Kaḅo Ma 14 - Kịrịkẹnị Baịbụl

¹ Eremeni yenemi anị warị ọlọarịye-ẹ, ọkụma yenemika mịẹmịẹaye àrị kankanmẹ.

² Karakaraye mị ḅụ chịẹ mị ḍukopakụmamẹ na ị́ osi nyana Nyanaḅọ Ḅe pịrịmẹ; si mịẹmịẹaye mịẹ mị ḍukopakụmamẹ na ị́ osi nyana ọ̀ pịrịkẹ.

³ Yenemikaḅọ ḅe ḅie sime opuaye mịẹ mị ọ̀ mịẹse ori opuma ọkwẹịnmẹ; yenemiḅọ ḅe oria ọkwẹịn ma àrị ọ̀ ḅọịmẹ.

⁴ Ozu soku ikulele fọnọ nwẹngịarị nambulo oforika mị mịẹso ọkụma ị́ya fịaye koko warị mị ḅie gbọrịye sọnị ofori-ẹ, àrị nemikase sime ọkụma anịa ḅie fịaye ḅeinḅịa.

⁵ Kuḅie se ḅụgbana gbẹịn iḅi onyechịẹḅọ ḅe sịkịmamgba karakaraye mị anị ò ḍukoḅịaye-ẹ; ọkụma kuḅie se ḅụgbana gbẹịnkaḅọ ḅe iruoaye sikima ò ḍukoḅịaye ofori-ẹ.

⁶ Opuma mịnaḅụ se yechịn apụ ngịsị ineda ḅo yenemi apụ sọ ẹkẹ, ọkụma yekaịnḅoḅo apụma ḅụ yeḍawọ mị sarasaramẹ.

⁷ Yenemika apụma ḅie ị́ ḅụ sin, ini nyana se ị́ telimaḅịaye ofori-ẹ.

⁸ Cheye gose tọrụkirilaḅọ ḅe ò yenemi? Anịatịḅị ọ̀ mịẹḅịaye ọ̀ nwọ nemimẹ. Cheye gose oḅoriḅọ ḅe ò yenemika? Anịatịḅị ọ̀ papa koromamẹ na ò yenemimẹ.

⁹ Yenemika apụma ini ye-abalabalakẹ ini siye mịẹ sịkị; ọkụma karakaraye mịẹ apụma ini ḅimẹ ini si ḅụ ḅarasin ini pịrị.

¹⁰ Ị́ya ḅieḅẹlẹ mị ị́yaye-ẹ, ị́ya ḅụakụ mị sọ ị́yaye-ẹ. Ị́rị́ na ineda anị ḍiaḅịaḅọ ofori-ẹ.

¹¹ Karakaraye mịẹḅọ ḅe oria warị mị pa chịẹḅịa, siye mịẹḅọ ḅe warị mị kan so sọ.

¹² Ị́ se iḅi ateli chịn ateli mị anị ineda ị́ da mun fị ḅie chuḅịa.

¹³ Ḍẹrị ine kururu ḅọịḅịa; ọkụma ḅieḅẹlẹ fasa ḅẹḅẹ ngịrị pa omi-ẹ.

¹⁴ Siapụ ma inia si mịẹmịẹaye ma ḅe gbẹịnye inia ḅaralaḅịa. Iḅi apụma inia iḅi mịẹmịẹaye ma ḅe gbẹịnye inia ḅaralaḅịa.

¹⁵ Yenemikaḅọ ḅe ori ọrịye-ọrịye nwọ ḅereniḅịa, ọkụma yenemi apụma ini inia ḅụọma ọbị nwẹngị-nwẹngịmẹ.

¹⁶ Koroma nyana apụma ḅụfụka ḅie ini inia ḅụ tẹrẹ sinsinmẹ, ọkụma yenemika apụma ye-abalaka ḅụ ini giririma iniaye ma mịẹmịẹmẹ.

¹⁷ Owoi tẹmẹ nyana apụma ini yenemika aye nwọ mịẹmịẹmẹ, yenemi apụma ini yawụma simesimemẹ.

¹⁸ Yenemika apụma inia yenemika mị ḅe gbẹịnye ini nwọ nyanaḅịa, ọkụma nemi nyana apụma inia gbẹịnye anị nemi-ẹ.

¹⁹ Siye mịẹ apụma ini tịḅịtu karakaraye mịẹ apụma pịrịḅịa, se ḅụ iderima inia ḅara ye ḅi ḅịa.

²⁰ Igweinḅọ ḅe ọ̀ ḅẹlẹmaḅọ ofori-ẹ, oria mịnaḅọ sọnị, ọkụma igbiki nyana apụma ini ḅaka ikiapụ nwọ nyana-nyanamẹ.

²¹ Ị́ ḅieḅẹlẹ ḅimẹ ḅẹḅẹ iḅi se igwein apụ nwọ mịẹ; nweni ḍikisima mị siye-ẹ.

²² Jịn apụ kuḅie se ị́ ḅụgbanaḅịa, ini pịkị ị́ osiḅịa, ị́ nemikase iḅi gose fịrịnwẹngị nwẹngịmẹ ḅẹḅẹ, ị́ nemikase si fịrịnwẹngị nwẹngịmẹ ḅẹḅẹ anị ị́ yemịẹ irimaḅẹ.

²³ Fịrịnwẹngị nwẹngị ị́ pịkị fịfịye nyanaḅịa; ị́ nemikase kpọnjị sime ọkwẹịnma ḅọrọaḅẹ ḅẹḅẹ ị́ igweinḅịa.

²⁴ Yenemi apụma ngọ anị inia gbẹịnye-ẹ; ọkụma yenemika apụma ini ini nemiḅịa inia yenemika mị ḅụ.

²⁵ Karakaraye ḍuko onyechịẹḅọ ḅe ò ḍumo ḍụaḍụamẹ; ori iruo onyechịẹmẹ ḅẹḅẹ ori ịbafịḅọ-ẹ.

²⁶ Osi se Nyanaḅọ Ḅe pịrị mị anị kụrọ kuḅie na ḅọị nyọ na sọ tomoniḅọ ḅe na oria furo mị na pịrịḅịa.

²⁷ Ị́ fị ḅụ sikima ḅi? Osi se Nyanaḅọ Ḅe pịrị mị anị ḍumo pịrị mengi-ẹ.

²⁸ Amanyanaḅọ ḅe oria opu mị ori ḅẹrẹtọn pịrịarị apụma ḅaka la ọkụ ḅụ anị omi-ẹ; ini ma oforika ọkụma ọ̀ ḅarị yeḅụ ofori-ẹ.

²⁹ Ị́ inema se yawụma simemẹ ḅẹḅẹ ị́rị́ yenemiḅọ-ẹ; ọkụma ị́ owoi tẹmẹ nyanamẹ ḅẹḅẹ anị ị́ya yenemika mị ị́ nwọ ḍukopakụmaḅẹ.

³⁰ Dein kuḅiemgbọlụ mị anị mịẹse oju mị anị kpụrụkpụrụmẹ, ọkụma yesọlị mị tomoniḅọ oju ḅie ḅọị obi ọkụ simemẹ.

³¹ Igwein apụma inuma mị anị ini tẹmẹ Tamụnọ Ḅe wọlọ-ẹ; ọkụma ḅarachụa ini pịrị mị anị osi se Tamụnọ Ḅe pịrị-ẹ.

³² Sitịḅịnyana apụma ini ngẹrị anị inia ḅịkịkoro mị dekiḅo inia ḅụ pịrịpịrịye-ẹ, inia si-a mịẹaye ma ḅụ, ọkụma iḅi mịẹ apụma ini inia iḅi a mịẹaye ḅụ ḅọị nyọ nyanamẹ.

³³ Nemi mị koroma nyana apụma inia ḅie anị omi-ẹ, yenemika apụma nemi mị ḅụ ini nemiye ofori-ẹ.

³⁴ Karakaraye mịẹ mị anị sẹ se opu sẹ mịẹmẹ; ọkụma si mịẹmịẹye mị anị ḅụgereremaye sọ sẹ goyegoye nwọ pịrịmẹ.

³⁵ Fịrịtịḅịnị ma ḅụ iḅi fịrịnwẹngị nwẹngị apụma, amanyanaḅọ ḅe inia mịẹmịẹaye ọ̀ ḅụḅẹlẹḅẹlẹmẹ; ọkụma ò ḅiye mịẹka apụma ini fomuḅara dadamẹ.