Kịẹnḅịpị Ma 13 - Kịrịkẹnị Baịbụl

Moziz Ḅe Ama Ẹnyẹ Apụ Se Kenan Sẹịnmẹ

¹ Anịeso Nyanaḅọ Ḅe nwọse Moziz ḅe ḅẹmẹ,

² “Oyimaịn sẹ fịnjịma ḅe tịḅịda apụma ḅụ gbọrịḅọ gbọrịḅọ sẹlẹọkị se ini fịrịma pakụma ama-ẹnyẹ-apụ ḅaraḅụ, ye ini mun Kenan mị ḍiki kelema, anị à seni Izrẹlapụma pịrịarị ama mị.”

^3-15 Se Moziz ḅe Peran piri ele mị ḅieḅụ tịḅịda apụma fịrịma pakụmamẹ ḅịpịpoki ḅụ, mị ini-ẹ: Sẹ Tịḅịdaḅọ Rubẹnị Shamua Zakọ yaḅe Simiọnị Shafat Horaị yaḅe Juda Kelẹb Jẹfunẹ yaḅe Ịsaka lgal Josẹf yaḅe Ifrem Hosia Nọn yaḅe Bẹnjamin Palti Rafu yaḅe Zẹbụlọnị Gadiẹl Sodi yaḅe Manasẹ Gadi Susi yaḅe Danị Amịẹl Gemalị yaḅe Asha Seto Maịkịẹl yaḅe Naftalaị Nabi Vọfsi yaḅe Gadị Geuẹl Makaị yaḅe

Sẹ Tịḅịdaḅọ

¹⁶ Mịna apụma anị ama ẹnyẹ apụ ma-ẹ anị Moziz ḅe fịrịma pakụma mun ama mị ḍiki kelema ḅe apụ ma-ẹ. Ori anị Hosia Nọn yaḅe ẹrẹ ḍinma se Jọsụwa mịẹye-ẹ.

¹⁷ Moziz ḅe ini fịrịma pakụma sịkị, ọ̀ nwọse ini ḅẹmẹ, “Ọ́ mịn anga sakị Kenan ama mị ḅe ọgọnọju ḅụ sọmun chukuju daọrụ mị la, ọ́ pịkịna so chịngị mị ọgọnọ sime sẹ mị mun.

¹⁸ Anị sẹ mị sime ọkụ ọ́ nwọ ḍọkịḅo, ndapụ anịa ḅie anga, pịkị ini kụrọ la-ọkụ mị na.

¹⁹ Ama mị iḅi na si na ọ́ nwọ ḍọkịḅo, pịkị ḅie sime apụma papa sara sime amama ḅie ini anga na onu seni gbọrị opuamama ḅie ini anga na.

²⁰ Ọ́ ḍọkịḅo nwọfa kiri mị fịye pakụma ye anịkanịka kụrọ kiri-ẹtuḅo. Ọ́ pịkị gbarịmaka ḅaraḅụ anị amakiri mị ḅe chịnmgbọlụma ḅụ ye ọkịḅo.” (Mị anị chịnmgbọlụḅịa ḅịa sịkị-ẹ.)

²¹ Anị owuapụma so ọgọnọju daọrụ mị mun Zin piri ele mị ḅieḅụ chuku daọrụ ḅụ wẹrị ama mị ḍiki kelema ọkịmun Rihọb mị lamẹ, anị Hamat Ḅọrọ nyọ mị na kpekima sime yemị ọgọnọju daọrụ ḅụ.

²² Ini tatarị sọ ama mị ḅụ chukuju daọrụ ḅu ini ḅọrọmun Hibrọn mị lamẹ, anị Ahiman na, Shẹshaị na, pịkị Talmaị na sẹma sime nyọ mị, anị opu godoro apụ furo ḅie apụma, anị ini Anakim nwọse chịn apụ anga nyọ ma-ẹ. (Hibrọn mị paka-ẹso sọnọma kụra ḅọrọ ḅụ anị Zoan Ijipt mị ḅie sime ama mị pakaye-ẹ.)

²³ Iniḅo Ẹshkọl Pẹsịkiri mị lamẹ, se anị anga ḅụ ini gbọrị irumịẹ chịnmgbọlụ ịkpangị pẹlẹmẹ, chụa wọkọlọma simeye, anị opuma iku ḅara gose mama owuapụ anị seni gbọrị chịn ogboku fịna se juju ḅụ anị pụramẹ. Ini pịkị mgbafa na pịkị figi irumịẹ chịnmgbọlụ na nwọse chụa ọkịḅomẹ.

²⁴ (Izrẹlapụma pẹlẹ ọkị irumịẹ chịnmgbọlụ ịkpangị mị gose Ẹshkọl Pẹsịkiri ini nwọse anị nyọ mị chịn mẹ.)

²⁵ Ini ama mị ḍikikelemamẹ ḍin-a mesi ḅụ, se ama-ẹnyẹ-apụ-ma vinpịkị

²⁶ so Moziz ḅe na, Erọn ḅe na, pịkị bebe Izrẹl sẹ mị mgba ḍọkịma mun mẹ anị Kedẹsh ḅie Peran piri ele mị ḅie ḅụ. Ini ọrị ayema ini nwọ ḍuko ini pịrị pịkị ini se ḅo chịnmgbọlụma seni ini ḍiemẹ.

²⁷ Ini nwọse Moziz ḅe ḅẹmẹ, “Wa ama mị ḍikikelema se ḍọkịḅo ọrịmẹ na anị ngọ nyanamẹ pịkị fịye pakụma lọkọlọkọ kiri-ẹ; ma wa pịkị se ḅo chịnmgbọlụma ḅụ daye-ẹ.

²⁸ Ọkụma ama ḅie anga apụma kụrọnị-ẹ; inia opuamama àrị opuma ḍụḅamẹ, ini pịkị kụrọma onu se àrị gborimẹ. Anị sitẹịn anga, godoro apụ furo ḅie apụma wa ini ọrịmẹ anị anga ḅụ.

²⁹ Ama mị ḅie chukuju daọrụ ḅụ mị Amalẹk apụma simeye-ẹ; Hitaị apụma na, Jebus apụma na pịkị Amọraị apụma na chịngị ọgọnọ sẹ mị ḅie anga mẹ; Kenan apụma pịkị Mẹditirenia Opu Tọrụ mị aka ḅụ angamẹ, Jọdan Tọrụ mị aka ḅụ na.”

³⁰ Kelẹb ḅe Moziz ḅe se ḅẹrẹsuarị apụma ḅịpịma gbẹịn se nwọ ḅẹmẹ, “Wa mịọkụ mun owu se ini paka seni ama mị ọkị; wa kụrọ laḅaraḅụ ama mị wa ineda anị kanḅịa.”

³¹ Ọkụma Kelẹb ḅe na mun apụma nwọ ḅẹmẹ, “Ẹn-ẹn, se owu se ini pakaḅịa ịnyọ wa nyanakẹ; anịanga sime tomonima ini kụrọtẹịn wa nẹngịmẹ.”

³² Mịn ḅara mị ḅụ, ini mun ḍikikelemasa ama mị gboloma iruoaye ini nwọ ḍuko wasamamẹ Izrẹlapụma ogboku ḅụ. Ini nwọ ḅẹmẹ, “Kiri mị anị ineda anịanga sime apụma karaḅịa fịye pakụma ḅokẹ. Wa ọrịḅọ goyegoye opuma gele ḅọ-ẹ,

³³ wa pịkị godoro apụ furo ḅie apụ ọrịmẹ, anị Anak ḅe ò furo apụma. Anị mịnaḅụ sime ọkụ, ị́ ḅẹḅịa mine ma kala akpakpa awọ-ẹ, wa fịnyọ la-ọkụ mị ḅụ, anị inima sọnị pịkị se wa ḍikiḅịa tọrụ-ẹ.”