Kaḅo Ma 6 - Kịrịkẹnị Baịbụl

Jịn Apụ Fịsa Ḅụ Ị́ Ḅụsin

¹ Ị̀ya owutọkụ, ị́ jụmḅọ fị sa gbẹịnḅịa ị́ nwọ ḅereni ọkịsa?

² Ị́ ḅarana kọn ọkwẹịn ma àrị ị́ kunsa, ị́ ḅereni ayema àrị ḍẹịn sọ ị́ pịrị se ị́ kunsa?

³ Anị-ẹ ḅẹḅẹ, ị̀ya owutọkụ, oriḅọ ḅe oria kụrọ ḅie ị́ sọsam, ọkụma mị anị ị́ ḅara-wẹrịma anịa ḅie pọkọḅịa ọkụ-ẹ; sarama ọ̀ damamun se ọ̀ tẹkẹ na ori ị́ ḅụ ḅarasin.

⁴ Mun mọnọ ma anịkanịka ịnyọ sọ sarama.

⁵ Ḍẹịn ḅie koro feni pọkọ so ọkụ anịkanịka tụḅụra namatẹịnḅọ ọrị se mangị so ọkụ.

Ikulaḅọ Sọma

⁶ Ikula apụma ini sọnọ ma angarị ḅara mị ḅụ yeḍawọ ọkị.

⁷ Àrị tịḅịnịḅọ na alaḅọ na pịkị ḅẹrẹtọn àrị pịrịarịḅọ na nyanakẹ,

⁸ ọkụma ịrụa kpoin sịkị àrị arịa fịayema koko koroma fọngụ sịkị mị ọbị ọbịmẹ.

⁹ Ikulaḅọ ḅe ọ̀ papa ḅọlọlọ sime nde sịkị la ḅe? Nde sịkị ọ̀ sịsẹ ḅe?

¹⁰ “Ye à pa kele sịkị kalaye se sịngị,” ọ̀ nwọ ḅẹmẹ; “Àrị ị̀ ḅarama kpo se kele ịnyọ saraḅịa.”

¹¹ Ọkụma ọ̀ nwọ mọnọarị sịkị igwein owu se ọ̀ pakaḅịa, alagba-se-furuḅọ owu paka ọkụ.

Sitịḅịnyanaḅọ Ḅe Ọ̀ Ḅụfụka Ḅie Sọḅịa

¹² Yeḅụofori sitịḅịnyanapụ, iruo se nwẹngịma ḅọrọaḅẹ.

¹³ Ini inia tọrụmgbọlụma kparapụ-kparapụma pịkị inia ḅarama sana-sana ịsụn-sụn aḅẹ se ị́ dairimaḅịaye gose,

¹⁴ sịkịmamgba inia si-a kuḅie ma ḅie siaye mịẹ kẹngẹ mị ini koromarịye-ẹ, nyọ goyegoye ḅụ ḅẹrẹ pakụmaḅịaye mịẹ na.

¹⁵ Mịn mị gose fị na fa na ini laḅịa ḅụnemika ḅaraḅụ, ini ḅaaḅịaye pịkị ḅarana ini laḅịa.

Nyanaḅọ Ḅe Ḅụḅẹlẹka Sọnọma Aye

^16-19 Sọnọma aye anị Nyanaḅọ Ḅe ḅụnwọnwọmaye-ẹ, ọ̀ pịkị ineda àrị se chụa anga ẹkẹ: Opu-a mịẹmịẹaye, iruo kọn ḅẹlẹ, ḅẹrẹtịḅị nemika apụ ḅaa ḅarama, siaye tọntọn kuḅie ma, siaye mịẹ gose gbọrị anga sime simeka ḅụọ-a ḅịpị ma, iruo onyechịẹchịẹḅọ, pịkị ikiapụ ogboku ḅụfụka chukuruma chukurumaḅọ.

Sẹfị Gose Ḅerijine Ọkwẹịn

²⁰ Ị̀ya owutọkụ, ị́ ḍaḅe ḍuko ị́ pịrịarịye ma mịẹ anịsịkị ị́ nyengima se ị́ telima ayema se ḅieḅaramama.

²¹ Inia ọkwẹịn ma sịkịmamgba àrị ọlọ, ị́ kuḅie ḅụ arịse ịkasị.

²² Ini se ị́ telima ayema àrị ateli se ị́ ḍieḅịa ị́ jịn nyọ munḅịa sịkị, ḍin ḅụ àrị ị́ kokoḅịa, enekakaḅụ àrị ị́ tetemaḅịa.

²³ Ini ḍuko ị́ pịrịarị ayema anị ḅịarị tọnjie-ẹ. Ini seni ị́ datekeremarị ayema àrị ine ị́ ḍumoḅịa ọkụ se ị́ ḍieḅịa.

²⁴ Si eremeni ḅaraḅie anị ine ị́ ḍụaḅịa, pịkịna deapụ nyana ḅịpị ḅẹlẹ jịn eremeni ḅaraḅie ḅụ na.

²⁵ Ḅerenima inia iḅi mị telima sọ ị́ pịrị, ḍụkụma inia wananị-wananị tọrụmgbọlụma ḍẹịn sọ se ị́ pịrị.

²⁶ Owuḅọ ine fịturu okpokpo laḅịa igbiki nwọse amanwẹngị eremeniḅọ pịrịḅịa, ọkụma sẹfị mị anị ine tomonikiri ḅie ọ̀ nyanaye goyegoye mamgba famaḅịa.

²⁷ Ị́ ineda fịnị se ị́ya ekpe gbana nwẹngị se ị́ya ḅụchụayema dọkị ẹka ḅara omi?

²⁸ Ị́ ine ma binka anyị ọgọnọ nwẹngị ḅe ị́ ḅụọma dọkịka ḅaraḅụ?

²⁹ Anị jụmḅọ nyana eremeniḅọ na gboloma mị ḅalafama ọkụ-ẹ. Ọkọsimeye nwọ mịẹḅọ goyegoye mamgba nụḅọ tọrụsiọrịḅịa.

³⁰ Tomoni furuḅọ ḍikisima ẹkẹ, fịye ọ̀ tarịye gose ò furu ọkụma;

³¹ anị sọnị ini nemikase ò kun ọkụma, anịaḅụ sọnọma kiri ọ̀ nwọ gbẹịnḅịa—ọ̀ nyanaye goyegoye ḅụ ò ḅarasinḅịa.

³² Jụmḅọ nyana eremeniḅọ na gbolomaḅọ goyegoye nụḅọ koroma nyanakẹ. Nụḅọ papa nụḅọ ḅụ ḅaa aḅẹ.

³³ Ini ọ̀ ḅụgererema pịkịna ò fomuḅịa; ḅụgerere ọ̀ ḅụ sime gbasoḅịa.

³⁴ Eremeniḅọ ma nyanaḅọ ḅe anị opuma ò ḅụosọsọmẹ jụmḅọ ta ḍọkị mị, ò ḅiḅịa so owu mị dachịẹ nyana ẹkẹ.

³⁵ Ori ọkị ḍụkụḅịa gbẹịnye ngịsị ofori-ẹ; seni ọ̀ pịrị se ò kuḅie deinmaḅịa ḍiepịrịye sọ ofori-ẹ.