Kaḅo Ma 18 - Kịrịkẹnị Baịbụl

¹ Jịn apụ na nwẹngịgboloma gbolomaka apụma, iniaḅụ kẹngẹ anị ini ḅẹlẹma ḅẹlẹmaye-ẹ; nweni mamgba nemimẹ na karakaraye-ẹ nwọḅẹye mị ini na tụḅụrụḅịa.

² Oḅoriḅọ ḅe ò yekaịnḅo na ò yekaịnḅoka na ọ̀ nwọ abalabalakẹ; ori sịkịmamgba mịẹ ḍọkịarịye anị oria nemi mị ḍiepakụma-ẹ.

³ Si mị na ḅụgerere mị na nwẹngịgboloma gbolomamẹ. Ị́ya osi mị wokuma, anịakiri ḅụ ḍikisima anị ị́ nyanaḅịaye-ẹ.

⁴ Tomoniḅọ ọkwẹịn ineda yenemi se nweni ḍieḅịa, abaji mị gbun ọkụ anị pịkị ideri mengi ịwọ ọkụ ịwọmẹ.

⁵ Anị karakarakẹ siyemịẹḅọ ḅe ḅụ ḅarasin anịsịkị siyemịẹkaḅọ ḅe si ḅẹrẹkọn ọ̀ pịrịḅụ.

⁶ Yenemikaḅọ ḅe ò ḅẹrẹnụnụa sakịsa ḅẹḅẹ, anị ò fomuye da ḅi aḅẹ.

⁷ Yenemikaḅọ ḅe ori ọkwẹịn sịkị, ori ọ̀ ḅụ famaḅẹ; oria ọkwẹịnma àrị ḍẹịnsọ ọ̀ pịrị se ò kunḅịa.

⁸ Nweni se fie mị opuma ḅẹlẹmẹ—anị mịnị-pụkọ-ḅie-ḅọrọma mị opuma ḅẹlẹmẹ!

⁹ Ikulaḅọ ḅe, yesimasimaḅọ ḅe si ọkụ anị ò si ọkụ-ẹ.

¹⁰ Nyanaḅọ Ḅe ẹrẹ mị, anị kụrọtịḅị-kikima sokopi warị-ẹ, karakaraye mịẹ apụma ini ineda anịa chuku mun se ḍụaḅọrọma nyanaḅịa.

¹¹ Ini nama gelema opuama kelema onu, opuama mị ḍụaḅịa ḅara, anị ngọ kọn apụ ini chịnchịn ọkụ-ẹ na inia ngọma àrị ineda gele, ọkọse ini ḍụaḅịa.

¹² Osi nyana gbọrịḅọ sọ ofori-ẹ, ọ̀ ḅụiderimaka simeogbo, opuaye mịẹ apụma ini mun fa ateli ḅie sọ-ẹmun-aḅẹ.

¹³ Tatarị poki tẹrẹrẹ ị́ ye pẹkẹrẹ, ị́ nemikase ọkọmịẹkẹ ḅẹḅẹ anị ị́ oḅoriḅọ sọaḅẹ, ị́ pịkị nweni wọlọaḅẹ.

¹⁴ Ị́ nyana na ị́ ḍumoḅịa nwọḅẹ kuḅiekụrọ mị ineda ị́ya ḍumo mị ḍụaḅịa, ị́ obi sịkịḅụ ọkụma ị́ nemikase anị famamẹ ḅẹḅẹ, anị ị́ya kuluma ḅiekpọ mị sọ fasam.

¹⁵ Yenemi apụma sịkịmamgba ini ḅụkarakaramamẹ yeḍawọ ḅụ.

¹⁶ Ị́ opuḅọ na ịrịa ḍọkị-ao? Ḍiepịrịaye se ḍie ọ̀ pịrị, ị́ sarasarama ori na ịrịaḅịa.

¹⁷ Tatarị ḅẹrẹkọn warị ḅie ọkwẹịnḅọ ḅe oria ọkwẹịn ma karakaraye ọkụ simeḅịa, ọkịmun orina ḅẹrẹ mịẹarịḅọ ḅe ye se ò gbelaka simeogbo.

¹⁸ Nemikase mama opu-kụrọ-apụ ḅẹrẹkọn warị ḅie ye jineaḅẹ ḅẹḅẹ, ịkịan wakị mị ineda inia ḅẹrẹ pẹlẹḅịaye-ẹ.

¹⁹ Ḅarachụa ị́ mbire ḅe pịrị, ori ị́ ḅọịḅịa, kụrọ onu opuama ḅọị ḅara, ọkụma ị́ orina kamụ sọmẹ nwọ ḅẹḅẹ, oria ḅọkọ ma ọ̀ palị ị́ pịrịḅịa.

²⁰ Ị́ ḍukoye ḅụ, pakaḅoye goyegoye, ị́ pụraḅịa.

²¹ Ị́ ḍukoye ine ḍumo ḍụaḅịa, anịkanịka anị anị famaḅịa; anịẹrẹchị ị́ kọn ọkwẹịn ḅụ pakaḅoye goyegoye ọkị.

²² Ị́ simeḅịa eremeniḅọ ị́ nwọ ọrịmẹ ḅẹḅẹ, ị́ iḅiye ḍọkịḅomẹ, anị ḍiepakụmamẹ na Nyanaḅọ Ḅe ori ị́ ḅẹlẹmamẹ.

²³ Igweinḅọ ḅe ori ọkwẹịnḅịa sịkị, ori ọ̀ ḅụ iderimaḅịa, ọkụma ngọ kọnḅọ ḅe ò ḅo pẹkẹrẹḅịa sịkị, ò nweni ọrịkaye nwọ mịẹḅịa.

²⁴ Tọn-a ikia ḅọlọsịkị lalakẹ, ọkụma tọn-a ikia àrị iḅitẹịn mịna nẹngịmẹ.