Kịẹnḅịpị Ma 10 - Kịrịkẹnị Baịbụl

Seleḅa Oḍu Ma

¹ Nyanaḅọ Ḅe nwọse Moziz ḅe ḅẹmẹ,

² “Ini ikoli-ḅakụye se ḅakụsa seleḅa se mama oḍu nwọ mịẹ, anị se nwenima chịn koḅirima, pịkị se Ikowarị ma kanse sakị nwẹngị na gose.

³ Mama oḍu ma fie ḅọlọ sịkị lamẹ ḅẹḅẹ, bebe tomoni ogbo mị mgba ḅo koḅirima ị́ gbọrị kelemaḅịa à pakaḅoḅo Ikowarị mị ḅọkọ mị ḅụ.

⁴ Ọkụma gbọrị oḍu kẹngẹ fiemẹ ḅẹḅẹ anị furoma ḅe tịḅịnịma kẹngẹ mị ḅo ị́ gbori kelemaḅịaye-ẹ.

⁵ Oḍu kpụlụma fiemẹ ḅẹḅẹ, ịrụapakapaka anga ḅụ Ikowarị pike sẹma sakị nwẹngịḅịa.

⁶ Oḍu kpụlụma maịn karama fiemẹ ḅẹḅẹ, chuku daọrụ ḅụ Ikowarị pike sẹma sakị nwẹngịḅịa. Anịẹrẹchị kpụlụma fie àrị oḍu ma anị se Ikowarị ma kan se sakị nwẹngị-ẹ,

⁷ ọkụma fie ḅọlọḅịa oḍu ma anị se tomoni ogbo mị chịn koḅiriḅịaye-ẹ.

⁸ Erọn owuapụ awọma, anị agbamịẹ apụma, mị oḍu ma ofuroḅịaye-ẹ. “Mị oloko mị ọ́ nwọ kokoḅịa sịkịmamgba ọkịmun ḅụọḅụọ la.

⁹ Ómine ọ́mịna ama ḅie sime se ọmụ gbin ọ́ ḅụ ḍụa àrị sịkị, anị tarakapụ ọmụ se ọ́ damaḅoḅịa sịkị, ma oḍu ma ọ́ nwọ ofuro se ḍiepakụma na owuniḅosam. Ị̀rị̀ Nyanaḅọ ọ́mịna Tamụnọ Ḅe, à ḅarachụa ọ́ pịrị se ómine na tarakapụma ḅara ḅie ọ́ ḍụaḅịa.

¹⁰ Ọ́ pịkị alalịfị ḅieḅẹlẹ àrị sịkị sọnị—ọ́mịna Ịwọ Akalụ Alalị ma na, pịkị ísí ọ́mịna jịn Tamụnọ tẹkẹ mịẹmịẹaye ma ḅe alalị ma na—ọ́mịna dọkịma agbama na pịkị deinma agbama na ọ́ nwọ mịẹḅịa sịkị sọnị ómine oḍu ma ofuro. Anịsịkị à ḅarachụa ọ́ pịrịḅịa. Ị̀rị̀ anị ómine Nyana Tamụnọ Ḅe-ẹ.”

Izrẹlapụ Ma Ini Saịnaị Mị Wẹrịso Mẹ

¹¹ Gbọrị ene tomonima Ijipt mị ḅie paka-e so maịn karama kụra mị ḅie maịn karama akalụ mị ḅie si ḍin ene Nyanaḅọ Ḅe pakaḅoḅo Ikowarị mị ọgọnọju sime soḅuno mị sakị iwo mẹ,

¹² se Izrẹlapụma Saịnaị Onwun Ele mị ḅie pakasomẹ. Soḅuno mị mun Peran Piri-Ele mị ḅie dachịẹmẹ.

¹³ Nyanaḅọ Ḅe tọnse Moziz ḅe pịrị ḅaraḅụ anị ini sakị nwẹngị tọrọkọ munye-ẹ,

¹⁴ se ini ḅụọpọkọ sịkị layelaye, ini tọn ḅara mị anị ini nwẹngị ọkụ-ẹ. Juda sẹ mị tịḅịda pịrị ịkpata mị chuku ḅie sime kpo mị tatarị sakị nwẹngị tọrọkọ mun mẹ kụlọkụlọ ḅụ, Nashọn, Aminadab yaḅe anị inia tịḅịdaye-ẹ.

¹⁵ Netanẹl, Zua yaḅe tịḅịda Ịsaka sẹ mị pịrịmẹ,

¹⁶ anịsịkị Ẹlaịab, Hẹlọn yaḅe tịḅịda Zẹbụlọnị sẹ mị pịrịmẹ.

¹⁷ Anịsịkị Ikowarị mị ini nwọ sinkoromaḅịa sịkị, Gashọn na Mẹreraị na sẹma, anị anị pụra apụma, sakị nwẹngị tọrọkọ munḅịa.

¹⁸ Ini palịapu anị Rubẹnị sẹ mị anịa ịkpata mị chuku ḅie sime kpo mị-ẹ, sakị nwẹngị tọrọkọ munḅịa, kụlọkụlọ ḅụ, Elaịzọ, Shẹdẹo yaḅe anị inia tịḅịdaye-ẹ.

¹⁹ Shẹlumiẹl, yaḅe tịḅịda Simiọnị sẹ mị pịrịmẹ,

²⁰ anịsịkị Elaịsaf Duẹl yaḅe tịḅịda Gadị sẹ mị pịrịmẹ.

²¹ Ini ḍukoma apụ anị Kohat, Livaị sẹ mị-ẹ, ini anị osiḅụ sime ayema pụra se tatarị nwẹngị pakaḅịa. Ini mun ísí ini simeḅịa nyọ laḅịa sịkị, Ikowarị mị pịkị pike chịẹmasosam.

²² Ini ḍukoma apụ anị Ifrem sẹ ịkpata mị chuku ḅie sime kpo mị sakị nwẹngị munḅịa, kụlọkụlọ ḅụ, Ẹlishama, Amaịhud yaḅe inia tịḅịdamẹ.

²³ Gamaliẹl, Pẹdazọ yaḅe tịḅịda Manasẹ sẹ mị pịrịmẹ,

²⁴ anịsịkị Abaịdan Gidiọnaị yaḅe tịḅịda Bẹnjamin sẹ mị pịrịmẹ.

²⁵ Anịḅe kuluma, Danị anị ọḅụkorukoruḅọ ḅe ịkpata mị chuku ḅie sime kpo ma mgba, sakị nwẹngị munḅịa, kụlọkụlọ ḅụ, Ahieza, Amishadaị yaḅe tịḅịda ini pịrịmẹ.

²⁶ Pagiẹl, Okran yaḅe tịḅịda Asha sẹ mị pịrịmẹ,

²⁷ anịsịkị Ahaịra, Inan yaḅe tịḅịda Naftalaị sẹ mị pịrịmẹ.

²⁸ Mịn ḅara anị ini se ọrụtọnma nwẹngị ọkụ-ẹ, kụlọkụlọ ḅụ, Izrẹlapụma Ele ogbo ini koḅirima sime anga ḅụ kansoḅịa sịkị layelaye.

²⁹ Moziz ḅe nwọse tarọ ma numbireowu Hobab, Jẹtro yaḅe, anị Midiaḅọ ḅe ḅẹmẹ, “Wa so Nyanaḅọ Ḅe ò se wa pịrịḅịa nwọḅẹ nyọ mị mun-ẹtọn aḅẹ. Ò ye ḅereni Izrẹl mị pịrịmẹ na ọ̀ mịẹse anị lọkọlọkọḅịa, anịẹrẹchị, ḅo wa mun, wa pịkị mịna lọkọlọkọ mị se ị́rị́ na ḍiaḅịa.”

³⁰ Hobab ḅe pẹkẹrẹ se nwọḅẹ mẹ. “Ẹn-ẹn, à pịkịma so ị̀ya ama munḅịa.”

³¹ Moziz ḅe nwọse ọ́ ḅẹmẹ, “Sisi wa koromasoma.” “Piri-ele mị ḅie wa mun pike koḅirima sime gbẹịn anga ị́ nemimẹ, ị́ pịkị ineda achọ se wa ḍieḅịa.

³² Nemikase ị́ mine na mun mẹ ḅẹḅẹ Nyanaḅọ Ḅe se wa pịrị ḅẹlẹma mamgba wa se ị́rị́ na ḍiaḅịa.”

Tomonima Sakị Nwẹngị Tọrọkọ Mun Mẹ

³³ Tomonima Saịnaị osiḅụ sime tụndụ mị koromaso sịkị, tẹrẹ-a ḍin ini nwọse ateli nwẹngịmẹ. Nyanaḅọ Ḅe Ọḅọkụ Igbe mị sịkịmamgba inia tọrọkọ ịsụnmẹ, ini mun pike koḅirima simeḅịa anga ḍọkịḅoḅịa ẹrẹchị.

³⁴ Ini pike koḅirima sime anga ḅụ ini soarị sịkị layelaye, Nyanaḅọ Ḅe soḅuno mị anị inia ọgọnọ ḅụ omi-ẹ enekaka ḅụ.

³⁵ Ọḅọkụ Igbe mị sakịpakasa ḅẹḅẹ, Moziz ḅe ọ̀ nwọ ḅẹḅịa, “Nyanaḅọ Sịsẹ; ị́rị́ na tarakapụma desin se mịẹ ị́ ḍikiḅieḅu àrị apụma mangịfa!”

³⁶ Se anị dachịẹsa ḅẹḅẹ, ọ̀ pịkị nwọ ḅẹḅịa, “Nyanaḅọ Vinpịkị, Izrẹl mị ḅe ẹndẹ ẹndẹ furoma damaḅo.”