Kaḅo Ma 2 - Kịrịkẹnị Baịbụl

Nemi Mị Anị Gbẹịnye Nyanamẹ

¹ Ị̀ya owutọkụ, à se ị́ ḍieaye ma ḍawọ pịkịna à ḍuko ị́ pịrị na mịẹ nwọḅẹ ayema se ḅieḅaramama.

² Nemi nwọ poki, pịkịna ḅụkụrọma anị kaịnḅo.

³ Iin, yekaịnḅo nwọ ọmgbọ, yeḅụokoro mị nwọ ḅi.

⁴ Iḅiọkụma kụrọma anị ḍọkị, seleḅa na ini ḅọị ngọ na ḍọkị ḅara nwọse anịḍọkị.

⁵ Ị́ nemikase ọkọ mịẹ ọkụma, Nyanaḅọ Ḅe ḍikiḅalafa mị fiearịye ị́ nwọ nemiḅịa, pịkị Tamụnọ Ḅe gbolomaye ḍawọ ḅụ ị́ tọrọkọ munḅịa.

⁶ Nyanaḅọ Ḅe, anị nemi pịrịpịrịye-ẹ, ọ̀ ḅụ anị yekaịnḅo na nemi na pakaḅoḅoye-ẹ.

⁷ Ọ̀ ḅarachụa na, ḅọị nyọ na nwọ nyana karakaraye mịẹapụ na, karakarapụ na pịrịpịrịmẹ.

⁸ Iḅi ḅara se jịn apụ na anga-angapụ ma ori ini ḅọịḅọịmẹ, ọ̀ pịkịna mịna ḍumo mgba se ọ̀ pịrịapụ ma tọrụse iniaḅụ wẹrịwẹrịmẹ.

⁹ Ị́ ḅọrọnemikase ị̀ poki ọkụma, ị́ karakaraye na mịẹgbẹịnye na pịkị iḅiaye na nemiḅịa. Anịsịkị ị́ mịẹḅịaye ị́ nemiḅịa.

¹⁰ Ị́ ḅo yenemiḅọ sọḅịa, ị́ya yekaịnḅo mị anị ḅieḅẹlẹ se ị́ pịrịḅịa.

¹¹ Ị́ya gbun yenemi mị na yekaịnḅo mị na àrị ị́ kpaḅịa se àrị

¹² ḅereni ị́ pịrị ẹkẹ ị́ kurakaye mị mị-ẹ. Àrị ị́ mịẹḅịa, ọkwẹịn se ḅẹrẹ deki ḅoḅo apụma ḅie ị́ sọ ẹkẹ,

¹³ anị karakara ḍumo kọn ḅụ ḅarasin se mun kanakana siaye mịẹ ḍumo ḅie angapụma,

¹⁴ kurakaye mịẹ ḅụ ḅieḅẹlẹ nyanarị apụma pịkịna nemi oforika simịẹaye ḅụ ḅieḅẹlẹarị apụma,

¹⁵ ngịsị kuḅie-se-ḅụgbanaḅịa ọkụ ofori si-a tomonima.

¹⁶ Ị́ ineda ḅịpịḅẹlẹ ḅụ ị́ da mun mịẹgbẹịnkaye mịẹ ḍọkịarị sẹfị eremeniḅọ na tụḅụrụḅịa,

¹⁷ anị deḅọ na mịnaḅụ na ḅarị kuḅie se ḅụgbanaka, pịkị á fị fịafịa ọḅọkụ mị se ḅieḅaramasa eremeniḅọ ma.

¹⁸ Ị́ nemikase árịa warị mun mẹ ḅẹḅẹ, ị́ nwẹngị fị ateli da aḅẹ. Anịanga mun mị anị nwẹngị fịsapụ tomonikiri dama mun-ẹ.

¹⁹ Mun á lase pịkịmaḅo sa ḅọ ofori-ẹ, nụḅọ ḅarị pịkịmaḅo ḍumo ateli mị ḅie sọ ẹkẹ.

²⁰ Anịẹrẹchị iḅiapụ ma nwẹngịarị ateli mị ḍuko nwẹngị se karakara ḍumo kọn.

²¹ Karakaraye mịẹapụ—mịnaḅụ se yechịn apụ—anị mịna ama mị ḅie angaḅịaye-ẹ.

²² Ọkụma Tamụnọ Ḅe ḅụnemikaḅara ḅụ ori ọ̀ ḅarama ịsụn se sitịḅịnyanapụma kun sinḅịa ama mị ḅie, ò siye mịẹapụ ma burasinḅịa kiri ḅie chịn burasin ọkụ.