Kaḅo Ma 22 - Kịrịkẹnị Baịbụl

¹ Iḅi ẹrẹ na ḅaka ngọ na ogboku, iḅi ẹrẹ mị nwọ sẹlẹọkị, pịkị iḅi mị mịẹmịẹye iḅitẹịn seleḅa na goli na nẹngịmẹ.

² Igbiki nyanaḅọ ḅe na igweinḅọ ḅe na gbọrị ḅara ini nwọ simemẹ, Nyanaḅọ Ḅe inimgba tẹmẹmẹ.

³ Koroma nyana apụma ḅẹrẹ ḅoaḅẹ ini nwọ ọrị ọkụma ini anị ḍiki ḅụ tọntọnmẹ, ọkụma yekoromakaḅọ ḅe ọ̀ nwẹngị anịa ḅie sọḅịa se à nwọ nemi-ọkụma nwọ ḅẹḅịa.

⁴ Nyanaḅọ Ḅe ḅịpị poki na, ḅụ iderima na, ḅe gbẹịnye anị ngọ na, osi na, pịkị ḍumo ḅọlọsịkị la na-ẹ.

⁵ Ị́ya ḍumo mị ị́ nwọ ḅẹlẹmamẹ ḅẹḅẹ, ateli ḅie sitịḅịnyana apụ kunkun ḍẹịn mị ḅie ị́ ḅụ sikima.

⁶ Kalatọkụ se wẹrị ḍumo kọnḅịa ḅara nwọse ò ḍie, ori anị se ḅie koroma gbasoḅịa oria ḍumo ene mamgba ḅụ.

⁷ Igwein apụma ini ma ngọ kọnḅọ ḅe oria omoniapụ-ẹ. Igbiki ḅọlọḅọ ḅe igbiki se ọ̀ ḅọlọḅọ omoniḅọ-ẹ.

⁸ Ị́ nemikase karakaraka chịnmgbọlụ ḍipimẹ ḅẹḅẹ, ḅịpịogbosọka mị sopakaḅịaye-ẹ, anịsịkị ị́ya jịn apụ inuma mị anị kulumaḅịa.

⁹ Ḅara pakụma jịn apụ pịrị, pịkị ị́ya fịye se igwein apụ na ḍia, ḅẹlẹma ḅo ị́ pịrịḅịa anị gose.

¹⁰ Nweni dairimaḅọ ḅe de sin, anịsịkị ịgbanịaye na, kamụ na, anịkanịka nime wori na ḅarị sime ẹkẹ.

¹¹ Ị́ nemikase fịafịa kuḅiemgbọlụ na dein ọkwẹịn ḅẹlẹmamẹ ḅẹḅẹ, amanyanaḅọ ḅe ori ị́ya ikiaḅọ sọḅịa.

¹² Nyanaḅọ Ḅe ḍọkịḅo ọrịmẹ na karakaraye mị chịẹ mẹ anịsịkị iruo ọkwẹịn ma se papaye mịẹmẹ.

¹³ Ikulaḅọ ḅe warị ḅie anị ò simesimeye-ẹ; ọ̀ nwọ ḅẹmẹ na chịrịḅa ò kunḅịa ọ̀ pakaḅo ọkụma.

¹⁴ Sẹfị mị ḍẹịnye—Nyanaḅọ Ḅe oria ịganị sime pịrị apụma anị anị kunkunye-ẹ.

¹⁵ Kala awọmẹnịma yenemikaye mịẹ mị na yeseyechịnka na inia ḅie ḅụ omi-ẹ, ọkụma iḅi fomuḅara ini ḍumo-kọn-gbẹịn-ọkụ se ini ḍieḅịa.

¹⁶ Ị́ nemikase ḍiepịrịaye se ḍie ngọ nyana apụ pịrịmẹ, anịkanịka igwein apụma pụnụmamẹ ḅẹḅẹ, ị́rị́ sọnị ị́ ḅo igweinḅịa.

Soi Nemi Ḍuko Aye ma

¹⁷ Poki, yenemi apụ ḍukoye à nwọ se ị́ ḍieḅịa. Ini ḍiearịaye ma ḍawọ,

¹⁸ anị ị́ ḅieḅẹlẹmaḅịa ị́ nemikase àrị se ḅiekoroma; pịkị àrị ḍukopakụmaḅịa ọkụma.

¹⁹ À ḅimẹ ị́ kuḅie-se-Nyanaḅọ Ḅe ḅụgbana; anị à gose mịọkụ àrị ḍuko ị́ pịrị-ẹmun-arịye-ẹ.

²⁰ Soi-a ḍukoaye à nwọ gịẹịn koroma ị́ pịrịsam. Àrị nemi na iḅi tetema na nwọ nyanamẹ,

²¹ se àrị karakaraye mị se ị́ ḍieḅịa. Anịsịkị ini ị́ fịrịma se ị́ mun anị ḍọkịḅịa sịkị; karakara pẹkẹrẹ ḅịpị ị́ nwọ ọkịḅoḅịa.

-1-

²² Igweinḅọ ḅe ò inuma ma, ọkọsime kụrọ ị́ nwọ nyanamẹ gose; ḅẹrẹkọn nyọ ḅụ ḅarachụa pịrịḅọ oforika apụma ini inuma ma.

²³ Nyanaḅọ Ḅe ò gbela ini pịrịḅịa, ọ̀ pịkị ḅụfụka se ḅụfụka se inia ḍumo pịrịarị apụma pịrịḅịa.

-2-

²⁴ Owoi, pịkị ye sima tẹmẹ nyana apụma, ini na ikiasọ ma.

²⁵ Ị́ inia ḍumo ma ḍawọ so, ị́ ḅarị ine anịaḅụ ḅarasin ẹkẹ.

-3-

²⁶ Jụmḅọ fị sa nwọ ḅereni ọkị ma na ị́ gbẹịnḅịa-ẹ.

²⁷ Ị́ya mọnọye mị ini kụrọḅara se dekiọkịḅịa ị́ ḅarị ine gbẹịnka ọkụma.

-4-

²⁸ Ngịsị ị́ya ḅieju-aḍapụma se olomu sịkị ḅụ chụa koroma eke ma sin ma.

-5-

²⁹ Tomoniḅọ nemikase oria fịrị se yechịn mẹ ḅẹḅẹ, ọ̀ tọrọkọ mun ḅịa; ori amanyanaḅọ tọrọkọ chịẹḅịa, ò yeḅụoforika apụ tọrọkọ chịẹ-ẹkẹ.