Kaḅo Ma 16 - Kịrịkẹnị Baịbụl

¹ Wa ine wa yemịẹḅịa ọkụ ḍukoḅịa, ọkụma Tamụnọ Ḅe anị kuluma ọkwẹịn mị nyanaye-ẹ.

² Ị́ ine koromaḅịa na ị́ mịẹarịye goyegoye karakaraye-ẹ, ọkụma Nyanaḅọ Ḅe ọ̀ ḅẹrẹkọn ị́ tọn se mịẹḅịaye ma pịrịḅịa.

³ Nyanaḅọ Ḅe ḅara ḅi na ori ị́ tọn àrịye ma ḅẹlẹma, anịsịkị mị ị́ tọn àrịye ma ị́ sarasarama nwọ deki nwẹngịḅịaye-ẹ.

⁴ Nyanaḅọ Ḅe ọ̀ mịẹye goyegoye, ọ̀ tọn anị pịrịye omi-ẹ; sime sitịḅịnyana apụma pịrịye anị fịfa-ẹ.

⁵ Nyanaḅọ Ḅe, ḅụdekichịẹmaḅọ goyegoye, ọ̀ ḅụḅẹlẹḅẹlẹkẹ, ò ḅereni ini pịrị ẹkẹ, ini fomuḅara daka ḅaraḅụ pọkọso.

⁶ Ḅịpịpoki, pịkị kuḅie-se-ḅụgbana iḅi ḍumo kọn, anịsịkị Tamụnọ Ḅe ị́ya sima ḅụ ọ̀ ḅarasin ị́ pịrịḅịa. Nyanaḅọ Ḅe ḅịpịpoki, anịsịkị gbọrị siye sọnị ị́ dapaka ẹkẹ.

⁷ Nyanaḅọ Ḅe ḅụḅẹlẹ ḅara ị́ nwọse ḍumo kọn ọkụma ị́ ineda mịẹḅịa ị́rị́ na taraka apụma ḅo ị́ya ikiapụ nwọ sọ.

⁸ Karakara ḅọkọ ḅụ kalaye nyana mị iḅitẹịn angara na furu na ḅie nyana ḅo ḅakaye ma nẹngịmẹ.

⁹ Ị́ ineda ị́ mịẹ ḅiye nwọ tọnḅịa, ọkụma Nyanaḅọ Ḅe anị ị́ tọn se ị́ mịẹḅịaye ma datekeremaḅịaye-ẹ.

¹⁰ Amanyanaḅọ ḅe, Tamụnọ kụrọ ḅụ mị ọ̀ kụrọma ọkwẹịn arịye-ẹ; anịẹrẹchị ọ̀ tọnpẹlẹsaye mamgba karakaraye-ẹ.

¹¹ Nyanaḅọ Ḅe, ò ḅimẹ na ini se yetọn dẹrịdẹrịaye mamgba àrị karakaraye ḅụ sime, dẹrịaye ma sọnị pịkị iḅi ḅịpị ḅụ ini àrị dẹrị.

¹² Amanyanaḅọ apụma ini ineda tọrụ se simịẹmịẹaye ọrị ẹkẹ; anịatịḅị karakaraye mịẹ mị anị sẹkẹnị ama mị mịẹkụrọma arịye-ẹ.

¹³ Amanyanaḅọ ḅe karakaraye anị ọ̀ naa ḍọkịarịye-ẹ, anị ḍukoarị apụma ori ini ḍiki ḅieḅẹlẹḅịa.

¹⁴ Yenemiḅọ ḅe ọ̀ ḅiḅịa ori amanyanaḅọ ḅe ḅieḅẹlẹmaye nwọ mị-ẹ; amanyanaḅọ ḅe ò nemikase ịganịsa ḅẹḅẹ tomoniḅọ fịḅịa.

¹⁵ Amanyanaḅọ ḅe oria ḅẹlẹma anị fọngụ sịkịḅụ soḅuno ene se ḅo ọkụ simemẹ—anịnyọ ḍumo omi-ẹ.

¹⁶ Nemi na, yekaịnḅo na, nwọ nyana mị anị iḅitẹịn—opuma iḅitẹịn goli na seleḅa na nẹngịmẹ.

¹⁷ Karakaraye mịẹ apụma ini siye sime ateli kọkọrọ nwẹngị-nwẹngịmẹ, anịẹrẹchị ị́ nwẹngịarị ateli mị ḍiki, anị ineda ị́ ḍumo ḍụaḅịa.

¹⁸ Opuaye mịẹ mị anị fịfa nwọ deki ḅoḅomẹ, ḅụdekichịẹma mị anị nweni ḅịkịma-ḅịkịmamẹ.

¹⁹ Ḅụiderima se igwein apụma na gbọrịḅara sime mị iḅitẹịn ḅụdekichịẹma apụma ḅụ gbọrịḅọ sọ se ini na ini furuḅo ayema ḍiaọkị mị nẹngịmẹ.

²⁰ Ḅeritokoloma ini se ị́ ḍiearịaye ma poki, ye pịkị ị́rị́ na iḅiḅịa; kuḅie se Nyanaḅọ Ḅe ḅụgbana ị́ ḅieḅẹlẹ nyanaḅịa.

²¹ Yenemi, pịkị kpaịnḅọ ḅe, oria yekaịnḅo mị ḅụ ini wẹrị ò nemiḅịa, ọ̀ kọn àrị ḅẹlẹ ọkwẹịn ma gose ini pịkị ò ḅerenitẹịnḅịa.

²² Nemi mị anị yenemiḅọ ḅe oria ḍumo iderimengi-ẹ, ọkụma ye se nemi nyanaka apụma telima mị anị sịkị fama-ẹ.

²³ Yenemi apụma ini tarị koromaso tẹrẹrẹ ini ọkwẹịn-ọkwẹịnmẹ, anịsịkị ini ḍukoḅịaye ma tomoni nwọ ḅerenitẹịn-tẹịnmẹ.

²⁴ Iḅi ọkwẹịn mị, ḅẹịn ḅẹlẹ ọkụ ḅẹlẹmẹ, anị pịkị oju na deinkoromẹ.

²⁵ Ị́ koroma na mị karakara ateli-ẹ nwọḅẹye mị anị ini damun fị ḅie chuḅịa.

²⁶ Fịrịnwẹngịḅọ ḅe ọ̀ pụkọ mgbọlụ mịẹsosịkị ọ̀ kụrọma fịrịnwẹngịḅịa, anịatịḅị ò ḅiḅịa ò ye fị ọ̀ ḅụlọ ḍụḅama.

²⁷ Si-a tomonima sịkịmamgba ini ye se jịn apụ mịẹḅịa ọkụ nwọ ḍọkịḍọkịmẹ, inia ḅịpị ḅie pakaḅoarị ọkwẹịn ma sọnị ḅụọyịmamẹ.

²⁸ Nweni se fie mị sitịḅịnyana apụma anị anị se nwẹngị ma ḅọrọḅọrọye-ẹ, ini ḅịpịogbosọka se ikiapụ ḅie chu ikia kankanmẹ.

²⁹ Yesimasima apụma ini oḅori se inia ikiapụ ma chịnchịnmẹ, pịkị ini se mun ḅụfụka ḅie chuchumẹ.

³⁰ Ḍẹrị ị́ darị apụma na pịkị tọrụse ị́ kin àrị apụma ḅụ ị́ ḅụ ọbị, ini sikoroma kọn ị́ pịrịsam.

³¹ Nangwọ ḍumo anị karakaraye mịẹ apụma inia gbẹịnye-ẹ; iḅulu mị anị boma nyana amanyanaḅọ chu-ẹ.

³² Inema nyana mị iḅitẹịn kụrọye mịẹ mị nẹngịmẹ. Ḅẹrẹtọn ị́ ḅụ pịrị mị iḅitẹịn, ị́ ḅẹrẹtọn opuamama pịrị mị nẹngịmẹ.

³³ Tomoni ịkịan-wakị-wakịmẹ se Tamụnọ Ḅe ọ̀ tọn ayema nwọ ḍawọ nemiḅịa ẹrẹchị, ọkụma Tamụnọ Ḅe na mịnaḅụ na anị pẹkẹrẹ ḅịpị mị nemiye-ẹ.