Kaḅo Ma 8 - Kịrịkẹnị Baịbụl

Ini Nemi Mị Tokoni Mẹ

¹ Poki! Nemi mị anị oloku aḅẹ. Yekaịnḅo mị nweni anị naa-ẹ anị nwọ ḅimẹ.

² Chịngị ma ọgọnọ ateli ma ḅie na kpeki-a nyọma ḅụ na, tẹrẹ-a ichira ma ogboku ḅụ na, yekaịnḅo mị anị chịẹ oloku aḅẹ.

³ Mun opuama mị ḅie sọḅịa ḅọkọ mị ḅụ, onu mị ḅie ḅọkọ ma angasịkị ḅụ anị oloku aḅẹ.

⁴ “Àrị ọ́ tẹkẹ aḅẹ tomoni mamgba; sẹkiri ḅie simeḅọ goyegoye à nwọ chịn aḅẹ.

⁵ Yekaịnḅo eke ma ọ́ laka? Yekaịnḅoḅịaye ọ́ nwọ ḍawọ. Ó yenemika? Koroma se ọ́ pịrịḅịaye ọ́ nwọ ḍawọ.

⁶ Ị̀ya iḅi ḅẹrẹ ma poki; à ḍuko ọ́ pịrịarịye mamgba karakaraye-ẹ.

⁷ Karakaraye mị anị à ḍukoarịye-ẹ; à ḍikiḅụnwọnwọ nyana iruo mị pịrịmẹ.

⁸ À ḍukoye goyegoye karakaraye-ẹ; iruoaye anịkanịka nweni dairimaye anịa ḅie ofori-ẹ.

⁹ Yekaịnḅoḅọ ḅe ḅụ, anịmgba kikimaye ofori-ẹ; ḅeri nyana ḅẹrẹ kaịnḅoḅọ ḅe ḅụ anị sarasaramẹ.

¹⁰ Seleḅa na karaka, à se ị́ telimarịye ma sẹlẹ ọkị, iḅitẹịn goli mị na karaka, nemi mị sẹlẹ ọkị.

¹¹ “Ị̀rị̀ anị Nemi mị-ẹ, à yelatẹịn yela pụkọchụaye nẹngịmẹ; ị́rị́ nyana se ị́ seni ị̀ otomaḅịaye ofori-ẹ.

¹² Ị̀rị̀ anị Nemi mị-ẹ, à pịkị yekaịnḅo nwọ nyanamẹ; yenemi na pịkị karakara ḅẹrẹkọn na à nwọ nyanamẹ.

¹³ Osi se Nyanaḅọ Ḅe pịrị mị anị ḍikiḅụnwọnwọ nyana si pịrị mị-ẹ; à ḍikiḅụnwọnwọ nyana ḅụdekichịẹma na opuayemịẹ na nwọ pịrịmẹ, pịkịna si nwẹngị na iruo ọkwẹịn na.

¹⁴ À tọn se à mịẹḅịaye ma à nwọ deki nwẹngị nwẹngịmẹ. À yekaịnḅo nyanamẹ, à pịkịna kụrọmẹ.

¹⁵ À ḅarachụa amanyanapụma pịrịpịrịmẹ se ini iḅiọkụma ḅẹrẹtọn sẹma ḍikiḍikimẹ à pịkị ḅẹrẹtọn apụma mịẹse ini iḅi oloko chụachụamẹ.

¹⁶ Sẹkiri ḅie tịḅịdaḅọ goyegoye ị̀ya ḅarachụa ḅụ anị ini ḅẹrẹtọn arịye-ẹ, fịrị tịḅịnị na ẹrẹso apụma na sọnị gbọrị ḅara mị-ẹ.

¹⁷ Ị̀ ḅẹlẹmapụ ma àrị ini ḅẹlẹmamẹ; ị̀ ḍọkịarịḅọ goyegoye ineda ị̀ ḍọkịḅoḅịa.

¹⁸ À se tomoni pịrịḅịa ngọ na osi na omi-ẹ, pịkịna ye ḅụ tọrọkọ mun na mịẹyeḅarasọ na.

¹⁹ Ị̀ ḅara ị́ nyanaḅịaye iḅitẹịn yelatẹịn goli nẹngịmẹ, yeḅụsọtẹịn pịkị iḅitẹịn seleḅa nwọ nẹngịmẹ.

²⁰ Karakara ateli anị à nwẹngị nwẹngịye-ẹ; karakara ḅẹrẹkọn ateli ḅie anị à ḅọrọḅọrọye-ẹ,

²¹ ị̀ ḅẹlẹma apụma àrị ngọ se ini pịrịpịrịmẹ, pịkị ye se ini ngọ koko-a warịma ḅie ḅeinma ḅeinma mẹ.

²² “Ị̀rị̀ anị Nyanaḅọ Ḅe ọ̀ tatarị tẹmẹye-ẹ yemamgba ḅụ, oria tatarị fịrịma ḅụ, ḅọlọ sịkị ngịsị.

²³ Sakị mị ḅụ ini tatarị ị̀ tẹmẹmẹ, tatarị mị ḅụ, sẹkiri mị ma tẹmẹka sịkị ngịsị.

²⁴ Abaji mà má ini nwọ tẹmẹka sịkị mị ḅụ ini ị̀ yi mẹ, anị ideri mengi mà má pakaḅoka sịkị ḅụ.

²⁵ Mà ini tụndụma tẹmẹka simeogbo ini ị̀ yi mẹ, chịngịma sọ mà ini àrị se àrị sime nyọma ḅụ koromaka sịkị ngịsị,

²⁶ Tamụnọ Ḅe má kiri mị na ozuma na nwọ tẹmẹka sịkị mị ḅụ anịkanịka sẹkiri ḅie ḅarakuḅu ḅeinka onwun ma tẹmẹka sịkị mị ḅụ.

²⁷ Anịanga ị̀rị̀ sọnị àrị omi-ẹ ò so mị se anịa kiri ḅụ koroma sịkị ḅụ, so mị tukoro nyọ mị ọ̀ nwọ finjima abaji mị kelema sịkị sọnị,

²⁸ ò soḅuno ma se sotọrụ ḅụ koroma sịkị na, abaji mị anịa mengi ma ọ̀ nwọ finji sịkị na,

²⁹ ọ̀ pịkị tọn opu-atọrụ ma ḅie mengi ma pịrịmẹ na àrị seri ọ̀ ḅẹ ḅara mị ḅọrọma. Ò tomonikiri mị ḅe chuku sẹkẹ ḍụparị mị koroma sịkị àrị omi-ẹ.

³⁰ Orianga sịkị ḅụ àrị omi-ẹ warị namaḅọ ḅara ḅụ, eneḅeneḅene ḅụ ị̀rị̀ anị oria ḅieḅẹlẹ mị ḅe chuku-ẹ, sịkịmamgba ọ̀ tọrụkuḅu ḅụ à ḅieḅẹlẹaḅẹ—

³¹ à sẹkiri mị na ḅieḅẹlẹmẹ tomoniḅọ goyegoye mịẹmịẹye pịkị ị̀ ḅụḅẹlẹmẹ.

³² “Mịọkụ, ị̀ya awọ, ómine ị̀ poki. À ḍuko ọkụ ọ́ nwọ mị-ẹ, anịsịkị ó ḅieḅẹlẹ nyanaḅịa.

³³ Ini se ó ḍieaye ma ọ́ nwọ poki. Nemi mị nyana; anị sịkịma.

³⁴ Ị̀ ḅịpị pokiḅọ goyegoye nụḅọ ḅieḅẹlẹ nyanaḅịa— anị ị̀ya ḅọkọḅụ sịkịmamgba simeḅọ ḅe-ẹ, ị̀ya warị ḅọkọḅụ koru arịḅọḅe.

³⁵ Ị̀ ḍọkịḅoḅọ goyegoye nụḅọ ḍumo ḍọkị ḅomẹ, Nyanaḅọ Ḅe pịkị nụḅọ ḍiki ḅieḅẹlẹḅịa.

³⁶ Ị̀ ḍọkịkaḅọ goyegoye yese mịnaḅụ lamamẹ; ḍikiḅụnwọnwọ nyana ị̀ pịrịḅọ goyegoye anị fị ḅẹlẹmaḅọ-ẹ.”