Kaḅo Ma 30 - Kịrịkẹnị Baịbụl

Agọ Ḅe Oria Ọkwẹịn Ma

¹ Mà ma anị Agọ, Jake yaḅe ḅe oria karakara ọkwẹịn ma-ẹ: “Tamụnọ Ḅe ori ị̀ ḅụ ofori-ẹ, Tamụnọ Ḅe ori ị̀ ḅụ ofori-ẹ, ḅarachụa pịkị ị̀ pịrịḅọ ofori-ẹ.

² Ị̀rị̀ à nama kịkẹtẹịn tomoniḅọ nẹngịmẹ; Tomoniḅọ nyanaḅịa koroma à nyanakẹ.

³ Gbọrị nemi sọ ma à ḍawọkẹ, Tamụnọ Ḅe na gbolomaye ḅụ à pịkị nemi kpọkpọ gbọrịye sọ ofori-ẹ.

⁴ Tụḅọ jịnsịkị sobieaye ma ḅụnemi nyana karama? Tụḅọ jịnsịkị ḅara se fọrụ mị kaịnsa? Anịkanịka ḅịtẹ pẹkẹrẹ se mengi mị fịnasa? Anịkanịka sẹkiri mị eke eke ḅụ anị tọn wẹrịsa? Oriḅọ ḅe tụḅọ, ị́ nemimẹ ḅẹḅẹ? Yayo ḅe tụḅọ?

⁵ “Tamụnọ Ḅe ò ḅereniye goyegoye ọ̀ mịẹmịẹmẹ. Ori agbọ sọ ò chuku ḅie sime ḍọkịḅọ goyegoye pịrịmẹ.

⁶ Ị́ nemikase ḅereni ọkịmẹ na ngịsị ò ḍukokaye ọ̀ nwọ ḍukomẹ ḅẹḅẹ, ori iḅiọkụ siḅara se ị́ ḍiki ịganịḅịa se ị́ ḍie na ị́rị́ iruoḅọ-ẹ.”

Jịn-a Kaḅo

⁷ Tamụnọ, mà à fịka simeogbo ị́ ḅaraḅụ à nyanaḅịa mamaye à nwọ ḅimẹ:

⁸ mịẹ àrị iruokọnḅọ sọma, àrị opu ngọ kọnma, à pịkị opuma igweinma. Ị́ ḅụpalịmaye se à fị se ị̀rị̀ na iḅiḅịa fịaye kẹngẹ nwọse ị̀ pịrị.

⁹ À nemikase ḅakaye nyana ọkụma, à ḅẹḅịa na ị́ ḅarị ị́ ḅụ anịkanịka ḅara nwọ sime ẹkẹ. Ọkụma à nemikase igweinmẹ ḅẹḅẹ, à furuḅịa se ḅụgerere ọkịḅo ị̀ nyana Tamụnọ Ḅe tọrụchụaḅịa.

¹⁰ Ngịsị fịrịnwẹngịḅọ ḅe tọrụkuḅu ọ̀ nyanaḅọ ḅe fiesimama. Worinime ị́ laḅịa ị́ pịkị anịa tọrụsiọrị daḅịa.

¹¹ Inia ḍapụ woriwori apụ omi-ẹ ini pịkị inia nyengiapụ ma se yechịnkẹ.

¹² Dapụ omi-ẹ ini chịnmẹ na ini opuma fịafịamẹ, ọkụma ini iḅiọkụma ḅụrụ waraḅẹ.

¹³ Da tomoni nwọ chịnmẹ na ini opuma ḍikitọrụgbẹịnmẹ—yei, nde ini iḅimẹ ini nwọ koroma ọkụ!

¹⁴ Kụrọtịḅị ḅie chụa igwein apụma na ngịsị mịẹḅịa ọkụ oforiapụ ma na inumarị apụ omi-ẹ; anị ẹmbẹ ḅụ mị ini ḅọrọ yekọnfịarịye-ẹ.

¹⁵ Pulo-ḅu-ịsọn ḅe mama eremeni awọ ọ̀ nwọ nyanamẹ, ini mama apụma ẹrẹ anị “Ị̀ pịrị!” Ngịsị ye pụkọtantanka inein aye omi-ẹ:

¹⁶ fịsapụma inia tomonikiri, awọ nyanaka eremeniḅọ, ene koro pisima-ẹ nwọ ḅi samịna kiri, pịkị ḅara nẹngịmasa kọrịfịnị.

¹⁷ Nụḅọ ḍaḅọ se kpọtiḅọ, anịkanịka nụḅọ nyengiḅọ ḍikisimaḅọ, árịa olomu sịkịḅụ, ẹdẹlẹ oriḅọ ḅe pẹị anịkanịka kurukịara ọ̀ tọrụmgbọlụma sọkị sin gbẹịnmẹ.

¹⁸ Inein aye opuma gbun ị̀ ḅụfụkamase à kaịnḅoka aye omi-ẹ:

¹⁹ sotọrụ fin àrị igo, ḍụparị ọgọnọ nwẹngịarị oruwu, abaji ogbo mịna ateli ḍọkịarị onwoin arụ, pịkị owuḅọ na eremeniḅọ na ḅo gboloma se jụmḅọ jụmḅọ ḅẹlẹma.

²⁰ Kuḅie se ḅụgbana gbẹịnka eremeniḅọ ma, mị á mịẹmịẹ ọkụ-ẹ; á sẹfịso, á ḅo mengi ḅịrịḅịa, se á ḅẹḅịa, “Ọkụma gbọrị siye sọnị ma à mịẹirimakẹ.!”

²¹ Inein aye omi-ẹ sẹkiri mị na, mịnaḅụ na ineda inema ẹka aye:

²² omoniḅọ ḅo amanyanaḅọ sọ, yenemikaḅọ ḅe ò ḅiye goyegoye nwọ nyana fị,

²³ taraka ḍọkịḍọkị eremeniḅọ ḅo owuḅọ ọrị sime, pịkị fịrịnwẹngịarị eremeni tọkụ ḅo à fịrịnwẹngị pịrịarị eremeniḅọ ma kiri nwọ ọkị.

²⁴ Sẹkiri mị ḅie ḅoka kala inein-a nama omi-ẹ, ọkụma àrị opuma yenemimẹ:

²⁵ Sọnọ ma: àrị ịnyọ nyanakẹ, ọkụma ịrụakpoin ḅie mị àrị arịa fịayema koḅiri koroma-koromaye-ẹ.

²⁶ Ḍụparịma ḅie anga ịsụn ma ngịsị àrị ịnyọ nyanakẹ, ọkụma ḍụparịma ḅie mị àrị arịa warịma namanamaye-ẹ.

²⁷ Igurube ma àrị amanyanaḅọ nyanakẹ, ọkụma kpo ḅụ mị àrị ọrụtọn nwẹngị-nwẹngịye-ẹ.

²⁸ Ambilembile ma ị́ ḅaraḅie ị́ ineda gbọrị wu nwọ ọlọḅịa, ọkụma amanyanapụ odo ma na warịma na mị ị́ àrị ọrịḅịaye-ẹ.

²⁹ Inein aye omi-ẹ arịa nwẹngị ḅara ḅụ kwein tọrụ se ḍikiḅịaye:

³⁰ chịrịḅama, namama ḅie mgba kụrọtẹịn pịkị gbọrịye sọ ḍikiḅalafafaka ayema;

³¹ oḅorima na, warịma ḅie ye abalaka ḅaraḅụ nwẹngịma ḅọrọarị owoi-ọḅọkọ ma na, pịkị amanyanapụma inia tomonima tọrọkọ simearị sịkị ḅụ na.

³² Ị́ nemikase opuma yenemika se ḅụdekichịẹma pịkị siye se ḅietọn aḅẹ ḅẹḅẹ, dachịẹ se koroma!

³³ Ị́ nemikase ndo mengi ẹngẹma ọkụma ị́ anịa ḅẹlẹkị nyanaḅịa. Ị́ nemikase jụmḅọ nini nwọ ḅakụ ọkụma anịa ḅie pulo saraḅịa. Ị́ nemikase ịganị owoima-owoimamẹ ḅẹḅẹ ị́ ḅụfụka ḅie sọḅịa.