Kịẹnḅịpị Ma 18 - Kịrịkẹnị Baịbụl

Sime Agbamịẹapụ Na Livaị Apụ Na Pịrị Fịrị

¹ Nyanaḅọ Ḅe nwọse Erọn ḅe ḅẹmẹ, “Ị́rị́ na, ị́ya owuapụ awọma na, pịkị Livaị apụma na anịa tọrụsiọrị ọ́ nwọ ọrịḅịa à pakaḅoḅo Ikowarị mị ḅie ọ́ fịrịnwẹngịarị sịkị ḅụ ọ́ mịẹirimaye omi-ẹ ḅẹḅẹ; ọkụma agbamịẹ fịrịkiri ayema ị́rị́ na ị́ya owuapụ awọma na mị arịa tọrụsiọrị ọrịḅịaye-ẹ.

² Ị́ya mịnapụ, Livaị sẹ apụma ọkịḅo ị́ ḅụ chụa, se ini ḅarachụa ị́ pịrị, ị́rị́ na ị́ya owuapụ awọma na nwọ Ikowarị mị ḅie fịrịnwẹngịarị sịkị.

³ Ini nwẹngị ị́ pịrị gbẹịn fịrị mamgba ini nwẹngịḅịa, pịkị Ikowarị mị ḅụ ini lalama fịrị mamgba na; ọkụma Fịafịa Nyọ sime fịrịnwẹngịaye ma ngịsị ini ḅụ se àrị kpekima-ẹkẹ. Ini nemikase ḅụ se àrị kpekima mẹ ḅẹḅẹ, ị́rị́ na ini na ọ́ fịḅịa.

⁴ Ini ị́rị́ na fịrịnwẹngịḅịa pịkị Ikowarị mị ḅie ini lalama fịrị mamgba nwọ nwẹngịḅịa; ọkụma papa jụmḅọ ngịsị ị́rị́ na sọ fịrịnwẹngị-ẹkẹ.

⁵ Ị́rị́ na ị́ya owuapụ awọma na kẹngẹ mị Fịafịa Nyọ mị na agbamịẹ-ẹbẹ mị na fịrịma nwẹngịḅịaye-ẹ, mịẹse ị̀ya ịganị mị ḅarị Izrẹlapụma ọgọnọ gbana ẹka ḅara.

⁶ Ị̀rị̀ anị ḅarana ị́ya mịnapụ Livaị sẹ apụma sẹlẹọkịye-ẹ Izrẹlapụma ḅieḅụ ị́ya ḍiepịrịye ḅaraḅụ. Ị́ ini mịẹfịafịama ị̀ pịrịsam, mịẹse ini ineda ini lalama fịrịma nwẹngịḅịa ọkụ Ikowarị mị ḅie.

⁷ Ọkụma ị́rị́ na ị́ya owuapụ awọma na kẹngẹ mị agbamịẹḅọ-fịrịkiri aye, anị agbamịẹ-ẹbẹ mị na pịkị Fịafịatẹịn Nyọ mị ḅie sime aye mamgba na fịrịnwẹngịḅịaye-ẹ. Mama sime ọ́ pịrịaye-ẹ, anịatịḅị agbamịẹḅọ-fịrịkiri mị à se ḍie ọ́ pịrịmẹ. Papa jụmḅọ ḅụ, ḅụ seni osiḅụ sime ayema kpekimaḅọ goyegoye nụḅọ fịḅịa.”

Agbamịẹapụ Ḍiekiri Mị

⁸ Nyanaḅọ Ḅe nwọse Erọn ḅe ḅẹmẹ, “Se ḅiekoroma na ini se sosikima ị̀ pịrịaye mamgba à se ị́ pịrịaḅẹ anị ini se dọkịma-agba mịẹkayema. Àrị àrị seni ị́rị́ na ị́ furo ḅie apụma na pịrị aḅẹ anị sime ọ́ pịrị ḍiekiri-ẹ mun ḅene-ḅene la.

⁹ Ini seni agbamịẹ ẹbẹ ọgọnọ dọkịmaka osiḅụ simetẹịn agbamịẹ ḍiepịrịayema ḅụ, ma sime ọ́ pịrịayema-ẹ: fịayemgbọlụ agbamịẹaye ma na, mịẹirima agbamịẹaye ma na, pịkị pẹkẹrẹ pakụmaḅo agbamịẹaye ma na. Ini se osiḅụ wẹrị ị̀ pịrị agbamịẹye goyegoye sime ị́rị́ na ị́ya owuapụ awọma na pịrịmẹ.

¹⁰ Ma ayema osiḅụ sime nyọ ḅụ mị ó sime àrị fịḅịaye-ẹ, pịkị owuapụ kẹngẹ mị àrị fịḅịaye-ẹ; ómine ọkị na àrị fịafịamẹ.

¹¹ “Anịḅe jịnye, Izrẹlapụma se ḅo sosikima ị̀ pịrị ḍiepịrịye goyegoye ọ́mịnaye-ẹ. À se ị́rị́ na ị́ya owuapụ awọma na pịkị eremeni awọma na pịrị aḅẹ ọkịmun ḅene ḅene la. Ọ́mịna furo mị ḅie ḅụmịẹfịafịamaḅọ goyegoye ineda àrị fịḅịa.

¹² “Izrẹlapụma kụra kụra ḅụ se ị̀ pịrịpịrị iḅitẹịn tatarị chịnmgbọlụ mamgba à se ọ́ pịrịaḅẹ: oliv pulo na, ere iru na, pịkị fịayemgbọlụ mamgba na.

¹³ Arịmgba sime ọ́ pịrịmẹ. Ọ́mịna furo mị ḅie ḅụmịẹfịafịamaḅọ goyegoye ineda àrị fịḅịa.

¹⁴ “Izrẹl ḅie oloko ọlọka ḅụ ini mịẹfịafịama se ị̀ pịrịye goyegoye sime ọ́ pịrịmẹ.

¹⁵ “Izrẹlapụma ḅụ ini tatarị yi tọkụ anịkanịka nama ḅụ tatarị yi se ini seni ị̀ pịrịye goyegoye sime ọ́ pịrịmẹ. Ọkụma tatarị yi tọkụ mị pẹkẹrẹ ọkịḅịa igbiki ọ́ daọkịḅịa, ọ́ pịkị se fịafịaka nama ḅụ tatarị yi wu ḅe pẹkẹrẹ ọkịḅịa igbiki nwọ daọkịḅịa.

¹⁶ Awọmẹnị ma ini ḅo gbọrị akalụ lasa ḅẹḅẹ ini ini pẹkẹrẹ ọkịḅịa, ini tọn koroma igbiki ḅịpị mị ḅụ, anị seleḅa sọnọ-a pẹkẹrẹ anị ene igbiki mị la ḅaraḅụ.

¹⁷ Ọkụma tatarị yi nambulo na, anana na pịkị oḅori na ḅụ tatarị yi ayema ini àrị pẹkẹrẹ ọkị-ẹkẹ, àrị okorona okorona sime ị̀ pịrịmẹ, ini pịkị àrị seni agbamịẹḅịa. Arịa oju pulo mị seni agbamịẹ ẹbẹ mị ḅu sara, se arịa ḅụ ḅẹlẹkị mị dọkịma fịye-agba ḅaraḅụ; anịa kụnụ mị ị̀ ḅụḅẹlẹḅẹlẹmẹ.

¹⁸ Arịa mịnị mị sime ọ́ pịrịmẹ, ini se sosikima agbamịẹ wu ḅe ekpe mị na pịkị amaḅara-anga-ọḅụju ḅụọ eleke mị na ọ́mịnaye-ẹ.

¹⁹ “Àrị àrị seni ị́rị́ na, ị́ya owuapụ awọma na, pịkị ị́ya eremeni awọma na pịrịaḅẹ, Izrẹlapụma se sosikima ḍiepịrịye agbamịẹ ị̀ pịrị aye mamgba, ọkịmun ḅene ḅene la. Mịn anị ngịsị kankanka ọḅọkụ mị à se ị́rị́ na ị́ furo apụma na fịsaye-ẹ.”

²⁰ Nyanaḅọ Ḅe nwọse Erọn ḅe ḅẹmẹ, “Sime ọḅụju ḅoḅịa apụ ḍia ọkịḅịa gbọrị ngọ so ọkịma, pịkị Izrẹl mị nyana kiri ḅụ ini tọn se ị́ pịrịḅịaye ngịsị ofori-ẹ. Ị̀rị̀, Nyanaḅọ Ḅe anị dada ị́ya ḍiekiriye-ẹ pịkị sime ị́ pịrịye-ẹ.”

Livaị apụma lalama Ḍiekiriye Mị

²¹ Nyanaḅọ Ḅe nwọ ḅẹmẹ, “Izrẹlapụma ye se oyi-a kiripu ḅe gbọrị kiri ḅụ se ị̀ pịrị aye goyegoye à se Livaị apụma pịrịsam. Mịn anị ini à pakaḅoḅo Ikowarị mị ḍikiḍikiarịye ẹrẹchị sime ini pịrị gbẹịnye-ẹ.

²² Ísí Izrẹlapụma ḅarị ngịsị ḅụse Ikowarị mị kpekimama, anịatịḅị anị fị fomuḅara ọkịḅo ini pịrịḅịa.

²³ Mịọkụ ọkị tọrọkọ mun Livaị apụma kẹngẹ mị Ikowarị mị ḍikiḍikiḅịaye-ẹ, se mịẹaye mamgba inia ọgọnọ mị anị pịkị gbanaḅịaye-ẹ. Mịn anị sime gbaso oloko-ẹ anị pịkị sime ọ́mịna awọma pịrịmẹ. Livaị apụma Izrẹl ḅie ini simegbaso ḍiekiri nyana-ẹkẹ,

²⁴ anịatịḅị oyi-a kiripu ḅe gbọrị kiri Izrẹlapụma se sosikima ị̀ pịrịye mị à se ini pịrịsam, inia ḍiekiri ḅaraḅụ. Anị à gose nwọse ini ḅẹye-ẹ na Izrẹl ḅie ini simegbaso ḍiekiriye nyana-ẹkẹ.”

Livaị apụma inia Oyi-a kiripu Ḅe Gbọrị Kiri Mị

²⁵ Nyanaḅọ Ḅe tọn Moziz ḅe pịrịmẹ

²⁶ na ò ḍuko Livaị apụma pịrị: “Izrẹlapụma ḅara ọ́ daọkị, Nyanaḅọ Ḅe se ọ́ pịrị oyi-a kiripu ḅe gbọrị kiri mị ọ́mịna ḍiekiriye ḅara ọ́ nwọ ọkịsa ḅẹḅẹ, gbarịmaka ḅaraḅụ ómine anịaḅụ oyi-a kiripu ḅe gbọrị kiri se ḅọ Nyanaḅọ Ḅe pịrịḅịa anị ọ́mịna sosikima ochoye ḅaraḅụ.

²⁷ Mịn sosikima ochoye mị ozuḍipiḅọ ḅe oria ịwọ fịaye mgbọlụ na pịkị ịwọ iru na ḅe agbamịẹ ḍiepịrịye mị pịrịarị sịkị ò se ḅoye mị na gbọrị ḅara simemẹ.

²⁸ Mịn ḅara ḅu ómine sọnị Izrẹlapụma se ḅo Nyanaḅọ Ḅe pịrị oyi-a kiripu ḅe gbọrị kiri mị ḅụ ọ́mịna sosikima ochoye mị seḅo Nyanaḅọ Ḅe pịrịḅịa, anị inia ḅara ọ́ daọkị ayema ḅụ. Mịn ọ́ mịẹ Nyanaḅọ Ḅe pịrịḅịa sosikima ḍiepịrịye mị ó se Erọn agbamịẹḅọ ḅe pịrịḅịa.

²⁹ Ọ́ daọkị iḅitẹịn ayema ḅụ ó ye ọkịḅo. Ọ́mịna agba mị mịẹ Nyanaḅọ Ḅe pịrị.

³⁰ Anịaḅụ iḅitẹịn pẹkẹrẹ ma ọ́ nwọse munsa ḅẹḅẹ, kọn ayema ọ́ nwọse ọ́ ḅụ wẹrịma, anị ozuḍipiḅọ ḅe oria agbamịẹ so se kọnye se ọ̀ ḅụ wẹrịma ọkụ mị.

³¹ Ómine na ọ́mịna furoma na ineda kọn ayema nwọ fịḅịa ḅẹ-anga-ḅẹ-anga-ḅụ, anịatịḅị anị ọ́mịna gbẹịnye-ẹ Ikowarị mị ḅie ọ́ nwẹngịarị fịrị mị ḅụ.

³² Ọ́ nwọ àrị fị àrị sịkị ọ́ ḅẹrẹḅarasi nyana ẹkẹ ọ́ pịkị arịaḅụ iḅitẹịn pẹkẹrẹ ma seni Nyanaḅọ Ḅe pịrịsa sịkị. Ọkụma ọ́ ḍọkịḅo ọrị na Izrẹlapụma se osiḅụ wẹrị se ḅo ḍiepịrịayema ọ́ nwọ pụlamakẹ anị ọ́ tatarị arịaḅụ iḅitẹịn ayema se ḅo agbamịẹ Nyanaḅọ Ḅe pịrịka sime ogbo anịaḅụye ọkị fị mị; ó nemikase ọkọ mịẹ ọkụma ọ́ fịḅịa.”