Kịẹnḅịpị Ma 16 - Kịrịkẹnị Baịbụl

Kora Ḅe Na Detan Ḅe Na, Pịkị Abaịram Ḅe na Inia Nyanaḅerenika Mị

^1-2 Kora Iza yaḅe, Kohat ḅe anị oria opu ḍaḅọ-ẹ Livaị sẹ mị ḅie, ọ̀ nyanaḅereni Moziz tịḅịda mị pịrịkẹ. Rubẹnị sẹ mị ḅie tẹrẹ apụ ọ̀ ḅụ sọmẹ—Detan ḅe na Abaịram ḅe na, Ẹlaịab owuapụ awọma na, pịkị Ọn Pilẹt yaḅe na, Izrẹlapụma ḅụ jịn kịnị oyimaịn-si fịnjị na oyi-apụ, ini anị ẹrẹpaka tịḅịnị, sẹ mị sẹlẹ ọkị apụ-ẹ.

³ Ini ḅo koḅiriamẹ Moziz ḅe na Erọn ḅe na tọrọkọ ḅụ se nwọse ini ḅẹmẹ, “Ó sime laḅiri opuma ḅọlọsam! Bebe sẹ mị mgba sime Nyanaḅọ Ḅe pịrịmẹ, Nyanaḅọ Ḅe pịkị minemgba na omi-ẹ. Nde anịọkụma, Moziz, ị́rị́ gose ị́ ḅụ dekichịẹma Nyanaḅọ Ḅe sẹ mị pịrịarị ọkụ?”

⁴ Moziz ḅe mịn mị naa sịkị, ọ̀ ḅịkịkoro se tẹkẹmẹ.

⁵ Anị ọ̀ nwọse Kora ḅe na ọ̀ ḅụ apụma na ḅẹye-ẹ, “Ḅa dede ḅie Nyanaḅọ Ḅe oria tomoniḅọ ḅe se wa ḍieḅịa; ọ̀ mịẹse sime ọ̀ pịrị ḅọḅe, anị, ori sẹlẹ ọkịsa ḅọḅe, kpekima ọ̀ damaḅoḅịa agbamịẹ ẹbẹ mị ḅụ.

^6-7 Ḅa dede ḅie ị́rị́ na ị́ ḅụ apụma na ọ́ ḅụrọchụapanị ma ọkịḅịa, binka anyị mgbọlụma na insẹnsị na se arịa ḅie chụa, se àrị deki se agbamịẹ ẹbẹ mị sime anga mun. Anịsịkị mịnaḅụ Nyanaḅọ Ḅe sẹlẹọkị ḅọḅe wa nwọ ọrịḅịa. Ómine Livaị apụma mị opuma ẹrẹ paka ḍọkịarịye-ẹ!”

⁸ Moziz ḅe pa ọkwẹịn Kora ḅe pịrịḅụ nwọ ḅẹmẹ, “Ọ́ poki, ómine Livaị apụ!

⁹ Ó se sarasaraye chịn, Izrẹl Tamụnọ Ḅe ísí-a sẹma ḅie ọ́ sẹlẹ sikima na, ó kpekimaḅo se fịrịnwẹngị Nyanaḅọ Ḅe pịrị, oria Ikowarị mị ḅie, pịkị oria fịrịnwẹngị sẹ mị pịrị-ẹ nwọḅẹye mị?

¹⁰ Ọ̀ mịẹse ị́rị́ na ísí Livaị apụma na mị osi mị nwọ nyanamẹ—se mịọkụ ọ́ pịkị agbamịẹ fịrịkiri mị sọnị se chụa ọkị ḅiaḅẹ!

¹¹ Ọ́ nwọ Erọn ḅe se chịn àrị sịkị, Nyanaḅọ Ḅe anị ị́rị́ na ị́ ḅụ apụma na ó jokoma se chịn arịye-ẹ.”

¹² Anị Moziz ḅe fịrịma Detan ḅe na Abaịram ḅe na chịnye-ẹ, ọkụma ini nwọ ḅẹmẹ, “Wa ḅoẹkẹ!

¹³ Anị Ijipt, fịye lọkọlọkọ ama mị ḅie ị́ wa ọkịpakụmaḅo mị piri-ele mị ḅie ḅaa-ẹtọn yemị ma iḅika? Ị́ pịkị ị́ ḅụ se wa nyanaḅọ mịẹ ḅi?

¹⁴ Pikipikiye ofori-ẹ na, ma ị́ wa ọkịmun fịye lọkọlọkọ ama mị ḅie sọkẹ, ozukiri sọnị ma ị́ se wa pịrịkẹ, ị́ pịkị irumịẹ chịnmgbọlụ ozu seni ma wa pịrịkẹ, ọkụma ị́ ḅiaḅẹ ị́ wa telima fama. Wa ḅoẹkẹ!”

¹⁵ Moziz ḅe Ḅụosọ ḅụ nwọse Nyanaḅọ Ḅe ḅẹmẹ, “Mịna owuapụma se ḅo agbamịẹ ḍiepịrịayema ḅụ gbọrịye sọnị ọkị ma. Inia ḅụ à mịẹsima sa ḅọ ma ofori-ẹ, inia yepụra asụnma ḅụ àrị ọkị wu pịkị ofori-ẹ.”

¹⁶ Moziz ḅe nwọse Kora ḅe ḅẹmẹ, “Ḅa ị́rị́ na ị́ ḅụ sime kịnị oyimaịn-si fịnjịma na oyi-apụ ma na ọ́ Nyanaḅọ Ḅe pakaḅoḅo Ikowarị mị tọrọkọ ḅo; Erọn ḅe sọnị ò ḅoḅịa.

¹⁷ Ọ́mịna ḅụ ḅọḅọ nụḅọ ḅụrọchụa panị mị ọkịḅịa, se insẹnsị se anịa ḅie chụa se anị seni agbamịẹ ẹbẹ mị sime anga mun.”

¹⁸ Anị ọrụ ḅọḅọ nụḅọ ḅụrọchụa panị mị deki se binka anyị mgbọlụma na insẹnsị ma na se anịa ḅie chụa, se Ikowarị mị ḅọkọ ḅụ chịẹ ye-ẹ Moziz ḅe na Erọn ḅe na sọnị pịkị ini na anịanga chịẹmẹ.

¹⁹ Anịsịkị Kora ḅe bebe sẹ mị mgba koḅirimẹ, ini tọrụ seni Moziz ḅe na Erọn ḅe na da se chịẹmẹ Ikowarị mị ḅọkọ ḅụ. Bẹkẹma ḅaraḅụ Nyanaḅọ Ḅe oria boma mị ḅịamun bebe sẹ mị mgba ḅụ saramamẹ,

²⁰ se Nyanaḅọ Ḅe nwọse Moziz ḅe na Erọn ḅe na ḅẹmẹ,

²¹ “Inia ḅụ ọ́ ḅụsikima chịẹ, àrị ini ḅaasinḅịa mị kirikiri.”

²² Ọkụma Moziz ḅe na Erọn ḅe na inia tọrụ ma se kiri iḅo se nwọ ḅẹmẹ, “Yei Tamụnọ, ị́rị́ anị ḍumo aye mamgba ḅe Tamụnọ Ḅe-ẹ. Gbọrịḅọ mịẹ si gose ị́ bebe tomoni kpo mị mgba ḅụ ịganị nyana ḅe?”

²³ Nyanaḅọ Ḅe nwọse Moziz ḅe ḅẹmẹ,

²⁴ “Ḍuko tomonima pịrị na ini ḅụsikima Kora ḅe na, Detan ḅe na, pịkị Abaịram ḅe na ikowarịma ḅụ.”

²⁵ Anị Moziz ḅe na, Izrẹl tịḅịnịma na so Detan ḅe na Abaịram ḅe na damamunye-ẹ.

²⁶ Ọ̀ nwọse tomonima ḅẹmẹ, “Mịna sitịḅịnyanapụma ikowarịma ḅụ ọ́ ḅụsikima, se iniaye ma ḅụ gbọrịye sọnị ọ́ ḅaraselamama. Anịka ọkụma, ómine iniaḅụ sọ kpọrọnị faḅịa inia sima gose.”

²⁷ Anịẹrẹchị ini Kora ḅe na. Detan ḅe na, pịkị Abaịram ḅe na ikowarịma ḅụ sikimamẹ. Detan ḅe na Abaịram ḅe na, inia erema na pịkị inia awọma na pakaḅo, inia ikowarịma ḅọkọ ḅụ chịẹmẹ.

²⁸ Moziz ḅe nwọse tomonima ḅẹmẹ, “Mịn ọ́ wẹrị nemiḅịa ọkụ-ẹ na Nyanaḅọ Ḅe anị ị̀ fịrịma seni à maye mamgba mịẹ-aḅẹ, na ị̀rị̀ papa ị̀ ḅụḅẹlẹ ẹrẹchị à àrị mịẹmẹ ḅẹyekẹ.

²⁹ Nemikase mịna apụma Tamụnọ Ḅe oria fomuḅara daka se amatẹmẹso fị kọnmẹ ḅẹḅẹ, anịọkụma Nyanaḅọ Ḅe ị̀ fịrịmakẹ.

³⁰ Ọkụma nemikase Nyanaḅọ Ḅe tomonima naakayemẹ, se kiri mị finji se ini na iniaye ma na chamamịnị, se ini fịka na koro ḍụẹịn ama mị mun mẹ ḅẹḅẹ, anịọkụma ọ́ nemiḅịa na mịna owuapụma ini Nyanaḅọ Ḅe sịkịsam.”

³¹ Ori ọkwẹịnso kirikiri, kiri mị Detan ḅe na Abaịram ḅe na chuku ḅụ wẹrị gbụamapu finji

³² se ini na inia furoḅie apụma na chamamịnịmẹ, pịkị Kora ḅe na ọ̀ ḅụapụ ma na pịkị iniaye mamgba na.

³³ Anị ini fịkana koro ḍụẹịn ama mị mun ọkụ-ẹ, iniaye mamgba na. Kiri mị ini gbẹịnmẹ, se nweni ḅarị ini ọrịkẹ.

³⁴ Anị anga sime Izrẹlapụ mamgba mangị somẹ inia owupụkọ mị ini nwọ naa sịkị. Ini olokumẹ, “Ọ́ mangị! Kiri mị anị wa se chụa chamamịnịka soẹkẹ!”

³⁵ Anị ḅọrọso sịkị Nyanaḅọ Ḅe fịnị koromaḅo ini kịnị-a oyiasi na mesi oyi fịnjị anị insẹnsị mị se mun owuapụma dọkịmasinye-ẹ.

Ḅụrọchụa Panị Ma

³⁶ Anị Nyanaḅọ Ḅe nwọse Moziz ḅe ḅẹye-ẹ,

³⁷ “Ḍuko Ẹleaza, Erọn agbamịẹḅọ, yaḅe pịrị na alapẹlẹka ḅụrọchụa panị ma fịnị mị dọkịmapụ ma ojuma ḅụ ori àrị dekisin, se anyị mgbọlụma wasama sikima koroma ḅụrọchụa panị ma ḅụ, anịatịḅị ḅụrọchụa panị ma osiḅụ àrị omi-ẹ.

³⁸ Ini nwọ àrị se ḅo Nyanaḅọ Ḅe agbamịẹ ẹbẹ mị ḅụ àrị se ọ̀ pịrị sịkị mị ḅụ àrị ḅo osiḅụ sime aye nwọ sọmẹ. Anịẹrẹchị inia si mị gose fịsapụma ḅụrọchụa panị ma àrị ọkị, se àrị ḅakụ pẹmpẹm ẹfẹrẹ ḅaraḅụ wẹrị, se agbamịẹ ẹbẹ gbẹịn gbẹịnḅịaye, àrị se nwọ mịẹ. Anị ḅerijineye sọ Izrẹlapụma pịrịḅịa.”

³⁹ Anịẹrẹchị Ẹleaza ḅe ḅụrọchụa panị ma ọkị, se àrị ḅakụ pẹmpẹm ma ẹfẹrẹ ḅaraḅụ wẹrị, se agbamịẹ ẹbẹ mị gbẹịn-gbẹịnḅịaye nwọ mịẹmẹ.

⁴⁰ Mịn mị anị ḅerijineye sọ Izrẹlapụma pịrịmẹ na Erọn furoḅieka ḅọ dadama agbamịẹ ẹbẹ mị ḅụ insẹnsị dọkịma Nyanaḅọ Ḅe pịrị-ẹkẹ. Anịka ọkụma Kora ḅe na ọ̀ ḅụapụ ma na fịfa ọkụ mị anị ini sọnị fịfaḅịa ọkụ-ẹ. Ma mamgba Nyanaḅọ Ḅe Moziz ḅe ḅụ ḅọrọ tọn se Ẹleaza ḅe pịrị ọkụ mị, anị ọ̀ pịkị se àrị mịẹ ọkụ-ẹ.

Erọn Ḅe Ò Tomoni Ma Ḍụamẹ

⁴¹ Anịḅe eneḅa, bebe tomoni kpo mị mgba Moziz ḅe na Erọn ḅe na se ḅẹrẹ suama ḅọrọmẹ se nwọ ḅẹmẹ, “Nyanaḅọ Ḅe oria tomonima ḅụ ḍapụ ọ́ nwọ ḅaasam.”

⁴² Ini koḅirima Moziz ḅe na Erọn ḅe na dapakaso sịkị, ini vinpịkị Ikowarị mị da se ọrịmẹ na soḅuno mị gbidipu ma anị gbẹịn aḅẹ, Nyanaḅọ Ḅe oria tọrụda enekuḅu mị pịkị ḅịapakasam.

⁴³ Moziz ḅe na Erọn ḅe na, ini mun Ikowarị mị tọrọkọ chịẹmẹ,

⁴⁴ se Nyanaḅọ Ḅe nwọse Moziz ḅe ḅẹmẹ,

⁴⁵ “Mịna apụma ḅụ, ómine ọḅụda, mịọkụ à gbọkụ mịkirikiri ini ḅaasinḅịa!” Ini mamapụ ma inia tọrụ ma se kiri iḅomẹ,

⁴⁶ se Moziz ḅe nwọse Erọn ḅe ḅẹmẹ, “Ị́ya ḅụrọchụapanị mị ọkị, agbamịẹ ẹbẹ mị ḅụ binka anyị mgbọlụ se arịa ḅie chụa se insẹnsị seni anyị mgbọlụma ọgọnọ sara. Anịsịkị sarama anịse ini damamun ḅụmịẹfịafịa ma mịẹmịẹye mị mịẹ ini pịrị. Sarama! Nyanaḅọ Ḅe ori ịganịsam, pịkị anị fin-fin-obi mị sakịsam.”

⁴⁷ Erọn ḅe ḅịpịpoki ḅụ oria ḅụrọchụapanị mị ọkị se mangị koḅirima tomonima ogboku mun mẹ. Ò ḅo ọrịna obi mị anị sakịsam nwọḅẹ sịkị, ori insẹnsị mị seni anyị mgbọlụma ọgọnọ sara se ḅụmịẹfịafịama mịẹmịẹye mị nwọ mịẹse tomonima pịrịmẹ.

⁴⁸ Mịn mị obi mị dachịẹmamẹ, se ò ḅo ḍumo apụma na fịapụma na ogboku chịẹ simemẹ.

⁴⁹ Fịapụ ma kịẹnḅịpị anị kịnị gbọrị poku, ineinfa kịnị-a si ẹndẹ, jieasi fịnjị nwọ lamẹ, Kora ḅe oria nyana ḅerenika mị ḅụ fịapụma kịẹnka ḅaraḅụ.

⁵⁰ Obi mị dachịẹ sịkị, Erọn ḅe ò vinpịkị so Moziz ḅe damamunmẹ Ikowarị mị ḅọkọ ḅụ.