Kaḅo Ma 26 - Kịrịkẹnị Baịbụl

¹ Ijiriji ịrụakpoin sịkịḅụ koro mị, anịkanịka ene ye soku sịkịḅụ koro mị anị osi se yenemikaḅọ ḅe pịrị ọkụ simemẹ.

² Worinime ine yese ị́ mịẹ ẹkẹ, ị́ mịẹye oforika simeogbo. Sotọrụ fin ma ḅọrọ àrị fenima ngịsị chịẹka ọkụ anị àrị sime ọkụ-ẹ.

³ Ị́ asụn ḅe fomuḅịa, yepụra asụn ḅe ḅịpị mị ị́ fịnaḅịa, anịsịkị ị́ pịkị yenemikaḅọ ḅe fomuḅịa.

⁴ Yenemikaḅọ ḅe gbela nemika ḅẹrẹ mị ị́ nwọ pẹkẹrẹmẹ ḅẹḅẹ, ye mị gbelaḅọ ḅe sime ọkụ anị ị́rị́sọ ị́ sime ọkụ-ẹ.

⁵ Yeḅụoforika ḅara nwọse yenemikaḅọ ḅe pẹkẹrẹ, anị ofori ò yenemi ḅara se ọ̀ ḅụ kịẹnmaḅịa.

⁶ Ị́ nemikase oku se yenemikaḅọ ḅe fịrịmamẹ ḅẹḅẹ, ị́ ị́ḅụọma pẹlẹsin aḅẹ, ị́ ḅụfụka ḅi ị́ ḅụ pịrịaḅẹ.

⁷ Ikeliḅọ ḅe ḅụọma yeḅụsọka ọkụ mị anị kaḅo yenemikaḅọ ḅe ḅụ sime ọkụ-ẹ.

⁸ Oḅoriḅọ nwọ tokoni mị sime ḅara anị ḍụparị se akarabọsị ḅụ fịna ọkụ simemẹ.

⁹ Yenemikaḅọ ḅe nemi ọkwẹịn kọn mị sime ḅara anị iruḅu tọrụḅaamaḅọ ḅe ọ̀ ḅara temi ịga sin ọkụ simemẹ.

¹⁰ Fịrị se yenemikaḅọ pịrịḅọ ḅe ọ̀ papa nweni mamgba ḅụosọḅịaye mịẹ-aḅẹ.

¹¹ Maịn karama sịkị se oḅori aye mịẹarị yenemikaḅọ ḅe anị vinpịkị mun ori ọsụn ayema taḅa obiri sime ọkụ ọ̀ nwọ simemẹ.

¹² Yenemikase opuma yenemi ḅara se ọ̀ ḅụ wẹrịḅọ ḅe opu oḅoriḅọ iḅitẹịn oriḅọ ḅe nẹngịmẹ.

¹³ Cheye gose ikula apụma ngịsị inia warị wẹrịsosoka? Cheye ini nwọ ḍikiḅalafa-ao? Chịrịḅa mọnọ?

¹⁴ Ikulaḅọ ḅe oria mọnọye ọgọnọ pekele-pekele koro ọkụ, anị ḅọkọ mị ọlọ ikulele mị anịaḅụ oḅolo sime ọkụ simemẹ.

¹⁵ Tọn apụ opuma ikulamẹ, fịye se inia ḅịpị ḅie chụa ḅụ.

¹⁶ Ikulaḅọ ḅe ọ̀ nwọ chịnḅịa na ori ọbịrịtẹịn sọnọmapụ nẹngịmẹ, anị ine iḅiọkụma inia kuḅie ḅụ ḅẹrẹḍuko se jịn apụ na deinḅịa apụ.

¹⁷ Ị́rị́ na gbolomakaye ḅụ ḅẹrẹ nụnụa mị sime ọkụ, anị nwẹngị ateliogbo mun se obiri ḅe ḅeri nụnụ ọkụ simemẹ.

^18-19 Epele se jụmḅọ ti se ḅo ḅẹ na ọ̀ papa tiaḅẹ nwọḅẹḅọ ḅe sime ọkụ anị nọmụḅọ nweni ḅaaḅaaye se ti ọkụ simemẹ.

²⁰ Fịnị pẹkẹrẹ oforika nyọ, kọrịarị fịnị mị binḅịa; nweni se fie oforika nyọ kamụsọ koro ẹkẹ.

²¹ Mà binsoka anyịmgbọlụ kalaye, anyị ogboku fịnị pakụmaḅịa, fịnị pẹkẹrẹ fịnị kọrịma kọrịmamẹ, ḅụfụka pịrịpịrị apụma sịkịmamgba ini ḅẹrẹ nụnụaḅịa.

²² Nweni se fie mị opuma ḅẹlẹmẹ! Nde wa ḅieḅẹlẹ se anị mịnị ọkụ?

²³ Jokoma ị́ koromarịye ma ḅọị karakaraka ọkwẹịnma sime ọkụ iḅitẹmẹḍikiye se yeḅụoforika aramaḅẹlẹ ọgọnọ gbana ọkụ simemẹ.

²⁴ Epekelepepeḅọ ḅe ò kuḅie ḅụ ọ̀ nyana taraka mị, ọ̀ kọn àrị ḅẹlẹ ọkwẹịn ma ọḅụju anị ḅọịmẹ.

²⁵ Ḅeri ḅie ḅụ àrị ine ḅẹlẹḅịa, ọkụma ò pokima, anịatịḅị ò kuḅie taraka ḅein palịwaraḅẹ.

²⁶ Ori ine ọ̀ nyana taraka mị ḅọịḅịa, ọkụma ọrụḅọḅọ ọ̀ mịẹarị siye mị ọrịḅịa.

²⁷ Ḍẹịntu jịn apụ pịrịarịapụ ma ini mị anị pịkị kunḅịaye-ẹ. Jụmḅọ gose ḍụparị imbibilearị apụma, ini mị anị ḅaakọsịmaḅịaye-ẹ.

²⁸ Ị́ taraka kuḅie nyanaye gose ị́ iruokọn jụmḅọ pụnụmamẹ. Karakaraka ḅẹrẹ ḍuko mị nyanaye jịnyekẹ, yesima sikima ọkụma.