Kịẹnḅịpị Ma 17 - Kịrịkẹnị Baịbụl

Erọn Amgbara Mị

¹ Nyanaḅọ Ḅe nwọse Moziz ḅe ḅẹmẹ,

² “Ḍuko Izrẹlapụma pịrị ini oyimaịn-amgbara fịnjị nwọse ị́ pịrị, sẹsẹ tịḅịnịma ḅụ gbọrịḅọ gbọrịye-gbọrịye. Gbọrịḅọ-gbọrịḅọ ẹrẹ seni nụḅọ amgbara mị ḅụ gịẹịn

³ se Erọn ḅe-ẹrẹ seni Livaị sẹ amgbara mị ḅụ gịẹịn. Gbọrị sẹ tịḅịnịḅọ gbọrị-amgbara-gbọrị-amgbara nwọ nyanaḅịa.

⁴ Àrị ọkị à pakaḅoḅo Ikowarị mị ḅie mun, se àrị seni Ọḅọkụ Igbe mị tọrọkọ koroma, anị àrị ị́rị́ na ịrịa ịrịa anga mị.

⁵ Anịsịkị à sẹlẹ ọkịsaḅọ ḅe amgbara mị, anị ịnyanya chụaḅịa. Mị à wẹrị anị mịẹpẹlẹḅịa ọkụ-ẹ, Izrẹlapụ sịkịmamgba nyana ọ́ pịrịarị mbụrụmbụrụ mị gose.”

⁶ Anị Moziz ḅe Izrẹlapụma ḅẹye-ẹ se ini inia tịḅịnịma ḅụ ḅọḅọ nụḅọ amgbara mị ọkịḅo ọ̀ pịrịmẹ gbọrịye gbọrị sẹ, gbọrị sẹ, arịmgba oyimaịn fịnjị-ẹ, se Erọn ḅe oria amgbara mị sọnị arịa ḅie omi-ẹ.

⁷ Se Moziz ḅe amgbara mamgba se Ikowarị mị ḅie Nyanaḅọ Ḅe Ọḅọkụ Igbe mị tọrọkọ ḅụ koromamẹ.

⁸ Anịḅe eneḅa, Moziz ḅe so Ikowarị mị ḅie mun sịkị ori ọrịmẹ na Erọn amgbara mị, anị Livaị sẹ ye mị, anị ịnyanya chụasam, pịkịna ngwengwe na ḅịasa ịmụnụ chịnmgbọlụ na chụasam!

⁹ Moziz ḅe amgbara mamgba deki se mun Izrẹlapụma ḍiemẹ. Ini pakaye mị ọrịmẹ se tịḅịnịma ḅụ ḅẹḅọ ḅẹḅọ nụḅọ amgbara mị deki ọkịmẹ.

¹⁰ Nyanaḅọ Ḅe nwọse Moziz ḅe ḅẹmẹ, “Erọn amgbara mị se vinpịkị mun Ọḅọkụ Igbe mị tọrọkọ koroma. Anị se koroma anị ḅerijineye sọ nyana ḅerenika Izrẹlapụ pịrịḅịa ọkụ, ini fịḅịa ini suama ḅọrọ àrị ḅẹrẹ ma dachịẹkẹ ḅẹḅẹ.”

¹¹ Moziz ḅe ọ̀ Nyanaḅọ Ḅe tọn ḅara mị nwọ mịẹmẹ.

¹² Izrẹlapụma nwọse Moziz ḅe ḅẹmẹ, “Anịọkụma mị anị mịna kuluma mị-ẹ!

¹³ Ḅụ se Nyanaḅọ Ḅe Ikowarị mị kpekimaḅọ goyegoye nụḅọ fịḅịa nwọḅẹ sịkị, anị mine mgba wa fịsoḅịaka!”