Kaḅo Ma 21 - Kịrịkẹnị Baịbụl

¹ Nyanaḅọ Ḅe ọ̀ ḅẹrẹtọn amanyanaḅọ ḅe kuḅiemgbọlụ pịrịpịrịmẹ, anị sime ḅara anị, ideri mengi damunḅịa anga ọ̀ nwọ tọn anị pịrịpịrị ḅara mị.

² Ị́ ine koromaḅịa na ị́ mịẹarịye mamgba iḅimẹ, ọkụma se ḅiekoroma na Nyanaḅọ Ḅe, ọ̀ ḅẹrẹkọn ị́ mịẹaye goyegoye pịrịḅịa.

³ Karakaraye na iḅiaye na nwọ mịẹ, anị mị Nyanaḅọ Ḅe ḅụḅẹlẹtẹịn agbamịẹ ọ̀ pịrị mị nẹngịmẹ.

⁴ Sitịḅịnyana apụma inia opuaye mịẹ na inia ḅụdekichịẹma na anị ḅẹrẹtọn ini pịrịarịye-ẹ, anịsịkị mịn mị siye-ẹ.

⁵ Tọrụkweinma yenemi ḅara se yetọn, se ị́ ḅakaye nyanaḅịa; ị́ nemikase sịkị ọkịka se bebe yemịẹmịẹmẹ ḅẹḅẹ, ị́ ḅaka aye nyana ẹkẹ.

⁶ Karakaraka ḅọkọ ḅụ ị́ nyanaḅo ngọma àrị ḅọlọka sịkị ḅụ faḅịa anịsịkị mị àrị ị́ suma mun fị mị anịa lokuḅie chuḅịaye-ẹ.

⁷ Sitịḅịnyana apụma, inia kụrọkụrọkụrọ ḅara se yemịẹmịẹ mị anị ini famaḅịaye-ẹ, karakaraye mị ini mịẹ ḍụkụkẹ.

⁸ Ḅẹrẹ ḅara si apụma, kpụlụkụ kpụlụkụ ateli anị ini nwẹngị nwẹngịye-ẹ, ḅẹrẹ nemikapụ ma karakaraye anị ini mịẹmịẹye-ẹ.

⁹ Warị ochu ọgọnọ ḅụ anga mị iḅitẹịn kamụ ḍọkịḍọkị eremeniḅọ na gbọrị warị ḅie anga mị nẹngịmẹ.

¹⁰ Sitịḅịnyana apụma, siye mịẹ mị, sịkịmamgba ini tarịtarịmẹ; ini ḍikitịḅịfoin nyana gbọrịḅọ sọnị pịrịpịrịkẹ.

¹¹ Opuma ḅụdekichịẹma-chịẹmaḅọ ḅe fomuḅara da sịkị, koroma kọnkọnka ḅọ ḅe ò yeḍawọḅịa. Yenemiḅọ ḅe ini se ò telimaye mị ḅụ ò yeḍawọ ọkịḅịa.

¹² Karakaraye mịẹmịẹ Tamụnọ Ḅe, sitịḅịnyana apụma inia warịma ḅie mịẹarịaye ma ò nemimẹ. Ọ̀ pịkị sitịḅịnyana apụma ọkịḅo faḅie chuḅịa.

¹³ Igweinḅọ ḅe ọ̀ kọn àrị owu mị ị́ poki ḍụkụkẹ ḅẹḅẹ, ị́ya ḅarachụa pịrị owu mị sọ ini naa ẹkẹ.

¹⁴ Tomoniḅọ ḅẹrẹḅuosọ nyana ị́ pịrịmẹ ḅẹḅẹ, ḅọịma yese nụḅọ pịrị mị anị nụḅọ kuḅie deinmaḅịa.

¹⁵ Karakara ḅẹrẹ mị kọn sịkị, karakaraye mịẹ apụma inia ḅieḅẹlẹmẹ, ọkụma siapụma anị inia ḅụḅalaḅalama-ḅalaḅalamamẹ.

¹⁶ Fị mị anị sime iḅikoroma kọn ḅụ ḅụsikimaḅọ goyegoye nwọ koruaḅẹ.

¹⁷ Ḅụse-tọrụḅẹlẹ ḅụ chu na, iru na, igbiki la fịaye fị na ngịsị ḅereni ẹkẹ ị́ ngọ nyana.

¹⁸ Sitịḅịnyana apụma tọn se karakaraye mịẹ apụma wẹrịma wẹrịma ḅụfụka ma anịḅo inia ọgọnọ gbana-gbanaye-ẹ.

¹⁹ Tomoniḅọ onwun ele mị ḅie anga mị iḅitẹịn kamụ ḍọkị pịkị sịkịmamgba ọkwẹịn ḍin eremeniḅọ na anga mị nẹngịmẹ.

²⁰ Yenemi apụma ngọ nyana ḅe tọrụḅẹlẹ ḅụ ini anga waraḅẹ, ọkụma oḅori apụma ini inia igbiki ma nwọ nyana àrị ọkụ anị ini pịkị be sarasarama àrị fama àrị ọkụ-ẹ.

²¹ Iḅi se nweni mịẹ, pịkị karakaraye mị mịẹ; se ị́ ḍumo ḅọlọ sịkị laḅịa, jịn apụ osi se ị́ pịrị pịkị iḅiọkụma ị́rị́ na deinma angaḅịa.

²² Yenemi ọmụtịḅịdaḅọ ḅe ori ineda kụrọ owuni koruarị opuama nwọ ọkịḅịa, ọ̀ pịkị ini se kuḅie kụrọma ama mị kelema onu ma kan sinḅịa.

²³ Ị́ ḅụfụka ḅie sọ ḍọkịkẹ ḅẹḅẹ, ị́ kọn àrị ọkwẹịn ma ḅụ ị́ ḅụ ọbị.

²⁴ Ḅụdekichịẹma opuayemịẹḅọ ḅe, ori anị pịkị ḅụ boma se jịn apụ ḍikisimaḅọ-ẹ; ọ̀ pịkị pakapaka ḍọkịmẹ.

²⁵ Fịrịnwẹngị ḍụkụka ikulaḅọ ḅe, ori ọ̀ ḅụ ḅaa aḅẹ.

²⁶ Ọ̀ mịẹarịye anị ọ̀ nyanaḅịaye ḅe koroma anị ọ̀ kọn arịye-ẹ, ọkụma karakaraye mịẹmịẹḅọ ḅe ori ine yese ḍie nweni pịrịḅịa kuḅie lokoloko ḅara ḅụ.

²⁷ Nyanaḅọ Ḅe sitịḅịnyana apụma inia ḍiepịrịaye agba se ọ̀ pịrị mị anị ò ḅieḅẹlẹmakẹ, anịtẹịn anga, ini sitẹmẹ ḅụ wẹrị anị pịrịmẹ ḅẹḅẹ.

²⁸ Iruo kọnḅọ ḅe ò ḍuko ayema àrị ḅereniḅịa ọkụ ofori-ẹ, ọkụma yese koroma ḅụ chuchuḅọ ḅe oria ọkwẹịn ma ini àrị ọkịmẹ.

²⁹ Karakaraye mịẹ apụma ini inia ḅụ kaịnḅomẹ; sitịḅịnyana apụma ini simeka iḅi ḅara ini ḅụkụrọma nwọ ḍiepakụma-pakụmamẹ.

³⁰ Tomoniḅọ yenemi, iḅiọkụma ọbịrị, nemi, na yekaịnḅo na nyana ḅarachụa ofori-ẹ, Nyanaḅọ Ḅe ị́rị́ na tụḅụrụ ọkụma.

³¹ Ị́ ine owuni asụn karakaramaḅịa se owusọḅịa gose, ọkụma Nyanaḅọ Ḅe kẹngẹ anị ọmụḅaraiḅi mị pịrịpịrịye-ẹ.