Kaḅo Ma 3 - Kịrịkẹnị Baịbụl

Sime Asẹmẹnị Awọ Pịrị Tetema Ọkwẹịn

¹ Ị̀ya owutọkụ, à se ị́ telimaye ma se ḅieḅaramama. Sịkịmamgba à ḍuko ị́ pịrị na mịẹ nwọḅẹ ayema se ḅiekoroma.

² À se ị́ telimaye ma, àrị nangwọ ḍumo na mịẹyeḅarasọ na se ị́ pịrịḅịa.

³ Iḅiyemịẹḅara na kuḅie se ḅụgbana gbẹịn ḅụ na ḅarasinma. Àrị seni ị́ kọngọ kpọ kelema; àrị seni ị́ kuḅie gịẹịn.

⁴ Ị́ mị ḅara mịẹ ọkụma, Tamụnọ Ḅe na tomoni na ị́ ḍikiḅieḅẹlẹḅịa.

⁵ Ị́ kuḅie mgba se Nyanaḅọ Ḅe ḅụgbana. Ị́ kuḅie se ị́ya nemi mị ḅụ sẹrẹrẹ ma.

⁶ Nyanaḅọ Ḅe se ḅiekoroma ị́ mịẹye goyegoye mamgba ḅụ, anịsịkị karakara ateli ọ̀ nwọse ị́ ḍieḅịa.

⁷ Ị́rị́ yenemitẹịnmẹ nwọḅẹ koroma kọn ị́ ḅụ pịrịma; Nyanaḅọ Ḅe ḅịpị poki, se mịẹ-na-gbẹịnkaye nwọ mịẹma.

⁸ Ị́ ọkọ mịẹ ọkụma, anị iḅi ḅụgwọ ḍiri sime ọkụ simeḅịa, anị ị́ ḅụ ịnọ ma gwọḅịa, anị pịkị ị́ ḅụ ọyị àrịaye ma deinmaḅịa.

⁹ Ị́ya ozu mị ḅie pakaḅo aye mamgba ḅụ, iḅitẹịnye mị se osiḅụ mịẹḅaka ḅe ḍiepịrịaye se ọ̀ pịrị.

¹⁰ Ị́ ọkọ mịẹ ọkụma ị́ya fịaye koko warịma ḅie fịaye ḅeinḅịa, ị́ àrịmgba ḅie iru koko ḅeinmaḅịa.

¹¹ Ị̀ya owutọkụ, Nyanaḅọ Ḅe ị́ datekeremarị sịkị iḅiọkụma anịaḅụ elekima chụa, se ḅeri jineye ḅara nwọse anị ọkị.

¹² Nyanaḅọ Ḅe ọ̀ ḅẹlẹma apụma ori ini datekerema-tekeremamẹ, anị ḍaḅọ se opuaye mịẹ tọkụ datekerema ọkụ mị.

¹³ Ḅieḅẹlẹ sime yenemi—pịkị yekaịnḅoḅọ ḅe pịrịmẹ.

¹⁴ Anịa ḅie sọye simetẹịn seleḅa nyana sọye nẹngịmẹ; ị́ ḅụ anị yelatẹịn goli nẹngịḅịa.

¹⁵ Nemi mị anị yelatẹịn yela pụkọchụaye nẹngịmẹ; ị́ nyana se anị otomaḅịaye ofori-ẹ.

¹⁶ Nemi mị anị nangwọ ḍumo na, ngọ na, osi na, se ị́ pịrịḅịa.

¹⁷ Nemi mị anị ineda ḅieḅẹlẹ ọkịḅo ị́ ḍumo mị pịrịḅịa, pịkịna ị́ se anịa ḅie toluḅọrọḅịa.

¹⁸ Nemi nyanasapụ ma inia ḅieḅẹlẹmẹ; nemi mị anị ḍumo se ini pịrịḅịa.

¹⁹ Nyanaḅọ Ḅe ọ̀ sẹkiri mị tẹmẹmẹ oria nemi ḅụ; oria yenemi ḅụ ò so mị se anị sime gbẹịn nyọ ḅụ koromamẹ.

²⁰ Oria nemi mị mịẹse tọrụ ma àrị serimẹ soḅuno ma ene se sẹkiri mị pịrịmẹ.

²¹ Ị̀ya owutọkụ, kapụma ị́ya nemi mị na gbunma-yekaịnḅo mị na ọlọ. Ngịsị ḅerenima àrị ị́ ḅaraḅie pọkọso.

²² Àrị ḍumo se ị́ pịrịḅịa—ḅieḅẹlẹ dein ḍumo.

²³ Ị́ ine ḅalafaka ḅụ ị́ya ateli nwẹngịḅịa, ḅụọ-tọmbụlọka ḅaraḅụ.

²⁴ Ị́ mun mọnọḅịa sịkị ị́ ḅalafa ẹkẹ, Ị́ ḍin mị ḅie mgba gbun mọnọ kọnḅịa.

²⁵ Bẹkẹma pakaḅịa siaye gose ị́ ḅụḅalaḅala se ị́ ḅụ pịrị ẹkẹ, anị sitịḅịnyanaḅọ ḅe dapakapaka irisi fọrụ kịkẹmaye mị.

²⁶ Nyanaḅọ Ḅe ori ị́ ḅọịḅịa. Ò ḅereni ẹkẹ ị́ mun ḍẹịn ḅie koro.

²⁷ Ị́ inedaḅịa sịkịḅụ goyegoye mamgba, iḅise yeḅụpalịma apụma mị-ẹ.

²⁸ Ị́rị́ na kpekima angaḅọ ḅe ọ̀ ḅẹma na ò koru ọkịmun ḅa la, ị́ nemikase ineda mịọkụ ḅụ ḅarachụa ọ̀ pịrịḅịa nwọ ḅẹḅẹ.

²⁹ Ị́rị́ na kpekima angaḅọ ḅe ò ḅụosọḅịaye mịẹma; ori ị́rị́ na kpeki ma angamẹ, kuḅie-se-ị́-ḅụgbana gbẹịn ḅara ḅụ.

³⁰ Yeḅụoforikaye se jụmḅọ na ḅẹrẹ nụnụa ma, ma ò ye se ị́ mịẹka sịkị ḅụ.

³¹ Kụrọ ḅarase ye mịẹarịapụ ma ḍikipụkọsolima anịkanịka ini ḍikima yemịẹma,

³² anịatịḅị Nyanaḅọ Ḅe simịẹapụma ori ini ḍikiḅụnwọnwọ mẹ, ọkụma karakaraye mịẹapụ ma ò kuḅie se inia ḅụ wẹrị waraḅẹ.

³³ Nyanaḅọ Ḅe ò worinime se sitịḅịnyana apụ warịma pịrịmẹ, ọkụma ọ̀ karakarayemịẹ apụma warịma ḅẹlẹmamẹ.

³⁴ Opu kuḅie nyana se mịnaḅụ dekichịẹma apụma, ọ̀ sịkị nyana ini pịrịkẹ, ọkụma ḅụiderima apụma ọ̀ ḅẹlẹ kuḅie se ini ọkịmẹ.

³⁵ Yenemiapụ ma ini ẹrẹso opu osi nyanaḅịa, ọkụma oḅori apụma ḅụgerere anị inia tọrụ sọḅịaye-ẹ.