Kaḅo Ma 4 - Kịrịkẹnị Baịbụl

Nemi Mị Anị Sọye Nyanamẹ

¹ Ị̀ya owuapụ awọ, ọ́mịna ḍaḅe se ó telimaye ma ọ́ nwọ poki. Ḅeri tokoloma àrị poki, anịsịkị ọ́ kaịnḅo nyanaḅịa.

² À se ó telimarịye mị iḅiye-ẹ, anịgose arịmgba ó se ḅiekoroma.

³ Ị̀ya kala sịkị ḅụ, ị̀ ḍa na ị̀ nyengi na ngẹrị owutọkụ ḅaraḅụ,

⁴ ị̀ ḍaḅe ò ye se ị̀ telima telimamẹ. Ọ̀ nwọḅẹḅịa, “À ḍukoye mị se ḅiekoroma, ngịsị anị se ḅieḅaramama. À ḍuko ị́ pịrị ḅaramị-ẹ, anịsịkị ị́ ḍumoḅịa.

⁵ Nemi na gbunma yekaịnḅo na nyana! À ḍukoye mị se ḅieḅaramama, anịkanịka anị sịkịma.

⁶ Nemi mị anị se gbin koroma soma, anị ị́ ḅọịḅịa, anị ị́ kokoḅịa.

⁷ Nemi mị nyana mị anị ị́rị́ ineda mịẹḅịaye mamgba ḅụ kụrọtẹịnye mị-ẹ. Ị́ nyanaḅịa jịnye goyegoye, gbunma yekaịnḅo mị nyana.

⁸ Nemi mị ḅẹlẹma, anị ị́ mịẹse ị́ ḅo opuḅọ sọḅịa. Anị oḅolo, anị opu ọkịḅo ị́ pịrịḅịa.

⁹ Anị boma amanyanaḅọchu sọ ị́ pịrịḅịa.”

¹⁰ Ị̀ poki, ị̀ya owutọkụ. Ị́ ḅụye-laḅara nwọse à ḍuko ị́ pịrịarịye mị ọkị, anịsịkị ị́ ḅọlọ-a ḍin laḅịa.

¹¹ À nemi se ị́ ḍiesam, pịkị ị́ karakara ḍumo kọnḅịa ọkụ na.

¹² Ị́ ḅụfụkamaḅịaye ofori-ẹ ị́ nemikase nemi nyanaḅọ ḅara se ateli nwẹngị ọkụma, ị́ ḅụọ pịkị tọmbụlọ ẹkẹ ị́ mangịḅịa sịkị.

¹³ Sịkịmamgba ị́ ḍawọ saye ma se ḅiekoroma. Ị́ ḍawọ nemisaye mị anị ị́ya ḍumo mị-ẹ, iḅiọkụma anị kpa.

¹⁴ Sitịḅịnyanapụma mun-arị anga nwọ munma. Sitịḅịnyanapụ ḍa se yemịẹma.

¹⁵ Mịẹma! Simịẹmịẹye ḅụ ị́ ḅụ sin! Ḅereni anị pịrịma, se ị́ mun-arị nyọ mun.

¹⁶ Sitịḅịnyanapụma ini ineda mọnọ ẹkẹ, ini gbọrị anga siyemịẹka simeogbo, ini ḅọlọlọ nyọ, mọnọ inia tọrụ sọ ẹkẹ, ini ye se nweni lamaka simeogbo.

¹⁷ Sitịḅị chụa na angara fị na, inia ḅụ fịaye na ḅuaye na kịkẹmẹ.

¹⁸ Karakaraye mịẹḅọ ḅe nwẹngịarị ateli mị, dede ịrụa sakị kelekelema ḅịa mun ene mị mgba finji sịkị la ọkụ simemẹ.

¹⁹ Sitịḅịnyanaḅọ ḅe oria ateli mị ḍin mị kanakana ọkụ anị anị kanakana ọkụ-ẹ. Ini ḅịkịmẹ ọkụma inia ḅụọma tọmbụlọ se ini gose ḅịkịye ini ineda ọrị ẹkẹ.

²⁰ Ị̀ya owutọkụ, ḅeri tokoloma à ḍukoye mị poki. Ị̀ya ọkwẹịn ma poki. Ḅerenima àrị ị́ ḅụ sikima.

²¹ Àrị se ḅiekoroma, pịkị àrị se ị́ kuḅie wẹrị.

²² Àrị ḍumo na obi ofori na se àrị kaịnḅoḅọ goyegoye nwọ pịrịḅịa.

²³ Tọrụkweinma ị́ koroma arịye ma ḅụ; anịatịḅị ị́ kọn àrị koroma ma anị ị́ya ḍumo tẹmẹarịye ma-ẹ.

²⁴ Ngịsị karakarakaye ḍukoma. Iruoaye na nweni-da-irimaḅịa ọkwẹịnma ḅụ, mịẹgbolomaye nyanama.

²⁵ Kuḅie maịn-maịn tọnka ḅara se gbụkụkụma tọrọkọju ḍiki, ḅụgerere ḅụ ị́ tịḅịtu ma.

²⁶ Kpaịnma ị́ mịẹḅịa ayema tọn, anịsịkị ị́ mịẹḅịaye goyegoye àrị karakaraye ḅụ pakaḅoḅịa.

²⁷ Simịẹaye ḅụ ḅụsikima se gbụkụkụma ị́ tịḅị deki chịẹma nwẹngị. Karakara ateli mị ḅie ḅụọ irimama.