Kịẹnḅịpị Ma 15 - Kịrịkẹnị Baịbụl

Agbamịẹ Gboloma Oloko Ma

¹ Anị-ẹ so Nyanaḅọ Ḅe ḍuko Moziz ḅe pịrịmẹ,

² ma anị sime Izrẹlapụma pịrị oloko ma-ẹ ini àrị koko anị à se ini pịrịḅịa ama mị ḅie.

³ Agbamịẹ ị̀ pịrị ḍọkịḅọ goyegoye gbọrị owoi nambulo, gbọrị ajirima, gbọrị anana anịkanịka gbọrị oḅori ị́ nwọse ḍọkịma agbamịẹ ị̀ pịrịḅịa anịkanịka ḅereniye mịẹ ḅeinma agba ḅaraḅụ anịkanịka ḅielokoloko ḍiepịrịaye agbamịẹ ḅaraḅụ anịkanịka sịkịsịkịḅụ ọ́ fịfị alalị ma ḅe agbamịẹye ḅaraḅụ; ma fịaye ḍiepịrịye agbamịẹaye ma arịa kụnụ Nyanaḅọ Ḅe ọ̀ ḅụḅẹlẹḅẹlẹmẹ.

^4-5 Anana anịkanịka oḅori se dọkịma agbamịẹ Nyanaḅọ Ḅe pịrịḅịa ḅọ goyegoye nụḅọ fịlawa gbọrị ḅarasịkịrị panị, oliv pulo gbọrị kongo se anị na gwa se nama ḅe ḅụ chụa seni mgbọlụ-a fịaye agbamịẹḅịa, ere iru gbọrị kongo nụḅọ nwọse arịa ḅụ chụaḅịa.

⁶ Ajirima se mịẹ agba-ẹ ḅẹḅẹ, fịlawa mama ḅarasịkịrị panị oliv pulo gbọrị kongo na ikiḅa, se anị na gwa se mgbọlụ-a fịaye agba nwọ mịẹḅịa,

⁷ ere iru gbọrị kongo na ikiḅa anịaḅụ sọḅịa. Ma agbama arịa kụnụ Nyanaḅọ Ḅe ọ̀ ḅụḅẹlẹḅẹlẹmẹ.

⁸ Owoi nambulo se mịẹ Nyanaḅọ Ḅe pịrịḅịa dọkịma agba-ẹ ḅẹḅẹ, anịkanịka ḅereniye mịẹ ḅeinma agba ḅaraḅụ anịkanịka nwẹngịgboloma agba-ẹ ḅẹḅẹ,

⁹ fịayemgbọlụ agbamịẹye ḅụ fịlawa tẹrẹ-a ḅarasịkịrị panị, oliv pulo mama kongo se anị na gwa se ḅoḅịa,

¹⁰ ere iru mama kongo pịkị anịaḅụ sọḅịa. Mịn agba mị anịa kụnụ Nyanaḅọ Ḅe ọ̀ ḅụḅẹlẹḅẹlẹmẹ.

¹¹ Mịn anị nụḅọ se gbọrị owoi nambulo anịkanịka ajirima, anịkanịka anana anịkanịka oḅori se anịa ḅụ chụa se agba mị mịẹḅịaye-ẹ.

¹² Nemikase gbọrị nama nẹngị nama ini nwọse agba mị mịẹmẹ ḅẹḅẹ, anị ḅara mị ini pịkị nwọ kịẹnma àrị na nwẹngịaye ma ḅụ ye se chụa se àrị na ḅoḅịa.

¹³ Izrẹl furo tọkụ goyegoye mịn mị mịẹḅịa, fịye agbamịẹ ḍiepịrịye ọ̀ nwọse ḅoḅịa sịkị ḅụ, anịa kụnụ Nyanaḅọ Ḅe ọ̀ ḅụḅẹlẹḅẹlẹmẹ.

¹⁴ Nemikase ómine na anga igoniḅọ, anị ḅọrọ jokoma ómine na angaḅọ anịkanịka bịamḅọ sọnị, fịye agbamịẹ ḍiepịrịye mị mịẹḅịa ḅẹḅẹ anị anịa kụnụ mị Nyanaḅọ Ḅe ḅụḅẹlẹḅẹlẹye mị, ma gbọrị olokoma mị nụḅọ sọnị pịkị kokoḅịaye-ẹ.

¹⁵ Ma gbọrị olokoma sime ómine na pịkị ọ́mịna ḅie anga igoniapụma na nwọ pịrịmẹ, ọkịmun ḅụọḅụọ laḅịa. Ómine na ini na ọ́ kịkịnamẹ Nyanaḅọ Ḅe tọrụkuḅu ḅụ;

¹⁶ nwọ sime ọ́ pịrị gbọrị olokoma na mịẹmịẹaye ma na anị pịkị sime ini pịrịayema-ẹ.

¹⁷ Nyanaḅọ Ḅe pịkịna ḍuko Moziz ḅe pịrịmẹ,

¹⁸ tọn se Izrẹlapụma pịrị, à se ọ́ pịrị olokoma ọ́ nwọ koko, ó mun à se ọ́ pịrị-ẹmun-arị ama mị lasa ḅẹḅẹ.

¹⁹ Se anịa ama mị ḅie pakaḅo fịye ọ́ nwọ fịsa ḅẹḅẹ, ómine arịaḅụ ye ọkị se agbamịẹ Nyanaḅọ Ḅe pịrịḅịa.

²⁰ Ọ́ tatarị ịwọ ịpịamgba mị se mịẹ tatarị fịturu okpokpo mị ó se sosikima ḍiepịrịye agbamịẹ Nyanaḅọ Ḅe pịrịḅịa. Ọ́ nwọ ọ́ pịsịrị pakụma ịpịamgba agba mị mịẹ ọkụ mị anị ọ́ pịkị mịn mị sọnị mịẹḅịa ọkụ-ẹ.

²¹ Mịn sosikima ḍiepịrịye agba mị ómine anị mịẹse Nyanaḅọ Ḅe pịrị ọkịmun ḅụọḅụọ laḅịa ọ́ mịẹ pakụmaḅo fịturu mị ḅụ.

Nemikaḅụ Mịẹ Si Ma

²² Nyanaḅọ pịkị nwọ ḅẹmẹ, ọkụma nemikase gbọrịḅọ ḅụnemika ḅaraḅụ ma Nyanaḅọ Ḅe se Moziz ḅe pịrị olokoma mịẹkẹ ḅẹḅẹ.

²³ Pịkị nemikase tọrọkọju sẹ mị ḅarị Nyanaḅọ Ḅe se Moziz ḅe ḅẹ ḅara mịẹkẹ ḅẹḅẹ.

²⁴ Sẹ mị nemika ḅụ mịẹirima nyanamẹ nwọ ḅẹḅẹ, ini owoi nambulo se dọkịma agbamịẹḅịa, anị anịa kụnụ mị Nyanaḅọ Ḅe ḅụḅẹlẹḅẹlẹye mị, karakara ịpịamgba mgbọlụ agbamịẹye mị na pịkị ere iru agbamịẹ ḍiepịrịye mị na. Anịḅe jịnye, ini pịkị gbọrị ẹkpẹịn se si dekisin agba nwọ mịẹḅịa.

²⁵ Agbamịẹḅọ ḅe, tẹmẹ anga ḅụmịẹfịafịama mịẹmịẹye mị mịẹ tomoni ogbo mị pịrịḅịa se ini ḅo siḅụ-ḅarasin nyanaḅịa, anịatịḅị nemikaḅụ ini mịẹirimamẹ ini pịkị inia sima ḅe agbamịẹye mị ọkị ḅomẹ se anị seni fịye agbamịẹ se Nyanaḅọ Ḅe pịrịsam.

²⁶ Nyanaḅọ Ḅe ò siḅụ-ḅarasin bebe Izrẹl sẹ mị na igoniapụ mamgba na pịrịḅịa, anịatịḅị nweni mamgba mịẹirima mị ḅụ sọmẹ.

²⁷ Nemikase gbọrịḅọ nemika ḅụ si mịẹmẹ ḅẹḅẹ, gbọrị kụra la ịrọrọ oḅori ọ̀ nwọse ḅo si agba nwọ mịẹḅịa.

²⁸ Agbamịẹ ẹbẹ mị ḅụ agbamịẹḅọ ḅe tẹmẹ anga ḅụmịẹfịafịama mịẹmịẹye mị mịẹse tomoniḅọ ḅe mịẹfịafịamaḅịa, se Nyanaḅọ Ḅe ò siḅụ-ḅarasin ọ̀ pịrịḅịa.

²⁹ Mịn gbọrị oloko mị pịkị sime nemika ḅaraḅụ simịẹ ḅọ goyegoye pịrịmẹ, anị ḅọrọ jokoma Izrẹlḅọ anịkanịka ama mị ḅie anga igoniḅọ sọnị.

³⁰ Ọkụma nemima si mịẹḅọ goyegoye anị ḅọrọ ama furo tọkụ anịkanịka igoniḅọ sọnị, Nyanaḅọ Ḅe ḍikisima ḅẹrẹḅarasi nụḅọ nwọ nyanaḅịa, anịẹrẹchị ini nụḅọ ḅaaḅịa,

³¹ anịatịḅị Nyanaḅọ Ḅe ḍukoye mị nụḅọ nwọ sịkị se nemima oria olokoma ḅụ gbọrịye nwọ kanmẹ. Nụḅọ ḅaraḅoye anị nụḅọ ḅaaye-ẹ.

Ḅụfụka Sime Ịnyọsara Ene Mị Kan Ḅọḅe Pịrịmẹ

³² Gbọrị sịkị, Izrẹlapụma pa piri-ele mị ḅie simearị ogbo, gbọrị owuḅọ ini nwọ ọrịmẹ ọ̀ sanga tan-aḅẹ Ịnyọsara Ene mị ḅụ.

³³ Ini ori ọkịmun Moziz ḅe na, Erọn ḅe na, pịkị bebe sẹ mị mgba na pịrịmẹ,

³⁴ ini nweni se ò korumẹ, anịatịḅị ini se ọ̀ mịẹḅịa ọkụ mị ma ḅelepakakẹ.

³⁵ Anị Nyanaḅọ Ḅe nwọse Moziz ḅe ye-ẹ, “Tomoniḅọ ḅe ini ọ̀ ḅaa; bebe sẹ mị mgba imgbele se ò gbin ḅaa ini pike sime anga mị ḅụ sikima.”

³⁶ Anị bebe sẹ mị mgba ini pike sime anga mị ḅụ ori ọkị paka sikimamun ò gbin ḅaaye-ẹ, Nyanaḅọ Ḅe tọnsa ḅaraḅụ.

Agagaḅie Ḍiki Sakasaka Ma Gboloma Oloko Ma

³⁷ Nyanaḅọ Ḅe tọn Moziz ḅe pịrịmẹ

³⁸ na ò ḍuko Izrẹlapụma pịrị: “Ọ́mịna ḅụchụayema ḅụ agagaḅie ḍiki sakasaka ọ́ nwọse chụa agagama ḅụ se bulu bulu ḍiki nwọse agagaḅie ḍiki sakasaka ḅụ gbọrịye gbọrịye ọgọnọ ḅụ chụa. Mịn mị ómine anị mịẹ mun ḅụọ-ḅụọ la.

³⁹ Agagaḅie ḍiki sakasaka ma àrị yese ḅiekoromaye sọ seni ọ́ pịrịḅịa, ómine àrị ọrị sịkị goyegoye, ị̀ya olokoma ọ́ nwọse ḅiekoroma se àrị kokoḅịa: anịsịkị ọ́ ḅarị ị̀ ḅụ sikima mun ó ḅie tọn aye na ọ́ ḅụḅẹlẹ aye na ḍuko nwẹngị-ẹkẹ.

⁴⁰ Agagaḅie ḍiki sakasaka ma ị̀ya oloko mamgba se ó ḅiekoroma se ómine àrị kokoḅịa se ómine okorona okorona sime ị̀ pịrịḅịa.

⁴¹ Ị̀rị̀ anị ọ́ Nyana Tamụnọ Ḅe-ẹ; Ị̀rị̀ Ijipt mị ḅie ómine ọkị pakụmaḅomẹ ọ́mịna Tamụnọ sọḅịa ẹrẹchị. Ị̀rị̀ anị Nyanaḅọ Ḅe-ẹ.”