Kịẹnḅịpị Ma 22 - Kịrịkẹnị Baịbụl

Moab Amanyanaḅọ Ḅe Belam Ḅe Fịrịma Ọkịmẹ

¹ Izrẹlapụma nwẹngị mun Moab ele ḅie pikemẹ Jọdan mị ḅụ ịrụapakapaka nyọ mị ḅụ Jẹriko mị na damadama nyọ mị ḅụ.

² Moab amanyanaḅọ, Belak Zipọ yaḅe Izrẹlapụma seni Amọraị apụma mịẹye mị na ini pịkị ḅaka la-ọkụ mị na nwọ naa sịkị,

³ ori na oria tomonima na inia ḅalafamẹ.

⁴ Moab apụma nwọse Midia apụ tịḅịnịma ḅẹmẹ, “Mịn tomoni kpo mị mịnaye goyegoye ini sima famaḅịa, owoi-nambulo osuein fị ọkụ mị.” Anịẹrẹchị Amanyanaḅọ Belak ḅe

⁵ ori okunwẹngịapụ seni Belam Beọ yaḅe fịrịmamẹ, anị Pitọ ḅie simeḅọ ḅe Yufretis Tọrụ mị na kpekima simeye mị Emọw ama mị ḅieḅụ. Belak ḅe ḅịpị ḅụ ini mịn oku mị daḅo Belam ḅe pịrịmẹ: “À ḅimẹ ị́ nemi na bebe gbọrị sẹ Ijipt mị ḅie pakaḅosam, se anịa tomonima wasama nyọ mamgba kelemaḅẹ pịkị mịna ama mị ọkịḅịa ẹrẹchị ḅiaḅẹ.

⁶ Inia kịẹnḅịpị ḅaka wa nẹngịmẹ, anịẹrẹchị sisi ḅo worinime se ini pịrị ị̀ pịrị. Anịsịkịre wa ineda ini nẹngịma se ama mị ḅie ini desinḅịa. Àrị iḅiọkụ nemimẹ na ị́ ḅẹlẹma se pịrịsa apụ, ini ḅẹlẹmasa apụ sọsam, ị́rị́ pịkị worinime se pịrịsa apụ, ini worisa apụ sọsam.”

⁷ Anị Moab na Midia na tịḅịnịma worinime mị ḅe gbẹịnye mị ọkị se so Belam ḅe damamunye-ẹ se Belak ḅe fịrịma oku mị ḍuko ọ̀ pịrịmẹ.

⁸ Belam ḅe nwọse ini ḅẹmẹ, “Ọ́ mịanga sime mị ḍin, se ḅa lasịkị Nyanaḅọ Ḅe ḍuko ị̀ pịrịḅịaye mị à nwọ ḍuko ọ́ pịrịḅịa.” Anịẹrẹchị Moab tịḅịnịma Belam ḅe na simemẹ.

⁹ Tamụnọ Ḅe Belam ḅe damaḅo se nwọse ò gbelamẹ, “Mịnapụ ma tapụ, nwọ ị́rị́ na sime apụma?”

¹⁰ Ọ̀ nwọse ọ̀ pẹkẹrẹmẹ, “Moab Amanyanaḅọ Belak ḅe ini se ị̀ fịrịmamẹ ḅo ḍuko ị̀ pịrị

¹¹ na Ijipt ḅie ḅụ ḅoapụ wasama bebe ama mị mgba kelemasam. Ò ḅimẹ à worinime se ini pịrị, mịẹse ori ineda ini na ọmụgbin se ini desinḅịa ọkụ.”

¹² Tamụnọ Ḅe nwọse Belam ḅe ḅẹmẹ, “Mịna apụma ini na munma, Izrẹlapụma worinime se ini pịrị ma anịatịḅị à ḅẹlẹma seni ini pịrị ḅọrọsam.”

¹³ Eneḅa dedeḅie Belam ḅe mun nwọse Belak ḅe se ọ̀ fịrịma okunwẹngịapụ ma ḅẹmẹ, “Ó vinpịkịso ọ́mịna ama mun, Nyanaḅọ Ḅe ò ḅerenikẹ àrị ómine na mun.”

¹⁴ Anị ini mun ḍuko Belak ḅe pịrịye-ẹ na Belam ḅe ori ini ḍukoḅo ḍụkụkẹ.

¹⁵ Belak ḅe tịḅịnịma ḅụ ḅakatẹịn pịkị osi nyanatẹịn tatarị apụma nẹngị jịn apụ se fịrịmamẹ.

¹⁶ Ini mun Belak ḅe fịrịma oku mị ḍuko Belam ḅe pịrịmẹ: “Sisi ḅereni ma gbọrịye sọnị kikichụa ị́ pịrị ị̀ damaḅo ḅụ!

¹⁷ À ḅakama gbẹịnye se ị́ pịrịḅịa, ị́ ḅiye ḅiye à pịkị se ị́ pịrịḅịa. Sisi ḅo worinime se mịnapụma pịrị ị̀ pịrị.”

¹⁸ Ọkụma Belam ḅe pẹkẹrẹ se nwọ ḅẹmẹ, “Belak ḅe ḅọrọ oria amanyanaḅọ warị mị ḅie sime seleḅa ma na goli mamgba na nwọse ị̀ pịrịḅịa nwọḅẹ sọnị ngịsị àrị ineda ị̀ Nyana Tamụnọ Ḅe ḅịpịkan ẹkẹ gbọrị sịkịsọ.

¹⁹ Ọkụma ómine sọnị ó mị ḍin mị se mịanga sime ísíapụma mịẹọkụ mịẹ, se ye à Nyanaḅọ Ḅe ḅịpị gbelanemi nwọfa ò ḍukoḅịa jịnye omi-ẹtuḅo.”

²⁰ Anị ḍin mị ḅie Tamụnọ Ḅe ḅo nwọse Belam ḅe ḅẹmẹ, “Nemikase mịnapụma ini ḅo ị́ chịn-ẹḅomẹ ḅẹḅẹ, ḅụkarakarama ini na mun, ọkụma àrị ị́ ḅẹye kẹngẹ nwọ mịẹ.”

²¹ Anị Belam ḅe eneḅa dedeḅie oria yepụra asụn ḅe ḅụkụlọ se Moab apụ tịḅịnịma na somunye-ẹ.

Belam Ḅe Na Oria Yepụra Asụn Ḅe Na

²² Tamụnọ ḅe anị ori ịganịma mẹ Belam ḅe ini na mun-arịye mị se Belam ḅe oria yepụra asụn ḅe se nwẹngịarị sịkị oria mama fịrịnwẹngịapụma pịkị ọ̀ḅụ sọ mun mẹ. Nyanaḅọ Ḅe enjẹlḅọ ḅe ogboku chịẹmẹ ateli kiki ọ̀ pịrịḅịa ẹrẹchị.

²³ Yepụra asụn ḅe enjẹlḅọ ḅẹ, okola-agiji ọlọ chịẹsime ḅara mị nwọ ọrị sịkị, ori ateli mị wẹrịso se piri ḅie sọmẹ. Belam ḅe yepụra asụn ḅe fomu se ọ̀ pịkị ḅo ateli ḅie chumẹ.

²⁴ Anị enjẹlḅọ ḅe somun mama irumịẹ chịnmgbọlụ ozuma ogboku, ḍụparị-onu anga anga ḅụ pịkị omi ḅe kpapụ ateli ḅụ chịẹye-ẹ.

²⁵ Yepụra asụn ḅe enjẹlḅọ ḅe ọrị sịkị, ọ̀ ḅụ se onu mị guroḅọrọ se Belam ḅe ḅụọ kpatụmẹ. Belam ḅe pịkịna yepụra asụn ḅe fomumẹ.

²⁶ Enjẹlḅọ ḅe pịkị so mun tọrọkọ chịẹmẹ anị ngịsị ḅọrọḅịa ọkụ oforika kpapụ ateli ḅụ mama pẹkẹrẹma ḅụ mgba.

²⁷ Mịn sịkị mị ḅụ, yepụra asụn ḅe enjẹlḅọ ḅe ọrị sịkị, ò kiri ḅọlọlọmẹ. Belam ḅe opu ḅụosọ ḅụ sakị oria amgbara mị se yepụra asụn ḅe fomumẹ.

²⁸ Anị Nyanaḅọ Ḅe ọkwẹịn kụrọ se yepụra asụn ḅe pịrị se ọ̀ nwọse Belam ḅe ḅẹye-ẹ, “Cheye à ḅọrọ nwọse ị́ mịẹ? Nde ị́ gose mịna tẹrẹ-a sịkị ma ḅụ ị̀ fomuye?”

²⁹ Belam ḅe nwọse ọ̀ pẹkẹrẹmẹ, “Anịatịḅị ị́ ị̀ seni oḅoriḅọ mịẹmẹ! Okola agiji nemikase ị̀ ḅara sime ọkụma, mgbọkụ àrị ị́ ḅaa sinḅịa.”

³⁰ Yepụra asụn ḅe nwọse ọ̀ pẹkẹrẹmẹ: “Ị́ya yepụra asụn ḅe ị̀rị̀ka, anị ene ngịsị ị́ se nwẹngị nweni ḅo mịmgba la wuḅe. Jịn sịkị ị́ ḅụ à nwọ sime ḍumokọnsa?” Belam ḅe nwọse ọ̀ pẹkẹrẹmẹ, “Ẹn-ẹn.”

³¹ Anịsịkị mị Nyanaḅọ Ḅe Belam ḅe mịẹse ori enjẹlḅọ ḅe okola-agiji ọlọ chịẹ ọkụ mị nwọ ọrịye-ẹ; anị Belam ḅe ḅịkịkoro se ọ̀ tọrụ se kiri iḅoye-ẹ.

³² Enjẹlḅọ ḅe nwọse ò gbelamẹ; “Nde ị́ gose ma tẹrẹ-a sịkị ma ḅụ ị́ya yepụra asụn ḅe fomuye? À ḅo ateli kiki ị́ pịrị-ẹḅomẹ, anịatịḅị mị ị́ mun na gbẹịnkaye-ẹ.

³³ Ị́ya yepụra asụn ḅe ị̀ ọrị se vinpịkịmẹ tẹrẹ-a sịkị ḅụ. Ori ọkọ mịẹka ọkụma, mgbọkụ àrị ị́ ḅaa se yepụra asụn ḅe wẹrịsosam.”

³⁴ Belam ḅe nwọse Nyanaḅọ Ḅe enjẹlḅọ ḅe pẹkẹrẹmẹ, “À si mịẹsam. À nemikẹ na ị́ ateli ogbo chịẹ kikichụa ị̀ pịrịarị ọkụ, ọkụma mịọkụ à mun-arịye mị kurakẹ ị́ nwọ ḅẹḅẹ, à vinpịkị soḅịa.”

³⁵ Ọkụma enjẹlḅọ ḅe nwọse ọ̀ ḅẹmẹ, “Mịnapụ ma ini na mun, ọkụma àrị ị́ ḅẹye kẹngẹ nwọ ḍuko.” Anị Belam ḅe ini na mun ye-ẹ.

Belak Ḅe Belam Ḅe Da Warị Chu Mẹ

³⁶ Belak ḅe Belam ḅe ḅoaḅẹ nwọḅẹye mị nwọ naa sịkị, ò mun Ar ḅụ ọ̀ lamẹ, Anọn Tọrụ mị ekeḅụ sime opuama mị anị Moab eke mị ḅụ.

³⁷ Belak ḅe nwọse Belam ḅe ḅẹmẹ, “Nde ị́ gose ḅokaye à tatarị fịrịma ị́ chịn sịkị? Àrị ineda ị́ karaḅịaye se ị́ gbẹịn ẹkẹ ị́ nwọ chịn?”

³⁸ Belam ḅe nwọ pẹkẹrẹmẹ, “À ḅomẹ, à ḅoka? Ọkụma mịọkụ, che kụrọ à nwọ nyanasa? Tamụnọ Ḅe ị̀ ḅẹ na ḍuko nwọ ḅẹye mị kẹngẹ anị àrị ineda ḍukoḅịaye-ẹ.”

³⁹ Anị Belam ḅe Belak ḅe na so Kiriat Huzọt ama mị mun ye-ẹ,

⁴⁰ anịju ḅụ Belak ḅe nambulo na anana na nwọ ḅaa mịnị mị ḅụ daye se ḍie Belam ḅe na tịḅịnịma na nwọ pịrịmẹ, anị ori na kiri ḅụ sime apụma.

Belam Ḅe Tatarị Koro Ịkịan Mị

⁴¹ Eneḅa dedeḅie Belak ḅe Belam ḅe ọkị iwo Bemọt Beal mị mun mẹ, anịanga ḅụ Belam ḅe ineda sime Izrẹlapụma ḅụ gbọrị pẹkẹrẹ nwọ ọrịḅịa ọkụ.