Kịẹnḅịpị Ma 25 - Kịrịkẹnị Baịbụl

Izrẹlapụ Ma Ini Ḅo Piọ Lasam

¹ Izrẹlapụma ḅo Akasia Pẹsịkiri mị ḅie ḅụ pike sime sịkị inia owuapụma sakị Moab eremeni ma na gbolomamẹ anị anịju ḅụ anga apụma.

² Mịna eremeni ma ini chịnmun ini Moab oru mị tẹkẹarị anga ḅụ agbamịẹ-alalị nwọ fịmẹ. Izrẹlapụma fịye mị fị pịkị Moab apụ oru mị tẹkẹmẹ anị

³ Beal Piọ ama oru mị. Anịẹrẹchị Nyanaḅọ Ḅe iniaḅụ ịganị nyanamẹ

⁴ se nwọse Moziz ḅe ḅẹmẹ, “Izrẹl tịḅịnị mamgba ọkị, se enekaka fịafịa ogbo ḅụ ini ḅaasin, ị̀ ḅịpịpoki ḅụ ọkọ mịẹ, anịsịkị re mị à ḅarị tomonima ḅụ ịganị nyana-ẹkaye-ẹ.”

⁵ Moziz ḅe nwọse Izrẹl ḅie fịrịtịḅịnị ma ḅẹmẹ, “Ọ́mịna ḅụ ḅọḅọ nụḅọ sẹ ḅie Beal Piọ ama oru mị tẹkẹḅọ goyegoye nwọ ḅaa-ẹ.”

⁶ Izrẹlapụma ḅie gbọrịḅọ, Midia eremeniḅọ ọkị se oria ikowarị mị ḅie sọmẹ, Moziz ḅe na bebe sẹ mị mgba tọrụkuḅu ḅụ, Nyanaḅọ Ḅe pakaḅoḅo Ikowarị mị tọrọkọ ḅụ ini kururuarị sịkị ḅụ.

⁷ Se Fịnehas, Ẹleaza yaḅe anị Erọn agbamịẹḅọ ḅe yayo ḅe, mịn ye mị ọrị sịkị, koḅirima ogbo mị ḅie ọ̀ sịsẹ pakasomẹ. Ọ̀ sụḅa deki se,

⁸ owuḅọ ḅe na eremeniḅọ ma na ḍuko ikowarị mị ḅie sọ, se sụḅa mị seni ini mamapụ ma temi ḅaamẹ. Mịn ḅara mị ḅụ Izrẹlapụma ḅaa sime obi mị dachịẹmẹ,

⁹ ọkụma anị kịnị-tẹrẹ-a poku ḅaa ḅọrọsam.

¹⁰ Nyanaḅọ Ḅe nwọse Moziz ḅe ḅẹmẹ,

¹¹ “Fịnehas ḅe nwọ mịẹye mị gose, Izrẹlapụma ḅụ à ḅarị ịganị nyanakẹ. Anịatịḅị ị̀ sikima se jịn oru tẹkẹ mị ọ̀ ḅụ ḅẹlẹkẹ, anị à gose ị̀ya ịganị mị ḅụ ini ḅaasinkaye-ẹ.

¹² Anịẹrẹchị ḍuko ọ̀ pịrị ori na sime mun ḅụọḅụọ laḅịa ọḅọkụ nwọ fịaḅẹ.

¹³ Ori na ò furo ḅie apụma na ini agbamịẹapụ sọ gbasoḅịa, anịatịḅị ọ̀ tọrụ se ḅụ seni ị̀ otomaḅịaye ọrị ḅikẹ se anị ḅụ ḅọrọ siḅụ-ḅarasin pịrị nwọ ọkịḅo tomonima pịrịsam ini mịẹasi ma ḅie.”

¹⁴ Ini Midia eremeniḅọ ma na ḅaa Izrẹlḅọ ḅe ẹrẹ anị Zimraị, Salu ḅe yayo-ẹ, Simiọnị sẹ mị ḅie ori gbọrị furo daḅọ-ẹ.

¹⁵ Eremeniḅọ ma ẹrẹ anị Kọzbaị, ḍawu Zọ ḅe, Midiapụ sẹma ḅie gbọrị kpo tịḅịdaḅọ-ẹ.

¹⁶ Nyanaḅọ Ḅe nwọse Moziz ḅe ḅẹmẹ,

¹⁷ “Owu seni Midiapụ ma paka se ini ḅaasin,

¹⁸ ini se ọ́ mịẹ siye mị gose, anị Piọ mị ḅụ ini seni ọ́ chịn oḅori mị ẹrẹchị pịkị Kọzbaị ma gose, obi mị Piọ mị gbẹịn sịkị ḅụ ini ḅaa ḅọ ma.”