Kaḅo Ma 25 - Kịrịkẹnị Baịbụl

Sọlọmọn Ḅe Oria Kaḅo Ma Ḅụ Jịn-Aye

¹ Mà sọnị Sọlọmọn ḅe oria jịn-a kaḅo-ẹ, Juda Amanyanaḅọ Hẹzekaya ḅe oria tomonima àrị gịẹịn koromamẹ oria ḅẹrẹkọn warịḅie.

² Ḅọịaye ma gose wa osi se Tamụnọ Ḅe pịrịmẹ; wa osi se amanyana apụma pịrịmẹ ini pu finjiaye ma gose.

³ Amanyanaḅọ ḅe koromarịye ị́ nemikẹ; oria koroma ma àrị wa nẹngịmẹ, so mị gele ọkụ ọgọnọju, anịkanịka abaji mị ḅie ḍian ma gbun ọkụ simemẹ.

⁴ Seleḅa mị ḅie sime siaye ma sin, anịsịkị aka kọnḅọ ḅe ori anị se iḅiye tẹmẹ pakụmaḅoḅịa.

⁵ Sitetema se amanyanaḅọ ḅe pịrịapụ ma, ọ̀ ḅụ ini sikima, anịsịkị nweni oria sẹkẹnịogbo mị anịa karakara nwọ nemiḅịa.

⁶ Amanyanaḅọ ḅe tọrọkọ ị́ ḅụ ḍiepakụmama na ị́rị́ opuma yelaḅọ-ẹ.

⁷ Mun gele ịkasịye mị ọgọnọ sime ini nwọse ị́ ḅe mị iḅitẹịn, ini ị́ ḅe na koro se ị́ya kiri mị se jịn kele ị́ nẹngịḅọ pịrị mị nẹngịmẹ.

⁸ Ị́ ọrịye mị gose be mangị ḅẹrẹkọn warị mun ma. Ọḅụkọ jịn onyechịẹḅọ ị́ mịẹye mị iḅika ọkụ nwọ ḍuko ọkụma nde ị́ mịẹḅịa ọkụ anịsịkị?

⁹ Ị́ nemikase ị́rị́na-kpekima angaḅọ na ịgbanịaye nyanamẹ ḅẹḅẹ, ómine mama apụma ogboku ómine anị tẹlịma, pịkị gbọrị ḅọịye sọ ḍukopakụmama.

¹⁰ Anịkaọkụma tomoni goyegoye naaḅịa na ómine ineda ḅọịye ḅọị ẹkẹ, ọkọsime ḅụgerere mị anị kuluma nyana ẹkẹ.

¹¹ Iḅiọkụma koroma se kọn se nweni na dein ọkwẹịn mị sime ọkụ anị iḅi goli okpokpo se seleḅa ogboku chụa ọkụ simemẹ.

¹² Yenemiḅọ kọn se yeḍawọ ḍọkịarịḅọ pịrị ḅeri nụnụ ọkwẹịn mị anị yelatẹịn goli goli ḅarachụaye, anịkanịka goli se tẹmẹ pụkọchụaye nẹngịmẹ.

¹³ Kuḅie se ḅụgbana gbẹịn fịrịnwẹngịḅọ ḅe ori ịnyọ se fịrị se ọ̀ fịrịmaḅọ ḅe pịrịmẹ, anị ene ọfịrị sịkị fịaye soku sịkị ḅụ ḅo oḅoku mengi sime ọkụ simemẹ.

¹⁴ Yeḅereni nweni pịrị se ḅarị ngịsị ḅereniye mị mịẹkapụ ma koro ẹka ene soḅuno na fọrụ na chụa ọkụ simemẹ.

¹⁵ Ye inema se kuḅiekụrọma ọkwẹịn kọn mị ine kụrọtẹịn yeḅerenika mị nẹngịmaḅịa; anị pịkị ine ḅẹrẹtọn apụma ḅụ okoroḅịa.

¹⁶ Ị́ ḅụnẹngịma ḅẹịn nwọ taḅama, anị ine ị́ mịẹse ị́ ọsụnḅịa.

¹⁷ Ị́rị́na-kpekima angaḅọ ḅe sịkịmamgba oria warị nwọ mun ma; ori ị́ ḍikisima pịkị taraka se ị́ wẹrịmaḅịa.

¹⁸ Tomoniḅọ mịẹkaye se nụḅọ pụnụma mị, anị nweni ḅaaḅaa okola-agiji, nweni ḅaa imgbele, anịkanịka opuma nwẹngị lubu ḍẹịn ọkụ simemẹ.

¹⁹ Ḅụfụka sịkịḅụ, ḅụ se kuḅie se ḅụgbana gbẹịnkaḅọ ḅe ḅụ sẹrẹrẹ mị sime ọkụ anị jikejike aka se yetokuru anịkanịka ikeliḅụọ se nwẹngị ọkụ simemẹ.

²⁰ Nime chu opuma ngịrịarịḅọ pịrị mị sime ọkụ, anị ene oḅoku sịkị tomoniḅọ oju ḅụchụaye sin ọkụ simemẹ, anịkanịka fụn se yelaye ọmbị ọkụ simemẹ.

²¹ Ḅuru nemikase ị́rị́na-tarakaḅọ ḅe tarịmẹ ḅẹḅẹ, fịye se ọ̀ pịrị, mengi nemikase ọ̀ tarịmẹ ḅẹḅẹ, mengi se ọ̀ pịrị se ò ḅu.

²² Ị́ mịẹse opu ḅụgerere ọ̀ tọrụ sọḅịa, anịsịkị Nyanaḅọ Ḅe ori anịa gbẹịnye se ị́ pịrịḅịa.

²³ Jụmḅọ se fie mị ḍikiḅụnwọnwọ se ḅoḅomẹ, ọgọnọ fọrụ gbarịmaka ḅaraḅụ ene se ḅo ọkụ simemẹ.

²⁴ Warị ochu ọgọnọ anga mị iḅitẹịn sịkịmamgba ọkwẹịn se nweni gọlịarị eremeniḅọ na gbọrị warị ḅie anga mị nẹngịmẹ.

²⁵ Oḅoku mengi pụkọ deinma ọkụ anị ḅọlọju ḅo iḅi okuḅịpị oju mị na deinkoro ọkụ-ẹ.

²⁶ Karakaraye mịẹarịḅọ ḅịkị sitịḅịnyanaḅọ ḅe pịrị mị anị ideriarị okputuku mengi anịkanịka tiḅe ḅie nweni ḅu se fịḅịa mengi ọkụ simemẹ.

²⁷ Opuma ḅẹịn taḅa mị oju mị na kuraka ọkụ anị tomoni opuma ị́ tokoni mị sọnị iḅika ọkụ-ẹ.

²⁸ Ị́ ineda ị́ya owoi kuḅie mị ọlọkẹ ḅẹḅẹ anị ini onu se kelekelema, se onu ma kansara sa ịnyọ ḅụ oforika opuama sime ọkụ anị ị́ sime ọkụ-ẹ, owu se ị́ paka mị sarasaramẹ.