Kaḅo Ma 13 - Kịrịkẹnị Baịbụl

¹ Yenemi tọkụ ḅe, ḍaḅọ ḅe ọ̀ datekeremarị sịkị ò ḅeri tokoloma ò pokiḅịa, ḅụdekichịẹmaḅọ ḅe ngịsị oria mịẹirima mị ori anị ḅereni ẹkẹ.

² Iḅi apụma ini ḍukoye ḅụ ini gbẹịnye nyanaḅịa ọkụma nwenidairima apụma yesima anị sịkịmamgba ini tarịarịye-ẹ.

³ Ị́ ḅụ ọbị ị́ kọn àrị ọkwẹịn ḅụ se ị́ ḍumo koko. Yeseyechịnka ḅara se ọkwẹịnḅọ ḅe ori ò ḍumo famaḅịa.

⁴ Ikulaḅọ ḅe ò ye nyana ḍọkị ọkụ goyegoye ori anị nyana ẹkẹ. Kụrọma fịrịnwẹngịarịḅọ ḅe ọ̀ nyana ḅiarịye goyegoye ọ̀ nyanaḅịa.

⁵ Karakaraye mịẹ apụma ini iruo ḅẹlẹmakẹ, ọkụma sitịḅịnyana apụma inia ọkwẹịn ma àrị ḅụgereremamẹ pịkị ḅụsimamẹ.

⁶ Karakaraye mịẹ mị anị ḅẹrẹ nemikaḅọ ḅe ḅọịmẹ; ọkụma sitịḅịnyana mị anị siyemịẹapụ ma inia ḅịkị-ẹ.

⁷ Tọn apụ alakọn ḅara se inia ḅụ wẹrịmẹ, ọkụma gbọrịye sọnị ini nyanakẹ. Ọkụma jịn apụ igwein ḅara se inia ḅụ wẹrịmẹ, ọkụma ini ḅakama ngọ nyanamẹ.

⁸ Igbikinyanaḅọ ḅe oria igbiki ọ̀ nwọse ò ḍumo ḍụapakụmaḅoḅịa, ọkụma igweinḅọ ḅe ọ̀ ḅalafamaḅọ ofori-ẹ.

⁹ Karakaraye mịẹ apụma ganịnịma ḅịarị tọnjie sime ọkụ anị ini sime ọkụ-ẹ, ọkụma sitịḅịnyanapụma bin àrị tọnjie sime ọkụ anị ini sime ọkụ-ẹ.

¹⁰ Ḅụse opuaye mịẹ mị mịẹmịẹ jịnye ofori-ẹ, ọkụma ḅụfụka-ẹ. Tetema ḍọkị mị nemi nyanatẹịnmẹ.

¹¹ Ị́ nwọ sarasarama ị́ya ngọma nyana ọkụ, anị ị́ sịkịfamaka ḅaraḅụ àrị famaḅịa ọkụ-ẹ. Anị nyana mị nwọ ḅụfụkama ọkụ, anị ị́ nyanatẹịnḅịa ọkụ-ẹ.

¹² Ị́ kuḅie tọnye mị ḅarị kiri ọkịka sịkị, ị́ kuḅie kansam, ọkụma ị́ ḅiye mị ị́ ḅaralasa ḅẹḅẹ ḅieḅẹlẹ ḅakaḅịa.

¹³ Ị́ nemikase ḅereni iḅi tetema pịrịkẹ ḅẹḅẹ, ị́ ḅụfụka ḍọkị aḅẹ, anị ḍukonwẹngị anịsịkị ị́ ḍụaḅọrọma nyanaḅịa.

¹⁴ Yenemiḅọ ḅe ò telimarị ayema anị ḍumo mengi-ẹ; àrị ḅarachụa ị́ pịrịḅịa ị́ ḅụfụka ḅie pọkọsoḅịa.

¹⁵ Yenemi mị anị osi chịn ḅoḅomẹ, ọkụma kuḅie se ḅụgbana gbẹịnka apụma fa ateli mị ḅie ini omi-ẹ.

¹⁶ Koroma nyana apụma sịkịmamgba ini koromaso anị ini ye mịẹmịẹye-ẹ, ọkụma oḅori apụma ini inia yenemika mị se dẹrị kanakanamẹ.

¹⁷ Kuḅie se ḅụgbana gbẹịnka fịrịnwẹngịapụma, ini ḅụfụka pịrịpịrịmẹ, ọkụma kuḅie se ḅụgbana gbẹịn apụma ini deinma se ḅoḅomẹ.

¹⁸ Yeḍawọ ḍụkụkaḅọ nụḅọ igwein pịkị ḅụgerere ḅụ sọḅịa, ọkụma datekerema pokiḅọ goyegoye ini nụḅọ osiḅịa.

¹⁹ Nde anị iḅiọkụ ị́ ḍọkịarịye nwọ nyanaḅo mị! Yenemikapụ ma simịẹmịẹye ḅụ ḅarasin mị ini ḍụkụḍụkụkẹ.

²⁰ Yenemi apụ na nwẹngị ị́ yenemiḅịa. Ị́ nemikase yenemikapụ na ikiasọmẹ ḅẹḅẹ, ị́ ḅụfụka ḅie sọḅịa.

²¹ Ḅụfụka simịẹ apụma ḍuko aḅẹ nyọ mamgba ḅụ, ọkụma karakaraye mịẹ apụma ini iḅi gbẹịnye nyanaḅịa.

²² Iḅi ḅọ ḅe ori ngọ kọn koroma oria awọma awọma pịrịḅịa, ọkụma simịẹ apụma inia ngọma karakaraye mịẹ apụma àrị ọkịḅịa.

²³ Ḅara ma laka piri ma àrị ḅaka fịaye pakụma igwein apụma pịrịḅịa, ọkụma si apụ ḅereni ẹkẹ tomoni anịa ḅie yeḍipi.

²⁴ Ị́ nemikase fomuḅara se ị́ya tọkụ ḅe pịrịpịrịka ọkụma anị ị́ ọ̀ ḅẹlẹmakẹ, ị́ ọ̀ ḅẹlẹmamẹ nwọ ḅe ọkụma, ị́ ọ̀ datekeremaḅịa.

²⁵ Karakaraye mịẹ apụma ini ḅakama fịaye nyana fịaḅẹ, ọkụma sitịḅịnyana apụma sịkịmamgba fịaye ini tarị aḅẹ.