Kịẹnḅịpị Ma 24 - Kịrịkẹnị Baịbụl

¹ Ḅo nwọ lasịkị Belam ḅe ò nemisam na Nyanaḅọ Ḅe ò ḅimẹ ọ̀ ḅẹlẹma seni Izrẹlapụma pịrị, anịẹrẹchị ọ̀ ḅarị mun elekima ḍọkịkẹ, anị ọ̀ tatarị mịẹ ḅara mị. Ò vinpịkị onwun ele mị da

² se Izrẹlapụma ọrịmẹ ini pike sime waraḅẹ sẹ sẹ ḅụ. Tamụnọ Ḅe sosikima kụrọ se ọ̀ datekerema

³ se ọ̀ mị ịkịan mị koromẹ: “Belam Beọ yaḅe oria oku mị, ineda ḅelema ye ọrịrịḅọ ḅe oria ọkwẹịn ma,

⁴ Anị ineda Tamụnọ Ḅe ḍukoarịye mị naanaaḅọ ḅe. Kweinma tọrụmgbọlụ se ḍiki ḅụ ḍawọju ọkụ simemẹ, Kụrọmamgba Nyana Tamụnọ Ḅe ḅara ḅo tẹmẹ ḅie aye à nwọ ọrịmẹ.

⁵ Izrẹlapụ ikowarịma àrị ḍikitọrụgbẹịnmẹ,

⁶ Kọrọ ma ọrụrụ ḅụ nangwọma sime ọkụ Anịkanịka tọrụaka ḅụ ozuma sime ọkụ, Nyanaḅọ Ḅe ḅarana ḍipi kụnụ alọis iḅi chịnma sime ọkụ Anịkanịka mengi aka ḅụ awụ chịnma sime ọkụ.

⁷ Ene ḅakama koro ini pịrịḅịa Se mengi iḅiọkụ lọkọlọkọma ozu kirima ḅie pakase ini inia chịnmgbọlụma ḍipiḅịa. Inia amanyanaḅọ ḅe opusọtẹịn Egag ḅe nẹngịḅịa, Oria ḅẹrẹtọn mị anị so mun ḅọlọju la pịkị wasamaḅịa.

⁸ Tamụnọ Ḅe Ijipt mị ḅie ini ọkị pakụmaḅomẹ; Piri ḅie owoi nambulo owusọ ọkụ ọ̀ nwọse ọmụgbin ini pịrịpịrịmẹ. Ini ini na tarakapụma desin mẹ, Inia ịmgbema kọsịma, pịkị inia lubu ḍẹịnma anyịmamẹ.

⁹ Sẹ mị opu chịrịḅa sime ọkụ anị anị sime ọkụ-ẹ; Anị mọnọarị sịkị ḅụ, dadama mun anị woḅịaḅọ ofori-ẹ. Izrẹl mị ḅẹlẹmaḅọ goyegoye ḅẹlẹma sime nụḅọ pịrịḅịa, Pịkị worinime se Izrẹl mị pịrịḅọ goyegoye worinime sime nụḅọ pịrịḅịa.”

¹⁰ Belak ḅe ịkpụlụchụa se ḅụosọ ḅụ nwọse Belam ḅe ḅẹmẹ, “Àrị ị́ chịnḅomẹ na ị̀rị̀ na tarakapụma worinime se ini pịrị, ọkụma mị tẹrẹ-a sịkị ị́ nwọse ḅẹlẹma se ini pịrịsam.

¹¹ Mịọkụ be so warị mun! À gbẹịnye se ị́ pịrịḅịa à nwọ ḅẹmẹ, ọkụma Nyanaḅọ Ḅe mịẹse anị ị́ gbarịsam.”

¹² Belam ḅe nwọse ọ̀ pẹkẹrẹmẹ, “Ị́ se ị̀ fịrịma okuḅo apụma à kọkọ ḍuko ini pịrị mama na

¹³ ị́ya amadaḅọ warị mị ḅie sime seleḅa ma na goli ma na ị́ ḅọrọ nwọse ị̀ pịrịḅịa sọnị, àrị ineda Nyanaḅọ Ḅe ḅịpịkan se ị̀ ḅarakuḅuye mịẹkẹ. Nyanaḅọ Ḅe ị̀ ḅẹ na ḍuko nwọḅẹye mị kẹngẹ anị à ḍukoḅịaye-ẹ.”

Belam Ḅe Koro Kuluma Ịkịan Ma

¹⁴ Belam ḅe nwọse Belak ḅe ḅẹmẹ, “Mịọkụ à vinpịkị so ị̀ya tomonima dama mun aḅẹ, ọkụma ma à soka sime ogbo, Izrẹlapụma se tọrọkọju ị́ya ama mị mịẹḅịaye mị à nwọse ị́ ḅerijine-aḅẹ.”

¹⁵ Anịsịkị ọ̀ mị ịkịan mị koromẹ: “Belam Beọ yaḅe oku mị Ineda ḅelema ye ọrịrịḅọ ḅe oria ọkwẹịnma,

¹⁶ Anị ineda Tamụnọ Ḅe ḍukoarịye mị naanaaḅọ ḅe Pịkị Geletẹịnḅọ Ḅe ḅaraḅo nemi mị daọkịḅọ ḅe-ẹ. Se tẹmẹ ḅụ Kụrọmamgba Nyana Tamụnọ Ḅe Ḍie elekima mị ọrịmẹ.

¹⁷ À tọrọkọju mịẹḅịaye ḍikimẹ, Se Izrẹl sẹ mị ọrịmẹ. Lolia ḅịaọkụ ḅịarị amanyanaḅọ, anị sẹ ḅie pakaḅoḅịa. Sotọrụ pu àrị lolia sime ọkụ, Izrẹl mị ḅie ọ̀ pakaḅoḅịa. Ò Moab tịḅịnịma ḅakụḅịa Ọ̀ pịkị Sẹt apụ mamgba fomu kiri gbinḅịa.

¹⁸ Idọm mị ḅie sime ori na tarakapụma ọ̀ nwọ kansinḅịa, Se inia ama mị seni oriaye mịẹḅịa. Izrẹl mị pa ọmụḅaraiḅi nyana ma munḅịa.

¹⁹ Izrẹl sẹ mị ini nanga kiri pịrịḅịa Se inia ḅụ kuluma se kọn apụma ḅaasinḅịa.”

²⁰ Se Belam ḅe tẹmẹ ḅie Amalẹk apụma ọrị se mị ịkịan mị koromẹ: “Amalẹk mị anị sẹ mamgba ḅụ kụrọtẹịn sẹ mị-ẹ, Ọkụma anị fagbasoḅịa kuluma ḅụ.”

²¹ Ò tẹmẹ ḅie Kenaị apụma ọrị se mị ịkịan mị koromẹ: “Ómine anga nyọ mị ḅara la-ẹka nyọ-ẹ, Ini se ịkụ ọgọnọ gelema sụka ḅara la-ẹka feni-warị sime ọkụ simemẹ,

²² Ọkụma ómine Kenaị apụma ini ọ́ kansinḅịa Asiriapụ ma ọmụ ḅie ó kun soḅịa sịkị.”

²³ Belam ḅe mị ịkịan mị koromẹ: “Ọgọnọju ḅụ koḅirima simearị apụma tapụ?

²⁴ Owuni Saịprọs ḅie ḅụ wẹrị ḅoḅịa; Asiria mị na Eba mị na kanḅịa, Ọkụma ọḅụkọ, ini ma, ini fagbasoḅịa.”

²⁵ Anịsịkị Belam ḅe ọ̀ ḅụ karakarama se so oria ama mun mẹ, Belak ḅe pịkị so oria ju damẹ.