẹye sọnị anịkanịka ḍụpọ se mịẹye sọnị.”

²¹ Ẹleaza agbamịẹḅọ ḅe nwọse ọmụgbin se ḅoapụ ma ḅẹmẹ, “Ma anị Nyanaḅọ Ḅe chụa se Moziz ḅe pịrị oloko ma-ẹ.

^22-23 Dọkị ẹkaye goyegoye, anị ḅọrọ goli, seleḅa, alapẹlẹka, ikulele, tini, anịkanịka ọlẹji, se anị mịẹfịafịamaḅịa ọkụ anị, anị se fịnị ḅie chu ḅụ-ẹ, jịnye goyegoye se ye mịẹfịafịama mengi mị se anị sana.

²⁴ Sọnọma ḍin karama ene mị ḅụ ọ́mịna ḅịtẹma mgba ọ́ sịkịrịḅịa; anịsịkịre mị ọ́ fịafịaḅịaye-ẹ se pịkị ẹmbẹ nyana se wa pike sime nyọ mị ḅie sọḅoḅịaye-ẹ.”

Ọmụ Ḅie Ọfọịnḅoaye ma Ḍie Mị

²⁵ Nyanaḅọ Ḅe nwọse Moziz ḅe ḅẹmẹ,

²⁶ “Ị́rị́ na Ẹleaza ḅe na, pịkị sẹ tịḅịdapụ ma na ó gboloma ọmụ mị ḅie ini ọfọịnḅoayema kịẹnḅịa, ini kunḅo ikoliapụma na pịkị namama na sọnị.

²⁷ Ini se ḅoaye mamgba seni gbasị mama kiri ḍie. Gbọrị kiri sime ọmụgbin-apụ ma pịrị, se ísí kiri mị pịkị sime sẹ mị ḅie kọn apụma pịrị.

²⁸ Sime ọmụgbin apụma pịrị kiri mị ḅụ ama ochoye ḅaraḅụ sime Nyanaḅọ Ḅe pịrịḅịaye anị, ini kunḅoapụ ma ḅụ kịnị ẹndẹ-sọnọ-asi fịnjị ḅụ gbọrịḅọ-gbọrịḅọ nwọ ọkị, nambuloma na yepụra asụn ma na, ananama na, pịkị oḅorima na ḅụ sọnị ọkọ mịẹ.

²⁹ Àrị se Ẹleaza agbamịẹḅọ ḅe pịrị anị sosikima se Nyanaḅọ Ḅe pịrịaye ḅaraḅụ.

³⁰ Sime ísí kirikọn apụma pịrịye mị ḅụ, ini kunḅoapụ ma ḅụ nweni-a mesi oyi fịnjị ḅụ gbọrịḅọ nwọ ọkị, nambuloma na, yepụra asụn ma na, ananama na, pịkị oḅorima na ḅụ sọnị ọkọ mịẹ. Àrị se Livaị apụma pịrị anị Nyanaḅọ Ḅe Ikowarị mị ḍikiḍikiarị apụma.”

³¹ Moziz ḅe na Ẹleaza agbamịẹḅọ ḅe na Nyanaḅọ Ḅe tọn ini pịrị ọkụ mị nwọ mịẹmẹ.

^32-35 Ma ọmụgbin apụma ọfọịnḅoaye ma-ẹ, pịkị ini se iniaḅụ wẹrịma ayema na: ananama na oḅorima na kịẹnḅịpị poku-a iniasi inein fịnjị, sọnọma ẹndẹ oyiasi-fịnjị na oyi na-ẹ, nambuloma esenia-a poku-ẹ, yepụra asụnma sọnọma poku na oyiasi-ẹ, ma owuapụ nemika eremeni ma kịẹnḅịpị anị inein-a poku-ẹ.

^36-40 Ọmụgbin apụma inia pẹkẹrẹ ḍiekiri mị, mị anị la-ọkụ-ẹ, ananama na oḅorima na, poku-a mesi maịn fịnjị, na tẹrẹ-a ẹndẹ jieasi fịnjị-ẹ, arịaḅụ ẹndẹ sọnọfa oyi iniasi fịnjị ini nwọse Nyanaḅọ Ḅe gbẹịnmẹ; nambuloma inein-a poku na oyi-a ẹndẹ anị ọmụgbin-apụ ma iniaye-ẹ, arịaḅụ tesioyifịnjị na maịn na ini nwọse Nyanaḅọ Ḅe gbẹịnmẹ, ama ochoye ḅaraḅụ, yepụra asụn ma tẹrẹ-a poku, ineinfa si ẹndẹ sọnọasi fịnjị-ẹ; ọmụgbin apụma iniaye-ẹ, arịaḅụ tesi gbọrịye fịnjị ini nwọse ama ochoye ḅaraḅụ Nyanaḅọ Ḅe gbẹịnmẹ; ma owuapụ nemika eremeni ma ḅụ kịnị-a mama poku sime ọmụgbin apụma pịrịmẹ, iniaḅụ kịnị soi mapụ fịnjị ini nwọse ama ochoye ḅaraḅụ Nyanaḅọ Ḅe gbẹịnmẹ.

⁴¹ Anị ḅụ Moziz ḅe sosikima sin Nyanaḅọ Ḅe pịrị ama ocho gbẹịn ayema seni Ẹleaza agbamịẹḅọ ḅe, pịrịmẹ, anị Nyanaḅọ Ḅe tọnsa ḅaraḅụ.

^42-46 Sẹ mị nyana ḍiekiriye mị sọnị ini ọmụgbin apụma ye mị mịẹ ọkụ anị ini pịkị anị mịẹ ọkụ-ẹ: ananama na oḅorima na poku-a mesi mama poku fịnjị, tẹrẹ-a ẹndẹ jieasi fịnjị na, nambuloma inein-a poku na oyi-a-ẹndẹ, yepụra asụn ma tẹrẹ-a poku, inein-a ẹndẹ fasi na sọnọasi, ma owuapụ nemika eremeni ma kịnị mama poku-ẹ.

⁴⁷ Mịn ḍiekiriye mị ḅụ Moziz ḅe ini kunḅo apụma ḅụ kịnị-a mesi oyifịnjị ḅụ gbọrị ikoliḅọ gbọrị ikoliḅọ ọ̀ nwọ ọkịmẹ, namama sọnị ọkọ-ẹ anị Nyanaḅọ Ḅe tọnsa ḅaraḅụ. Ori àrị se Livaị apụma pịrịmẹ anị Nyanaḅọ Ḅe oria Ikowarị mị ḍikiḍiki ḅaraḅụ simeapụ ma-ẹ.

⁴⁸ Anị ọmụ tịḅịdapụ ma Moziz ḅe damamun

⁴⁹ se ḅẹrẹ se ò suaye-ẹ, “Wa nyanaḅọ, mịna chukuḅie sime ọmụgbin apụma wa nwọ kịẹn nemisam na inia ḅie karakaḅọ ofori-ẹ.

⁵⁰ Anịẹrẹchị wa goli ḅiriaye ma na, ḅarachụaye na, iringi ma na, gulu ma na, pụkọchụaye ma na ọkịḅoaḅẹ, anị mịnaḅụ ḅọḅọ dekiaye ma. Wa àrị se agbamịẹ Nyanaḅọ Ḅe pịrịmẹ mịna ḍumo ma gose, mịẹse ori agbọsọ wa pịrịḅịa ọkụ.”

⁵¹ Moziz ḅe na Ẹleaza agbamịẹḅọ ḅe na inia ḅara goli ma ọkịmẹ, arịmgba ḅiriaye ḅụ àrị omi-ẹ.

⁵² Ọmụ tịḅịdapụ ma ocho pakụmaḅo ayema laye, goli okpokpo ẹndẹ pembeye-ẹ.

⁵³ Ini ọmụtịḅịda kiri ḅụ simekapụ ma ini deki ayema ini se koroma iniaḅụ wẹrịmamẹ.

⁵⁴ Anị Moziz ḅe na Ẹleaza agbamịẹḅọ ḅe na goli ma ọkị se Ikowarị mị ḅie mun ye-ẹ, Nyanaḅọ Ḅe ori Izrẹlapụma ḍikiḍikiḅịa ọkụ.