Kịẹnḅịpị Ma 19 - Kịrịkẹnị Baịbụl

Pulo-pulo Nambulo Ḅe Ḅụ Fọn Ma

¹ Nyanaḅọ Ḅe nwọse Moziz ḅe na Erọn ḅe na ḅẹmẹ

² na ini ma olokoma chụa se Izrẹlapụma pịrị. Gbọrị pulo-pulo nambulo ọ́ nwọ ọkịḅo Moziz ḅe na Erọn ḅe na pịrị, anị ḅẹḅẹye ḅụ oforika wu, ma ini pịkị se fịrịnwẹngịka wu,

³ se ini ma ó se ḅo Ẹleaza agbamịẹḅọ ḅe pịrịḅịa. Ini pike sime nyọ mị ḅụ ini ori ọkị pakamun ḅaaḅịa ọ̀ tọrọkọ ḅụ.

⁴ Anịsịkị Ẹleaza ḅe ọ̀ nama ḅe ḅụ pulo ọkị se ọ̀ ḅaratụmgbalị se nama ḅe oju pulo mị gbọ se sọnọma sịkị se Ikowarị mị tọrọkọ da pẹkẹrẹ mị sanaḅịa.

⁵ Bebe nama ḅe mgba, apụra mị na, nama mịnị mị na, oria oju pulo mị na, pịkị ịlama na, ini àrị dọkịmaḅịa agbamịẹḅọ ḅe tọrọkọ ḅụ.

⁶ Anịsịkị ọ̀ da awụ chịn na, chịn ịsaka na, pịkị pulo-pulo ḍiki na ọkị se àrị seni fịnị mị ḅie gbin-chuḅịa.

⁷ Anị ḅọrọsa ḅẹḅẹ, ori oria ḅụchụayema sịkịrị pịkị mengi ḅiriḅịa, anịsịkị re mị ori ineda ini pike sime nyọ ḅie sọmunḅịaye-ẹ ọkụma ọ̀ fịafịakaḅọ ḅara ḅụ simemun sasoḅiri laḅịa.

⁸ Nambulo ḅe dọkịmaḅọ ḅe sọnị pịkị oria ḅụchụayema sịkịrị pịkị mengi ḅiriḅịa, ori sọnị pịkị fịafịakaḅọ ḅaraḅụ simemun sasoḅiri laḅịa.

⁹ Anịsịkị fịafịa ḅụ sime gbọrị owuḅọ nambulo fọn ma tan se mun fịafịa gbọrị nyọḅụ sikima koromaḅịa ini pike sime nyọ mị laka ḅaraḅụ, ini àrị se anịanga koroma Izrẹl sẹ mị wẹrịmaḅịa, anị ḅụmịẹfịafịama mengi mị ini nwọ tẹlịma wẹrịḅịa ẹrẹchị. Mị mịẹmịẹye mị se si dekisinḅịa ẹrẹchị ini anị mịẹmẹ.

¹⁰ Fọn ma tanḅọ ḅe oria ḅụchụayema ọ̀ sịkịrịḅịa, ọ̀ pịkị fịafịakaḅụ sime mun sasoḅiri laḅịa. Mịn oloko mị anị sime mun ḅụọḅụọ laḅịa, ini Izrẹlapụma ḅụ pịkị ini na anga igoniapụma ḅụ sọnị.

Ḅara Se fịḅọ Lama

¹¹ Ḅara se fịḅọ lamaḅọ goyegoye nụḅọ fịafịaka ḅụ sime mun sọnọma ḍin laḅịa.

¹² Ḅụmịẹfịafịama mengi mị ọ̀ nwọse ọ̀ ḅụ mịẹfịafịamaḅịa tẹrẹ-a ḍin karama ene mị ḅụ pịkị sọnọma ḍin karama ene mị ḅụ na, anịsịkị re mị ọ̀ fịafịaḅịaye-ẹ. Ọkụma ọ̀ ḅọrọ nemikase tẹrẹ-a ḍin karama ene na pịkị sọnọma ḍin karama ene na ḅụ ọ̀ ḅụ mịẹfịafịamakẹ ḅẹḅẹ, ọ̀ fịafịa ẹkẹ.

¹³ Ḅarase fịḅọ lama se nụḅọ ḅụ mịẹfịafịamakaḅọ goyegoye fịafịaka ḅụ simeḅịa, anịatịḅị ḅụmịẹfịafịama mengi mị ma ini se nụḅọ sarakẹ. Ọ̀ Nyanaḅọ Ḅe Ikowarị mị pụlamamẹ, anịẹrẹchị ini ḅarị pịkị ò se Tamụnọ-a tomonima ḅie gbọrịḅọ kịẹnma-ẹkẹ.

¹⁴ Nemikase tomoniḅọ ikowarị mị ḅie sime fịmẹ ḅẹḅẹ, fịḅọ ḅe fịarị sịkị ikowarị mị ḅie simeḅọ ò mịẹ ḅẹḅẹ, anịkanịka anị ikowarị mị ḅie sọḅọ ò mịẹ ḅẹḅẹ, fịafịaka ḅụ sime mun sọnọma ḍin laḅịa.

¹⁵ Ikowarị mị ḅie sime ḅịpị gbẹịnka ojongo na ḅẹlẹ na goyegoye sọnị fịafịakaye sọsam.

¹⁶ Ḅarase ini ḅaaḅọ, anịkanịka ateli ogbo ngẹrịfịḅọ, anịkanịka ḍụẹịn imgbe, anịkanịka iḍupu lamaḅọ goyegoye, ọ̀ fịafịaka ḅụ sime mun sọnọma ḍin laḅịa.

¹⁷ Se fịafịaka mị mịẹsin ḅụ, ini dọkịma si dekisinḅịa pulo-pulo nambulo be ḅụ fọn mị ḅụ ye ọkị se gbọrị ḅẹlẹ ḅie chụa, se ḅu mengi seni anịa ḅie chụaḅịa.

¹⁸ Mịn ini se tatarịye mị mịẹḅịa ọkụ-ẹ, fịafịaḅụ sime gbọrịḅọ chịn ịsaka ọkị, se mengi mị ḅie su, se anị seni ikowarị mị sanaḅịa, anịa ḅie simeayema na, pịkị tomonima na. Mịn ini se maịn karamaye mị mịẹḅịa ọkụ-ẹ, fịafịaḅụ sime gbọrịḅọ mengi mị ọkị seni ḅarase ḍụẹịn imgbe mị anịkanịka fịḅọ mị anịkanịka iḍupu mị lamaḅọ ḅe sanaḅịa.

¹⁹ Tẹrẹ-a ḍin karama ene mị na pịkị sọnọma ḍin karama ene mị ḅụ na fịafịaḅụ simeḅọ ḅe mengi mị seni fịafịakaḅọ ḅe sanaḅịa. Sọnọma ḍin karama ene mị ḅụ ò tomoniḅọ ḅe mịẹfịafịamaḅịa, anịeso ori oria ḅụchụayema sịkịrịḅịa pịkị mengi ḅiri ḅịa anịsịkị saso ḅiri lasa ḅẹḅẹ ọ̀ fịafịasam.

²⁰ Ḅo fịafịaka ḅụ sọ, se nụḅọ ḅụmịẹfịafịamakaḅọ goyegoye nụḅọ fịafịaka ḅụ sime ḅịa anịatịḅị ḅụmịẹfịafịama mengi mị ma ini se nụḅọ sarakẹ. Ọ̀ Nyanaḅọ Ḅe Ikowarị mị pụlamamẹ ini pịkị ḅarị ò seni Nyanaḅọ Ḅe tomonima ḅie gbọrịḅọ kịẹnma-ẹkẹ.

²¹ Mịn oloko mị ómine anị koko mun ḅene ḅene la. Ḅụmịẹfịafịama mengi mị sanaḅọ ḅe sọnị oria ḅụchụayema ọ̀ sịkịrịḅịa: ḅarase mengi mị lamaḅọ goyegoye nụḅọ fịafịaka ḅụ sime mun sasoḅiri laḅịa.

²² Fịafịakaḅọ ḅe ḅarase lamaye goyegoye fịafịakẹ, pịkị ḅarase anị lamaḅọ goyegoye nụḅọ fịafịaka ḅụ sime mun sasoḅiri laḅịa.